Kraisgo Geme Dualali Sę Pedelabo Po Jonbolo Ola Mani 1:9 - Godigo dwagi yai po buku

⁹ Ena Jon, ena duga ama dao. Ena dage dali hodobo te Jisasde wadolama, tama da deli hani elalubaso, tama gasa bage augwaligo dabolo dene dali, sęgę dali mayu elama, tama da tigidali hodobo bomo elama dolaluyu, sęgę bugagia tolobo dao. Tama ena Godigo we bidi tonalubo sę tomode dage dali hodobo bidibao. Tama eno te we bidi dabebolo Godigo po dali, te Jisasgo hania hanilali mu po dali, te po si augwalibolo pusubaso augwaligo ena sela sąnama, ena te tamu ąį tomode elalubo dwasianu tǫ nogi Patmos teba kalabus mugi pali dao.

Kraisgo Geme Dualali Sę Pedelabo Po Jonbolo Ola Mani 1:9 Iomraidhean Croise

Matyu 20:23

Tama Jisasgo augwali sibolo te po wai, “Mu dao, te dage si eno kapde ąį tueibao. Tiali goli de mu te eno dolo nogode me pobase nogode me dua yabo, te sę eno egobeo. Menio. Te tobage bidi dabe bidabo bulu dabe te eno Ayago naga augwali dua yabo digi sisi yai elalubao,” Jisasgo te po wai.

Dwagi Yai Gesi Po Makgo Asęani 10:39

Tama augwali sigo agabolo te po wai, “Te da si usu yaibao,” wai. Jisasgo augwali sibolo te po wai, “Mu dao, te megi eno ąį tubo kapde te dage sigo me tueibao. Te megi eno baptais sabo, te dage sigo me saibao.

Dwagi Yai Gesi Po Jongo Asęani 16:33

Eno homugo dage ena dali wadoloyu, tama dwagi yai homu nagame elama bidimainogo eyu, eno e po tamadi tama dage dali wai dao. Dage tǫde bidibadi te tǫde we bidi augwaligo dwai sę dage dali yaibao. Tialima, dagego homu bomo elama, bidao. Eno e tǫde kolesaga aiyaba elaluai dao,” Jisasgo te po aga sę bidi dabe dali wai.

Godigo Sęba Tagala Palai Bidigo Po 1:15

Te nosali si sela sogo silibaso, tama te sogo te Jisasde homu dąų wai we bidi dabe deliba sisinagasali. Bidi sese me sela me sela 120 tama bidi sisinagasali. Tama Pita doligulama, te we bidibolo po me wai.

Godigo Sęba Tagala Palai Bidigo Po 14:22

Augwali sigo te Jisasgo po wali pabo we bidibolo dwagi yai po mobo mani, augwaligo Jisas konealubo homu dąų walomainu. Augwali sigo te genuai po ola mawai, “Dago te Godigo tųdu pobadi, gasa we bidi augwaligo dabolo haniani sęgę mawaibao, tama nosali Godigo da tonalubo buluba da sabolaibao,” te po wai.

Polgo Po Pas Rom Dabeba Asęani 8:17

Tama da te Godigo wai dabe bidaligo da, teda nosali dago te Ayago nai me saibao. Awe, te dago Godigo nai saibao, te nai me dago Krais dali saibao. Te megi dago Godigo sę eyu tama Krais dali dago te dene tolobaso da, teda dago aga dali te genuai nogi me te ula yai bomo me, te me dago aga dali nosali saibao.

Polgo Po Pas Rom Dabeba Asęani 8:25

Tiali goli megi te nai dago sisąbadi da, dago homu dąų mu olama te nai dago mu saiba homu yali da, teda dago homu bomo te naiba elama tama bugagia tonaludubo dao.

2 Korin 1:7

Tama homu si isąyu, dago homugo koneani, te dage bomo elama dolalueibao. Dago koneai, dage da dali dene tolobao, tama tibaso te dage da dali te homu nagame ebo kolesaga me selama bidaibao.

