Kraisgo Geme Dualali Sę Pedelabo Po Jonbolo Ola Mani 4:5 - Godigo dwagi yai po buku

⁵ Tama te tomode bidibo genuai tuni bidigo duabo digide te be sele eyu, tama be kulu kulu wai, te moni u wabo odai. Tama te tuni bidigo gesabidide te sole a naga olama me badu nogo si te ula elaluai. Te sole ula elalubo te Godigo mobo bidi a naga olama me badu si dao.

Kraisgo Geme Dualali Sę Pedelabo Po Jonbolo Ola Mani 4:5 Iomraidhean Croise

Tigidali Nai Gagalama Nigali Side 15:7

Tama Yawego Abrambolo te tiwai po wai, “Ena Yawe dao. Eno nage i obaso, te naga bidali bulu Ur te Kaldia tǫ pedaide bidali te taga soai. Eno tama tiali, eno e tǫ nagebolo mawainogo yali, tama e tǫ nago tǫ mu pedelaibao.”

Tuni Bidi Dabego Po Elalubo Buku Si 4:20

Tama me augwaligo te gol selama, tama augwaligo lam dabe geseliyu me te lam walabo bobobage nai dabe me geselali, te Tedali Gasagi Yai Mu Be Habu pąde muabo madi geselali. Te lam walabo bobobage nai dabe geselabo sę yabode po te bomai po te elaluali. Tama augwaligo bugagia wali pelama, tama te lam walabo nai dabe geselali.

Godigo Nogi Ugwaba Sabo Tęąbi Po Wabo Buku Dabe 68:35

Te Israelgo God te aga wiegi yai tedali bede bidibao, tama dago te Godide wi yao. Agai te aga we bidi dabeba te genuai bomo mobao. Te God nogi ugwaba sao.

Ma Dobola Sali 19:16

Tama bidama, te sela sogo wabo side kigamu, te genuai pǫ te bulu dude pedelali, tama te pǫ kulukulu olama, tama be sele ula pepeda pelama, tama bu wabo nai biugel gela genuai mu wai. Tama te bulu du sesegede pesage nigali we bidi dabe tigidali wi mu elama, tama augwali tigi didibili yai.

Ma Dobola Sali 20:18

Te we bidi augwaligo te pǫ kulukulu wabo, me te bu wabo nai biugel gela wabo me odai. Tama augwaligo te be sele te pǫ ula ebo ugwaba peyu, eda asiyu eyu, tama genuai hano te bulu dude pedalobo sulama, tama augwali wi mu yai. Tama augwali kilasa ma pelama, te bulu du digibulu gana dolalugi pai.

Ma Dobola Sali 25:37

Tama dagego te lam a naga olama me badu nogo si nigilama, tama augwali te lam tolalubo naiba muao. Tama augwali te bugagia wasilama, augwaligo ula te ugwa be tomoba pomainao.

Ma Dobola Sali 37:23

Tama augwaligo te gol nogo a naga olama me si lam genagi nigilama, tama selama, te lam tolaluabo naiba muainogo nigali, tama te lam genagi deli deliba muabo hobi, me te plet meba badi, te tama nai nigai dao.

Esekiel 1:13

Te nai dabego kolesaga te tama elalubao. Eno suali, te nai dabego ula te isi ula me sole tiwai ula te bidi tiwai nai me si me si tomode iba peyu, eda asu yali. Tama te sia bogoli genuai pedelama, te be sele ula te isi pedelama, te pepeda pabo sę ela palio.

Joel 3:16

Genuai Bidi te Jerusalem te Saion bulu dude bidiyu, te po dagą genuai mu waibao. Agai i wabo te dagalu kulukulu wabo tiwai obaso, te tǫ dali dagalu si mumunu yaibao. Tiali goli, Genuai Bidigo te aga we bidi tigidali tonalu, te augwali me dologobeo.

Sekaraia 4:2

Tama agai enabolo e tama po hanalu wali, “Nago magi nai subawe?” Tama eno te po wali, “Eno gol ni dage wel muabo dis ugwadu daide elalubo eno subao. Tama nogo a naga olama me badu nogo si, te 7 gol lam ni dage dagana sai elalubo subao. Tama tigidali lam deli deligo te disde wel sabo paip elalubao.

Matyu 25:1

Jisasgo te po wai, “Te aga ma asobo sogo te Godigo we bidi tonalubo madi tomoba painogo ebo we bidi augwali te wegi mani nogo si tiwai dao. Te bidi me deli megi tama we sabo bidi, aga asaiba wali. Tama te gesi wegi mani augwaligo augwa lam sole selama, tama augwali te gege peyu, te tųdu tiąba pelama, tama aga odasa asainogo yai.

