Matiu 5:5 - Buka Blahi Ka Cheke Holo

⁵ Keli tadi iheire te au faparidi thedi, mare ginauna nake gleꞌau. Naugna mare na au nodi glepo te keli teke kulu nhaꞌa cheke ranghidi.

Matiu 5:5 Iomraidhean Croise

Nodi Khoje Hatimare Mae Jiu 147:6

Mana togho haghedi iheire te au kokhonidi, nu koko sorudi pari iheire te gnognoro.

Nodi Khoje Hatimare Mae Jiu 149:4

Lord na keli tagna fara ka tahati, naugna igne mana ghatho tahu ghita tahati nogna naiknore mala uluni tahati u magra na.

Nodi Khoje Hatimare Mae Jiu 22:26

Naikno te kuma re ginauna ghamu ghedi boho. Eghuteuna naikno te hironi God na, mare ginauna na pala hagheni nanghagna God na. Iara toreni God mala fablahidi fabrahu tifa e tifa!

Nodi Khoje Hatimare Mae Jiu 25:13

Nafnata mae igne ginauna au nogna kmana glepo te keli, eghuteuna thugnare ginauna au fakeli nodi ka nogna vido glose mana na.

Nodi Khoje Hatimare Mae Jiu 25:9

Mana falalase puhi te doglo na ka naikno te nhaꞌa faparidi thedire, nei farirhiudi puhi te magnahaghedi thegna re.

Nodi Khoje Hatimare Mae Jiu 37:11

Nu iheire te lisei faparidi thedire, mare na atha nodi vido glose teke nhaꞌa cheke God ranghidi na. Mare na au fakeli nodi nei na au glealeꞌa nodi eghu.

Nodi Khoje Hatimare Mae Jiu 37:22

Iheire Lord te fablahidire ginauna atha vido glose teke nhaꞌa cheke mana ranghidire. Nu iheire te diꞌatagnadi Lord naugna te leghuni mare puhi te diꞌa na, mana ginau brue fajifladi.

Nodi Khoje Hatimare Mae Jiu 37:29

Mae ihei te doglo ka tathagna God na, mana ginauna na khotogna glose teke tusu ranghini God na, eghuteuna mana ginauna na au fabrahu tagna.

Nodi Khoje Hatimare Mae Jiu 37:34

Fatutuani ka Lord nei leghudi nogna puhi mana re eghu. Te eghu iagho na, mana ginauna fafnakno nigho iagho, eghuteuna iagho na tangomana te khotogna vido glose teke tusu ari mana ka iagho igne. Eghuteuna iagho ginauna na filoni mana nate kuru teini mae te diꞌa na.

Nodi Khoje Hatimare Mae Jiu 37:9

Iheire te fatutuani ni Lord ginauna atha nodi vido glose, nu iheire te diꞌa puhidire Lord ginauna kuru fajifladi.

Nodi Khoje Hatimare Mae Jiu 69:32

Naikno te theome fahaehaghere ginauna filoni igne na keli tadi fara. God ginauna farerheta gaoghathodi iheire te pogho soruni mana re.

Profet Isaia 11:4

nu mana ginauna fatedi naikno te kumare ka puhi te doglo. Mana ginauna famane fanomho fakeli ka fate igne mala ke hata fapulo unha teke nodi mare re. Ka nogna cheke te autagna nolaghi na mana ginauna paradi naiknogna nauthoglu igne. Eghuteuna kate cheke kolho mana na naikno te diꞌa re ginauna lehe.

Profet Isaia 29:19

Eghuteuna naikno te kuma te theome fnakno nanghadire ginauna glealeꞌa fara balu ragi, naugna Lord na nodi God Blahi mae Israel.

Profet Isaia 60:21

Ghotilo te gnafa na ginauna doglo fara ke ulugu iara, eghuteuna ghotilo ginauna khotogna fabrahu kantri igne. Iara neke lilisei ghami ghotilo ka namono igne, jateula gaju teke joꞌu iara ia eghu, eghuteuna naikno te gnafa igre ginauna cheke fakeli ghau iara eidi glepo te keli teke edi iara ra.

Profet Isaia 61:1

Nogna mae gloku Lord na ne cheke eghu, “Tharunga gna Lord na au balugu iara, naugna mana neke vahi ghau iara mala toutonuni u nonomho te keli na ka iheire te kuma. Mana neke kuru ghau iara mala fameomegodi iheire te au diꞌanagnafa. Mana neke kuru ghau iara mala toutonu ka iheire te au ka suga sosolo, nei ka iheire te loku jateula naikno sneka teu te mala snagla.

