Kraisgo Geme Dualali Sę Pedelabo Po Jonbolo Ola Mani 1:4 - Godigo dwagi yai po buku

⁴ Ena Jon, eno e po dage a naga olama me badu nogo si te Godigo po wali pabo we bidi hani, dagebolo e po asęna tolobao, te dage te genuai tǫ Esia te genuai hanu dabede bidibo we bidi. God aga te megi bidibo, tama polobadu mu aga bidaluai, tama nosali aga ma asiyu, tama eno homugo te God agai da olo mu tau sabo te kolesaga dali, tama te dwagi yai homu nagame ilibo kolesaga dali te si dageba mao. Tama eno homugo te a naga olama me badu nogo si mobo bidi augwali me, te tuni bidi God aga au yali duabo sia sai pąde bidibo bage, augwaligo me te dwagi yai homu eyu olo tau sabo kolesaga dali, te dwagi yai homu nagame ilibo kolesaga me dagebolo mawaibao.

Kraisgo Geme Dualali Sę Pedelabo Po Jonbolo Ola Mani 1:4 Iomraidhean Croise

Godigo Nogi Ugwaba Sabo Tęąbi Po Wabo Buku Dabe 90:2

Te sesemane bidada peyu, bidada pabo sogo, nage te God bidibao, te polobadu me bidali, nosali me bidaibao. Tigidali bulu du pedalisąbadi, tama nago te tǫde nai tigidali nigisąbadi, tiali goli, nage God bidai dao.

Ma Dobola Sali 3:14

Tama Godigo te po wali, “Ena Digi Ena Tama Bidibo Dao. Nago te Israel we bidi dali te po wao, ‘Ena Digi Bidibo, te Godigo nogi dao. Tama agai ena tagala palobaso, tama ena dage bidiboba asai.’

Aisaia 11:2

Te Genuai Bidigo Spirit Mobo Bidi aga dali bidagaselama, tama aga te wiegi yai homu kolesaga dabe magasaibao. Tama agai aga we bidi tonalubo homu kolesaga wiegi yai mu saibao. Tama aga bomai tuni bidi bidiyu, tama agai aga we bidi tonalubo kolesaga wiegi yai mu elaluaibao. Agai te Genuai Bidigo homu kolesaga koneaibao. Tigidali sogo aga te Genuai Bidi dologode naga bidaibao.

Aisaia 41:4

Dego mu te sę dabe pedalumainu ilaliwe? Te Genuai Bidi, eno naga dao. Te eno tǫ gagalama pedalumainu yali sogo, sesemane sogo eno tigidali nai te tǫde pedalumainu dodoludalio. Ena Genuai Bidi ena hasia polasa mu bidali. Te ena nosali badu sogo me bidaibao.”

Aisaia 57:15

“Ena digi ena God, te ena sesemane sogo bidibao. Eno nogide te magi meda mu meni yai elalubao, ena te Wiegi Yai Doloba Pai Kolesaga Mu Ebo God dao. Ena te ena wiegi yai bulude digi ugwadu bidibao. Tiali, ena te augwa digi augwa aiyaba elaluama bidiyu, te augwa yali dwai sęde homu dene ebo we bidi dali bidibao. Te eno augwa haliga dąų waliyu, te augwa bidibo ula te wiegi yai ma pedalumainu ebo dao.

Maika 5:2

Genuai Bidigo te tiwai po wali, “Betlehem Efrata, te tigidali Juda taun tomode nage te dwasianu taun mu elalubao. Tiali goli, nagede te genuai tuni bidi me deli pedelama, tama agai te Israel hani tonaluabo bidi dao. Te polobadu mu aga hasia wąį monu nǫų me deli pedelali, tama aga hani bidi me bidibao,” te po wai.

Sekaraia 3:9

Megi da, eno masigi me gedu a naga olama si, te 7 yai te masigi selama, Josua pąde muaibao. Tama eno te masigide po me asęaibao. Tama deli sogo tama eno ena kantri we bidigo sęgę sela sąwaibao.

Sekaraia 4:10

Augwaligo sę polo siligi pisąma ebo suali, tama tibaso augwali homu sęgę yali. Tiali goli augwaligo Serubabelgo te be sę dodolabo ain yai string tolama, tama eno be sę gagalobo sulama, tama augwali wiegi yai homu pemene mu yaibao,” wali. Tama ensel bidigo enabolo e tama po wali, “Te nogo a naga olama me badu nogo si, te 7 lam te Genuai Bidigo gedu magi iliyu te yali dao. