Kraisgo Geme Dualali Sę Pedelabo Po Jonbolo Ola Mani 12:3 - Godigo dwagi yai po buku

³ Te gasa genuai sę me dagalude pedalali, te we bidi noma sabo sę. Te sę yali e tiwai. Genuai hasamani me deli bidai. Te mama yai tama, aga tobolu te a olama me badu nogo si, tama nogo si gąų elaluai. Tama a naga olama me badu nogo si te tuni bidigo madi aga tobolude muani elaluai, te tobolu deli delide elaluai.

Kraisgo Geme Dualali Sę Pedelabo Po Jonbolo Ola Mani 12:3 Iomraidhean Croise

Aisaia 27:1

Te sogo te Genuai Bidigo agai genuai bomo olamayu, te Leviatan, te tamu węde bulu hwą bidigula mane elaibao. Genuai Bidi agai aga poa pai genuaiboma pai ge hwą selama, tama te bulu hwą bidi gula, tegagela bilibo gula mane toga sąwaibao.

Aisaia 51:9

Genuai Bidi, nage hogodao. Nage hogodama, te nage genuai bomo dali aselama, te da tau sagasao, te nago polobadu yali tiwai yao. Nago tama nago te Rehap enani, te tamu ąįde bidali moni hasamani, te nago dwasianu dedelege miani.

Aisaia 9:15

Tobolu te polo monu dabe de genuai nogi yai bidi sibolo wali. Te danu te tibo po we bidibolo pusali profet bidi dabebolo wali.

Daniel 2:41

Te nago nade te tiwai suali, te naigo sągą sawali me sągą ge dabe augwaligo te tǫ de ain si taluama, nigali. Te page te tiwai. Te kingo tonaluali we bidi te pepeda pelama, te hani si pedelaibao. Tiali goli, te hani si te bomo elaludaibao. Ain te tǫ dali sągą side elaluali, tama te da te tiwai ola mawai, augwaligo bomo tigidali te polo tama me siligobeo.

Daniel 2:42

Te sągą ge dabe augwaligo te ain me tǫgo nigali te tiwai ola mawai, te king bidi hani me badu te aingo bomo tiwai elalueibao, tiali goli te gasa pedai badu te tǫgo dwasianu bomo naga tiwai me elalueibao.

Daniel 7:20

Tama me eno te nogo si kom gąų te tobolude elaluali, te kuna mu ma koneabo homu yai, tama te dwasianu nosali pedelali kom te gąųgo te polasa elaluali gąų sela guda sąwani. Te kom gąųgo te gedu me pedauwali elalu, tama genuai po dagą mu weyu, tama aga digi aga nogi ugwaba sali. Eno te dwasianu kom gąų suali sogo, tama ena wi dwai mu yai. Eno te kom gąųde wi ebo tiwai yaligia te gasa kom gąų dabede me tebeo.

Daniel 7:24

Te kom nogo si te nogo si king augwali te bulu tǫ kantride digi pedelaibao. Nosali te gasa king pedaliyu, tama aga te polasa pedelali king dabego kolesaga tiwai egobeo, te tedali gasagi yai yaibao. Agai te king sela sela sąwaibao.

Kraisgo Geme Dualali Sę Pedelabo Po Jonbolo Ola Mani 12:1

Te sogo te dabolo Godigo bomo ola mabo genuai sę me deli te dagalude pedalai, te we bidi noma sabo sę. E tiwai. We me deli bidai, tama agai tigigo te giliga te ugwa tiwai elama sesela sai. Tama polua agai sągą dologode elaluali. Tama hǫ nogo si olama sągą badu si te agai madi tiwai tobolude munama elaluai.

Kraisgo Geme Dualali Sę Pedelabo Po Jonbolo Ola Mani 12:13

Te genuai dwai hasamani agai suali, augwaligo aga e tǫba aba aiya sąwani, tama agai te wai ame nani we pobeai.

Kraisgo Geme Dualali Sę Pedelabo Po Jonbolo Ola Mani 12:17

Tama tibaso, te genuai hasamani agai te we dali sębę mu yali, tama aga pelama, te wego gasa wai dabe dali wąbi hwįainogo pai. Te we bidi augwaligo te Godigo bomo yai po tigidali wali peyu, tama augwaligo Jisasgo po pusuyu tama agade homu kęą pai we bidi mu bidibo dao.

Kraisgo Geme Dualali Sę Pedelabo Po Jonbolo Ola Mani 12:4

Tama agai danugo te hǫgo hani deli dagaludu te pobele bage tiwai tǫba aiya poala sąwai. Tama hǫ hani si digi te dagalude me elaluali. Tama te hasamani te wego gesabidide te wai ame nainogo ebadi dolaluali, tama agai tonaluali te wego te wai ame nabode, te wai agai tuainogo yai.

Kraisgo Geme Dualali Sę Pedelabo Po Jonbolo Ola Mani 12:7

Tama te sogo dagalude genuai wąbi hwįai. Tama te ensel mobo bidi dabego augwa polalubo bidi te Maikel aga dali, te aga tonalubo ensel bidi dabe dali, augwaligo te genuai hasamani dali hwįai. Tama te hasamani aga dwai ensel mobo bidi dabe dali augwaligo te wąbi wei augwali dali ponainogo yai.

Kraisgo Geme Dualali Sę Pedelabo Po Jonbolo Ola Mani 12:9

Tama Godigo ensel mobo bidi augwaligo te genuai hasamani e tǫba sąwai dao. Te hasamani aga te polobadu digi bidai, tama augwaligo te hasamani aga nogi “Te Bidigo Tigidali Bidi Kisiliyu Po Tų Ela Mabo Dao,” gasa nogi me Satan poai. Agai tigidali tǫde we bidi ili po ola mabo bidi dao. Augwaligo aga e tǫba tula palai, tama augwaligo aga dwai ensel mobo bidi dabe dali hodobo e tǫba tula palai dao.

