Jone 1:18 - Buka Blahi Ka Cheke Holo

¹⁸ Funu tifa te ghilei thoke ka narane gognarogne, theo kaisei naikno te thofno filoni God na. Nu mae Jisas Kraes thofno mae Thugna God te au balugna Mama na ngala te mei fatakleni God ka tahati na.

Jone 1:18 Iomraidhean Croise

Jenesis 16:13

Naꞌa ne jaglo nogna fara ne cheke eghu, “Iara gognaro na la filonihi God mae ihei te filo ghau iara na.” Aonu Hega ne kiloni nanghagna Lord na, “El Roi,” gaoghathogna ka cheke Hibru na, “God na ne filo ghau iara.”

Jenesis 18:33

Kate cheke te gnafa balugna mae Ebraham na, Lord jifla ne tei kokoni mae Ebraham. Eghuteuna mae Ebraham neke pulo ka namono na.

Eksodas 23:21

Ghotilo famane fanomho fakeli nei leghudi eghu unha te chekedi mana re. Te theome leghudi ghotilo unha te chekedi mana re, mana ginau na thono diꞌatagna fara ka ghotilo, naugna iara la tusu laohi ka mana nogu nolaghi na.

Proveb 8:30

Ka narane te edi Lord gloku igne, iara neke au balugna mana. Eghuteuna Lord neke vahi ghau iara mala toghoni ka nogna gloku na. Leuleghu narane na, God ne gleale'a fara, naugna iara ne au balugna mana. Iara thofno gleale'a fara te filoni nogna nauthoglu mana igne, nei jaola gleale'a fara ka nogna naikno mana re.”

Profet Isaia 40:11

Mana reireghi fakelidi nogna naiknore, jateula mae ihei te reireghi fakelidi nogna sipura eghu. Uve, mana jateula mae ihei te pala sua te ikodire ka fafragna ra eghu, eghuteuna mana batudi idodi sipu te au thudire mala blaknoi tei.

Lamentations 2:12

Goro sua igre tanhi ghedi gano nei khoꞌu eghu ka idodire. Ghilei khoko soru lamna nabrou jateula mae te fnera ra neu. Eghuteuna lehe soru nodi ka thinidi idodire.

Naba 12:8

Tuana site mei fakakhana iara te facheke teu balugna mana grea, eghuteuna kate facheke teu iara balugna mana na, iara theome chekedi cheke te ninhigrana gaoghathodire. Nu iara facheke balugna mana ka cheke te bligi gaoghathodire. Mana la filo ghauhi iara. Ne unha site theome mhaghu ghopa te cheke faparini nogu mae gloku iara gnea?”

Matiu 11:27

Mae Jisas ne cheke eghu, “Mae Kmagu iara na la lisa meihi ka khamegu iara gobigna lepore. Theo kaisei naikno te thofno laseni mae Thugna God na, mae Mama thegna ngala. Tutuani, theo kaisei naikno te thofno laseni mae Mama na, kaisei mae Thugna ngala. Nu iheire ngala teke vahidi iara ginauna cheke ranghidi eigna mae Mama, eghuteuna mare ginauna jaola laseni mae Mama.

Luku 10:22

“Mae Kmagu iara na la lisa meihi ka khamegu iara na gobigna lepore. Theo kaisei naikno te thofno laseni mae Thugna God na, mae Mama thegna ngala. Tutuani, theo kaisei naikno te thofno laseni mae Mama na, kaisei mae Thugna ngala. Nu iheire teke vahidi iara re ngala, iara ginauna cheke ranghidi eigna mae Mama, eghuteuna mare ginauna jaola laseni mae Mama.”

Jone 1:14

Eghume Chekegna God igne neke karha mei fei thini jateula tahati neku, neke au balumi ghehati. Ghehati neke filonihi u nogna nolaghi mana na. Nolaghi tuana neke tusu lao mae Mama ka mae thofno Thugna na. Eghuteuna mae Chekegna God igne fodu kau khokofakasai nei tutuani.

Jone 12:41

Mae Isaia neke chekedi glepo igre tifa na, naugna mana la kulu filonihi nogna nolaghi biꞌo mae Jisas na ne chekeni igne eigna mana.

Jone 13:23

Kaisei mae fanomho te namhani fara mae Jisas na ne gnokro rhegna mae Jisas.