Filipai 1:7

Tama tigidali sogo eno dwagi yai homu eyu dagede homugo konea palobo dao. Tama eno dagede dwagi yai homu ebo te dolo naga dao. Magi baso meni, God agai ena dali dwagi yai sę elama, tama agai po pusubo sę eno nogoba mani. Tama tigidali sogo eno te sę ebadi, te dagego ena tau sai dao. Polobadu ena kalabus menibadi eno te Godigo pode boi bidi homu ebo bagego po aiyaba elaluabo po wabo sę yai. Tama tiyu, eno te gasa we bidi tau sali, augwaligo augwa homugo Godigo po bugagia dąų omainogo yai. Tama megi ena kalabuside bidibao. Polobadu me, megi me, te tigidali sogo dagego ena te sęde tau sai dao. Tama tibaso, eno dage dali kone palobo si ena dwagi yai homu ebo dao.

Filipai 4:14

Tiali goli, dagego ena dali hai namu si weyu, eno sęgę dagego tolai, te kolesaga dwagi yai dao.

2 Tesalonaika 3:5

Dago homugo Genuai Bidi Jisasgo dagego homu kolesaga dodolomainogo yai. Tama agai te sę dage dali eyu, tama dagego Godigo dage dali dwagi yai homu eyu, godolo mu ebo sę page mu koneaibao. Tama agai dagego homu kolesaga dodolama, tama Krais agai moni sęgę tolaluyu, aga bomo elama dolaluali sę page dagego te me mu koneaibao. Tama koneama, dagego te sę tiwai gilama eyu bidao. Dago dage dali te homu eyu, dago Godibolo gedu haluasa po wabo dao.

Polgo Si Wali Pas Timotiba Asęani - 2TI 1:8

Tama tibaso, nago te dago Genuai Bidi Jisas da, te Godigo sa muani te we bidi tau somainogo tagala palali bidi Krais dao, te po te we bidibolo pusubo te hale me egio. Tama eno te po we bidi meba augwalibolo pusubaso, augwaligo ena kalabusiba muani. Tiali goli nago enade me hale me elamuo. Menio. Nago bomo te Godide selama, tama ena dali te Kraisde wiegi yai gesi po pusubo sęde sęgę tolao.

Hibru 10:36

Dage bomo elama dolaluyu, tama sęgę bugagia toloyu, tama duga te Godigo homu wali pagameo. Tama tiyu, duga wiegi yai nai somainogo yaibao, polobadu Godigo te nai dagebolo mawaibao po dąų wai dao.

1 Pita 5:1

Tama tibaso, megi eno te dage Godigo hani we bidi tonalubo bidi dabe dali e homu kęna sabo po obao. Ena digi me ena da te Godigo hani we bidi tonalubo bidi dao, te dage tiwai. Tama eno gedugo Krais aga dene sabo suai bidi dao. Tama aga ma asiyu, tama aga bomo yai ula pedalobo si, te sogo ena te bomo yai ula meba sabo bidi me bidaibao.

Kraisgo Geme Dualali Sę Pedelabo Po Jonbolo Ola Mani 1:1

Te eno megi asęna tolobo po, polobadu te po geme dulaluai, tama Godigo te po Jisas Kraisbolo waselama ola mani. Te Kraisgo aga sę ebo bidi dabebolo te nosali gana pedalobo sę hania hanilainogo tama Godigo agabolo te sę ola mani. Tama agai aga ensel mobo bidi me deli te Jon enabolo tagala palama, tama ena agai sę bidi, tama te tagala palali ensel mobo bidigo te waselali po enabolo ola magasai.

Kraisgo Geme Dualali Sę Pedelabo Po Jonbolo Ola Mani 1:2

Tama ena Jon, eno te sę tigidali sulama, tama te po me eno koneai, tama eno hanilama te Godigo po dąų weyu, tama Jisas Kraisgo enabolo pusali po me, te pode eno te po wai dao, “Te mu po naga dao.”

