Efesas 3:9 - Mian

⁹ Gode inamin namino alukum klanebue baatnenea Kobo moneba ne weng olo sino ayok binobuo nakaia unangai alukum omkaye bianeba baabeneba Sinanggwano e weng olo ayok binabo otane memalo keimanobo ge baabenale ge baatnenebiobe.

Efesas 3:9 Iomraidhean Croise

Matyu 10:27

Ne inamin namino ayok baabei biamo ibo nakaia unangai kin dimo keim maniba weng olo omkeimabeine! Eka ibo inamin namin wengo ayok wentebib olo sinanomo taniba bib daang tam unaniba omkeimaine!

Matyu 13:35

Gode weng omkeimalin nakae Aisaiae Yesuse weng sango Gode buk temo dolanea baanea Ne wengo oyemang gamio saa weng ota oyemabibe. Sinanggwano Gode inamin namino klam tlebuosa memalosa inamin namin wengo ayok buo weng olo omkeimabenamabibo ge baanea dolanebuo Yesuse ina monseo weng olo yamo balinobiobe.

Matyu 25:34

eka Komok Sum ne kweile kweita sin dae blibi baabenia Ne Aye Gode ibo inamin namin ayamo daabenea omyebio kesoa ibo tlaniba bib unine! Sinanggwano dabale mema klane dimo bib olo klanea baanea Ibmibo genebio kesoa ibo bib olo kimanomabiobe.

Matyu 28:19

Ne titilsa kesoa ibo moniba bib mak bib mako alukum nakaia unangai ne wengo aleyebiba i ne okok aleyemin naka unang aniba Ay esa Miin nesa Hob esa ne niniin dimo aaye fuaye bianiba

Dowan Weng Olo Luke Dolanebuotabe. 24:47

eka naka maki e niniino mikiktemo Yelusalem bib seli sino omyenibta mitdata bib mak bib mak sel isa Gode Dofakamin Nakae Klaiste niniino omkeimaniba omkaye bianiba baabeniba Ib hengmino deiboniba ib bobol temo deskinaniba Gode omaliba e ib hengmino omtlabeneko ge baabenomabiobo genobiobe.

Dowan Weng Olo Yone Dolanebuotabe. 10:30

Nesa ne Ay esa ni dumo makob elekiemobo ge baabesea

Dowan Weng Olo Yone Dolanebuotabe. 5:17

Yesuse i weng olo tekein kene kesoa e baabenea Ne Aye Gode am obba ye bomanomo bomanomo yo dimo amitie okok kebianea eka singkalin am bomanomo dim osa okok kebianea nibo daaye binabe kesoa nesa inania okok kemabibo ge baabesebe.

Dowan Weng Olo Yone Dolanebuotabe. 5:19

Yesuse Yudai komokwali baabenea Ne bain baabenamabibe, Gode miin ne okoko nabio nene bobol tem funino mo okok kebibabe. Ne Aye okoko nabeo olota wateme biania nesa ming inanita okok kebibe. Ne Aye okoko nabeo e miin nesa olota nabibe.

Abosel 15:18

memalosa imin inangge baanebo ge baaniba dolaibbio

Fole Lom teni bainobo galini futano dola omfubesebe. 11:25

Sino Gode wengo atosino ayok bu otane memalo Gode e weng olo ne aletnene kesoa ne funania Weng olo ne nekwal isa baabeia wenteniba i bobol temo fumbianiba Ni tekein kemino sumobo galin bobol temo funino deibueine ge funai kesoa ne weng ayok olo ibo baabenamabibe. Memalo Yudai milimi Yesus Klaiste wengo mo bainobo geim blim bliobe. Ina otane Gode Yudaba nakaia unangai maki e dlakanebuei alukum Yesus Klaiste bainobo genimib dim ota Yuda nakaia unangai alukum Yesuse bainobo geiba Gode i hengmino temo blibo dotlanamabebe. Gode buk temo enangge baanoa Nakaia unangai i hengmino temo blibo dotlanamabe nakae Yudai bib sumo niniino Yelusalem bib da tlamabebe. E tenea Yekobe molobseli daabenamabe kesoa i Gode wengo imino mo omdibihamomabibbabe.

