Sekaraia 4:2 - Godigo dwagi yai po buku

² Tama agai enabolo e tama po hanalu wali, “Nago magi nai subawe?” Tama eno te po wali, “Eno gol ni dage wel muabo dis ugwadu daide elalubo eno subao. Tama nogo a naga olama me badu nogo si, te 7 gol lam ni dage dagana sai elalubo subao. Tama tigidali lam deli deligo te disde wel sabo paip elalubao.

Sekaraia 4:2 Iomraidhean Croise

Tuni Bidi Dabego Po Elalubo Buku Deli 28:15

tama te sole lam dabe me, te lam ni dili muabo nai dabe me,

Tuni Bidi Dabego Po Elalubo Buku Si 13:11

Te tigidali sogo kigamu me pio augwaligo isigo dela silibo ofa eyu, me augwaligo wiegi yai denami ebo pauda dabe ulama, Genuai Bidiba denami holiyu ebo dao. Tama augwaligo Godibolo te ofa tiwai mani te bret siyu ebo dao, tama augwaligo te bret te Godigo gedude doloba pai elalubo tebolba mugi peyu ebo dao. Tama tigidali sogo pio augwaligo lam sole udalobo dao, augwaligo te golgo nigali te lam ni dagede udaliyu ebo dao. Dago Genuai Bidi dena Godigo po wali pabo dao, tama te sę dabe tama ebo dao. Tiali goli dage da, menio, dagego aga tudiba mu ola manio.

Tuni Bidi Dabego Po Elalubo Buku Si 4:7

Tama augwaligo gol selama, tama lam sole walabo bobobage nai geselali. Te lam sole walabo te bobobage nai nigibode bomai po elaluali. Augwaligo bugagia wali pelama, tama augwaligo te lam sole walabo nai dabe nigali, augwa te bomai pode elaluali kolesagadu bugagia wali pali. Tama me augwaligo nogo si 10 tebol sai geselali. Tama augwaligo te tebol me lam dabe augwaligo Genuai Bidigo tempel be tomode te Tedali Gasagi Yai Be Habude muani. Te tebol a naga ebadi me lam sole walabo bobobage nai a naga ebadi augwaligo not badu polo badu te be habu tomode muani, tama te a naga tebol me lam sole walabo bobobage nai dabe me augwaligo te saut badu polo badu muani, te be habu badu, te be tomode. Tama augwaligo gol selama, 100 dis pou nigali.

Kolesaga Koneai Bidigo Pusali Po Elalubo Buku 12:6

Dage isisąbadi, dagego Godiba homu kone paliąo. Dage isibo sogo, te wiegi yai lam sole ula sia sabo tiwai yaibao, te silvago nigai sen toga peyu, ma te golgo nigai pou dis alua pabo tiwai yaibao. Tama te ulu ąį dedagede ugaba kekebo dwasianu nai winis toga peyu, tama te ąį tuali tǫgo nigali sospen tulaluama, alua pabo tiwai ebo dao.

Jeremaia 24:3

Tama Genuai Bidigo enabolo te tiwai po wali, “Jeremaia, nago magi nai sualiwe?” Tama eno te tiwai po wei ponani, “Eno te ni kaya fik du wai sualio. Te wiegi yai fik du te wiegi yai mu elalubao, te kaya fik du dolali te mu dwalio, te bidigo tuabo usu egobeo,” wali.

Jeremaia 52:19

Tama Nebusaradango te bidi dabego gol me silvago nigali nai dabe me sali, te dwasianu pou dis dabe, te sia sela pabo pou plet dabe, te ofa ebo nai kaneme mubo pou dis, me sospen dabe, me te ni dilide udalubo lam dabe, me te wiegi yai denami ebo pauda ulubo pou plet dabe, me te ofa ebo wain dabe muani pou dis dabe, te tama tigidali nai sela palio.

Amos 7:8

Tama agai enabolo te tiwai po hanalu wai, “Amos, nago magi nai sualiwe?” Tama eno te po wali, “Te be dodolabo ain elalubo hobi me deli suali.” Tama agai enabolo te tiwai po wali, “Odao. Eno te hobi tolalubo sę ebo te eno ena we bidi augwaligo ebo kolesaga sueinu ebao, te eno augwali suali, te be daga dolo dolalusąbo tiwai suali. Tama tibaso, eno augwaligo dwai kolesaga wei ponaibao homu eyu, te eno homu ma hasegelabo usu egobeo.

Sekaraia 5:2

Tama ensel bidigo enabolo e tama po wali, “Nago magi nai subawe?” Tama eno te po wali, “Eno buku me bola pabo subao. Tama te buku bobobage te 10 mita usu nama, me agai genuai te 5 mita usu nama,” wali.

Kraisgo Geme Dualali Sę Pedelabo Po Jonbolo Ola Mani 1:12

Tama enabolo te po wali bidi eno begelama suainogo yai. Tama ena gesabidi begelai, tama eno suali, te kapa nogi gol, te golgo nigali lam sole a naga olama me badu nogo si tama munalubo suali.

Kraisgo Geme Dualali Sę Pedelabo Po Jonbolo Ola Mani 1:20

Tama nago eno dolo nogode te hǫ a naga olama me badu nogo si elalubo suali. Te lam sole gol a naga badi me si tama te me nago suai. Tama te nai dabe geme dualali page e dao: te hǫ a naga olama me badu nogo si wali, te Godigo po wali pabo bulu a naga olama me badu si te bulude bidibo we bidi tau sabo ensel mobo bidi dabe dao. Tama me te a naga olama me nogo si te lam sole po wali, te a naga olama me badu nogo si Godigo po wali pabo we bidi hani dabede po begelama weyu,” agai te po wai dao.

Kraisgo Geme Dualali Sę Pedelabo Po Jonbolo Ola Mani 4:5

Tama te tomode bidibo genuai tuni bidigo duabo digide te be sele eyu, tama be kulu kulu wai, te moni u wabo odai. Tama te tuni bidigo gesabidide te sole a naga olama me badu nogo si te ula elaluai. Te sole ula elalubo te Godigo mobo bidi a naga olama me badu si dao.