Kraisgo Geme Dualali Sę Pedelabo Po Jonbolo Ola Mani 1:4

Ena Jon, eno e po dage a naga olama me badu nogo si te Godigo po wali pabo we bidi hani, dagebolo e po asęna tolobao, te dage te genuai tǫ Esia te genuai hanu dabede bidibo we bidi. God aga te megi bidibo, tama polobadu mu aga bidaluai, tama nosali aga ma asiyu, tama eno homugo te God agai da olo mu tau sabo te kolesaga dali, tama te dwagi yai homu nagame ilibo kolesaga dali te si dageba mao. Tama eno homugo te a naga olama me badu nogo si mobo bidi augwali me, te tuni bidi God aga au yali duabo sia sai pąde bidibo bage, augwaligo me te dwagi yai homu eyu olo tau sabo kolesaga dali, te dwagi yai homu nagame ilibo kolesaga me dagebolo mawaibao.

Kraisgo Geme Dualali Sę Pedelabo Po Jonbolo Ola Mani 1:6

Tama tiyu, agai da tau selama, tama dabolo genuai sę menama, tama da te tuni bidi kingo pris hani bidi dabe nigilama, tama megi da te Jisas aga Aya Godibolo me te lotu po weyu, sesemane sogo aga sę ebo pris bidi dabe bidibao. Tama tibaso, eno homugo agai genuai wiegi yai nogi dali, te we bidi tonalubo bomo dali me bidada peyu, bidada pomainao. Te mu tama dao.

Kraisgo Geme Dualali Sę Pedelabo Po Jonbolo Ola Mani 11:7

Te bidi sigo te Godigo po pusubo silibo si, tama te dwai hudigi ebo hasa te tǫ dedage page meni yai digi bidali tagaliyu, tama aga buluba eda holaibao. Tama holama tama agai te bidi si dali hwįaibao. Agai te bidi sigo bomo aiyaba elaluyu, tama te bidi si ela mueibao.

Kraisgo Geme Dualali Sę Pedelabo Po Jonbolo Ola Mani 12:11

Tama te kibu sipsip wai aga isiyu aga kaneme gelebaso, tama dago ama dede augwaligo te dwai bidigo bomo aiyaba elaluai dao. Tama me augwaligo Godigo po gasa we bidibolo pusali, tama augwaligo te kolesaga yaligo me augwaligo te dwai bidigo bomo aiyaba elaluai dao. Tama te kolesaga ebadi augwaligo te homu yali, ‘Te Godigo po odobo hagela ebo bage augwaligo da eleyu da, teda te usu da, da wi egobeo,’ te homu yali. Tama te homu eyu, augwaligo augwali e tǫde bugagia bidabo te homu ebeo.

Kraisgo Geme Dualali Sę Pedelabo Po Jonbolo Ola Mani 12:17

Tama tibaso, te genuai hasamani agai te we dali sębę mu yali, tama aga pelama, te wego gasa wai dabe dali wąbi hwįainogo pai. Te we bidi augwaligo te Godigo bomo yai po tigidali wali peyu, tama augwaligo Jisasgo po pusuyu tama agade homu kęą pai we bidi mu bidibo dao.

Kraisgo Geme Dualali Sę Pedelabo Po Jonbolo Ola Mani 13:10

Niwai bidi me deli te boi bidigo aga nogo dunama tama aga kalabusiba muabo sa muani bidi, te aga te kalabusiba pomainao. Niwai bidi me deli aga te poa pai gaia gego elabo sa muani bidi, te bidi augwaligo te ge hwągo mu ela mueibao. Te tiwai kolesaga augwalibolo pedalobaso da, teda te Godigo we bidi augwaligo Godide augwa homu bugagia kęą pai we bidi bidiyu, tama augwaligo te sęgę bugagia tolao.

