Proveb 18:5 - Buka Blahi Ka Cheke Holo

⁵ Theome doglo te phile balugna mae ihei te huhughuni vetula na. Eghuteuna theome doglo te theome toghoni ihei te theome huhughuni vetula na te mala lus ka fate na.

Proveb 18:5 Iomraidhean Croise

Thoutonu Eigna Mae Job 34:19

Mana theome phile baludi mae mala baubatu, eghuteuna mana theome fanomho ka mae te dedei nei mae te kuma, naugna mana ngala teke vuavuhadi mare te gnafa na.

Nodi Khoje Hatimare Mae Jiu 82:2

Aonu mana na cheke eghu ka mare, “Ghotilo thosei fatedi naiknore kau nafnata puhi te theome doglo, nei ghotilo thosei ke phile ka naikno te diꞌa puhidi are.

Eksodas 23:2

“Kate tei ka fate na, ghotilo chekeni koba ngala unha te tutuani na, neuba naikno kmana ne kafe phile ka unha te diꞌa na, ghotilo kegra maku ngala ka unha te tutuani na.

Eksodas 23:3

Kate kilo ghami mare te mala toutonu eigna kaisei mae te kuma ka fate na, ghotilo thosei ne mae kuma mana eghu toghoni mae te kuma igne.

Eksodas 23:6

“Jame kaisei mae te kuma tei ka fate eigna kaisei puhi, ghotilo thosei leghuni puhigna fate na mala faparini mana.

Proveb 17:15

Jame mae mala fate snakre fajiflani mae te diꞌa na, ba parani mae te keli na. Lord na tirognadi phei puhi igre.

Proveb 17:26

Theome doglo te parani ihei te theo nakhibogna na. Eghuteuna theome keli te purini mae te keli na.

Proveb 24:23

Igre langau keha nodi famane cheke mae ihei te au tagna gaoghatho te keli na. Mae mala fate na mala theome mala phile balugna ihei nga ka kot.

Proveb 28:21

Theome doglo mae mala fate na te phile ka keha na, eghuteuna faparini keha na teu ka fate na. Nu kakatha vido gano kolho te mala famaemaheni mae fate igne.

Proveb 31:5

Glahu koꞌu mare theome ghathoni vetula na, eghuteuna mare ginauna na theome tangomana te toghodi naikno te kumare.

Profet Isaia 5:23

Kate fatedi ghotilo naiknore, ghotilo lisa teidi kolho iheire te edi puhi te diꞌa re, naugna mare ne foli ghami ghotilo te mala eni nafnata puhi igne. Nu ghotilo atha tei ka sosolo naikno te doglore.

Profet Isaia 59:14

Puhi te doglo te mala fatedi naiknore, nei unha te keli teu igre theome tangomana te mei namo ka ghehati na. Naikno na theome tangomana te nomhini kaisei cheke te tutuani, nu puhi te chaichaghi igne ngala te au ka foflogna naikno na.

Levitikas 19:15

“Kate fateni ghotilo kherami na ka kot, ghotilo fateni mana ka puhi te doglo. Jame kaisei mae kuma tei ka kot, ghotilo thosei kaisei phile fara ka mana naugna te kuma mana na. Eghuteuna jame mae dedei tei ka kot, ghotilo theome ghatho tahuni fara mana naugna mana mae dedei. Ghotilo fatedi phia mare kaisei nanaba kolho.

Profet Maeka 3:9

Ghotilo mae mala baubatu ka naiknodi Israel, fanomho mei ka nogu cheke iara igre! Ghotilo tiromi ni puhi te doglo te mala fate naikno na. Eghuteuna ghotilo ke tughu kolho puhi te doglo igne ka puhi te diꞌa.

Profet Maeka 7:3

Naiknore kafe laseni fara te mala edi glepo te diꞌa re. Mae biꞌore loku fodu mala edi gaoghatho te diꞌa. Leuleghu fata na mae mala baubatu nei mae mala fate teu igre mare famaemahedi naiknore mala chaghidi keha naiknore ka sileni. Mae biꞌo igre huhurudi naiknore mala edi kolho unha te magnahaghedi thedi re.

Matiu 22:16

Mare kurudi keha nodi mae fanomho thedire, nei keha mae ka tothoghei te kiloi Herodias. Aonu mae igre mei ne cheke eghu ka mana, “Mae velepuhi, ghehati lase nigho iagho kaisei mae doglo fara. Ghehati lase nigho iagho kaisei mae te farirhiu unha te tutuani eigna puhigna God. Iagho theome mhaghudi unha te cheke eimu iagho naiknore. Naikno te kmanare kaisei nanaba ngala ka iagho.

Diutronomi 16:19

Mare mala theome leghuni puhi te theome doglo na. Mare theome mala phile baludi keha mae kolho. Mare theome mala snakreni ihei mala famaemaheni kaisei naikno mala hata sileni ka mana, naugna puhi te famaemahe igre tangomana te fadofuni mae mala fate neuba mana ne mae glalase, eghuteuna mae mala fate ginauna theome cheke fadoglo ka kot.