Matyu 3:11

“Te eno dage olo ąįgo baptais mabo te dage homu begelai elalubo te dąį tiwai dao. Tiali goli ena tudi badu nosali asobo bidi, te agai bomogo eno bomo aiyaba elaluaibao. Ena da, te wiegi yai bidi meni, tama tiyu eno agai sągą nadoba tolabo te usu egobeo. Agai dage te Godigo Tedali Mobo Bidi me te sia dali si dagebolo mawaibao, te baptais mabo sę tiwai.

Godigo Sęba Tagala Palai Bidigo Po 2:3

Tama augwaligo te nai dabe suali, te dwasianu sia bogoli dabe tiwai, bidigo hamena gagawai dabe augwaligo suali. Tama te nai dabe pebeda pelama, bidi deli deliba pelama, dią yani.

Kraisgo Geme Dualali Sę Pedelabo Po Jonbolo Ola Mani 1:4

Ena Jon, eno e po dage a naga olama me badu nogo si te Godigo po wali pabo we bidi hani, dagebolo e po asęna tolobao, te dage te genuai tǫ Esia te genuai hanu dabede bidibo we bidi. God aga te megi bidibo, tama polobadu mu aga bidaluai, tama nosali aga ma asiyu, tama eno homugo te God agai da olo mu tau sabo te kolesaga dali, tama te dwagi yai homu nagame ilibo kolesaga dali te si dageba mao. Tama eno homugo te a naga olama me badu nogo si mobo bidi augwali me, te tuni bidi God aga au yali duabo sia sai pąde bidibo bage, augwaligo me te dwagi yai homu eyu olo tau sabo kolesaga dali, te dwagi yai homu nagame ilibo kolesaga me dagebolo mawaibao.

Kraisgo Geme Dualali Sę Pedelabo Po Jonbolo Ola Mani 10:3

Tama agai i bomonama weyu, te bulude bidibo moni hudigi ebo kibu nogi laiongo gaa moni bage wabo tiwai yai. Agai te i wabode, tama a naga olama me badu nogo si te dagalu pǫ kulu weyu wei ponai.

Kraisgo Geme Dualali Sę Pedelabo Po Jonbolo Ola Mani 11:19

Augwaligo po ola silama, tama augwaligo te Godigo dagalude elalubo Moni Lotu Be tempel te be tų dawai. Tama polobadu Godigo te Israel we bidi dali po dąų olama, tama augwaligo te asęani po te halobage me deli tomoba muani. Tama te halobage te Lotu Be tomode munalubo eno hania suali. Tama te sogo tama te be sele eyu, tama moni u wabo me, te be kulu wali me, tama tǫ mali ebadi, te kedau ebo nai talua ge tulubage hauwa te dagaludu tǫba tulaluai.

Kraisgo Geme Dualali Sę Pedelabo Po Jonbolo Ola Mani 3:1

Te bidigo enabolo po me ma wai, “Te megi nago te Sardis bulude Godigo po odoyu bidibo we bidi tonalubo ensel mobo bidibolo e po asęna tolao: eno te a naga olama me badu nogo si te Godigo mobo bidi dabe elaluyu, tama eno te a olama me badu nogo si hǫ te eno nogogo tolalubo dao. Tama ena digi eno e po nagebolo ola tolobao. Tama nago ebo kolesaga tigidali te eno koneai. Gasa we bidi augwaligo te po dagede wabo dao, ‘Te Sardis bulude bidibo Godigo po odobo we bidi hani augwali bomo elama, wiegi yai kolesaga wali peyu bidibo dao,’ augwaligo dage dali te po wabo dao. Tiali goli menio, eno gedude dage isai bidi tiwai dao.

Kraisgo Geme Dualali Sę Pedelabo Po Jonbolo Ola Mani 5:6

Tama te sogo eno suali, te kibu sipsip wai dolalubo suai, te augwaligo aga hwągo ela muai subo tiwai homu yai. Tama aga te genuai tuni bidi duabo nai dali te bidibo ula elalubo hasa me si me si te pąde aga dolaluyu, tama te polalubo tobolu bidi dabe tomode bidai. Tama agai te bulmakaugo tobolude elalubo gąų tiwai te a naga olama me badu si badi, te agai gedu me te a naga olama me badu nogo si elalubo. Tama te gedu dabe augwali te Godigo mobo bidi a naga olama me badu nogo si dao. God agai augwali te tigidali tǫba tagala palai dao.

Kraisgo Geme Dualali Sę Pedelabo Po Jonbolo Ola Mani 8:5

Tama tilama, te ensel mobo bidi agai te denami yai nai muani pou selama, tama agai te nai ulali saide sia dage te poude pągąnama, tama agai te sia tǫba aiya sąwai. Agai te sia sąwai digi, tama te dagalude be kulu kulu weyu, genuai po me weyu, tama dagalude be sele eyu, tama tǫ mali yai.