Jemes 4:5 - Buka Blahi Ka Cheke Holo

^5-6 Unha te chekeni ka grioriso te blahi na ia thofno tutuani fara eigna God neke snakre meini mae Tharunga te Blahi na ka tahati mala au ke lamnada tahati na thofno magnahaghe ghita tahati te mala leghuni kolho mana. Nu neuba ngau, keha ka ghotilo leghuni gaoghathogna naikno kolho. Nu God tusu ranghi ghami ghotilo nogna thotogho na, mala tangomana ghotilo te hogri nagnafa na. Naugna igne, grioriso te blahi na thofno tutuani fara te chekeni igne, “God theome magnahagheni ihei te fahaehaghe na. Nu toghoni ihei te nhaꞌa faparini thegna na.”

Jemes 4:5 Iomraidhean Croise

Jenesis 26:14

Mana au nogna kmana sipu, buluka nei naikno gloku eghu, aonu maedi Filistia gre ne goghotuni fara mana.

Jenesis 30:1

Kate laseni Resel te khara te theo thugna na, naꞌa ne diꞌatagna fara ka Lea ne cheke eghu, ka mae Jekop, “Fabukla ghau iara sagho. Te theo iagho na, iara ginauna na lehe nogu.”

Jenesis 37:11

Hatimare mae thabusigna thegna mae Josep gre ne goghotu fara ka mana. Nu mae kmagna na ne ghaoghatho ne brahu fara ka gaoghathogna nogna mifi mae Josep na.

Jenesis 38:9

Nu mae Onan ne theome magnahagheni u vetula igne, naugna mana magnahaghei te au thugna thegna. Nu kate thuru balugna gaꞌase igne na, mana ne totofa kolho kholognare ka glose na, mala theome tangomana te au sua malagna mae tighagna na.

Jenesis 6:5

Lord ne filodi puhidi naikno gna nauthoglu gne ne thono diꞌa fara. Eghuteuna mare ghathodi fabrahu kolho glepo te diꞌa re.

Jenesis 8:21

Lord ne gnanghini u fafara te famane sisiri keligna igne ne keli tagna fara ne cheke eghu, “Iara ginauna nake theome goigoni u nauthoglu igne ke tughugna puhi diꞌa teke edi naikno igre neuba iara kulu lasedihi naikno igre neke diꞌa neke mei ngala funu suadi. Nu iara ginauna nake theome goigonidi gobigna lepo te karha ka nauthoglu na igre jateula te eni iara gognaro gne eghu.

Nodi Khoje Hatimare Mae Jiu 106:16

Jare ke lamnagna namono nagou na, keha mae ka mare ne goghotudi fara mae Moses ghe mae Eron, nogna mae pris Lord na.

Nodi Khoje Hatimare Mae Jiu 37:1

Thosei nanga nou ka puhi te edi mae te diꞌare. Thosei mamagnani ka nagnafamu na te leghuni puhidi mare re.

Proveb 21:10

Mae te diꞌa na magnahagheni fara puhi te diꞌa na, mana theome keli ranghini kheragna fofodu na.

Eklesiasti 4:4

Eghuteuna iara jaola filodi thua nafnata nakmusa biꞌo nei thua glepo te keli eghu te edi tahati igre, naugna tahati goghotu ka nagnafadare ka unha te edi keha naiknore. Glepo igne jaola theo nafugna kolho, jateula ihei te ngolho leghu ka nuri na ia eghu kolho.

Profet Isaia 11:13

Naiknodi Israel igre ginauna theome goghotudi naiknodi Juda nei na theome khidi eghu mare. Naiknodi Juda igre mala jaola theome goghotudi nei khidi eghu naiknodi Israel.

Naba 11:29

Aonu mae Moses ne cheke eghu, “Unha site nanga nou iagho ka iara te mala kmu mare teu gnea? Iara magnahagheini Lord te tufa lao nogna nolaghi gna Tharunga te Blahi na ka mare, mala cheke jateula mae profet eghu mare!”