Profet Sefanaea 2:3

Ghotilo te au ka kantri igne, ghotilo leghuni Lord! Ghotilo naikno te nhaꞌa fapari ghami themi ra, eni unha te chekeni mana na. Ghotilo eni unha te doglo na nei au fapari ghami themi. Jame te leghuni ghotilo unha te chekeni iara igne na, jau God ginauna na theome para ghami ghotilo.

Naba 12:3

Uve, mae Moses gne kaisei mae nhaꞌa faparini thegna. Theo kaisei naikno ka nauthoglu gne te tangomana nhaꞌa faparini thegna jateula mana teuna.

Matiu 11:29

Ghotilo mei mala leghuni nogu vetula iara gne, eghuteuna iara ginauna farirhiu ghami ghotilo, naugna iara mae au kmu nei nhaꞌa fapari ghau thegu. Eghuteuna ghotilo ginauna na ludeni vido mala gnafa na.

Matiu 21:5

“Cheke ka naiknodi Jerusalem, ‘Filo si ghotilo nomi King ghotilo na la mei ka ghotilo. Mana nhaꞌa faparini thegna la saghe ka dongki na. Mana saghe ka sua dongki na.’ ”

Letas Teke Riso Tei Mae Pol Ka Khiloau Rom 4:13

God nhaꞌa cheke ka mae Ebraham nei goro thugna na te mei ginau ke leghugna mana, u nauthoglu igne mala nodi mare. Nu God neke eni nhaꞌa cheke igne ka mae Ebraham theome eigna te eni mana unha te chekeni ka nogna vetula mae Moses na. Theo. Naugna mae Ebraham gne neke fatutuani ni God, God ne filo glanini mana jateula kaisei mae te doglo.

Galesia 5:23

amama nei thosei leghuni unha te magnahagheni thini kolho. Theo kaisei vetula te cheke faparidi naikno te edi glepo te keli igre na.

Efesus 4:2

Ghotilo mala edi fabrahu glepo igre: au faleghu, au blagna, nei thosei diꞌatami faghose ka keha naiknore. Eghuteuna kate au nogna puhi fadidiꞌa kaisei naikno ka ghotilo na ranghini kheragna fofodu na, te keli na phiamare thosei magra, nu fari fathaegoi ka puhi namha.

Kolose 3:12

God neke vahi ghami ghotilo te mala nogna naikno blahi mana nei namha ghami fara ghotilo. Eghume ghotilo mala edi fabrahu glepo igre: kokhonidi keha naiknore, taegodi, au faleghu, au blagna, thosei diꞌatami faghose ka keha naiknore.

Ululahu Timoti 6:11

Nu iagho kaisei mae nogna God. Eghume iagho nabamu na au fadelei ka glepo te diꞌa tuare. Iagho fariuriu koba mala edi unha te doglo ke ulugna God. Eghuteuna au fakeli nakarhamu na ka khiloau gne, nei loku famaku ka nou fatutuani na. Au heta ka vido te ninhigrana, biꞌo nou namha na ranghini ihei nei lolokelidi keha naiknore.

Fapea Timoti 2:25

Mana theome mala diꞌatagna kate farirhiudi iheire te theome kaisei gaoghatho ka mana re. Nu mana jame thoghei taegodi ka puhi te doglo, God glahula te tangomana te toghodi naikno tuare mala tughu nagnafa nei lase fakelini u thofno farirhiu te tutuani na.

Taetus 3:2

Farirhiudi mala thosei cheke faparini ihei, nu te keli na au fodu kau pharikeli nei au faleghu, nei famane taegodi keha naiknore eghu.

Jemes 1:21

Eghume, koko nafnata nakhibo nei puhi te diꞌa eghu te edi ghotilo are. Thosei fahaehaghe, nu nhaꞌa fapari ghami themi nei leghuni eghu nogna farirhiu God teke farirhiu ghotilo ia. Naugna farirhiu igne ngala tangomana te fakarhi ghami ghotilo na.

Jemes 3:13

U famane glepo khuakhuda te edi kaisei mae ka ghotilo igre fagaglana gna te kaisei mae glalase tutuani mana na. Eghuteuna kate edi mana glepo te khuakhuda igre, mana na theome tangomana te fahaehagheni thegna na.

Ululahu Pita 3:15

Nu te keli na ghotilo lisa lao ghami themi fabrahu ka mae Kraes nomi Lord. Eghuteuna leuleghu fata na ghotilo tarabana mala cheke tughudi naikno te ghusna ghami eigna unha te fatutuani ni ghotilo mae Kraes na.

Ululahu Pita 3:4

Nu unha te au ke lamna nagnafami ghotilo na tangomana te mala kekheliana fifilogna na. Eghuteuna te kekheliana fifilomi ghotilo na igne theome tangomana teke mala tughu na, naugna mei ka nakarha te au faleghu nei famane muana. Puhi igre thofno kekheliana fifilodire ka tathagna God nei mana ghatho tahudi fara.