1 Kolin 2:7

Gode tekein kemin weng olo sino ayok binobu ota ne omkeimabibe. Sino Gode weng olo ayok bio kesoa nakaia unangai bainobo gabibbai mo wentemin blimobe. Sinanggwano Gode dabal ele mo klaim blim bie dimo e baanea Sinanomo nakaia unangai ne bainobo getnenimibi weng ayok olo kla tekein keniba bobol ayam fumbianiba amit ayam nomabiobo genebiobe.

Efesas 1:4

Sinanggwano Gode dabale mo klaim blim bianea nibo dlakanea funanea Sinanomo i Klaiste bainobo geniba e meletan animibo ne kin dimo i hengmin blimanomabiobo ge funane kesoa nibo dlakanebiobe.

Efesas 3:2

Ne funania Sino Gode ne baatnenea Kobo moneba Yudaba naka afet isu unaneba baabeneba Gode ibo daabenebiobo ge baabenale ge baatnenebio weng olo ibo sin wentibbiobo gabibe.

Efesas 6:19

Eka ibo nesa beten kene bianiba daanemine! Ibo Gode oha bianiba Kobo Fole daabaneba e keb dowan weng ayamo sino ayok binabo otane e memalo omkeimabe kesoa kobo keb wengo e omaleba e nakaia unangai weng olo omkayemang gameo e tosianino deibonea keim omkayemeko ge ohamine!

Kolosi 1:23

Ibo ib bainobo galino sbalma blib mole Klaiste inabenamabebe. Gode dowan weng ayamo baanoa Ibo Yesus Klaiste bainobo geib mole e dletnea moniba Gode bib ayamo amit nomabiobo genobio waisanomabiobe. Ibo sino weng olo wenteniba funaniba Bainobo, Gode inabenebiobo geniba bainobo geibbio kesoa ib bainobo galino sbalma bianiba inamin namin kukub misiamo ib dimo tam tlamo ibo tosianino deiboniba ib bainobo galino sbal maine! Bainobo galin nakaia unangai homoni moniba bib mak bib mako alukum Gode dowan wengo nakaia unangai omkayebiba Gode Fol nesa nemanea monia e dowan wengo nakaia unangai bib mak bib mako blibi omkayebibe.

Kolosi 1:26

Sino Gode wengo atosino ayok bua nakaia unangai alukum e weng olo mo wentim blim binibbi otane memalo e weng olo alukum keim anoa e bainobo galin nakaia unangai e weng olo wentebiobe.

Kolosi 3:3

Niminbabe, ib bobol tem funin ole dabalim olo bobol tem funinobe. Klaiste atdimo kaanea ib bobol tem funino sino wananea blimanobiobe. Ib bobol tem funino sin ole deiboniba ibtem Klaist etem naniba ib bobol temo makob aiba eka Klaist esa God etem naniba i bobol temo makob anaibbio kesoa e ib bobol temo kima biebe.

Kolosi 4:3

Ibo Gode nganhamibo ni bobol osa fumbianiba Gode baabaniba Kobo Folwali daaye bianeba i deibo klaubeneba moniba bib mak bib mako haabianiba Yesus Klaiste wengo sino ayok binabo otane memalo kobo alebenebbuo, weng olo nakaia unangai omkayemine ge ohamine! Ne sino Yesus Klaiste wengo nakaia unangai omkayebio dafa ota nakaia unangai teniba ne ge nemeb teniba klabutam ele daibbiobe.

2 Tesalonaika 2:13

Nekwal ibo Gode gobe bie kesoa ni am mak bomanomo am mak bomanomo ni ib bobolo fumbianoba Gode gangobo galomo! Niminbabe, sinanggwano e ibo dlakanea Sinanomo i hengmino temo blibo ne miine dotlanamabebo genebua e Hobe daabenea ibo e moton wengo bainobo geniba e meletan aibbiobe.

