Jenesis 3:5 - Buka Blahi Ka Cheke Holo

⁵ Jame te ghamu ghopa sisi gna gaju igne na, tathami ghopa re ginauna na thofra fakeli, eghuteuna ghopa ginauna na laseni unha te keli na nei laseni unha te diꞌa na eghu, eghuteuna ghopa ginauna na lalase fara jateula God eghu. God na laseni igne, naugna igne mana lhotini ka ghopa te ghamu sisi gna gaju igne na.”

Jenesis 3:5 Iomraidhean Croise

Jenesis 2:17

Nu iara theome snakre nigho iagho te ghamu sisigna fapea gaju te au farihotei nagare igne. Gaju igne mala laseni iagho unha te keli na nei unha te diꞌa na eghu. Tutuani fara, jame te ghamu iagho sisi gna gaju igne na, iagho ginauna na lehe!”

Jenesis 2:9

God neke lilisei kmana famane nafnata gaju te ure sisi te naba te mala ima na. Gaju igre famane keli fara. Fari hoteigna nagare igne na au kaisei gaju, ihei te ghamuni sisi gna gaju igne na naikno tuana ginauna na theome lehe, nu mana na karha fabrahu tifa tifa. Eghuteuna fapea gaju na aula jare, ihei te ghamuni sisi gna gaju igne na naikno tuana ginauna na laseni unha te keli na nei unha te diꞌa na eghu.

Jenesis 3:10

Mae Adam ne cheke eghu, “Iara ne nomhini nigho iagho te nonolo ka nagare igne ne mhaghu nogu nigho fara ne poru, naugna iara gne ne soesole.”

Jenesis 3:22

Aonu Lord God ne cheke eghu, “Naikno gre la jateula tatilo lau sigre la lasenihi unha te keli na nei unha te diꞌa na eghu. Eghume gognaro na tatilo na theome snakredi repa mala tei namo ka gaju te tusu lao karha na ka naiknore. Na glahu ghamu repa sisi gna gaju igne nu karha fabrahu eghu.”

Jenesis 3:7

Eghuteuna tathadi repa re ne funu thofra, aonu repa ne laseni te soesole na ne susuki fodu khakla gaju fig re ne pipichi.

Ululahu Kings 22:6

Aonu mae king Ehab ne kilo meidi fati gobi profet. Eghuteuna mana ne ghusna eghu ka mae profet igre, “Ba, iara tangomana te tei magra ka king gna Siria jare Ramot-Gilead, ba theo?” Hatimare ne cheke eghu ka mana, “Uve king, tei sagho. Noda Lord ginauna togho nigho mala uluni iagho magra na!”

Fapea Kronikols 32:15

Ghotilo thosei snakreni Hesekaea mala chaghi ghami nei batu fadiꞌa ghami jateula tuana eghu! Ghotilo thosei fatutuani ni mana! Theo kaisei nodi god keha kantri are teke fakarhidi nodi naiknore ka nomi nolaghi ghehati na! Iara cheke fadoglo ari ka ghotilo, nomi God ghotilo na theome tangomana te fakarhi ghami ghotilo na!”

Nodi Khoje Hatimare Mae Jiu 12:4

“Ghehati ginauna na chekedi unha te magnahaghedi themire, eghuteuna naiknore ginauna leghudi unha te chekedi ghehati re. Naugna foflomi gre thono heta fara. Theo ihei nga te fothi ghami na.”

Eksodas 20:7

“Thosei cheke faparini nanghagu iara na. Iara nomi Lord nei God eghu ghotilo. Tutuani, iara ginau na paradi naikno te cheke faparini nanghagu iara na.

Eksodas 5:2

Nu king igne ne cheke eghu, “Ihei Lord na mala leghuni iara mana? Iara theome laseni mana, eghume iara ginauna theome tangomana nate snakre ghami te tei ghotilo na!”

Profet Isaia 14:14

Iara ginauna haghe ke kligna khoveo, eghuteuna iara ginauna kaisei nanaba balugna God mae ihei te thofno haghe fara!’

Profet Esikiel 13:22

Iara theome magnahaghedi naikno te doglo gre te diꞌanagnafa na, nu ghotilo faglaꞌedi gaoghathodi naiknore ka nomi chaichaghi ghotilore. Ghotilo togho haghedi koba naikno te diꞌare, eghuteuna mare theome tangomana teke figri fapulo ka puhidi mare te diꞌa re, mala tangomana mare te fakarhadi nakarhadi thedire.

Profet Esikiel 28:12

“Maegna ka nauthoglu. Tanhi fabiꞌo eigna king biꞌogna Taea, eghuteuna cheke ka mana iara Lord God te cheke igne: “ ‘King gna Taea. Tifa na, iagho kaisei mae doglo nakarhamu na, kaisei mae glalase nei kaisei famane mae fara.

