Solomon 7:12 - Godigo dwagi yai po buku

¹² Te kigamu digi mu te da hogodasa peyu, te wain ni dabe sueibao. Te augwali kulubi pedelama, te augwa yabe diligi naniwe, ma meniwe, te homu ebao. Tama dago te nai du wiegi yai walobo ni dabe sueibao. Te augwa plaua dabe diligi naniwe, ma meni yaliwe? Da te wain gide bidalu, te eno te tiwai nagebolo ola mobaso, te eno nage godolo mu eba homu yagameo.

Solomon 7:12 Iomraidhean Croise

Godigo Nogi Ugwaba Sabo Tęąbi Po Wabo Buku Dabe 122:5

Te pesagede te po tų ebo be elalubao, tama Israel king dabego te we bidigo po tų odolama, tama po dodoliyu ebo dao.

Godigo Nogi Ugwaba Sabo Tęąbi Po Wabo Buku Dabe 43:4

Tama tialima, ena te God, nago alta sai teba paibao. Magi baso meni, nago ena wiegi yai haliga iliyu, te pemene ilibo dao. Nage eno God da, te eno gita selama, te musik weyu, tama nago nogi ugwaba sabo tęąbi po naga waibao.

Godigo Nogi Ugwaba Sabo Tęąbi Po Wabo Buku Dabe 73:25

Te gasa de te dagalude bidiyu, tama ena tonalubo dawe? Te gasa bidi me meni, naga deli naga dao. Tialima, God, eno nage godolo mu ebao. Eno te tigidali tǫde nai wei ebo tiwai gilama me ebeo.

Ma Dobola Sali 25:22

Tama ena nage dali te dwai sęgę sela sąbo buluba sisinaibao. Tama ena te mobo bidi si daidu tomode ugwadu bidiyu, tama nage dali da si deliba sisinama, tama eno te bomo yai po tigidali nagebolo pusaibao. Tama nago te bomo yai po te Israel we bidi dabe augwalibolo menama, tama augwaligo wali pomainao,” wali.

Bugagia Bidibo Kolesagade Po Asęai Buku 8:17

Tama mena we bidi dabego ena gegebo sę bomo eyu da, teda augwaligo ena sueibao. Mena we bidigo ena wei yali da, eno me te eno augwali wei mu yaibao.

Kolesaga Koneai Bidigo Pusali Po Elalubo Buku 9:10

Te nago sę me deli ebaso da, teda nago sągą dili tǫde dąų walama dolalu, te sę mu tama yao. Magi baso meni, te nago sę me isiąyu, ma homu kolesagade kone paliyu, ma te wiegi yai homu kolesaga konea sabo sę te isali bidi dabego bulude me egobeo, te nage pabo bulude te tama sę dabe me egobe dao.

Solomon 2:13

Te ni kaya du walobo gagalali. Te buside tigidali bonogo duduli pedelama, tama te plaua dabego wiegi yai denami ebao. Eno sawia pai we abagi mu, nage buluba teda asao, tama nage ena dali asao.

Solomon 2:15

Te dwasianu bulu uni yowi dabe nogo pageabi elama, tola sao. Tiyu, augwali dago gi tomoba aselama, te wain ni duduli walobo plaua dolidalio,” wali.

Solomon 4:13

Nage te wiegi wiegi yai ni du dabe te wiegi yai gide elalubo tiwai da. Te ni mebade wiegi yai nai elalu, te meba nedu dude wiegi yai denami elalubao. Mebago te wiegi yai sanda nigiyu, te mebago naiba munama, pusu ilaibao. Mebago te tobage au dogia pabo nai dabe nigibadi, te mebago wiegi yai denami hano ilibo pauda nigaibao.

Solomon 4:16

Not badu wali, nage asao. Saut badu wali, nage aselama, eno gi waligo mesega sagasobaso, te tigidali pesage te gi habu te wiegi yai denamigo pągąną saibao. Tama eno te godolo mu ebo abagite aga giba aselama, tama te wiegi yai nedu du dabe tuagasomainao.

