Eksodas 16:3 - Buka Blahi Ka Cheke Holo

³ Naiknore ne cheke eghu ka phia mare, “Jame te keli na Lord gne jame neke falehe ghami ghehati kolho Ijep. Au teku jare ia ghehati neke au ghemi kmana nafnata gano te magnahaghedi ghehati re. Nu ghopa ne atha mei ghami ghehati ka namono nagou te theo kaisei gano gna igne neu. Ba ghopa magnahaghei ghami ghehati te mei lehe agne sia? Jame au meu ghehati Ijep me lehe meu na keli!”

Eksodas 16:3 Iomraidhean Croise

Fapea Samuel 18:33

King nomhini igne ne thono diꞌanagnafa gna fara. Mana kegra haghe ne tei ruma ka kaisei chogho kligna ka grengathagna bara thina na ne tanhi eghu fabiꞌo, “Thuguo Absalom! Thuguo Absalom! Te keli na jame iara nga teke lehe tughu nigho iagho na. Theome iagho, thuguo Absalom!”

Thoutonu Eigna Mae Job 3:1

Aonu Job ne funu cheke fadiꞌa eigna narane teke karha mei mana tagna na.

Thoutonu Eigna Mae Job 3:10

Iara theome magnahagheni narane tuana naugna ne snakreni idogu iara na ne fakarhi ghau iara. Idogu iara fakarhi ghau iara mala au ke lamna puhi biꞌo.

Thoutonu Eigna Mae Job 3:20

“Naugna unha si God te snakredi iheire te au papara fara igre te mala filoni kolho naphae gnea?

Nodi Khoje Hatimare Mae Jiu 107:5

Mare rofo nei roi koꞌu, aonu, mare ne glaꞌe soru gaoghathodire.

Nodi Khoje Hatimare Mae Jiu 78:19

Mare ne ke cheke faparini God, ne ke cheke eghu, “God na theome tangomana te tusu mei gano te keli ka tahati ka namono nagou igne.

Nodi Khoje Hatimare Mae Jiu 78:25

Aonu God ne tusu ranghidi naba gano ne imani mare ghedi gano engel na.

Eksodas 14:11

Naiknore ne jaola ne cheke eghu ka mae Moses, “Iagho mala atha mei ghami ghehati agne mala lehe ka namono nagou igne neku sia? Ba, la ikohila si beku Ijep ia? Jame te keli na ghehati jame au neku kolho Ijep mala lehe kolho jare.

Eksodas 17:3

Nu naiknore ne thono rodi koꞌu fara ne nguru ngau fara ka mae Moses, ne cheke eghu ka mana, “Moses, mala unha neku neke atha ghami ghehati Ijep neke mei agne sagho ia? Ba, iagho atha mei ghami ghehati ka vido te theo khoꞌu gna igne mala lehe ghehati baludi thumi, nomi sipu nei nomi buluka teu igre ka groi koꞌu na neku sagho ia?”

Eksodas 2:23

Kmana finogha salaꞌu ke leghudi igre, king gna Ijep na ne lehe. Nu vikegna Israel igne ne diꞌanagnafadi fara fabrahu ka gloku biꞌo te edi mare re. Leuleghu fata na mare tanhi ka God, naugna mare magnahagheni fara God te toghodi. Eghuteuna nodi tharai mare na tei thoke ka God.

Eksodas 5:21

Aonu mae greireghi igre ne cheke eghu ka Moses ghe Eron, “Snakreni Lord mala para ghami ghopa eidi glepo te edi ghopa igre. Ghopa eni king nei nogna funei mana igre mala theome magnahaghei ghami ghehati jateula mae ihei te theome magnahagheni glepo te siri diꞌagna fara ia neu. Ghopa ei puhi ranghidi mare mala falehe ghami ghehati!”

Profet Jeremaea 2:6

Mare ghatho ihoni teke atha fajifladi iara ka kantri Ijep tifa ra. Eghuteuna iara neke batudi neke tei ke lamna namono nagou. Namono te theo kaisei khoꞌu nei theo kaisei naikno tagna. Neuba iara ne fakarhidi, mare theome ghatho ghau nei hiro ghau eghu iara.

Profet Jeremaea 44:17

Ghehati ginauna edi gobigna lepo igre jateula teke chekedihi ghehati ra eghu. Ghehati ginauna gahu insens nei tarai eghu ka god gaꞌase Kuin gna Kligna igne. Eghuteuna ghehati ginauna tofa waen fabrahu ka naꞌa, jateula teke edi kuꞌemi, nomi king, nei nomi mae mala baubatura. Mare neke edi glepo igre ka namono te gnafa agne Juda nei Jerusalem. Ka narane tuare tahati neke au gheda kmana gano neke au fakeli noda neke theome thoke ghita kaisei puhi biꞌo.

