Luku 10:22 - Buka Blahi Ka Cheke Holo

²² “Mae Kmagu iara na la lisa meihi ka khamegu iara na gobigna lepore. Theo kaisei naikno te thofno laseni mae Thugna God na, mae Mama thegna ngala. Tutuani, theo kaisei naikno te thofno laseni mae Mama na, kaisei mae Thugna ngala. Nu iheire teke vahidi iara re ngala, iara ginauna cheke ranghidi eigna mae Mama, eghuteuna mare ginauna jaola laseni mae Mama.”

Luku 10:22 Iomraidhean Croise

Matiu 11:25

Aonu mae Jisas ne cheke eghu ka mae Kmagna na, “Mama, iara cheke fakeli nigho, iagho mae te funei frunidi gobigna lepo kligna ba pari. Iara cheke fakeli nigho, naugna iagho ne falalase ka iheire te jateula sua teu te ihoni thofno glalase na, nu iagho pophoru glalase igne ka naikno te lasedi kmana glepo nei fahaehaghe fara teu eigna nodi glalase na.

Matiu 11:27

Mae Jisas ne cheke eghu, “Mae Kmagu iara na la lisa meihi ka khamegu iara gobigna lepore. Theo kaisei naikno te thofno laseni mae Thugna God na, mae Mama thegna ngala. Tutuani, theo kaisei naikno te thofno laseni mae Mama na, kaisei mae Thugna ngala. Nu iheire ngala teke vahidi iara ginauna cheke ranghidi eigna mae Mama, eghuteuna mare ginauna jaola laseni mae Mama.

Matiu 28:18

Ka narane igne, mae Jisas mei ne cheke eghu ka nogna mae fanomho re, “Mae Mama snakre meihi ka iara nolaghi te gnafa kligna nei pari.

Jone 1:18

Funu tifa te ghilei thoke ka narane gognarogne, theo kaisei naikno te thofno filoni God na. Nu mae Jisas Kraes thofno mae Thugna God te au balugna Mama na ngala te mei fatakleni God ka tahati na.

Jone 13:3

Eghuteuna, mae Jisas kulu lasenihi mae Kmagna na neke tusu ranghini nolaghi te mala funei frunidi gobigna lepore, nu mana laseni la mana neke mei funugna ka God nei nake pulo la ka God.

Jone 17:10

Naikno te nogu iara re nou la iagho, nei naikno te nou iagho re nogu la iara. Naugna nogu nolaghi biꞌo iara na la thaklehi ka naikno igre.

Jone 17:2

Naugna iagho neke tusu mei ka iara nolaghi te mala reireghidi naikno fateo gre, mala tangomana iara te tusu lao u karha fei tifa na ka naikno nogu iara teku iagho gre.

Jone 17:26

Iara la falalasehi ka mare nanghamu iagho na, eghuteuna iara na eni koba igne. Iara ginauna au baludi mare, mala jateula iagho te namha ghau iara gne eghu mare mala namhadi keha naiknore.”

Jone 17:5

Mama, gognarona fafnakno ghau iara ke ulumu. Tusu mei ka iara nafnakno teke kulu au ka iara kani teke au tekeu iara balumu iagho ia, ame eni nga iagho nauthoglu gne teku ia.

Jone 3:35

God Mama ne namhani fara mae Thugna na ne tusu lao ka mana u nolaghi te mala funei frunidi gobigna lepore.

Ululahu Korin 15:24

Aonu kate thoke mei narane leghu lahu na, Kraes ginauna magra mala tapla soruni mae Satan nei naitu te gnafa ka nauthoglu igne, eghuteuna mana ginauna snakreni God Kmagna mala King.

Fapea Korin 4:6

Naugna God neke chekeni naphae na mala siasigla kate romno na, eghuteuna God tuanala te fasigla mei u naphae gna na ka nagnafami ghehatire. Mana eni igne mala lase fakelini ghehati nogna nolaghi biꞌo God te sigla mei ka thinigna Kraes.

Efesus 1:21

Tutuani, Kraes na au kligna mala funei frunidi hatimare mae King te gnafa, nei hatimare mae engel, nei keha nafnata nolaghi fateo langau ka maloa gne. Kraes au nangha te biꞌo tulao ke uludi keha nangha te au nolaghi biꞌo ka nauthoglu igne, ba ka keha narane te mei ginau.

Hibru 2:8

Iagho tusu ranghini mana nolaghi te mala funei frunidi gobigna lepo fateo ke lamnagna nauthoglu igne.” Te filoni tahati ka grioriso te blahi na, God neke vuavuha naikno mala funei frunidi gobigna lepo fateore. Nu tahati theome filoni ngau naikno na te funei frunidi gobigna lepore.

Ululahu Jone 5:20

Eghuteuna tahati lasenihi Thugna God ne mei tusu ranghi ghita glalase mala laseni tahati thofno God. Eghuteuna tahati au balugna mae ihei te tutuani, tulao balugna mae Jisas Kraes. Mana thofno God nei mae ihei te tusu ranghi ghita u karha fei tifa na.

Fapea Jone 1:9

Mae ihei lalase te tei sala'uni nogna farirhiu mae Kraes na, God na theome au ka mana. Nu mae ihei te leghuni fabrahu nogna farirhiu mae Kraes na, mae Mama ghe mae Thugna ginauna na kafe au balugna mana.