Kraisgo Geme Dualali Sę Pedelabo Po Jonbolo Ola Mani 14:6 - Godigo dwagi yai po buku

⁶ Tama eno suali, gasa ensel mobo bidi te dagalu tomodu sigide mu bola soabo eno suali. Agai te sesemane bidada pabo wiegi yai gesi po elaluai, tama agai te po te tǫde bidibo we bidi augwalibolo pusubo sę elalubo dao. Agai te wiegi yai gesi po pusubo sę te tigidali tǫde bidibo we bidi hanibolo te po pusubo sę eyu, tama te tigidali haniani tigiwali yai bidi dabe dali, tama tigidali haniani hani bidi augwalibolo te wiegi yai gesi po pusubo sę elalubo dao.

Kraisgo Geme Dualali Sę Pedelabo Po Jonbolo Ola Mani 14:6 Iomraidhean Croise

Tigidali Nai Gagalama Nigali Side 1:6

Nosali Godigo te po wai, “Te wę ugwaba sagolabo dąį me deli pedelama, te wę si badu elalumainao,” wali. Tama te nai pedelali.

2 Samuel 23:5

“Tama Godigo te eno hani sibi bomo ilama, bidimainu ilali, magi baso meni, agai te bomai po me deli te ena dali dąų wali, tama agai te dąų wali po te togolama, me ma bologobeo. Menio. Teda te dąų wali po te sesemane sogo elalueibao. Te eno godolo ebo nai tigidali, te Godigo ena mawaibao. Tama agai te ena te sesemane sogo ugwaba ela holomainu ilali.

Godigo Nogi Ugwaba Sabo Tęąbi Po Wabo Buku Dabe 119:142

Te nago doloba pai kolesaga sesemane sogo elalua pidu bidaibao, tama sesemane sogo nago bomai po te mu naga dao.

Godigo Nogi Ugwaba Sabo Tęąbi Po Wabo Buku Dabe 139:24

Nago ena bugagia dagalao, tiyu te tibo homu meba enade elalu idalio. Tama nago ena te bidada pabo ula sabo sunumidu odasa pao.

Godigo Nogi Ugwaba Sabo Tęąbi Po Wabo Buku Dabe 145:13

Tama nage te tuni bidi bidiyu, tama tigidali we bidi sesemane sogo nago tonaluyu, bidada peyu, bidada paibao. Genuai Bidi Godigo agai aga we bidi dali dąų wali po wali naga pabo dao. Te agai me deli tagalobo menio. Agai wiegi yai sę naga eyu, da tau siyu ebo dao.

Aisaia 40:8

Te nosai wa pelama, te plaua dabe boga selama, tulalueibao. Tiali goli, te dena Godigo po da, te sesemane elalua pidu, elalua paibao. Te po pusao,” wali.

Aisaia 45:17

Tiali goli, Genuai Bidigo dage Israel ma selama, te sesemane sogo agai dage ugwaba igulama, ugwa ela holomainu ilaibao. Te dage gasa we bidi hani dabede munu ma hale me isąma, te dage sesemane sogo bugagia bidada peyu, bidada paibao.’ Te Seba tǫ kantri bagego te tobage po waibao,” Genuai Bidigo te po wai.

Aisaia 51:6

Dagego te dagaluba ugwaba tonoyu, te tǫba aiyaba tonoyu yao. Te dagalu tigidali te hano sia sabo tiwai mu yaibao, tama tǫ te gudubo ugwa dolobo tiwai yaibao. Te tigidali we bidi te dinai sibi isila pabo tiwai yaibao. Tiali goli, eno te we bidi tau siyu, ma sabo kolesaga, te sesemane sogo elalua pidubadi, te me sia sogobeo,” wali.

Aisaia 51:8

Te hani dabe te ugwa asobago tologolama, te silibo tiwai eyu dolaibao. Tiali goli, eno te we bidi dabe tau siyu ma sabo kolesaga, te me sia sogobeo. Menio. Te sesemane sogo elalua pidu elalueibao,” wali.

