Luku 5:21 - Buka Blahi Ka Cheke Holo

²¹ Aonu hatimare mae velepuhigna vetula nogna mae Moses, nei hatimare mae Farasi eghu re ne funu cheke eghu kau gaoghathodire, “Mae ihei si mae ignea? Mae igne cheke faparini God signe. Theo kaisei naikno te tangomana te mala hata fadelei nakhibo na, kaisei thegna God ngala!”

Luku 5:21 Iomraidhean Croise

Nodi Khoje Hatimare Mae Jiu 103:3

Mana hata kokodi nakhibogu iara re, eghuteuna fagaota fapulodi khabrugu iara re.

Nodi Khoje Hatimare Mae Jiu 130:4

Nu atha kokodi sagho nakhibomi ghehati gre mala tangomana ghehati te ghatho tahu nigho nei tufru soru nigho teuna.

Nodi Khoje Hatimare Mae Jiu 32:5

Nu, Lord, u gaoghathogu na iara magnahaghei te cheke thakledi nakhibogure ka iagho. Eghume, iara neke eni tuana. Ke leghugna te cheke thakledi iara nakhibogure ka iagho na, iara neke theome porudi nakhibogure. Kate cheke thakledi te hui iara re, iagho hata kokodi najafragu nei nakhibogu teu iara re.

Nodi Khoje Hatimare Mae Jiu 35:5

Kuru meini sagho nou engel na mala ngolhidi mae igre mala jateula chara wit te flalo tafri ka nuri ia eghu mare mala sopagna tei kolho.

Profet Isaia 1:18

Lord neke cheke eghu, “Mei ghotilo mala fadoglini tahati glepo igne! Neuba ne jateula dadara ka pohe vegha ra neu ne ninhigrana fara atha kokodi nakhibomi ghotilore, iara tangomana te togho ghami ghotilo te mala thofno gae fara jateula khakla sipu teu ghotilo na.

Profet Isaia 43:25

“Nu tutuani fara, iara Lord nomi God ghotilo. Eghuteuna iara hata koko nakhibomi ghotilo tuare leghuni puhigu iara na. Eghume iara ginauna nake theome ghathodi nakhibomi ghotilo re.

Profet Isaia 44:22

Eghuteuna iara la hata fadeleihi nakhibomi ghotilo re, jateula khoveo te pala te tei nuri delei ra eghu. Ghotilo ke figri mei ka iara, naugna iara neke fakarhi ghami ghotilo!”

Profet Daniel 9:19

Lord, fanomho sagho ka nomi tharai ghehati gre. Lord, hata fadelei sagho nakhibomi ghehati gre. Lord, fanomho mei ka ghehati sagho mala togho ghami. Faghose sagho, thosei ofo mala laseni naiknore te iagho God na. Kate au fakeli nou namono iagho Jerusalem igne nei ghehati nou naikno iagho gre au fakeli langau teuna, ghehati te gnafa na ginauna ghatho tahuni nanghamu iagho na.”

Profet Daniel 9:9

Neuba ghehati ne theome keli ranghi nigho iagho, iagho kokhoni ghami ghehati fabrahu kolho, nei hata fadelei nakhibomi ghehati re.

Levitikas 24:16

Ihei te cheke goigoni ni nanghagna Lord na mala lehe. Neuba mana ne maegna ka ghotilo ba kaisei mae phosa au balumi ghotilo, nu jame te cheke goigoni ni nangha blahi igne na, ghotilo te gnafa na mala fada faleheni mana ka thina.

Profet Maeka 7:19

Lord, ghehati lase nigho iagho te kokhoni ghami ghehati, eghuteuna iagho ginauna atha fadelei nakhibomi ghehati gre mala koko tei fari hotei nhorora.

Matiu 26:65

Kate nomhini igne, mae pris biꞌo na ne rerheku nogna phoko na, naugna mana diꞌatagna fara. Aonu mana ne eha eghu fabiꞌo, “Tore! Mae igne cheke faparini God! Gognarona tahati theome magnahaghei keha thoutonui eigna mana. Naugna ghotilo nomhinihi themi mana cheke faparini God.

Matiu 9:3

Keha mae ka hatimare mae velepuhigna vetula nogna mae Moses igre, mare ne cheke eghu fari thedi, “Tore, mae igne te chekeni na ne God thegna eghu! Cheke tuana cheke faparini God!”

Luku 3:8

Koko si ghotilo puhimi te diꞌare mala jateula sisi te keli eghu ka nakarhami are fagaglana gna u nakarha majaghani na. Thosei chekeni koba ghotilo ne doglohi ke ulugna God naugna ne vikegna mae Ebraham themi teuna. Naugna te chekeni iara ka ghotilo na, God na tangomana te hohoro vikegna mae Ebraham ka thina te filodi ghotilo igre!

Luku 5:17

Kaisei narane mae Jisas farirhiudi naiknore ka suga na. Eghuteuna keha mae Farasi, nei jaola keha mae velepuhi eghu au neu jare. Mae igre mei funudi ka namono te gnafa ka Provins Galili, nei funudi ka Provins Judia, nei ka namono Jerusalem. God ne tusu lao nolaghi ka mae Jisas mala fakelidi naikno te fogra re.

Luku 5:22

Nu mae Jisas lasedi ngala gaoghathodi mare re ne cheke eghu, “Naugna unha site au mei nafnata ghaoghatho igre ke lamnami ghotilo gnea?

Luku 7:49

Aonu, hatimare mae te gnokro ima teu ka tevo na, ne cheke eghu fari thedi, “Tore, mae ihei si ignea? Tangomana si mana te hata fadeleidi nakhibodi naikno grea?”

Jone 10:33

Hatimare ne cheke eghu ka mana, “Theo, ghehati theome romi fadi thina nigho eidi nou gloku te keli teke edi iagho re. Nu iagho ne chekedi glepo te faparini God re! Ghehati lase nigho iagho kaisei naikno kolho. Eghuteuna iagho ne magnahaghei nigho themu te nanaba ka God neu. Tuana site romi fadi thina nigho ghehati gnea.”

Letas Teke Riso Tei Mae Pol Ka Khiloau Rom 8:33

Eghuteuna ihei gne te tangomana te cheke fapari ghita tahati naikno teke vahi ghitahi God gre? Theo kaisei naikno! Naugna God thegna ngala teke chekeni ne naikno doglo tahati teku na.