Filipae 1:6 - Buka Blahi Ka Cheke Holo

⁶ God mae ihei teke fufunu gna u gloku karha na ka nakarhami ghotilo re, mana ginauna eni fabrahu u gloku te keli tuana ghilei gnafa ka narane na teke pulo meigna mae Jisas Kraes. Eghuteuna iara thono fatutuani ni fara igne.

Filipae 1:6 Iomraidhean Croise

Nodi Khoje Hatimare Mae Jiu 138:8

Lord God, iara laseni, iagho ginauna edi unha teke nhaꞌa chekedi iagho ka iara ra, naugna nou namha iagho ka ghehati na theome tangomana te hui na. Thosei tei koko ghami ghehati nou naikno iagho teke vuavuha themu gre sagho.

Jone 6:29

Mana ne cheke eghu ka mare, “U gloku te magnahagheni God te mala eni ghotilo na igne, fatutuani ghau iara, mae ihei teke kuru mei mana gne.”

Mae Khuru 11:18

Kate nomhini naikno khiloau re igne, mare ne theome chekeni kaisei glepo ka mae Pita. Nu mare ne cheke fakelini God, ne cheke eghu, “Eghume, God ne snakredi naikno te theome Jiure mala figri ka mana mala karha.”

Mae Khuru 16:14

Kaisei gaꞌase jare nanghagna na Lidia. Naꞌa thaugna Taetira neke mei au jare Filipae. Nogna gloku na mala fofoli pohe ukru nei naꞌa jaola pogho soruni thofno God. Kate fanomho teu naꞌa ka mae Pol na, God ne tothora nagnafagna na ne fatutuani ni mae Jisas.

Fapea Korin 1:15

Iara neke magnahagheni fara te kulu ari filo ghami ghotilo tifa na naugna iara thofno fatutuani ghami ghotilo te lase ghau iara te loku fadoglo ke ulumi. Tutuani, iara neke ghathoni kate filo ghau iara na ghotilo tangomana te phei fata gleale'a na.

Fapea Korin 2:3

Ka gaoghatho tuana teke riso arini iara letas na ka ghotilo tifa ia. Neuba iara neke magnahaghei te ari filo ghami ghotilo na, iara theome magnahaghe ghami ghotilo naikno te tangomana te mala faglealeꞌa ghau iara ra te fadiꞌa nagnafa ghau iara na. Te thofno ghathoni iara na, ghotilo te gnafa na mala gleale'a balugu iara.

Fapea Korin 7:16

Iara gleale'a fara eigna iara rouronu ghami ghotilo fara!

Fapea Korin 9:4

Jame keha naiknodi Masidonia ari balugu iara thogheiro, eghuteuna filo deni te theome tarabana kolho ghotilo teuna, ghehati ginauna mamaja nomi fara naugna ghehati neke rouronu ghami ghotilo fara. Eghuteuna ghotilo ginauna jaola mamaja nomi fara!

Galesia 5:10

Neuba, iara fatutuani ni God mala togho ghami mala theome leghudi farirhiu te theome tutuani re. Eghuteuna mae ihei te fariuriu goigoni ghami ghotilo na, God ginauna parani mana.

Efesus 4:12

Mana neke eni igne mala tangomana nogna naikno te gnafa God re te mala loku fakelidi nogna glokure, nei mala kotu heta thinigna Kraes.

Filipae 1:10

Eghume ghotilo ginauna tangomana te lasedi glepo te doglore. Ka puhi tuana ghotilo ginauna au fakeli nei doglo eghu ka narane teke pulo meigna mae Jisas Kraes.

Filipae 1:29

Tutuani fara, God la tusu arihi ka ghotilo u nafnakno te mala loku ranghini nei fatutuani ni mae Kraes nei au papara malagna mana teuna.

Filipae 2:12

Kheraguro, kate au tekeu iara balumi ghotilo jare ia, ghotilo neke leghudi koba nogu farirhiu iara re. Neubane au fadelei iara, iara magnahaghei ghami ghotilo fara te leghu ghau iara gognaro gne. Loku heta balu mhaghu nei fifilo fakeli mala gnafa fakeli nogna gloku God te mala athi ghotilo karha na.