Aisaia 6:2

Tama geninama ensel sibigo aga bagua sai elaluali. Te tigidali deli deli ensel dabego bogo a naga olama, me badu nogi deli naga elaluali. Tama deli deligo augwa bogo me sigo augwa gesabidi halua siyu, ela pai suali. Tama gasa bogo me sigo augwa tigi mesega siyu yai yali. Tama gasa bogo me sigo da, augwali bola peyu yali. Te ensel sibi da, te isi ula tiwai.

Esekiel 1:14

Tama te me si me si bidi tiwai nai dabe te polo asesa iba peyu, eda asu yalio, te be selego ula tiwai yai dao.

Daniel 4:1

Te King Nebukatnesargo po te tigidali bulu tǫ pedai we bidi dabeba me, te tigidali haniba me, te tigidali haniani po wabo bidi haniba te po ola tolali. Agai po te tiwai, “Dage tigidali bugagia bidaluiąo,” walio.

Daniel 9:21

Eno gedu haluasa po odubadi, tama te ensel Gebriel, eno te hasia yali nade suali, te aga bola dulu, te ena bidibo pesageba asali. Tama te sogo, te dago polobadu iduali te pio ofa ebo sogo dao.

Matyu 10:27

Tama te hulide eno dagebolo ola mabo po, te po dagego te giligade we bidibolo pusao. Tama dagego te olode duadigi odali po, te dagego te be daiba holama, te po augwalibolo pusao.

Dwagi Yai Gesi Po Makgo Asęani 16:15

Tama agai po augwaliba weyu, te po wai, “Dage te tigidali tǫ habu pedaiba pelama, tama te enade gesi wiegi yai po te tigidali we bidiba pusa mao.

Polgo Po Pas Rom Dabeba Asęani 16:25

Dago Godigo nogi ugwaba mu sinao. Eno aga gesi wiegi yai po pusubogia tama God agai dage te Kraisde homu kęą pai we bidi mu dąų wabo usu yaibao. Te wiegi yai gesi po te Jisas Kraisde elalubao. Tama polobadu tigidali sogo te po te geme dualali po geme dualaluali,

Kolosi 1:23

Tialima dage, dagego bomo elama, te Godigo gesi dwagi yai pode homu kęą pai we bidi bidiyu tama dolaluao. Te bugagia sę yai be aga tǫba tuluali ni tigi augwali te tǫde mu dąų obaso, te be peme egobeo. Te tiwai me dagego duga homu agai pode kęą pai we bidi bidao. Dagego polobadu te po odoyu, tama te Godigo dagebolo nosali maiabo naide dagego dwagi yai homu eyu tonalubo gagalali. Megi dage te tonalubo kolesaga tagaligio. Te gesi dwagi yai po augwaligo tigidali tǫde we bidibolo pusigi pai dao, tama ena Pol, ena te gesi dwagi yai po pusubo sę ebo bidi pedalai dao.

2 Tesalonaika 2:16

Te dago Aya God agai da dali dwagi yai homu eyu, da godolo mu ebo dao. Tama tiyu, agai da olo mu tau siyu, dago homu kolesaga dwagi yai eyu, sesemane sogo bidada paibao. Tama agai da olo mu tau siyu, tama Godigo da nosali bugagia bidimainogo yaibao, da tonaluyu bidibo dao. Tama dago homugo dago Aya God dali, dago Genuai Bidi Jisas Krais dali, augwali sigo dagego homu kolesaga bomo dąų walomainao, tama dage tau sao, dagego tigidali dwagi yai kolesaga eyu, tama dwagi yai po naga omainogo yao. Dago homugo tama timainogo ebao, tama tibaso dago gedu haluasa po obao.