Jone 14:9

Mae Jisas ne cheke eghu ka mana, “Ghema Filip, iara au raughahi balumi ghotilo. Ba theome lase fakeli ghau ngala iara si ghotilo ia? Tutuani fara, mae ihei te filo ghau iara na, mana la filonihi mae Mama. Naugna unha site chekeni iagho, ‘Fatakle ranghi ghami mae Mama na’ teu gnea?

Jone 17:26

Iara la falalasehi ka mare nanghamu iagho na, eghuteuna iara na eni koba igne. Iara ginauna au baludi mare, mala jateula iagho te namha ghau iara gne eghu mare mala namhadi keha naiknore.”

Jone 17:6

“Iara neke fatakle nigho iagho ka naikno teke tusu mei iagho ka iara teke vavahi fadelei iagho kau nauthoglu igne. Naikno igre nou iagho, eghuteuna iagho neke snakre meidi ka iara. Mare leghudi nou cheke iagho teke cheke ranghidi iara ra.

Jone 3:11

Tutuani fara te chekeni iara ka iagho na. Ghehati cheke eidi unha glepo te thofno lasedi nei cheke eidi unha glepo teke filodi kau tathamire. Nu ghotilo theome fatutuanidi unha te chekedi ghehati re.

Jone 6:46

Theo kaisei naikno teke filoni God mae Kmagu iara na. Kaisei iara mae teke au balugna mana na ngala te filoni mana na.

Fapea Korin 4:4

Eigna Satan mae ihei te funei frunini nauthoglu igne ne faromnodi nagnafadi naikno te theome fatutuanire. Eghume mare theome tangomana te filoni u naphae gna Nonomho te Keli te thofno fatakleni nogna nolaghi biꞌo Kraes na, mae ihei te thofno thotoghale gna God na.

Diutronomi 4:12

Lord au neu ke lamnagna khaꞌaghi igne neke cheke mei ka kuꞌemi ghotilo ra. Kate cheke mana na, mare neke nomhidi nogna cheke mana re, nu mare neke theome filoni mana.

Kolose 1:15

Mae Kraes gne thofno thotoghale gna God mae ihei tahati te theome filoni na, nei thofno Thugna God, pha'udi glepo vuavuha fateo.

Ululahu Timoti 1:17

Nafnakno nei siasigla ranghini mae King te funei fabrahu tifa tifa! Mana theome tangomana te lehe eghuteuna tahati theome tangomana te filoni mana, eghuteuna kaisei mana ngala God na. Tahati ginauna na ghatho tahuni nei cheke fakelini nanghagna mana na tifa tifa. Amen.

Ululahu Timoti 6:16

Mana thegna ngala te theome tangomana te lehe na. Mana au ke lamnagna naphae biꞌo te theome tangomana naiknore te tei rhegnai. Theo kaisei naikno te filoni God, ba tangomana te filoni mana. Ranghini nafnakno nei nolaghi tifa tifa. Amen.

Josua 5:13

Kaisei narane, kate tei te namo mae Josua Jeriko igne, mana ne filoni kaisei mae te kegra teu ke ulugna mana na. Mae igne loku kaisei naflahi mala magra. Mae Josua ne tei namo ka mae igne, ne cheke eghu ka mana, “Iagho kaisei mae balumi ghehati, ba iagho kaisei mae naoka?”

Ululahu Jone 4:12

Theo kaisei naikno te filoni God, nu te fari namhai tahati na, God au baluda nei nogna namha na thofno horoghoto ke lamnada.

Ululahu Jone 4:20

Jame kaisei naikno cheke eghu, “Iara namhani God,” nu tirognani kheragna fofodu na teuna, mana kaisei mae chaichaghi. Eigna mana theome tangomana te namhani God, mae ihei mana te theome filoni, jame te theome namhani mana mae kheragna fofodu na, mae ihei mana te filoni.

Ululahu Jone 4:9

God fatakle nogna namha na ke lamnada kate kuru mei kaisei thofno Thugna ngala ka nauthoglu gne mala fakarhi ghita.

Ululahu Jone 5:20

Eghuteuna tahati lasenihi Thugna God ne mei tusu ranghi ghita glalase mala laseni tahati thofno God. Eghuteuna tahati au balugna mae ihei te tutuani, tulao balugna mae Jisas Kraes. Mana thofno God nei mae ihei te tusu ranghi ghita u karha fei tifa na.