Matiu 5:4 - Buka Blahi Ka Cheke Holo

⁴ Keli tadi iheire te au diꞌanagnafa, mare ginauna nake gleꞌau. Naugna God ginauna fameomegodi.

Matiu 5:4 Iomraidhean Croise

Profet Isaia 12:1

Ghotilo nogna naikno God ra! Ka narane tuana, vikeda tahati ra ginauna koje kaisei khoje, khoje igne cheke eghu: “Lord! Iara cheke fakeli nigho! Tifa na, iagho neke diꞌatamu ka iara, nu gognarona diꞌatamu iagho ka iara na la gnafahi, eghuteuna iagho la fakeli nagnafa ghauhi iara.

Profet Isaia 25:8

Lord ginauna bobotho fabrahu u glehe na, eghuteuna mana ginauna nuju koko kholo ka tathadi naikno te gnafare. Eghuteuna mana ginauna hata fadelei mamaja te au ka naiknogna na. Lord thegna ngala teke chekeni igne.

Profet Isaia 30:19

Ghotilo naiknomi Jerusalem! Lord na kokhoni ghami ghotilo. Ghotilo ginauna nake theome tanhi nei diꞌanagnafa eghu. Naugna Lord ginauna nomhi ghami ghotilo ka vido te tanhi ghotilo ka mana te mala togho ghami na.

Profet Isaia 35:10

Uve, iheire teke foli fapulodihi Lord ra ginauna nake pulo mei Jerusalem. Eghuteuna ka narane teke pulo mei mare Saion na, mare ginauna eha fabiꞌo, naugna mare ne glealeꞌa fara. Mare ginauna theome tangomana te diꞌanagnafa nei tanhi teuna, naugna mare glealeꞌa fabrahu kolho ka namono igne.

Profet Isaia 57:18

Iara filodihi puhimi ghotilo te diꞌa tuare, nu neuba, iara ginauna nake fakeli fapulo ghami ghotilo. Iara ginauna na baubatu ghami nei togho ghami eghu ghotilo. Iara ginauna farerheta nagnafami ghotilore, eghuteuna ghotilo iheire te diꞌanagnafa nei tanhi teura ginauna eha nei kilo fnakno ghau iara.

Profet Isaia 66:10

Ghotilo iheire te magnahagheni Jerusalem fara ra, ghotilo eha nei glealeꞌa eghu. Ghotilo iheire te tanhi nei diꞌanagnafa teu eigna namono igne ra, gognarona ghotilo glealeꞌa nomi fara tagna.

Profet Isaia 66:2

Iara thegu teke vuavuhadi maloa ghe nauthoglu igre baludi gobigna lepo te au ke lamnadi. “Nu iara keli tagu fara ka nafnata mae te nhaꞌa faparini thegna igne, ba mae te diꞌa nagnafadi nakhibognare, mana thofno ghatho tahu ghau iara, eghuteuna leghuni nogu cheke iara na.

Profet Esikiel 7:16

Eghuteuna iheire te karha nga teure, ginauna rikha tei holo ka thogele ro, eghuteuna mare ginauna tanhi jateula balhu te tanhi ka gloha ra eghu ka diꞌanagnafa edi nakhibodi re.

Profet Esikiel 9:4

Lord ne cheke eghu ka mana, “Iagho tei tongana ka namono igne, eghuteuna lilisei fagaglana ka greredi iheire te au diꞌanagnafa nei tanhi teu eidi glepo te diꞌa teke edi keha naiknoi ke lamnagna namono igne.”

Profet Sekaraea 12:10

Lord ne cheke eghu, “Iara ginauna edi tharaknagna Devet nei naiknodi Jerusalem mala thofno au gaoghatho te keli, eigna mare tangomana te kokhoni ni keha mae na, eghuteuna mare tangomana te tarai ka iara mala toghodi. Mare ginauna filo mei ka iara, mae ihei mare teke fadini. Eghuteuna mare ginauna diꞌanagnafa nei tanhi eghu ka mana, jateula mae te au kaisei thugna kolho te lehe ra eghu, ba mae te lehe thugna teke kulu karha na.

Luku 16:25

“Mae Ebraham ne cheke eghu ka mana, ‘Thuguo, ke ghathodi sagho kani teke karhamu ra. Iagho neke gleale'a fara nu mae Lasaros neke diꞌanagnafa fara. Nu gognaro na mae Lasaros kela au gleale'a agne, nu gognarona iagho kela au papara.

Luku 6:21

Ghotilo te rofo gognaro ra, ghotilo tangomana te gleale'a na. Naugna ghotilo ginauna nake bohou. Ghotilo te tanhi gognaro ra, ghotilo tangomana te gleale'a na. Naugna ghotilo ginauna nake maꞌeu.

Luku 6:25

Puhi biꞌo ka ghotilo naikno te boho nomi gognaro gre! Naugna ghotilo ginauna nake rofou! Eghuteuna puhi biꞌo ka ghotilo te maꞌe gognaro gre! Naugna ghotilo ginauna nake tanhi biꞌo nei diꞌanagnafa eghu!

Luku 7:38

Naꞌa kegra ke leghugna mae Jisas ne tanhi neu. Naꞌa ne fabobothu ka kholo tathagnare phei ghahegna mae Jisas re. Eghuteuna naꞌa tuturupuku soru ne famomoja ka khaklagna thegna te brahure ne gnangho fabrahu. Jaola naꞌa totofa kholo te sisiri keligna na ke klignadi.

Luku 7:50

Mae Jisas ne cheke eghu ka naikno biꞌo na, “Iagho fatutuani ghau iara. Naugna igne iara ne fakarha nigho ka nakhibo. Jifla tei kau pharikeli.”

Jemes 1:12

Mae ihei te kegra heta nei theome snakreni thegna teu ka fariuriu te mala eni puhi te diꞌa na, mana keli tagna fara. Mana ginauna na hata nogna taba na, karha fei tifa teke kulu nhaꞌa cheke God ranghidi iheire te namhani mana re.

Thakle 21:4

Mana ginauna ghiha koko kholo te gnafa ka tathadire. Jare ginauna theo kaisei naikno tangomana teke lehe na, ba teke diꞌanagnafa na ba teke tanhi na ba teke papara na. Naugna glepo te gnafa tifa re la theohi.”