Hibru 13:20

God aga te da we bidi homu nagame ilibo page bidi elalubao. Agai te dago Genuai Bidi Jisas te gų pagede ma hodolama, tama aga ma bidimainu ilali. Hasia Jisasgo aga digi bidibo ula olo mayu, tama Godibolo ofa tiwai mani, te da we bidi tau somainogo yali. Tama tebogo agai te Godigo te we bidi tau sabo dąų wali gamonabo po te mu dąų walali. Tama tiyu, aga te da sipsip tiwai bidibo we bidi tonalubo te polalubo bidi pedalai dao. Tama eno homugo te God agai te tigidali wiegi yai kolesaga dagebolo mao, te dagego agai homu kolesaga wali pabo usu ilimainogo yao. Tama eno homugo me da tomode agai tigidali te aga digi godolo yabo kolesaga tigidali pedalomainogo yao, te Jisas Kraisgo nogide tama tiao. Aga genuai nogi te sesemane bidada pabo sogo elalua peyu, elalua paibao, te eno homugo. Mu dao.

1 Pita 1:25

Tiali goli te Genuai Bidigo po bidada peyu, bidada pabo dao,” te po asęani. Tama te po da, te augwaligo dagebolo pusagasali wiegi yai gesi po dao.

Kraisgo Geme Dualali Sę Pedelabo Po Jonbolo Ola Mani 10:11

Tama agai enabolo te po wai, “Nago te Godigo yabo sę po ma pusao. Te po te hauwa bulu tǫde bidibo hanide me, te haniani tigiwali yai me, te haniani po wabo bulu bidi dabe me, tama te tǫde tuni bidi hauwade me, augwali tigidalide nago te nosali pedalabo sę po pusao,” agai enabolo te po wai.

Kraisgo Geme Dualali Sę Pedelabo Po Jonbolo Ola Mani 10:7

Menio. Tama nosali te nogo a naga olama me badu nogo si wali te ensel mobo bidi me deligo agai te ona tiwai nai elebadi, te sogo te Godigo homude polobadu dualali nosali yabo sę te hania pedalama, tama agai te sę yaibao. Polobadu agai aga sę ebo bidi augwalibolo te aga nosali yabo sę po pusali, tama augwaligo koneani, te sę hania pedalaibao,” te ensel mobo bidigo te po wai.

Kraisgo Geme Dualali Sę Pedelabo Po Jonbolo Ola Mani 13:7

Tama Godigo aga sula tagaliyu ebaso, tama agai te Godigo we bidi dali wąbi hwįyu, tama augwali bomo aiyaba elaluai. Tama tiyu, aga te tigidali bidi hani tuni bidi bidainogo eyu, te tigidali tǫde me, te tigidali po wabo me, te tigidali haniani tigi yai bidi dabego tuni bidi aga bidainogo Godigo aga tama osogo sula tagalali.

Kraisgo Geme Dualali Sę Pedelabo Po Jonbolo Ola Mani 3:10

Nago eno po wali peyu, tama sęgę nageba pedalobode te nage bomo elama dolaluai. Tama tibaso, nage eno bugagia tonaluyu, tama te usu sabo sę te tigidali we bidibolo te tigidali tǫde pedalainogo eyu, te sę nagebolo pedalidali weyu eno nage paliaibao.

Kraisgo Geme Dualali Sę Pedelabo Po Jonbolo Ola Mani 5:9

Tama augwaligo gesi tęąbi me tama wai, “Nago te buku selama, te dąų wali nai togobo usu mu dao. Magi baso meni. Augwaligo nage ela muani, tama nago isibo kanemego te bidi dabe augwali ma abelai, te augwali Godibolo mayu tiai dao. Te nago tigidali we bidi hanide we bidi meba abelali, te tigidali haniani po wabo bulude me, te tigidali haniani tigi yai bidi hanide me, te tigidali genuai tǫde bidibo bagede me te nago we bidi meba abelai.

Kraisgo Geme Dualali Sę Pedelabo Po Jonbolo Ola Mani 8:13

Tama eno suali, te ba kemodage tiwai ba me deli dagalu tomodu sigide bola pabo eno suali. Tama eno odali, agai i bomonama weyu te po wali, “Hobede, hobedeo, te tǫde bidibo we bidi hobedagia bidaibao. Te gasa ensel mobo bidi me sela augwaligo te ona tiwai nai elebo si, tebode te genuai dwai dwai sęgę te tǫde we bidi augwaliba pedalaibao,” te bago te po wai.