Kraisgo Geme Dualali Sę Pedelabo Po Jonbolo Ola Mani 13:1

Te genuai dwai hudigi ebo hasa me deli te tamu ąįdu pedalobo eno suali. Tama te hasago tobolu te a naga me si elaluali, tama agai tobolude te gąų nogo si pedelai elaluali. Te agai gąųde te tuni bidigo mubo te tiwai wiegi yai madi te nogo si elaluali, tama agai tobolu deli delide asęani dwai nogi elaluai. Tama te nogi deli deli page e tama tiwai: te God dali haniani dwai posobo po wali te tobage nogi po asęai elaluai.

Kraisgo Geme Dualali Sę Pedelabo Po Jonbolo Ola Mani 13:2

Te dwai dwai kolesaga eyu te hudigi ebo hasa megi eno suali, te moni hasa nogi lepat tiwai, tama te hasago sągą te gasa moni hudigi ebo hasa nogi bea, te beago sągą tiwai, tama te hasa agai penani te moni hasa lainogo penani tiwai yai. Tama te genuai dwai hasamanigo aga bomo te dwai hudigi ebo hasabolo mawai. Agai te dwai hasa aga tuni bidi aga tiwai nigilama bidali, tama agai we bidi tonalubo genuai bomo me te dwai hudigi ebo hasabolo mawai.

Kraisgo Geme Dualali Sę Pedelabo Po Jonbolo Ola Mani 13:4

Te genuai dwai hasamanigo agai bomo te dwai hudigi ebo hasabolo mobaso, te we bidi tigidali augwaligo te hasamanibolo aga nogi ugwaba sabo po wai. Tama augwaligo te dwai hudigi ebo hasabolo me aga nogi ugwaba sabo po weyu, augwaligo te po wai, “Niwai bidi aga te dwai hudigi ebo hasa tiwai dawe? Niwai bidigo aga dali hwįbo usu egowe? Bidi menio,” augwaligo te po wai.

Kraisgo Geme Dualali Sę Pedelabo Po Jonbolo Ola Mani 15:1

Te eno suali gasa genuai noma sabo sę te dagalude pedalali, tama eno homu hauwa te sęde yali. Eno suali, ensel mobo bidi a naga olama me badu nogo si bidali, tama augwaligo te bidi dolabo dwai nai mu a naga olama me badu nogo si tolaluai. Tama nosali te dwai nai augwaligo sę ebo silibo si, teda te we bidi dolabo gasa dwai nai ma pedalogobeo. Te nogo a naga olama me badu si te dwai nai, te naide te Godigo sębę ebo mu silaibao.

Kraisgo Geme Dualali Sę Pedelabo Po Jonbolo Ola Mani 16:13

Tama eno te dwai haubo noma bidi sela te gedeli tiwai gagawai suali, te me deli aga te genuai dwai hasamanigo pedauwali ą elalubo digi pedalali, tama me deli aga te dwai hudigi ebo hasago pedauwalidu me, me deli te tibo po ola mabo bidigo pedauwali ą elalubo digi tedu pedalai. Augwali sela te tiwai pedalali eno suali.

Kraisgo Geme Dualali Sę Pedelabo Po Jonbolo Ola Mani 17:12

“Tama te nago suali te nogo si gąų, te gąų dabe te tuni bidi nogo si tiwai dao. Megi augwaligo te tuni bidi bomo me sabeo. Tiali goli augwaligo te tuni bidi bomo te dwai hudigi ebo hasa dali selama, tama augwali aga dali te dwasianu sogo naga we bidi tonalubo sę yaibao.

Kraisgo Geme Dualali Sę Pedelabo Po Jonbolo Ola Mani 17:16

Tama te nogo si gąų nago suali, te dali te dwai hudigi ebo hasa dali augwaligo te penani we dali boi bidi yaibao. Te penani we augwaligo aga mu dolama, tama agai ugwa dabe me tigidali doado bage dolaibao. Tama augwaligo agai tigi mi tuyu, tama aga tigi tigidali siago domainogo ulaibao.

Kraisgo Geme Dualali Sę Pedelabo Po Jonbolo Ola Mani 17:7

Tama te ensel mobo bidigo enabolo te po wai, “Magi baso nago noma siyu tama homu hauwa ebawe? Te eno te wede geme dualali po page nagebolo ola mawaibao. Tama te dwai hudigi ebo hasa tobolu a naga olama me badu nogo si me, te nogo si gąų tobolude elaluyu, tama te naigo te we selasa pabo. Agade me te geme dualali po page nagebolo ola mawaibao.

Kraisgo Geme Dualali Sę Pedelabo Po Jonbolo Ola Mani 19:12

Tama te gasa nogi te “Mu po naga wabo bidi.” Tama agai gedu te sia bogoli ebo tiwai yali, tama agai tobolude te tuni bidigo mubo wiegi yai madi hauwa muai elaluai. Tama agai tigide po me deli asęai elaluali, te aga nogi dao. Te agaduba deligo naga te nogi page koneani, tama gasa bidi dabe augwaligo te nogi me konebeo.

Kraisgo Geme Dualali Sę Pedelabo Po Jonbolo Ola Mani 20:2

Agai te genuai dwai hasamani dąų ola sai, te hasamani te polobadu mu bidai, agai nogi Satan dao, tama agai gasa nogi page e dao: “Agai te tigidali we bidide kisiliyu po tų ela mabo bidi dao.” Tama te ensel mobo bidigo aga te sen bonogo dąų olama bidibadi te kibu be hauwa mu 1,000 bidai.