Eklesiasti 1:13 - Buka Blahi Ka Cheke Holo

¹³ Iara magnahaghei fara te lasedi unha teke edi naiknore ka nauthoglu igne. Eghuteuna unha teke filoni iara na, nakarha teke tusu mei God ka tahati igne thono tahu fara.

Eklesiasti 1:13 Iomraidhean Croise

Thoutonu Eigna Mae Job 28:3

Mae igre hata juta kate dokha te soru pari ke lamna glose na. Mare dokha tei pari fara mala hiro aean ke lamna glose te romno fara.

Nodi Khoje Hatimare Mae Jiu 111:2

Gobigna lepo te edi Lord re thofno keli fara, eghuteuna naiknore thono keli tadi fara ka nogna gloku Lord re. Mare magnahaghedi fara te lase fakelidi glepo igre.

Proveb 18:1

Mae te ghamu nhoto na ghathoni thegna kolho, eghuteuna mana tirognani gaoghatho te keli na.

Proveb 18:15

Mae te autagna gaoghatho te keli na, mana loku heta mala lasedi gobigna lepore. Mana tangomana te fanomho fakeli ka mae ihei te magnahaghei farirhiuni mana na.

Proveb 23:26

Thuguo, iagho famane fanomho fakeli ka iara. Leghuni kolho puhigu iara gne.

Proveb 25:2

Iagho ghatho tahuni God, naugna mana pophoru kmana glepo. Nu iagho ghatho tahunila mae lida na, naugna mana ne hiro dedi glepo igre.

Proveb 4:7

Gaoghatho te keli na glepo ulu fara, iagho mala hata. Neuba glalase te keli na ne ninhigrana fara, iagho mala jaola hata.

Eklesiasti 1:17

Eghume, iara fariu riu fara mala laseni gaoghathogna mae ihei te au tagna gaoghatho te keli na, nei gaoghathogna mae ihei te fameomekro na eghu. Nu iara jateula mae ihei te ngolho leghu ka nuri na ia eghu kolho.

Eklesiasti 11:5

Iagho theome laseni faꞌunha ne karha nga neu sua na lamna ka thiꞌagna idogna na teuna. Jateula tuana eghu iagho theome laseni nogna gloku God na, mae ihei teke vuavuhadi gobigna lepore.

Eklesiasti 12:12

Eghume, fiofilo fakeli nigho thuguo. Naugna te salofodu nei rioriso gaoghatho te keli teu ka buka na igre ginauna theome gnafa. Eghuteuna jame te hiohiro fabrahu iagho na, iagho ginauna kmusa.

Eklesiasti 2:23

Leuleghu narane na tahati huruhanga nei diꞌanagnafa eghu ka gloku te edi tahati igre. Tahati theome thuru fakeli bongi narane na. Nafnata nakarha igne jaola theo nafugna ka gaoghathogu iara na.

Eklesiasti 2:26

Leuleghu narane na God tusu lao gaoghatho te keli nei glalase eghu ka iheire te leghuni manare, mala jaola glealeꞌa mare. Nu God tusu lao gaoghatho ka naikno te diꞌa re mala loku heta mala hata kmana glepo te keli nei dedei. Eghuteuna keha narane ke leghu, glepo igre tangomana te tei toghodi naikno te keli re. Puhi igne jaola theo nafugna ka gaoghathogu iara na. Eigna igne jateula mae ihei te ngolho leghu ka nuri na ia eghu kolho.

Eklesiasti 3:10

Iara lasenihi glepo teke tusu mei God te mala eni tahati na.

Eklesiasti 3:11

Uve, God neke famane lilisei fakeli gobigna lepore ka thofno narane gna na. Eghuteuna Mana jaola farirhiu ghita mala lasedi tahati glepo teke edi mana tifare, nei unha nate edi ginaure. Nu tahati theome thofno lasedi glepo igre.

Eklesiasti 4:4

Eghuteuna iara jaola filodi thua nafnata nakmusa biꞌo nei thua glepo te keli eghu te edi tahati igre, naugna tahati goghotu ka nagnafadare ka unha te edi keha naiknore. Glepo igne jaola theo nafugna kolho, jateula ihei te ngolho leghu ka nuri na ia eghu kolho.

Eklesiasti 4:8

Jame kaisei mae au sopa thegna, mae igne theo thabusigna, ba thugna, nu leuleghu narane na mana loku heta fabrahu theome gnafa kaisei narane, naugna mana magnahaghei sileni biꞌo. Nu mae igne theome ghusna eghu ka thegna, “Mala toghoni ihei si gloku biꞌo te edi iara leuleghu narane te theome gnafa igrea?” Nafnata puhi te eni mana igne thofno diꞌa fara nei theo nafugna eghu kolho.

Eklesiasti 7:25

Eghume, iara neke fariuriu fara mala lasedi gaoghatho te keli nei mala hata thua nafnata glalase. Eghuteuna iara neke loku heta mala lasedi thofno gaoghathodi thua nafnata puhi te diꞌa nei puhi te fameomekro teu igre.

Eklesiasti 8:9

Iara filodi glepo igre kate ghathodi iara unha nafnata puhi te edi naikno ka nauthoglu igne. Keha fata iara filodi mae funei te paradi nei fadiꞌadi teu naiknore.

Ululahu Timoti 4:15

Edi fabrahu glepo igre. Eghuteuna naikno te gnafare tangomana te filoni nakarhamu iagho ka Kraes na bruara fara.