Luku 10:14 - Buka Blahi Ka Cheke Holo

¹⁴ Nu ka narane fate na God ginauna kokhonidi naiknodi Taea ghe Saedon igre ke tulaomi ghotiloi.

Luku 10:14 Iomraidhean Croise

Profet Joel 3:4

“Ghotilo naiknomi ka phei namono biꞌo Taea ghe Saedon, nei ghotilo naiknomi ka kantri Filistia! Unha te magnahaghei eni ghotilo ka iara na? Iara neke theome eni kaisei puhi te diꞌa ka ghotilo. Iara neke theome eni kaisei puhi te diꞌa mala ke foli fapulo ghotilo ka iara. Jame te eghu na, iara ginauna nake tughu fapulo ka ghotilo.

Profet Emos 1:9

Lord ne cheke eghu, “Kmana fata naiknodi Taea tapla jafra ka nakhibo. Mare theome gnafa katha vido ikoi ka puhi igne. Thono theo fara. Kate tei ka magra te uluni kaisei namono na, mare hata naiknogna namono tuana mala tei foli jateula naikno sneka eghu ka kantri Idom. Tifa na mare neke nhaꞌa cheke mala au ka pharikeli baludi vike igre, nu mare theome leghuni kolho nodi nhaꞌa cheke na. Tutuani fara, iara ginauna roꞌeni namono biꞌo Taea eidi nafnata puhi te diꞌa te edi naiknore igre.

Profet Emos 3:2

Lord ne cheke eghu, “Kmana vike fara ka nauthoglu igne, nu iara neke vahi ghami ghotilo kolho mala nogu naikno iara. Eghuteuna iara tangomana te reireghi fakeli ghami ghotilo na. Nu kate filoni iara te theome keli ghotilo ranghi ghau iara na, iara ginauna para ghami ghotilo eidi nakhibo te edi ghotilo ra.”

Matiu 10:15

Tutuani fara te chekeni iara ka ghotilo na. Ka narane fate na thono diꞌa fara ranghidi naikno te diꞌa te au kau namono tuana ke tulaodi naikno te diꞌa di Sodom ghe Gomora tifa ra.

Matiu 11:21

Mana ne cheke eghu, “Puhi biꞌo ka ghotilo naiknomi ka namono Koresin! Puhi biꞌo ka ghotilo naiknomi ka namono Betsaeda! Naugna ghotilo ne tiromi leghuni chekegna God. Kofubobhoi te edi iara ka ghotilo ra, jame edi ka namonodi mae bongihehe Taea ghe Sidon gre meuna, mare jame gnokrohi pari balu pohe thapa nei ghiha nakrofuhi eghu ka thinidire, fagaglana gna tela tughu nagnafahi nei koko nakhibohi teuna.

Jone 3:19

God fatedi naiknore ka puhi igne: mae Thugna God na neke meihi jateula ngau u naphae neku kau nauthoglu igne, nu naiknore theome magnahagheni mana. Naugna hatimare jateula te au kate romno ra neu ne edi glepo te thono diꞌa fara re.

Letas Teke Riso Tei Mae Pol Ka Khiloau Rom 2:1

Ghotilo iheire te lase fate naiknora, ghotilo theome tangomana te chekeni kaisei glepo na. Kate fatedi ghotilo keha naiknore, ghotilo cheke fapari ghami themi kolho, naugna ghotilo jaola edila glepo te diꞌa te edi mare igre.

Letas Teke Riso Tei Mae Pol Ka Khiloau Rom 2:27

Ka puhi igne God la fate ghamihi ghotilo. Naugna ghotilo ne huhughuni fabrahu nogna vetula na, neubane hatahi ghotilo nogna vetula mae Moses na ba tohi fagaglana hi ghotilo. Nu ihei te theome mae Jiu te leghuni unha te chekeni ka vetula na, neuba mana ne theome thofno tohi fagaglana fei thini, God ghatho tahuni mana.