Kraisgo Geme Dualali Sę Pedelabo Po Jonbolo Ola Mani 14:12

Tama tibaso, Godigo we bidi augwali bomo elama, tama augwaliba pedalabo sęgę bugagia toloyu bidao. Te we bidi augwaligo Godigo bomo yai po wali peyu, tama Jisasde homu mu kęą pai we bidi bidibo dao.

Kraisgo Geme Dualali Sę Pedelabo Po Jonbolo Ola Mani 19:10

Tialima, ena te ensel mobo bidi sągą pąba kidu sugunama, tama eno gesabidi tǫba munama, tama eno aga dali lotu po wabo homu yai. Tiali goli agai enabolo te po wai, “Nago tama tigio! Ena nage dali, nago ama dede dali deli sę ebo bidi dao. Dagego konealubo po Jisasde dąų olama, agai nogi haninama pusubo dao. Nago God deli dali naga lotu po wao. Te Jisasde gasa bidibolo po pusubo we bidi, te Godigo Mobo Bidi agai augwali homu hodolama, tama augwaligo te po pusubo dao. Te Mobo Bidigo te tobage sę naga te Godigo nosali yabo sę po pusubo bidi dali me ebo dao,” agai te po wai.

Kraisgo Geme Dualali Sę Pedelabo Po Jonbolo Ola Mani 20:4

Tama eno suali, te tuni bidi dulalubo nai meba elaluai, tama bidi meba te duabo naide duawai. Godigo augwalibolo te bidi dabe po tųde dagalobo kolesaga ebo sę yabo bomo mawai. Tama eno me suali, we bidi hauwa augwaligo konealubo po Jisasde dąų weyu, tama agai nogide po pusubo sę yai, tama tiyu Godigo po bomo elama tola sai. Te augwaligo agai nogide po pusubo sę ebaso, te boi bidi dabego augwali elama, mage togolama, augwali isai dao. Tama eno augwaligo noma bidi homu ogwa wai dabe suali. Tama tǫde bidibadi augwaligo te dwai genuai hudigi ebo hasabolo lotu po wasiąma bidibadi, te agai noma me, te augwaligo gebode me te nogode me te hudigi ebo hasago asęai dąį me sabeo. Te we bidi dabe augwali te bidibo ula ma selama, tama augwali Jisas dali tuni nigilama bidibadi te kibu be hauwa 1,000 bidai.

Kraisgo Geme Dualali Sę Pedelabo Po Jonbolo Ola Mani 3:10

Nago eno po wali peyu, tama sęgę nageba pedalobode te nage bomo elama dolaluai. Tama tibaso, nage eno bugagia tonaluyu, tama te usu sabo sę te tigidali we bidibolo te tigidali tǫde pedalainogo eyu, te sę nagebolo pedalidali weyu eno nage paliaibao.

Kraisgo Geme Dualali Sę Pedelabo Po Jonbolo Ola Mani 6:9

Tama te kibu sipsip waigo te buku dąų wali nai a naga wali togwai, tama eno suali, te isai bidigo noma bidi meba augwali te Godibolo maiabo nai ulubo alta sai dologode bidai. Polobadu te bidi dabe augwaligo Godigo po te we bidibolo pusubo sę eyu, tama te pode augwaligo homu kęą pai bidi dabe bidai. Tama tibaso, te boi bidi dabego augwali ela munama isai dao.

Kraisgo Geme Dualali Sę Pedelabo Po Jonbolo Ola Mani 7:14

Tama eno agabolo te po wei ponai, “Genuai bidi, naga digi nago koneai.” Tama agai enabolo te po wai, “Te we bidi dabe augwali te boi bidigo nogode genuai sęgę dali te dene dali sali we bidi dabe dao. Tama augwaligo te sęgę bugagia tolaluama, tama te sęgę tolalubo sogo silalio. Tama augwaligo augwa ugwa te kibu sipsip wai kanemego ąį telawai, tama augwaligo ugwa te tedela yai dao.