Nehemaea 1:6 - Buka Blahi Ka Cheke Holo

⁶ Lord, filo mei ka iara eghuteuna fanomho mei ka nogu cheke iara nou mae gloku gne. Ka narane nei bongi teu igre iara tarai fabrahu ka iagho malami ghehati nou mae gloku iagho agne Israel. Ghehati naiknomi Israel gre theome gnafa te tapla jafra ranghi nigho iagho na. Iara nei vikegu iara teu igre, ghehati te gnafa na kafe tapla jafra ka nakhibo.

Nehemaea 1:6 Iomraidhean Croise

Ululahu Kings 8:30

Lord, fanomho mei ka nogu tharai iara nou mae gloku gne, eghuteuna filo mei ka vido igne kate tharai nou naikno gre. Neuba iagho ne au kligna fanomho mei ka nomi tharai gre. Kate fanomho na, iagho hata fadeleidi nakhibomi gre.

Ululahu Kings 8:47

Jateula teke au mare ka keha kantri delei ra eghu, glahu te figri gaoghathodi mare te tarai ari ka iagho te mala cheke thakledi puhidi te diꞌa, nei nakhibodi.

Fapea Kronikols 28:10

Eghuteuna gognarona ghotilo magnahaghedi keha naiknodi Jerusalem nei Juda eghu mala nomi naikno sneka ghotilo. Ba, ghotilo gaoghathomi na theome naba te papara eidi nakhibo te edi ghotilo ranghini Lord are?

Fapea Kronikols 29:6

Kmada tahati tifa ra neke huhughuni Lord. Mare neke edi puhi te diꞌa re neke tei kokoni mana. Mare tirodini Sugablahi te au mana tagna na, eghuteuna mare figri tagruni mana.

Fapea Kronikols 6:40

“Nogu God, filo mei fabrahu ka ghehati, eghuteuna fanomho mei ka nomi tharai ghehati te edi ghehati ka vido igne.

Esra 10:1

Pris Esra tuturupuku soru ke kosigna grengathagna nogna Sugablahi God na ne tarai balu diꞌanagnafa ne tanhi neu, eghuteuna mana ne cheke thakledi nakhibodi naiknodi Israel re. Ka narane igne, kmana nalhaꞌu nei gaꞌase, goro sua eghudi Israel gre mei khapru faligohoni mana, eghuteuna naikno igre jaola ne tanhi fara.

Esra 10:11

Gognarona, ghotilo mala cheke thakledi nakhibomire ka Lord, nodi God kuꞌeda tifara. Eghuteuna ghotilo mala leghudi puhi te magnahaghedi mana re. Eghume ghotilo au fadelei ka naikno bongihehe te au ka noda glose tahati gne eghuteuna ghotilo koko gaꞌase bongihehe te tolaghi ghotilo are.”

Nehemaea 1:11

Lord, fanomho ka nogu tharai iara gne nei ka nodi tharai nou naikno gloku iagho te magnahaghei ghatho tahuni nanghamu iagho gre. Togho ghau gognarogne, mala tangomana king te kokhoni ghau iara na, nei mala eni mana unha te toreni iara na eghu.” Ka narane tuare, iara kaisei nogna mae biꞌo king mae ihei te rouronu ghau iara fara, eghuteuna iara thegu kolho te tangomana te reireghidi ghegna waen mana re.

Nodi Khoje Hatimare Mae Jiu 102:17

Mana ginauna nomhidi noda tharai tahati gre, eigna tahati gne theo kaisei namonoda aheva te mala au na.

Nodi Khoje Hatimare Mae Jiu 106:6

Tahati gne au nakhiboda jateula ku'eda tifa ra eghu. Uve, tahati neke leghudi puhi te diꞌare neke edi glepo te diꞌare.

Nodi Khoje Hatimare Mae Jiu 32:5

Nu, Lord, u gaoghathogu na iara magnahaghei te cheke thakledi nakhibogure ka iagho. Eghume, iara neke eni tuana. Ke leghugna te cheke thakledi iara nakhibogure ka iagho na, iara neke theome porudi nakhibogure. Kate cheke thakledi te hui iara re, iagho hata kokodi najafragu nei nakhibogu teu iara re.

Nodi Khoje Hatimare Mae Jiu 34:15

Lord na reireghidi iheire te au doglo eghuteuna fanomho ka nodi tharaire.

