Eksodas 1:11 - Buka Blahi Ka Cheke Holo

¹¹ Aonu mae Ijep igre ne lilisei keha mae mala reireghidi nei huhurudi eghu maedi Israel mala loku jateula naikno sneka eghu. Mare eni igne mala thofno paradi mare. Ka puhi igne mare huhurudi mare mala loku ka phei namono biꞌo Pitom ghe Ramese, aheva king te lilisei gano nei keha glepo eghu tagna.

Eksodas 1:11 Iomraidhean Croise

Jenesis 15:13

Aonu Lord ne cheke eghu ka mae Ebram, “Tutuani fara te chekeni iara na, thumu iagho gre ginauna na tei au ka nodi kantri keha naiknoi. Eghuteuna naiknogna namono te tei au mare tagna tuana ginauna paradi mare nabagna fati gobi finogha. Thumu iagho gre ginauna na mala sneka mala loku ranghidi mare.

Jenesis 47:11

Mae Josep ne leghuni unha teke chekeni mae king na ne toghodi kmagna nei thabusigna teure ne au soru Ijep. Mana ne snakre lao ka mare kaisei vido te keli ka nohi Gosen. Vido igne keli fara uludi keha vido te au jare Ijep.

Ululahu Kings 9:19

Eghuteuna mare jaola horo keha namono biꞌo mala lilisei gano, chariot mala magra nei hose. Eghuteuna mare jaola ne horo keha glepo te magnahaghei edi mana Jerusalem nei Lebanon, nei ka keha vido aheva te funei frunidi mana re.

Fapea Kronikols 16:4

King Ben-Hadad nomhini nogna cheke King Asa igne ne leghuni nogna cheke mana na. Aonu mana ne kurudi hatimare mae komanda balugna nogna armi na ne tei magra ka namono te au ke raru Israel. Eghuteuna mare ne uludi thilo namono Ijon nei Dan, nei Abel-Maem, nei namono te gnafa te mala lilisei glepo ka nohi Naftali.

Fapea Kronikols 8:4

Eghuteuna mana bara ne ligoho ka thina namono te au ka namono nagou Tadmoa. Eghuteuna mana chekedi nogna mae glokure neke babana fakeli namono Hamat mala lilisei gano nei glepo mala magra.

Nodi Khoje Hatimare Mae Jiu 105:13

Leuleghu fata na mare tugha tafri leuleghu namono neke theome au snoto ka namonodi na, mare jifla ka keha nohi na mala tei ka keha nohi na eghu tafri kolho.

Nodi Khoje Hatimare Mae Jiu 129:1

Tore! Ghotilo mae Israel ra, toutonu mei si ghotilo! Funu ka narane teke sneka mae ku'edara ka namono Ijep te ghilei mei posa gognaro gne, naugna unha si mae naoka gre te goigoni ghita tahati gnea?

Nodi Khoje Hatimare Mae Jiu 129:2

Funu ka narane tuana te mei posa gognaro gne, hatimare mae naoka gre ngolhi ghita nei goigoni ghita eghu tahati, nu mare theome tangomana te ulu ghita tahati na eghu.

Nodi Khoje Hatimare Mae Jiu 68:13

Neuba iheire teke au teku ka namono re, mare neke jaola neke hata famane glepo te keli teke uludi mare ka magra na.

Nodi Khoje Hatimare Mae Jiu 81:6

“Iarau ngala teke hata fadelei ghami ghotilo ka naꞌau papara ia. Uve, iara ngala teke hata fajifla ghau ghotilo ka gloku biꞌo teke eni ghotilo jare Ijep ia.

Eksodas 1:14

mala diꞌa salaꞌui fara nakarhadi re. Mare huhurudi naiknodi Israel mala loku ka brik, nei mala loku ka suga biꞌo ka namono na, nei mala loku ka nodi nagare, eghuteuna leuleghu fata na mare goigonidi nei tirodi kokhonidi.

Eksodas 2:11

Kaisei narane, kate rheta tela biꞌohi na, Moses tei ne sighodi kheragna mae Hibru gre, eghuteuna mana filodi maedi Ijep gre huhurudi mare mala loku heta fara. Ka narane tuana, mana ne filoni kaisei maegna Ijep ne puri fadiꞌani kaisei maegna Hibru.

Eksodas 3:7

Lord ne cheke eghu ka mana, “Iara la filo tathaguhi naiknodi Ijep te paradi fara nogu naikno iara igre. Iara jaola nomhidihi nodi natanhi re mala fakarhidi iara ka khamedi mae iheire te paradi ka gloku biꞌo jateula naikno sneka teu igre. Uve, iara filoni nodi na au papara re ne thono kokhoni nogudi fara.

Eksodas 5:10

Aonu mae funei baludi mae te reireghidi igre mala tei cheke eghu ka mae sneka igre, “King ne cheke eghu, ‘Ghehati ginauna nake theome snakre ari buburu moja ka ghotilo mala eꞌei brik.

Eksodas 5:15

Aonu mae greireghi igre ne tei ka mae king, ne cheke eghu ka mana, “King! Ghehati nou mae gloku iagho. Naugna unha sagho te fakokhoana ghami fara ghehati gnea?

Eksodas 5:8

Eghuteuna ghotilo cheke faheta ka mare, eigna mare mala edi jateula naba te sughu edi thedi mare tifa ra eghu. Mare theome mala kmoꞌe ka naba brik! Naiknore igre thodo fara! Naugna igne te mei tanhi mare ka iara igne, ‘Snakre ghami ghehati mala tei fafara ka nomi God.’

Proveb 27:4

Puhi te diꞌatada balu fangingiri na fakabrudi keha naiknore, nu puhi goghotu na thono diꞌa fara salaꞌuni puhi te diꞌatada na.

Naba 20:15

Eghuteuna ghotilo jaola lasedi kuꞌemi ghehati teke tei au Ijep tifa ra. Ghehati neke au jare kmana finogha eghuteuna ghotilo jaola lasedi eidi mae Ijep teke goigoni ghami ghehati.

Diutronomi 26:6

Naiknodi Ijep igre cheke fapari ghami ghehati, mare para ghami ghehati, eghuteuna mare huhuru ghami mala nodi sneka mare.