Luku 18:13 - Buka Blahi Ka Cheke Holo

¹³ “Nu mae mala salo takis gne kegra neu delei. Kate tarai na mana tirogna filo haghe kligna. Mana ne tutini babangogna na, naugna mana ne diꞌanagnafadi fara nakhibognare ne tarai eghu, ‘God kokhoni ghau iara, mae te diꞌa gne.’ ”

Luku 18:13 Iomraidhean Croise

Fapea Samuel 12:13

Mae Devet nomhini igne ne cheke eghu, “Iara la thofno tapla jafra ke ulugna Lord.” Mae Natan ne cheke eghu ka mana, “Lord ginauna hata fadelei nakhibo teke eni iagho igne. Eghuteuna iagho na theome lehe eigna nakhibo igne.

Fapea Kronikols 33:19

Eghuteuna keha glepo la ngau teke edi Manase re, Hosae neke rioriso soru ka nogna buka na. Ka buka igne, au thoutonu eigna nogna tharai mae Manase nei nogna cheke tughu God ranghini mana. Eghuteuna ka buka igne jaola au thoutonu eidi glepo te diꞌa teke kulu edi mana re, nei thoutonu eidi puhigna mana te diꞌa re, nei thoutonu eidi vido aheva teke horo mana vido blahi re, nei thoutonu eigna mumuju gna god gaꞌase Asera nei keha mumuju god teke lisei haghe langau mana re eghu. Igre glepo teke edi mana ame nhaꞌa faparini nga thegna teku na.

Fapea Kronikols 33:23

Nu mana theome jateula mae kmagna neku, naugna mana neke theome nhaꞌa faparini thegna ka Lord. Mana edi koba glepo te diꞌa re, eghume nabagna te thokeni papara biꞌo na.

Esra 9:6

ne tarai eghu, “Nogu God! Iara thono mamaja nogu fara, iara theome tangomana te ghae haghe tathagu nei foflogu teu gre te mala ari posa ka iagho kligna na. Nakhibomi ghehati gre kmana fara, ghehati nabami te papara eidi nakhibo igre. Naugna nakhibomi ghehati igre la pagu la haghe salaꞌudi phaꞌumi ghehati gre la ghilei tei posa kligna.

Thoutonu Eigna Mae Job 42:6

Eghume, iara tirogu ghau thegu, eghuteuna iara gnokro lamna nakrofu nei ka gaughavu glose fagaglana gna te tughu nagnafa iara na.”

Nodi Khoje Hatimare Mae Jiu 106:6

Tahati gne au nakhiboda jateula ku'eda tifa ra eghu. Uve, tahati neke leghudi puhi te diꞌare neke edi glepo te diꞌare.

Nodi Khoje Hatimare Mae Jiu 119:41

Lord God, fathakle mei ranghi ghau nou namha biꞌo iagho na. Uve, fakarhi ghau iara sagho jateula teke nhaꞌa chekeni iagho themu ia eghu.

Nodi Khoje Hatimare Mae Jiu 130:7

Tahati naiknoda Israel ra, tahati mala au noda grouronu ka Lord, naugna nogna namha mana thono biꞌo fara, nei magnahaghei fara fakarha ghita na.

Nodi Khoje Hatimare Mae Jiu 25:11

God, leghuni sagho nou nhaꞌa cheke na hata fadeleidi nakhibogu gre, naugna nakhibogu iara gre kmana fara.

Nodi Khoje Hatimare Mae Jiu 25:7

Lord, ghatho ihodi nakhibo nei najafra eghu teke edi iara kani mae majaghanigu ra. Naugna iagho namha ghau nei keli ranghi ghau eghu iara koba.

Nodi Khoje Hatimare Mae Jiu 40:12

Gognaro na kmana puhi biꞌo fara te mei ka iara na. Iara theome tangomana te kahadire. Nakhibo teke edi iara re te bukri soru ghau iara re. Eghume iara gognaro na la theome tangomana te filoni kaisei nabrou aheva nate tei iara na. Nakhibo igre la kmana fara la uludi khakla te au ka phaꞌugu iara gre eghuteuna gaoghathogu iara na la theome au blagna.

Nodi Khoje Hatimare Mae Jiu 41:4

Nu kate fogra ghau na, iara cheke eghu, “Lord, iara eꞌei nakhibo biꞌo ranghi nigho iagho, kokhoni ghau iara, ke fakarha fapulo ghau.”

Eksodas 33:10

Eghuteuna kate filoni khoveo te au ke ulugna suga tapuale ikoi igne, naiknore ne kafe kegra haghe ne pogho soru pari ke uludi nodi suga tapuale re.

Profet Isaia 1:18

Lord neke cheke eghu, “Mei ghotilo mala fadoglini tahati glepo igne! Neuba ne jateula dadara ka pohe vegha ra neu ne ninhigrana fara atha kokodi nakhibomi ghotilore, iara tangomana te togho ghami ghotilo te mala thofno gae fara jateula khakla sipu teu ghotilo na.

Profet Isaia 6:5

Aonu iara mhaghu nogu fara ne cheke eghu, “Tore! Iara theome nabagu te karha na, naugna cheke te gnafa te jifla mei ka foflogu iara na igre fodu ka nakhibo, eghuteuna iara au baludi naikno te diꞌa igre! Neuba ngau, iara la filonihi King igne, Lord mae ihei te au nolaghi fateote'o.”

