Luku 3:1 - Buka Blahi Ka Cheke Holo

¹ Ka fabotho glima finogha gna te King biꞌo mae Taebirias na mae igre neke funei ke parigna mana. Mae Paelat neke funei ka Provins Judia. Mae Herod Antipas neke funei ka Provins Galili. Mae Filip, mae tahigna mae Herod na, neke funei ka phei nohi Ituria ghe Trakonitis. Mae Lisanias neke funei ka Provins Abileni.

Luku 3:1 Iomraidhean Croise

Jenesis 49:10

Naikno nate karha mei ka vikemu iagho re ginauna mala au fabrahu ka sapegna king na. Eghuteuna naikno te gnafa re ginauna leghuni mae funei ka vikemu iagho na.

Matiu 14:1

Ka narane te King Herod Antipas ka Provins Galili, mana nomhidi kmana thoutonu eigna mae Jisas.

Matiu 14:3

Filo si ghotilo, tifa na mae Filip tahigna mae Herod neke tolaghi ka Herodias. Mae Herod magnahagheni Herodias neke tolaghi ka naꞌa. Aonu mae Jone Apublahi ne cheke fabrahu ka mae Herod. Mae Jone neke eni igne ka mana naugna thono blahi fara ka nodi vetula mae Jiu te tolaghi ka khetogna mae tahigna na kate karha nga teu mana na. Herodias ne diꞌatagna fara ka mae Jone, ne magnahaghei koko laoni mae Jone ka suga sosolo. Aonu mae Herod hatani mae Jone ne koko laoni mana ka suga sosolo. Mana magnahaghei te faleheni mae Jone, nu mana mhaghu te faleheni mae Jone na, naugna hatimare mae Jiu laseni mae Jone gne kaisei nogna mae profet God.

Matiu 14:6

Kau narane ghatho fapulo teke karhagna mae Herod, thugna gaꞌase Herodias mei ne ragi ke ulugna mae Herod nei hatimare mae nogna tothoghei nafnaknore kau gaghamu na. Mae Herod ne thofno gleale'a fara ka naꞌa.

Matiu 22:17

Eghume, chekeni ka ghehati unha te ghathoni iagho na. Ba, ghema, keliu ngala te foli takis tahati ka Sisa na? Ba theo?” Sisa gne king biꞌo gna Rom.

Matiu 27:2

Hatimare haru fodu phei khamegna mae Jisas re hata ne tei ka mae Paelat, mae gavana.

Nonomho Te Keli Teke Risoi Mae Mak 6:17

Mae Herod gne ngala teke chekedi mae soldiare teke lokini mae Jone teke haruni mana kau chen teke liliseini mana ke lamna suga sosolo na. Mae Herod neke eni igne mala keli tagna Herodias, khetogna na. Tifa na Herodias gne neke khetogna mae Filip, thabusigna mae Herod nu mae Herod hata Herodias ne tolaghi ka naꞌa.

Nonomho Te Keli Teke Risoi Mae Mak 6:21

Aonu kaisei fata na mae Herod ne eni kaisei gaghamu biꞌo mala ke ghatho fapuloni narane teke karhagna na. Mae Herod ne kilodi hatimare mae biꞌo ka gavman nei hatimare mae biꞌodi armi nei hatimare mae funeidi Galili mala mei kau gaghamu na. Ka narane igne Herodias ne ludeni nogna puhi te mala faleheni mae Jone na.

Luku 13:31

Ka narane tuanala, keha mae Farasi ne mei ka mae Jisas ne cheke eghu ka mana, “Te keli na iagho jifla agne mala tei delei, naugna King Herod Antipas magnahaghei te falehe nigho iagho.”

Luku 2:1

Ka narane tuana, mae Funei Sisa Aghastus gna Rom na ne eni kaisei vetula mala riso nanghadi naikno te gnafa te au ka provins fateo te funei frunidi mana re.

Luku 23:24

Aonu mae Paelat ne kaisei gaoghatho ngala ne leghuni unha teke chekeni naiknore.

Luku 3:19

Jaola mae Jone neke cheke faheaheta fara ka mae King Herod Antipas naugna mae Herod neke tolaghi blau ka Herodias, khetogna mae Filip mae tahigna thegna na. Eghuteuna mae Herod jaola neke edi kmana glepo te diꞌa fara tulao.

Luku 9:7

Ka vido tuana, mae King Herod Antipas ne nomhidi naikno te toutonudi gobigna lepo te edi mae Jisas re. Aonu mana ne faꞌihoni fara, naugna keha naiknore ne filoni nogna gloku mae Jisas na ne cheke eghu, “Mae Jone Apublahi teke lehe tifa ia kela karha fapulo.”

Mae Khuru 23:26

Uve, mae biꞌo, Gavana Filiks. Iara mae Klodius Lisias te risoni letas igne. Iara kubae nigho iagho.

Mae Khuru 24:27

Nu mae Filiks ne liliseini mae Pol mala au mana ka suga sosolo, naugna mana magnahaghei te keli tadi hatimare mae Jiu. Nu ke leghu phei finogha, mae Posias Festas neke tughuni mae Filiks mala gavana ka provins tuana.

Mae Khuru 26:30

Aonu mae King Agripa, Gavana Festas, Benis nei naikno te gnafa gnokro teu baludi re kegra haghe

Mae Khuru 4:27

Tuani fara Lord, agne Jerusalem na mae Herod ghe mae Pontius Paelat neke kaisei baludi naikno te theome Jiure nei naiknodi Israel re eghu mala faleheni mae Jisas, mae nou gloku blahi iagho na. Mae ihei iagho teke vahini mala mae Mesia.