Luku 14:13 - Buka Blahi Ka Cheke Holo

¹³ Nu kate ei gaghamu na, iagho tore meidi kolho naikno te kuma, naikno te blughu, naikno te dofu nei keha naikno te diꞌa thinidire.

Luku 14:13 Iomraidhean Croise

Fapea Samuel 6:19

Eghuteuna mae Devet ne tuatufa ka naiknore kaisei bret, kaisei vido nafnahi teke gahu ka khaꞌaghi, nei keha sisi grep te gata kaisei naikno neu ka naikno te gnafare. Kate hata te gnafa gano igre, mare ne kafe figri ka namonodire.

Fapea Kronikols 30:24

King Hesekaea ne falao ka naiknore kaisei thogha buluka nalhaꞌudi nei fitu thogha sipu nei nanigot mala gaghamu. Eghuteuna nogna mae biꞌo mana re falao kaisei thogha buluka nalhaꞌudi nei nabotho thogha sipu nei nanigot. Ka narane tuana, kmana mae pris ne fagaedi thedi ka tathagna Lord na.

Nehemaea 8:10

Aonu iara ne cheke eghu ranghidi, “Ghotilo tei ka namono mala ei gaghamu biꞌo. Ghotilo ghamu gano te keli nei koꞌu waen te mamahe eghu, eghuteuna tufa keha gano nei waen eghu ka iheire te theome naba ghedi gano, naugna narane igne blahi ka noda Lord. Ghotilo thosei diꞌanagnafa nei tanhi eghu naugna Lord magnahaghei ghita tahati te glealeꞌa, eigna puhi glealeꞌa ngala te mala farheta ghita na.”

Nehemaea 8:12

Aonu naiknore ne kafe tei ka namono balu glealeꞌa, mare ghamu nei koꞌu nei tufa keha ka iheire te theome naba ghedi gano. Mare kelitadi fara naugna mare lase fakelidi cheke te iuꞌiju mae Esra ka mare igre.

Thoutonu Eigna Mae Job 29:13

Ka narane tuana, naikno te papara fara igre cheke fakeli ghau iara, eghuteuna naikno biꞌo re thono glealeꞌa fara, naugna iara neke toghodi.

Proveb 14:31

Mae te fakokhoanani naikno te kuma na, mana theome ghatho tahuni Lord mae ihei teke vuavuhani naikno na. Nu mae te keli ranghini naikno te kuma na, mana ghatho tahuni Lord.

Proveb 22:9

Mae te tufa gano ka mae te kuma na, ginauna kelitagna fara.

Profet Isaia 58:10

eghuteuna jame te toghoni ghotilo ihei te rofo, ba ihei te au ka puhi biꞌo, iara ginauna togho ghami ghotilo. Uve, jame te eni ghotilo igne na, iara ginauna atha fadelei gromno te toku tafru ghami ghotilo igne mala phae jateula naprai fari hotei naublatha ra eghu ghotilo.

Profet Isaia 58:7

Igne puhi te magnahagheni iara na, ghotilo fei ghegna ihei te rofo. Eghuteuna kate filoni ihei te kuma te theo nogna suga na, ghotilo atha meini ka sugamire. Eghuteuna kate filoni ihei te theo nogna pohe na, ghotilo tufa nogna pohe. Eghuteuna ghotilo thosei poruni ihei kherada te mei tore nogna glepo ka ghotilo na.

Matiu 15:30

Ka vido tuana, kmana naikno ne mei ka mae Jisas. Mare hata ne mei lilisei soru ke ulugna mana naikno te lehe ghahedi, naikno te dofu, naikno te blughu, naikno te iho cheke nei iheire langau te au kmana nafnata khabru. Mae Jisas kafe fakarhidi ne gnafa.

Matiu 22:10

Mae glokure tei ka nabroure ne kafe hata mei naikno te filo dedi mare te keli ba te diꞌa. Aonu suga gaghamu tholaghi na fodu ne ngata ka naikno.

Luku 11:41

Tutuani, ghotilo mala tufa ka naikno te kumare gano teke au ke lamnadi tapera re, eghuteuna God ginauna thono fagae ghami la ghotilo.

Luku 14:12

Ke leghugna igne, mae Jisas ne cheke eghu ka mae teke tore meini mana ka gaghamu na, “Kate ei gaghamu biꞌo iagho na, thosei tore meidi kheramu themu, ba thabusimu themu, ba vikemu themu, ba mae ihei te dedei te au rhemu themu. Naugna keha fatare mare ginauna nake tore nigho iagho mala ke ghamu baludi. Nu neuba mare nake tughu fapulo ka iagho ginauna, God thegna ginauna nake theome tughu fapulo ka iagho.