Lamentations 4:9

Mare theo ghedi gano ka nagare, eghuteuna mare thono rofo nodi fara. Te keli na mare nabadi te lehe na, jateula iheire te lehe ka magra ra eghu.

Naba 11:15

Eghuteuna jame te eghu fabrahu iagho puhi igne ka iara na, falehe ghau iara gognarola. Nu te reireghi ghau iara iagho na, thofno lisa ghau iara ka glehe mala theome thoke ghau puhi!”

Naba 11:20

Thono theo fara, mare ginauna ima nabagna kaisei nhigra. Neubane jifla ka nehudi, foflodi, ba ghilei babaꞌodi neu mare, mare mala ima nafnahi re ghilei gnafa. Puhi igne thoke ghami ghotilo naugna iara au ngala balumi ghotilo, nu ghotilo tiromi ghau iara, nei cheke fapari ghau neke cheke eghu, ‘Mala unha site jifla kokoni tahati Ijep gnea?’ ”

Naba 14:2

Aonu mare ne cheke balu diꞌatadi ka mae Moses ghe mae pris Eron, “Jame keli kolho teke lehe ghehati Ijep, ba ka namono nagou na!

Naba 14:3

Mala unha eghu si Lord te atha ghita tahati te tei ka vido tuana ia? Jame te age tahati na mare ginauna falehe ghita gnafa, eghuteuna mare ginauna atha khetoda, nei thuda teu tahati re. Te keli na tahati ke pulo kolho Ijep!”

Naba 16:13

Filo sagho! Iagho neke atha fajifla ghami ghehati ka famane namono Ijep mala falehe ghami ghehati ka namono nagou igne! Ne unha site magnahaghei funei ghami ghehati iagho gnea?

Naba 16:41

Ka keha narane na, naiknore mei ne cheke balu diꞌatadi ka Moses ghe pris biꞌo Eron ne cheke eghu, “Ei! Ghopa falehedi nogna naikno Lord re!” Eghuteuna kate cheke balu diꞌatadi te gnafa ka Moses ghe Eron na mare filo tei ka nogna Suga Tapuale te Blahi Lord na, ne filoni khoveo te toku tafru Suga Tapuale te Blahi na eghuteuna siasigla gna nogna nolaghi Lord na ne agha tongana ka vido tuana.

Naba 21:5

Aonu mare ne cheke eghu ka Lord nei ka mae Moses, “Ba, iagho atha fajifla ghami ghehati Ijep mala lehe ka namono nagou igne sia? Vido igne theo gano nei khoꞌu eghu tagna na. Ghehati theome gleꞌa kolho te au agne na, nei ghehati tiromidi kolho gano te diꞌa fara igre.”

Mae Khuru 26:29

Mae Pol ne cheke eghu, “Neubane vido kmoꞌei ba vido brahu, iara tarai ka God malamu iagho nei naikno te gnafa te fanomho teu ka iara agne gognaro gre mala jateula iara eghu. Nu iara theome magnahaghedi chen te au ka khamegu iara igre te ari ka ghotilo na!”

Ululahu Korin 4:8

Ba, ghotilo la hatahi glepo te magnahaghedire? Ba, ghotilo la mae dedeihi? Ba, ghotilo ulu ghami fara ghehati la king hi? Tutuani, iara magnahaghe ghami fara ghotilo mala king, ghehati jaola mala jateu king eghu balumi ghotilo! Kheraguro, iara cheke igre mala maꞌe kolho sigre.

Fapea Korin 11:1

Iara magnahaghe ghami ghotilo te snakre ghau iara te mala cheke jateula mae te meomekro eghu katha vido kmoꞌei. Tutuani, ghotilo la kulu snakre ghau iara te mala eni tuana!

Diutronomi 28:67

Gaoghathomi ghotilo re ginauna faꞌiho fara, naugna ghotilo mhaghu nomi fara ka glepo te filodi ghotilo re. Kate dofra haghe hamerane na, ghotilo ginauna magnahaghei fara teke romno na. Eghuteuna kate romno na, ghotilo ginauna magnahaghei fara teke phae na.

Diutronomi 8:3

Uve, mana neke magnahaghei te fariuriu ghami ghotilo neke rofo eghuteuna faghamu ghami ka ‘manna’, kaisei gano te theome laseni ghotilo nei kuꞌemi ghotilo tifa ra. Mana neke eni igne mala farirhiu ghami ghotilo te naikno na theome tangomana te karha ka gano kolho, nu tahati karha ka cheke te gnafa te mei ka foflogna Lord.

Josua 7:7

Ka vido igne, mae Josua ne tarai, “Lord iagho nomi mae funei ghehati! Naugna unha sagho te hata fakasa mei ghami ghehati agne ka Khoꞌu biꞌo Jordan igne te lisa lao ghami ka vikegna mae Amo igre te mala falehe ghami gnea? Jame te keli na ghehati au neku kolho ka keha phile Khoꞌu biꞌo Jordan.