Nodi Khoje Hatimare Mae Jiu 55:17

Fei hamerane nei fei naublatha nei fei grafi teuna iara tanhi ka mana eidi puhi te fadiꞌa ghau re. Eghuteuna mana ginauna na nomhidi nogu tharai iara re.

Nodi Khoje Hatimare Mae Jiu 88:1

Lord God, iagho nogu God iara mala togho ghau. Ka narane nei ka bongi teuna, iara diꞌanagnafa nei tanhi fabiꞌo eghu ka iagho mala mei togho ghau.

Profet Isaia 6:5

Aonu iara mhaghu nogu fara ne cheke eghu, “Tore! Iara theome nabagu te karha na, naugna cheke te gnafa te jifla mei ka foflogu iara na igre fodu ka nakhibo, eghuteuna iara au baludi naikno te diꞌa igre! Neuba ngau, iara la filonihi King igne, Lord mae ihei te au nolaghi fateote'o.”

Lamentations 5:7

Kuꞌemi ghehati tifa ra neke tapla jafra ka nakhibo, nu la kafe lehehi eghu, eghuteuna gognarona ghehati papara fara eidi nakhibodi mare igre.

Profet Daniel 9:15

“Lord, iagho nomi God ghehati. Tifa na iagho neke hata fajifla ghami Ijep. Eghuteuna naiknore ghatho tahuni nou nolaghi biꞌo iagho na. Nu funu tifa te ghilei mei posa ka narane gognarogne, ghehati tapla jafra fabrahu ka nakhibo.

Profet Daniel 9:20

Kate tarai na, iara ne cheke thakledi nakhibogu te gnafare, baludi nakhibodi nogu naikno iara Israel. Eghuteuna iara toreni Lord, nogu God mala ke babana fapulo nogna Sugablahi na.

Profet Daniel 9:5

Ghehati naikno diꞌa fara. Ghehati edi puhi te diꞌare ka tathamu iagho na. Ghehati theome leghudi nou vetula nei cheke teu iaghore.

Profet Daniel 9:8

Lord, hatimare mae king, nei hatimare mae funei nei hatimare mae kuꞌemi ghehatira, ghehati te gnafa na kafe edi unha te naba te mala mamajadi re, eghuteuna ghehati tapla jafra ke ulumu iagho.

Luku 18:7

Naiknore tanhi bongi narane ka God mala toghodi. Eghuteuna God ginauna tusu ranghidi fabrahu unha glepo te keli na, eghuteuna mana ginauna na theome phaipalighi te mala toghodire.

Luku 2:37

Eghuteuna ke leghugna te lehe khetogna na, naꞌa ne au kolho nabagna nhanasalei fati finogha. Anna gne theome tei kokoni u nogna Sugablahi God na nu bongi narane na naꞌa au kolho jare mala dangna nei tarai eghu.

Efesus 2:3

Tifa na, tahati te gnafa na neke au jateula mare neku. Tahati neke diꞌa nei leghuni kolho unha te magnahagheni theda na, eigna tahati eni unha thini nei gaoghathoda te magnahagheni. Naugna igne, God nabagna te para ghita jateula keha naikno te theome leghuni mana re eghu.

Ululahu Timoti 5:5

Jame kaisei thau te lehe khetogna na au kolho thegna, eghuteuna theome toghoni thegna teuna, naꞌa na nhaꞌa lao nogna fatutuani te biꞌo na ka God, eghuteuna toreni nogna thotogho God na bongi narane.

Fapea Timoti 1:3

Iara cheke fakelini God, eigna iara loku ranghini mana balu gaoghatho te klino ke ulugna God, jateu teke edi mae kuꞌeda tifa ra eghu. Leuleghu fata kate tarai re iara ghatho nigho fabrahu bongi narane.

Ululahu Jone 1:9

Nu te cheke thakledi tahati ka God nakhibodare, mana ginauna hata fadeleidi. Tahati fatutuani ni God te eni unha te doglo na. Eghume mana ginauna na hata fadelei nakhiboda nei fagae ghita ka thua najafra fateo.

Ululahu Samuel 15:11

“Iare diꞌanagnafagu fara, naugna iara neke vahini mae Sol mala king. Nu gognarona mana la theome leghudi nei nomhidi eghu nogu cheke iara re, eghume iara theome magnahagheni mana teke king na eghu.” Aonu mae Samuel ne faꞌihoni fara ka puhi igne ne tarai ne tarai bongi thongana na.