Solomon 6:11

Ena dulama, tama ena te du wiegi yai walobo ni dabe elalubo giba asali. Ena asali, te gesi kulubi dabe te ni dabede te bulu odogode holobo sueinogo asali. Eno te ni waingo gesi kulubi dabe, me te nai du walali wiegi yai elalubo te eno sueinu yali.

Solomon 7:11

Eno abagi wali bidi, nage ena dali asao. Tama da te dwasianu bulu dabeba bidigi pinao.

Solomon 7:6

Eno abagi we, nage gasa sawi yai we mu da. Eno nage godolo mu ebao, te nago tigidali naigo ena pemene ilibo dao.

Aisaia 18:5

Te mu tama, megi te bulu te ni wain bomona holama, tama dudili elama, tama telega pelama, te wain du tau yabo magą ebo tiwai dao. Tialigo Genuai Bidigo te bulu dolaibao, te bidigo sębę elama, te ni wain nologo te wain du tau isąbadi toga sabo tiwai yaibao, te nedu du sabo magą isąbadi toga sabo tiwai yaibao.

Godigo Sęba Tagala Palai Bidigo Po 15:36

Te nosali me badu polua silama, Pol agai Barnabasbolo e tama po walali, “Dadi si ma pelama, dadi sigo Genuai Bidigo po polobadu pusa mani we bidi augwali Godigo po bugagia wali pabo wenama, sugi pinao,” te po wai.

Polgo Po Pas Rom Dabeba Asęani 5:11

Tama tede naga me egobeo. Menio. Dago Genuai Bidi Jisas Krais agai da te God dali deli homu pedalumainogo ilali, tama agai te yali sęde te megi dago Godibolo wiegi yai homu pemene ebo dao.

2 Korin 13:5

Dagego sesemane sogo duga digi duga homu usu sela suyu, te duga homu tigidali Kraisba munama agaba homu tialubowe, ma meni yani, te bugagia koneao. Duga digi duga dagalao. Te bidi Jisas Krais dagego homude bidibo te dagego konebewe? Te meni wida, teda dage usu selama, te usu niba kadu wabeo.

Efesus 6:24

Te eno homugo me, Godigo agai olo tau mabo kolesaga te dago Genuai Bidi Jisas Krais godolo mu eyu aga me tagalisąbo we bidi dabe tebolo te olo tau mabo kolesaga mao. Tama dao. Ena da, Pol da.

Hibru 12:15

Te ama me deli tula muyu tama Godigo te olo tau siyu mabo kolesaga tagalidali weyu dagego bugagia tonaluao. Tama tiyu dage tomode pedalobo ama me deli aga te ha ebo nedu du tiwai walama, tama dagebolo sęgę menama, tama dage God gedude meda yai pedelabuo.

Hibru 2:13

Tama agai po ma wali, “Te eno digi agade konealubo homu mu dąų waibao.” Tama agai po ma weyu te po wai, “Ena digi bidibo, suao. Tama Godigo ena mani we bidi dabe, augwali me ena dali bidibao, te wai dabe tiwai bidibao.”

Hibru 2:15

Te we bidi augwali isibode wi yai. Tama augwali te tǫde bidali tigidali sogo, te isibode wi ebogo augwali kalabus elaluai. Tama augwali te kalabuside bidibo sela sąwainogo eyu, Jisas aga e tǫde isai dao.

Hibru 4:16

Tama dago te tobage genuai pris tobolu bidi elalubaso, da te dwagi yai homu eyu tama God pąba pao, te da wi me egimio. Aga da te olo tau siyu wiegi yai kolesaga mabo bidi dao. Tama da agaba peyu, tama agai da homu dene ebo homu eyu te da tau saibao. Tama dago sęgę elalubaso da, teda agai te olo tau sabo wiegi yai homu kolesaga ebogo te da tau saibao.