Filipae 2:13

God na loku balumi ghotilo nei togho ghami ghotilo eghu naugna mana magnahaghei te edi ghotilo unha te magnahaghedi thegna re.

Filipae 2:16

Naugna ghotilo mala toutonu eigna u thofno karha na ranghidi. Eghuteuna te eni ghotilo igne na, iara ginauna gleale'a fara ka narane nate ke pulo mei mae Kraes na. Naugna igne u fagaglana gna te theome fiti loku kolho iara kate theo nafugna na.

Kolose 2:12

Kate apublahi na ghotilo kaisei ka mae Kraes, jateula mare te giugilu ghami nei ke karha fapulo ka glehe balugna mana. Igne tutuani fara ka ghotilo naugna nomi fatutuani ka nogna nolaghi biꞌo God teke fakarha fapuloni mana ka glehe.

Ululahu Tesalonika 1:3

Ghehati cheke fakelini God Kmada eidi gloku te keli teke edi ghotilo naugna nomi fatutuani nei namha. Ghehati jaola cheke fakelini God eigna ghotilo te kegra maku fabrahu ka nomi grouronu ka noda Lord Jisas Kraes.

Fapea Tesalonika 1:11

Naugna igne, ghehati tarai koba eimi ghotilo, nei toreni noda God mala togho ghami nei nabami te au ka nakarha te keli teke kilo ghamihi mana. Eghuteuna ghehati jaola toreni God ka nogna nolaghi mala togho ghami ghotilo mala leghudi gaoghathomi nei loku fahui gloku teke edi ghotilo naugna te fatutuani ni God.

Fapea Tesalonika 3:4

Ghehati rouronu ka Lord eimi ghotilo te mala edi unha teke chekedi ghehati ka ghotilo ra. Eghuteuna jaola te laseni ghehati na, ghotilo ginauna edi fabrahu glepo igre.

Filimon 1:21

Iara rioriso ari cheke igre ka iagho, naugna iara laseni iagho ginauna na edi unha te toredi iara mala edi iagho teura. Jaola iagho ginauna na edi glepo ke uludi nogu cheke iara igrei.

Hibru 10:35

Eghume, thosei ghatho peapea naugna God ginauna thofno tabadi iheire te loku famaku ka nodi fatutuani na te ghilei thoke ka narane leghu lahu.

Hibru 12:2

Fifilo kolho ka mae Jisas. Mana neke fatutuani ni God, eghuteuna kate eni igne mana neke batu ghita ka nabrou te mala fatutuani ni God na nei mana jaola toghoni noda fatutuani na ghilei thoke ka narane leghu lahu na. Mana neke lehe ka gaju fafatha na. Nu mana neke theome ghathoni u mamaja eigna u glehe papara ke kligna gaju fafatha igne, naugna mana tangomana te filoni thofno gleale'a ofoni teu mana. Eghuteuna mana gognaro gnokro fei nhetagna God mala funei fruni balugna mana.

Ululahu Pita 5:10

Uve, leghu fata na God togho ghami ghotilo ka nogna khokofakasai te biꞌo. Eghuteuna naugna ghotilo te nogna mae Kraes na, mana kilo ghami ghotilo mala hata balugna nafnakno biꞌo te au fabrahu tifa te tifa. Gognaro na ghotilo au papara katha vido kmoꞌei kolho, nu God ginauna togho ghami mala ke majaghani fapulo nakarhamire nei fadodoglo nomi fatutuani ghotilo na. Eghuteuna mana ginauna jaola tusu ranghi ghami nolaghi mala tangomana ghotilo te au heta fabrahu na.

Fapea Pita 3:10

Nu narane mala ke pulo meigna noda Lord na ginauna megei nga mei jateula kaisei mae te mala mei blau te theome laseni tahati narane meigna na ia eghu. Eghuteuna ka narane tuana kaisei naogla biꞌo na mei ka maloa na, eghuteuna maloa na ginauna luvu. Eghuteuna kaisei khaꞌaghi biꞌo ginauna ghamu fateo gobigna lepo te au ke lamnagna maloa na. Nauthoglu igne ginauna jaola dofini baludi gobigna lepo te au ke lamnagna re.