Profet Isaia 66:2

Iara thegu teke vuavuhadi maloa ghe nauthoglu igre baludi gobigna lepo te au ke lamnadi. “Nu iara keli tagu fara ka nafnata mae te nhaꞌa faparini thegna igne, ba mae te diꞌa nagnafadi nakhibognare, mana thofno ghatho tahu ghau iara, eghuteuna leghuni nogu cheke iara na.

Profet Esikiel 16:63

Uve, iara ginauna nake togho nigho mala doglo iagho ka tathagu iara na eidi glepo diꞌa te gnafa teke edi iagho ra, eghuteuna kate ghathodi iagho re, iagho ginauna mamaja nou fara na theome chekeni kaisei glepo. Igne nogu cheke iara Lord God.”

Profet Daniel 9:5

Ghehati naikno diꞌa fara. Ghehati edi puhi te diꞌare ka tathamu iagho na. Ghehati theome leghudi nou vetula nei cheke teu iaghore.

Matiu 10:3

mae Filip ghe mae Batolomiu; mae Tomas ghe mae Matiu, mae mala saosalo takis; mae Jemes thugna mae Alfius ghe mae Tadius;

Matiu 6:5

Mae Jisas ne cheke eghu, “Kate tarai na, ghotilo mala thosei jateula mae te chaichaghi ra eghu. Mare magnahaghei fara te tei kegra te tarai ke lamnadi suga tharai ba farihotei glalaba. Mare magnahaghedi naiknore te filodi unha te edi mare re. Nu tutuani fara te chekeni iara ka ghotilo na, mare la kulu hatahi ka naiknore nodi tabare.

Matiu 9:13

Jateula tuana eghu, iara gne theome mei mala kilodi naikno te doglohi ke ulugna God te mala leghu ghau iara na. Nu iara gne mei mala kilodi kolho naikno te diꞌare mala hogri nagnafa. Ke pulo si ghotilo mala hironi u gaoghathogna chekegna God igne, ‘Iara theome magnahaghedi nomi fafara ghotilo re, nu iara magnahaghei ghami ghotilo te kokhonidi nei taji fakelidi teu naiknore!’ ”

Nonomho Te Keli Teke Risoi Mae Mak 11:25

Eghuteuna kate tarai na, jame ghotilo diꞌatami ranghini kaisei naikno, ghotilo kulu hata fadelei ghu nakhibogna mae ihei teke diꞌa tamuni na eghu. Jame te eghu na, mae Kmami ghotilo te au kligna na ginauna hata fadelei nakhibomi ghotilo re.

Luku 17:12

Mana mei ne posa ka kaisei namono ikoi jare. Eghuteuna, nabotho mae te thubu biꞌo ka khabru te kiloi leprosi, ne mei ka mana. Mare ne theome mei namo ka mae Jisas, naugna mare ne kafe au tadi khabru te thono diꞌa fara igne.

Luku 22:41

Eghuteuna mana ne tei fagaꞌu katha vido ka mare. Mana tuturupuku soru pari ne tarai.

Luku 23:48

Kmana naikno ne mei mala filoni unha te eni igne. Kate filoni igne, mare tapodi babangodire, naugna mare diꞌanagnafadi fara neke figri ka sugadire.

Luku 5:8

Mae Simon Pita filoni igne ne pogho soru ke ulugna mae Jisas ne cheke eghu ka mana, “Lord, thosei mei namo ka iara, naugna iara naikno diꞌa.”

Mae Khuru 2:37

Kate nomhini naiknore unha te chekedi mae Pita igre, mare ne diꞌanagnafadi fara ne cheke eghu ka mae Pita nei ka keha mae khurure, “Kheraguro, na fanefou si ghehati ia?”

Letas Teke Riso Tei Mae Pol Ka Khiloau Rom 5:8

Neubane au neu tahati ka nakhibo, God neke fatakle ranghi ghita u nogna namha biꞌo na kate kuru meini Kraes mala lehe tughu ghita na.

Fapea Korin 7:11

Kate ghathoni ghotilo unha te diꞌanagnafani ghotilo na, ghotilo lasenihi puhi tuana mei ka ghotilo leghuni unha te magnahagheni God na. Tutuani, puhi tuana togho ghami ghotilo mala fariuriu fara te eni glepo te keli na. Diꞌanagnafa tuana jaola tangomana te falalaseni te theome jafra ghotilo na, nei falalase diꞌatami na ka mae ihei te eꞌei puhi na. Puhi tuana neke togho ghami mala mhaghuni God, mala magnahaghei fara te filo ghau iara, mala au nomi gaoghatho faheta ka God, nei mala fateni ihei te tapla jafra. Ka gobigna lepo te edi ghotilo re, ghotilo neke falalasenihi te theome jafra ghotilo ka puhi igne na.

Ululahu Timoti 1:15

Mae Jisas Kraes neke mei ka nauthoglu igne mala fakarhi ghita ka nakhibo fateote'o. U cheke tuana thofno tutuani fara, mala nomhini nei fatutuani ni eghu naiknore. Iara tifa na neke diꞌa pari lahu ka nakhibo ke uludi naikno te gnafare gre.

Hibru 4:16

Naugna igne tahati thosei mhaghu te mei ka God Kmada mae ihei te kokhoni ghita. Mana ginauna na kokhoni ghita nei lolokeli ghita, eghuteuna mana ginauna na tusu meini nogna namha te mala togho ghita ka vido te magnahaghei tothogho na.

Hibru 8:12

Iara ginauna kokhonidi iheire te edi glepo te diꞌa eghuteuna iara na hata fadelei nakhibodire.”