Naba 23:19

God na theome jateula naikno te lase chaghi ra eghu. Mana theome jateula tahati te lase tughu gaoghatho ra eghu. Unha glepo te nhaꞌa chekedi mana re, mana ginauna edi. Eghuteuna unha te chekedi mana re, ginauna thoke mei tutuani.

Jone 10:35

Tahati laseni unha te chekeni ka grioriso te blahi na tutuani fabrahu. God kilodi naikno te toutonuni chekegna mana tuare jateula thegna God eghu.

Jone 19:37

Eghuteuna, keha grioriso te blahi na cheke eghu, “Naiknore ginauna filoni mae teke jajaꞌi mare na.”

Jone 7:42

Unha te chekeni kau grioriso te blahi na mae Kraes na mala karha mei ka vikegna mae King Devet. Eghuteuna mana na karha ka namono Betlehem, namono aheva teke karha mae Devet.”

Mae Khuru 7:9

“Thugna mana igre neke goghotuni mae Josep, mae Josep gne kaisei mae ka hatimare nabotho phei mae kuꞌeda tahati igre. Eghume mare neke snakreni mae Josep ka keha naiknodi delei mala foli mare hata teini Ijep. Nu God neke au balugna mae Josep,

Letas Teke Riso Tei Mae Pol Ka Khiloau Rom 1:29

Mare fodu ka puhi te diꞌa, eghuteuna mare magnahaghei te hata glepo maladi thedi kolho, eghuteuna mare thono lalamadi fara naiknore. Mare fodu ka goghotu, falehe naikno, magra, saosagro, ghaoghatho fadiꞌani koba ihei, nei cheke pouporuni ihei.

Letas Teke Riso Tei Mae Pol Ka Khiloau Rom 9:17

Naugna kau grioriso te blahi na God neke cheke eghu ka mae Fero, “Iara vahi nigho iagho mala King, naugna iara magnahaghei te falalase ka iagho nogu nolaghi na mala lase ghau naikno te gnafa ka nauthoglu igne.”

Ululahu Korin 6:19

Ba, ghotilo theome laseni thinimi ghotilo gre jateula Sugablahi nogna Tharunga te Blahi teuna!? Tharunga te Blahi na au ke lamnami ghotilo, eigna God neke tusu mei ka ghotilo. Ghotilo theome nomi themi,

Fapea Korin 6:16

Nogna Sugablahi God na theome mala fodu ka mumuju. Jaola ghotilo laseni eigna tahati na nogna Sugablahi God mae ihei te karha te tifa! Naugna God neke cheke eghu, “Iara ginauna mala au baludi nogu naiknore, eghuteuna iara ginauna mala tei baludi. Iara ginauna mala nodi God mare, eghuteuna mare ginauna mala nogu naikno iara.”

Galesia 3:8

Tifa na u grioriso te blahi gne neke kulu chekenihi eigna God ginauna jaola fakarhidi ka nodi fatutuani iheire te theome Jiu. Ka puhi igne mae Ebraham neke kulu nomhini u Nonomho te Keli na kani teke cheke eghu God na, “Iara ginauna vahi nigho mala fablahidi naikno te gnafa ka nauthoglu igne.”

Taetus 3:3

Naugna tifa na tahati neke theome ghaoghatho fakeli, jateula naikno te theome fatutuani ni Kraes ra neku. Tutuani, tahati neke huhughu koba. Nu keha naiknore chaichaghi ghita koba mala loku jafra tahati. Tahati tifa na neke loku ranghini kolho unha te magnahaghei fara u thinida theda na. Tahati neke edi fabrahu ngala unha glepo te diꞌa nei goghotu teure. Naiknore neke theome magnahaghei ghita fara nu tahati jaola ngau neke theome magnahaghedi fara keha naiknore.