1 Timoti 3:16

Ne Gode weng olo sbal weng baabkenamabibe. Gode Klaiste wengo nibo omyebua nibo wafu biobo sino weng olo ayok otane Yesuse tenea omkeimanebio weng olo sum kesota ne weng olo baabkenamabibe. Gode e dabanea daakenea dabalim ele tlanea naka moton aneta nakaia unangai atemibbiobe. Gode Hobe Yesuse dofaanea imin hananea Gode nakaia unangai e alebenea i funaniba Bainobo, e Gode miinobo geibbiobe. Abisel isa atemibbiobe. Eka bainobo galin nakaia unangai moniba bib mak bib mak seli Gode wengo omkayebiba eka Gode wengo monoa nakaia unangai dabale monea dene dene isu osa onon tlanoa nakaia unangai mak isa Gode weng olo wenteniba bainobo gabinibbiobe. Gode Yesuse debeb utnea abilim ut danea bianea inamin namino alukum kima biebe.

2 Timoti 1:9

Gode nibo hengmino temo biobo dotlanea funanea I ne naka unang aine genea nganabenebiobe. E nibo nganabenebuo nib kukub nabobo mo kibianeta nganabeim blimobe. Yeye. E ele bobol tem funin ota wafu bianea nibo daabenea kukub ayamo omyebiobe. Sinanggwano Gode dabale mo klaim blim bie dimo e funanea Sinanomo Yesus Klaiste dabaia daaknea dabalim daak unea nakaia unangai daabenia kukub ayamo omyamabibo genebiotabe.

2 Timoti 4:17

Otane Sume ne daatnenea nemsbal mane kesoa ne Yesus Klaiste wengo alukum nakaia unangai Yudabai omkaye bia i e weng olo wentibbiobe. Eka i funaniba Fole ananoba kaaneko ge fumbib otane Sume ne daatnene kesoa i ne mo nenaim blimobe.

1 Fita 1:20

Sinanggwano Gode dabal esa abil esa inamin namin osa mo klaim blim bianea e Yesuse sin dofakanea funanea Sinanomo e dabaia daaknea nakaia unangai daabeneko ge funanebua memalo mubiang amo meb tebio kesoa e tlea nakaia unangai atemibbue ibo daayebea

Lebelesen 13:8

Nakaia unangai dabalimo blibi i niniino Gode dabale mo klaim blim bianea buko klanebuo temo mo bibebiobai kulan haleb ele niniino dobtouleb nomabiobe. Buk olo eil sibsib mene i anaiba kaanebue bukobe. Nakaia unangai i niniino buk olo temo bibebue ita amit nomabiobe. I kulan halebe niniino mo dobtouleb nomabibbabe.

Lebelesen 14:6

Eka abisak make ei tenea abile isak ut tlanea Gode dowan wengo amit nino nakaia unangai dabalim ele blibi mit mak afet isa eka weng afet isa eka aal afet isa alukum omkayemang gena bianea

Lebelesen 17:8

kobo kulan halebe atemeb ele sinanggwano binabe otane memalo blimobe. Sinanomo kwiam bil amite tamalaim blim amit holo unebue teme deiba utlea Gode dabanea monea bib misiam unanea watwat danamabebe. Nakaia unangai dabalimo blibi i niniino Gode dabale mo klaim blim bianea afen smik buk olo klanebuo temo mo dolabeim blimi kulan haleb ele atemniba bobol tem hekhek funomabiobe. Sinanggwano kulan haleb ele binabe otane memalo e blimanebe. Sinanomo e imin tlea i smiko deibe unamabobe.

Lebelesen 4:11

Kobo God ni Sumobo, keb kukubo ayamobo, ni keb niniino kemtouleb nob mole ayamobe. Ni oke bianoba Kobo naka sbalobo ge okemob osa ayamobe. Eka ni oke bianoba Kobo Sumobo ge okemob osa ayamobe. Niminbabe, kobo inamin namino abilim uto bu osa eka dabalim olo bu osa klanebbiobe. Kleb bobol tem funin ye funaneba Ne inamin namin olo klanano geneb kesoa inaneba klanebbiobo ge ngambibta yatemibe.