Filipae 3:3 - Buka Blahi Ka Cheke Holo

³ Neubane eghu ngau, tahati nogna naikno God gre thofno laseni gaoghathogna tohi fagaglana. Naugna nogna Tharunga te Blahi God na te togho ghita tahati te mala pogho soru ranghini mana na. Tutuani, tahati gleale'a te kaisei balugna mae Jisas Kraes. Jaola theo kaisei noda fatutuani ka unha te eni ka thinida na.

Filipae 3:3 Iomraidhean Croise

Nodi Khoje Hatimare Mae Jiu 105:3

Tahati te hui na mala pala hagheni nanghagna Lord. Tahati glealeꞌa, naugna tahati pogho soruni mana.

Profet Isaia 45:25

Iara Lord, iara ginauna toghodi iheire nate karha mei ka vikegna Israel mala leghuni puhi te doglo na, eghuteuna mare ginauna na thofno kilo fnakno ghau iara.

Profet Jeremaea 9:26

Tutuani, naiknodi Ijep, nei naiknodi Juda, nei naiknodi Idom, nei naiknodi Amon, nei naiknodi Moab, nei iheire te au ka namono nagou te leghuni puhi kastom na te kuchi fakmoꞌei khakla ka greredi re igre, neubane vahehi thinidire, nu mare jateula naikno te theome vahe ra eghu leghuni puhi te diꞌa na. Eghuteuna neubane mae Israel tela vahehi igre, nu puhidire jateula naikno bongihehe te theome vahe ra eghu fara, eghuteuna mare theome tajini nodi nhaꞌa cheke teke eni mare balugu iara na.” Igne chekegna Lord.

Profet Malakai 1:11

Naikno te gnafa ka kantri te gnafa teu ka nauthoglu na igre ginauna atha insens nei gano eghu mei mala fafara ka olta, eigna mare ghatho tahu ghau iara.’

Letas Teke Riso Tei Mae Pol Ka Khiloau Rom 1:9

Iara loku ranghini God balu nagnafagu fateo mala toutonuni u Nonomho te Keli eigna Thugna God. Eghuteuna God lase ghau iara te ghatho ghami ghotilo koba ka nogu tharaire.

Letas Teke Riso Tei Mae Pol Ka Khiloau Rom 15:17

Naugna iara kaisei balugna mae Jisas Kraes, iara tangomana te fahaehagheni nogu gloku ranghini God na.

Letas Teke Riso Tei Mae Pol Ka Khiloau Rom 7:6

Tifa na u vetula neke loku famaku ghita fara, nu gognarona tahati snagla fei vetula na, naugna kate lehe Kraes tifa na tahati jaola lehe balugna mana. Eghuteuna gognarona tahati tangomana te loku ranghini mana ka puhi majaghani. Naugna tahati leghuni mae Tharunga te Blahi, theome leghuni puhi te risoni mae Moses ka vetula na.

Letas Teke Riso Tei Mae Pol Ka Khiloau Rom 8:15

Tharunga te Blahi teke tusu ari God ka ghotilo igne theome mala haru famaku ghami ka namhaghu jateula teke au ghotilo ka namhaghu tifa ia eghu. Theo. Nu mana togho ghami mala thugna God. Eghuteuna ka nogna nolaghi Tharunga te Blahi na tahati tangomana te cheke eghu ka God, “Mama, Mama.”

Letas Teke Riso Tei Mae Pol Ka Khiloau Rom 8:39

neuba kaisei vido ka maloa kligna ba kaisei vido mamhara ke pari glose, uve, neuba kaisei glepo biꞌo ka gobigna lepo teke vuavuha God gre, theome tangomana te fota ghita ka nogna namha God teke fatakle ranghi ghita Jisas Kraes noda Lord.

Letas Teke Riso Tei Mae Pol Ka Khiloau Rom 9:6

Neubane kmana mae Jiu te theome fatutuani ni nga teu mae Jisas Kraes, nogna nhaꞌa cheke God ranghidi mae Ebraham, mae Isak, nei mae Jekop na theome jafra. Naugna keha naikno ghu kolho Israel te thofno nogna naikno God re.

Fapea Korin 11:18

Kmana naikno cheke fahaehaghe leghuni kolho gaoghathogna nauthoglu gne, eghume iara tangomana te cheke fahaehaghe jateula tuana teuna.

Galesia 5:25

Tharunga te Blahi na tusu mei karha ka tahati. Eghume tahati mala jaola leghuni nogna puhi mae Tharunga te Blahi na.

Galesia 6:16

Iara toreni God mala tusu lao pharikeli nei lolokeli ka iheire te leghuni gaoghatho igne nei ka iheire te gnafa te thofno nogna naikno God.

Efesus 6:18

Kate edi ghotilo glepo igre, ghotilo tarai nei toreni God eghu mala togho ghami mana. Tarai fabrahu ka nogna nolaghi mae Tharunga te Blahi. Tutuani, ghotilo tarabana fakeli koba nei thosei babaꞌo nei taraidi koba hatimare nogna naikno God fateote'o.

Diutronomi 10:16

Eghume, ghotilo kato koko gobigna lepo ka gaoghathomi ghotilo te patu gama nei theome tajini teu nogna nhaꞌa cheke Lord igne.

Diutronomi 30:6

Aonu Lord nomi God ginauna hata koko glepo te diꞌa fateote'o ka gaoghathomi ghotilo are, nei ka gaoghathodi vikemi ghotilo are eghu. Eghume ghotilo te gnafa ginauna namhani mana ka gaoghathomi fateote'o, nei ka nomi glalase fateote'o mala tangomana ghotilo te karha na.

Filipae 1:1

Uve, iara mae Pol ghepa mae Timoti phei nogna mae gloku mae Jisas Kraes. Ghepa riso ari letas igne ka ghotilo naikno khiloau te au ka namono Filipae. Eghuteuna ghepa riso ranghidi langau hatimare mae biꞌo nei hatimare mae te totogho ka khiloau Filipae.

Filipae 3:12

Iara theome chekeni nakarhagu ka mae Jisas Kraes na la gnafahi teuna. Theo! Nu gognaro na iara loku heta te mala hatagna u taba tela kulu tarabanahi mana malagu iara teku ia.

Filipae 3:14

Iara faheaheta fara mala hata u taba igne. Naugna mae Jisas Kraes, God kilo ghau iara mala tei ka mana kligna nei au fabrahu balugna mana jare. Eghume tuana ngala nogu taba iara na.

Kolose 2:11

Kate mei ghotilo te kaisei balugna mae Kraes na, mana ne hata fasnagla ghami ka gaoghatho te diꞌa. Kraes neke tohi fagaglana ghami ghotilo, theome tohi fagaglana fei thini nu fei tharunga.

Letas Teke Rioriso Mae Jud 1:20

Nu ghotilo kheraguro, nomi fatutuani na thono blahi fara. Eghume ghotilo loku heta mala kegra maku ka nomi fatutuani te blahi fara tuana. Eghuteuna tarai ka nogna nolaghi mae Tharunga te Blahi.