Luku 14:14

Te eghu iagho na, iagho tangomana te gleale'a na. Naugna neubane theome ke tughuni mare gaghamu teke eni iagho tuana, God ginauna nake tughu fapuloni ka iagho, kau narane nate kegra fapulodi naikno te kelire.”

Luku 14:21

“Kate ke pulo mei mae gloku na teke toutonu gobigna lepo igre ka nogna mae funei na, nogna mae funei na ne diꞌatagna fara. Eghuteuna mana ne cheke eghu ka nogna mae gloku na, ‘Ghosei tei ka nabrou biꞌo ba nabrou ikodi gna namono gne, mala hata mei ka gaghamu gne iheire te kuma, iheire te dofu, ba iheire te blughu.’ Aonu, mae gloku na ne leghuni nogna mae funei na.

Mae Khuru 9:39

Mae Pita ne tei baludi phiamare. Kate thoke Jopa na mare ne tathaleini mae Pita ne tei ka chogho ke kligna na. Eghuteuna goro gaꞌase tela lehehi khetodire kafe kegra faligohoni mana balu tanhi. Reꞌe ne falalase ka mana phoko nei pohe brahu eghu teke susuki Dokas kani karhagna teku na.

Diutronomi 14:29

Ka puhi igne vikegna mae Livae te theo nodi glose igre ginauna tangomana te au ghedi gano na. Eghuteuna jaola naiknodi delei te mei au balumi ghotilo are, nei iheire te glehe kokoi, nei goro naikno biꞌo tela lehehi khetodire teu te au ka namonomi ghotilo are eghu tangomana te kafe mei ka vido igne mala hata gano te nabadi. Jame te eghu ghotilo na, Lord ginauna fablahidi nomi gloku te gnafa ghotilore.”

Diutronomi 16:11

Ghotilo balu thumi, nomi mae gloku nei gaꞌase gloku, nei mae Livaet ka namonomi ghotilo ra, maedi delei te au balumi ghotilo ra, goro sua glehe kokoi ra, goro naikno biꞌo ra, ghotilo te gnafa na kafe tei mala glealeꞌa ka vido blahi aheva Lord teke vahini te mala au nanghagna na.

Diutronomi 16:14

Ghotilo balu thumi, nomi mae gloku, nei gaꞌase gloku, nei mae Livaet te au ka namonomi ghotilo are, nei naiknodi delei te mei au balumi ghotilo are, nei goro sua glehe kokoi, nei goro naikno biꞌo te au ka namonomi ghotilo are, ghotilo te gnafa na mala kafe tei mala thofno glealeꞌa ka gaghamu igne.

Ululahu Timoti 3:2

Eghume mae ihei te mala baubatu ka khiloau na mana mala kaisei mae doglo fara, eghuteuna theo kaisei naikno te filoni kaisei najafra ka mana na. Mana mala tolaghi ka kaisei gaꞌase ngala eghuteuna tangomana te mala reireghi fakelini thegna. Mana theome mala ghosei diꞌatagna, nu mana kaisei mae mala au doglo fabrahu. Eghuteuna mana tangomana te mala reireghi fakelidi naikno te posa mei ka sugagna na, eghuteuna mala laseni puhi farirhiu na.

Ululahu Timoti 5:10

Eghuteuna naiknore filo glani naꞌa tangomana te edi gloku te kelire. Nafnata gloku jateula igre eghu te mala reireghi fakeli thugna, nei farumadi naikno phosa ka sugagna na, nei fafnaknodi naikno khiloaure kate titihi ghahedire, nei mala toghodi naikno te au puhi biꞌo ka nakarhadire. Uve, nafnata thau te fariuriu edi fabrahu thua nafnata gloku te keli.

Taetus 1:8

Nu mana kaisei mae mala namhadi nei reireghidi eghu keha naikno te mei ka sugagna mana re. Mana kaisei mae mala magnahaghe te edi koba glepo te kelire. Nu mana kaisei mae mala reireghini thegna. Nogna gaoghatho mana re mala doglo koba nu puhigna mana re mala keli fara ke ulugna God nei edi koba unha glepo te magnahaghedi God re. Mana theome mala u nafnata naikno te snakreni u thinigna thegna na te mala funei frunini u nakarhagna na.

Filimon 1:7

Ghema thabusigna, nogna naikno God igre mare keli tadi fara eigna puhi te namhadi iagho. Eghuteuna glepo te edi iagho tuare iara keli tagu fara nei farhetani nagnafagu na.

Hibru 13:2

Thosei ghatho ihoni mala toghodi naikno te posa mei ka sugamire. Keha naiknore tifa na neke theome filo glanidi kolho, nu mare neke toghodi engel ka sugadire.