Nehemaea 7:2 - Buka Blahi Ka Cheke Holo

² Eghuteuna iara vahini mae thabusigu Hanani, balugna mae Hananaea mae ihei te komanda ka vido te keli te mala poru ka namono igne, mala fiofiloni phiamare namono Jerusalem. Iara vahini mae Hananaea gne naugna naiknore tangomana te ronuni mana na, eghuteuna mana jaola thofno ghatho tahuni God, salaꞌudi keha kmana naiknore.

Nehemaea 7:2 Iomraidhean Croise

Jenesis 42:18

Ka fatilo narane na mae Josep ne cheke eghu ka mare, “Iara kaisei mae mala mhaghuni God. Jame te leghudi ghotilo nogu cheke iara igre na, ghotilo ginauna na theome lehe.

Fapea Samuel 23:3

Noda God tahati maeda Israel, mana neke cheke. Nodi Thina rheta mae Israel, mana neke cheke eghu ka iara, ‘King igne mana funei frunidi naiknore ka puhi te doglo, nei ka puhi te ghatho tahuni God,

Ululahu Kings 18:12

Iara theome laseni aheva Tharunga gna Lord nate hata nigho te tei kate jifla koko nigho iara na. Jame te tei cheke iara ka King Ehab, eghuteuna theome filo nigho mana teuna, mana ginauna falehe ghau iara. Neuba, iara ghatho tahuni nei pogho soruni eghu koba Lord funu suagu.

Ululahu Kings 18:3

King Ehab ne kiloni mae Obadaea mala tei filoni mana. Mae Obadaea gne kaisei mae biꞌo te loku ka sugagna king. Eghuteuna mana mae mala tarai nei ghatho tahuni Lord.

Nehemaea 1:2

Mae Hanani kaisei mae thabusigu iara baludi keha naiknodi Juda mare mei ne posa ka namono igne. Iara neke ghusna ka mare eidi naiknodi Juda teke au faleghu teku ka narane teke mei mae naoka gre teke hata teke tei naiknore Babilonia ra. Eghuteuna iara jaola ne ghusna eigna namono Jerusalem.

Nehemaea 10:23

nei mae Hosea, nei mae Hananaea, nei mae Hasub,

Nehemaea 13:13

Iara vahidi Pris Selemaea ghe mae Sadok mae velepuhigna nogna Vetula God, nei kaisei mae Livaet, nanghagna na mae Pedaea mala fiofilodi chogho igre. Eghuteuna iara vahini mae Hanan thugna mae Sakua, gragna mae Matanaea mala toghodi mare. Iara vahidi mae igre, naugna mare tangomana te eni puhi te doglo na. Nodi gloku mare na mala tufa fakeli glepo blahi igre ka kheradi re.

Nehemaea 2:8

Iara jaola toreni king mala rioriso kaisei letas ka mae Asaf, mae ihei te mala fiofilodi gaju ka nogna namhata king re, mala alha thaba mala ke horo fakeli grengathagna vido mala toetoegna nogna Sugablahi God, baludi grengathagna namono igne, eghuteuna mala jaola eni kaisei suga mala au iara. King ne famei ka iara gobigna lepo teke toredi iara re, naugna God na au balugu iara.

Nehemaea 5:15

Mae iheire teke gavana ke ulugu iara Juda igre neke paradi fara naiknore. Leuleghu fata na mare hata gano nei waen eghu ka naiknore, eghuteuna mare jaola hata vido kilo silva ka naiknore. Eghuteuna nodi mae gloku mae gavana gre jaola faparidi naiknore. Nu iara theome magnahaghei te eni igne, naugna iara ghatho tahuni God, eghuteuna iara magnahaghei te leghuni mana.

Nehemaea 7:3

Eghuteuna iara ne cheke eghu ka phiamare, “Grengatha te gnafa Jerusalem igre hamerane na thosei tothora ghilei aublatha. Eghuteuna kate gnafa loku fei grafi na mae greireghi gre mala bobotho grengathare, eghuteuna bibilakhi famaku ka aean te brahu ame jifla nga eghu. Ghopa vavahi keha mae te au ka namono Jerusalem mala reireghi, kehare ginauna kegra ka keha vido te ulu fara, eghuteuna kehare mala kegra ke uludi nodi suga thedire.”

Thoutonu Eigna Mae Job 1:1

Kaisei mae nanghagna na Job, mana au ka kantri te kiloi Us. Mana kaisei mae te keli nei doglo eghu. Mana ghatho tahuni God nei theome magnahaghei te eni kaisei glepo te diꞌa.

Nodi Khoje Hatimare Mae Jiu 101:6

Nu iheire ngala te ghatho brana nigho re nate au balugu iara re. Eghuteuna iheire te doglo puhidire, ginauna loku ranghi ghau iara.

Eksodas 18:21

Jaola, iagho vavahi keha famane mae funei te lalase mae iheire te ghatho tahuni God nei mae iheire te tutuani nodi cheke re nei mae iheire te theome tusu lao sileni ka naiknore te mala eni u puhi te diꞌa na eghu. Mae igre keha mala batuni kaisei thogha naikno, keha mala batuni kaisei gobi, keha mala batuni glima fului nei keha mala batuni nabothoi eghu.

Profet Daniel 6:4

Keha phei mae funei igre, baludi mae minista te gnafa igre ne fariu riu hirodi keha najafra ka nogna gloku mae Daniel re. Nu mare theome tangomana te filoni kaisei najafra ka nogna gloku mana igre. Naugna nogna gloku manare thofno keli fara. Mana theome tangomana te chaghi na, ba te eni kaisei najafra na.

Naba 12:7

Nu iara theome eghu ka mae Moses mae ihei te kaisei nogu mae gloku iara na. Mana kolho mae lidadi nogu naikno iara re.

Matiu 24:45

Te mala laseni mae fanomhore gaoghathogna cheke naba igne, mae Jisas ne cheke eghu ka mare, “Ba, mae ihei si mae gloku te keli tagna mae funei na ia? Mae gloku te lalase fara te leghuni fabrahu teu nogna cheke mae funei na. Igne ngala mae teke vavahi nogna mae funei na te mala reireghidi keha mae glokure kate tei mae funei na. Mae gloku igne ginauna tangomana te tufa nanaba ganore ka keha mae glokure ka thofno narane te mala ghamu mare na.

Matiu 25:21

“Aonu, mae funei na ne cheke eghu ka nogna mae gloku na, ‘Ghema, iagho kaisei mae gloku keli fara! Eghuteuna iagho ghathodi koba unha te chekedire. Eghume, naugna te ghatho branani iagho nou gloku na ka sileni ikoi teke tusu ari iara ia, gognarona iara na tusu ari kmana glepo ke biꞌodi igrei ka iagho mala reireghidi iagho. Aonu iagho mei mala gleale'a balugu iara.’

Ululahu Korin 4:2

Tutuani, mae gloku na mala eni gloku te keli ranghini nogna funei na.

Fapea Timoti 2:2

Iagho ke toutonu ranghidi mae iheire te rouronudi iagho ra eigna u farirhiu te nomhidi iagho igre teke edi iara ka naikno te kmanare. Eghuteuna mae igre ginauna jaola tangomana te mala farirhiudi keha naiknore.