Profet Esikiel 28:2

“Maegna ka nauthoglu. Cheke ranghini mae funei gna Taea iara Lord God te cheke igne: Iagho kaisei mae fahaehaghe fara cheke eghui, ‘Iara jateula kaisei god eghu, eghuteuna iara gnokro ka chea ka nogu nolaghi, aheva thongna te faligoho ghau iara. “ ‘Nu neuba iagho ne cheke eghu, iara jateula kaisei god eghu sia neu, iagho kaisei maemu ka nauthoglu igne kolho, eghuteuna iagho theome kaisei god.

Profet Esikiel 28:9

Jame te kegra iagho ke uludi mae iheire nate falehe nighore, iagho ginauna tangomana nate chekeni te iagho kaisei god na? Ghema, iagho naikno kolho, iagho theome kaisei god.

Profet Esikiel 29:3

Iagho cheke ka mare te iara Lord God te cheke eghu igne: “ ‘King gna Ijep! Iara nou naoka iagho. Iagho jateula kaisei nasava biꞌo te thuru teu ka phesigna Khoꞌu biꞌo Nael ia eghu. Eghuteuna iagho cheke eghu koba, “Khoꞌu biꞌo igne nogu iara! Iara neke eni malagu thegu!”

Profet Daniel 4:30

Mana ne cheke eghu, “Tutuani fara, Babilonia gne kaisei famane namono biꞌo tutuani fara. Iara ngala teke eni gna namono biꞌo igne, iara neke falalase nogu nanheta nei nogu nolaghi teure ka naikno igre.”

Profet Daniel 6:7

Ghehati te gnafa te loku ke lamnagna nou kantri iagho igne, thilo nou mae funei iagho igre baludi hatimare nou mae minista, sekretri, advaesa, nei mae primia teu iagho ka provins na igre, ghehati magnahaghei nigho iagho te eni kaisei vetula te mala leghuni naikno te gnafa igre. Ghehati magnahaghei nigho iagho te cheke faheta ka naikno igre funu gognarogne ghilei thokeni tolufulu narane. Te chekeni na, theome tangomana kaisei naikno te tarai ka kaisei god, ba ka kaisei naikno na. Theo fara. Naiknore mala tarai ka iagho kolho. Jame ihei te theome leghuni vetula igne na, iagho koko soruni naikno tuana lamna khora lion.

Matiu 6:23

Eghuteuna te diꞌa fara iagho tathamure, thinimu iagho na ginauna romno fara. Eghume te theo kaisei naphae ke lamnamu iagho nu romno kolho teuna, iagho ginauna na romno fara.

Mae Khuru 26:18

Iara na kuru tei nigho mala tothora tathadi iheire te au kate romno mala filoni mare u thofno naphaegna God. Uve, iara na kuru nigho mala jifla kokoni mare nogna nolaghi mae Satan mala ke pulo ka God. Eghuteuna te fatutuani ghau iara mare na, God ginauna hata fadelei nakhibodire. Eghuteuna mare ginauna na kaisei ngala baludi naikno teke kulu vavahi God re.’

Fapea Korin 11:3

Nu iara nanga nogu fara, glahula baubatu fajafradi mare gaoghathomi ghotilo re mala theome klino nei theome namhani eghu ghotilo Kraes. Glahu jateula mogo teke saosagroni Ivi ka chekegna te chaichaghi ia eghu.

Fapea Korin 4:4

Eigna Satan mae ihei te funei frunini nauthoglu igne ne faromnodi nagnafadi naikno te theome fatutuanire. Eghume mare theome tangomana te filoni u naphae gna Nonomho te Keli te thofno fatakleni nogna nolaghi biꞌo Kraes na, mae ihei te thofno thotoghale gna God na.

Fapea Tesalonika 2:4

Mana ginauna cheke fadiꞌadi gobigna lepo te tufru sorudi naiknore balu nodi thua nafnata god. Eghuteuna ginauna mana na ghatho tahuni thegna jateula kaisei mae te uludi gobigna lepo te tufru sorudi naikno igre eghu, eghuteuna mana ginauna tei gnokro lamna nogna Sugablahi God eghuteuna mana na chekeni te mana ngala God na.

Thakle 13:14

God snakreni fapea bosu na mala edi kofubobhoi igre ke ulugna bosu ulu lahu na. Eghuteuna naugna te edi mana kofubobhoi igre, mana ne chaghidi naikno te gnafa ka nauthoglu igne mala leghuni mana. Mana chekedi naiknore mala fafnaknoni bosu ulu lahu na kate eni mare kaisei mumuju jateula bosu ulu lahu. Bosu gne neke falelehe mare ka naflahi nu kela karha fapulohi teu na eghu.

Thakle 13:4

Naiknore ne pogho soru ka pholi biꞌo na naugna mana neke tusu lao nogna nolaghi na ka bosu na. Eghuteuna mare jaola pogho soru ne cheke fakelini bosu na, “Theo kaisei naikno te nheta jateula bosu igne teuna! Jaola theo kaisei naikno te naba te mala magra nei tapla soruni teu bosu tuana!”

Jajis 3:2

Mana eni igne, mala farirhiudi naiknodi Israel iheire teke theome magra tifa ra mala laseni magra na.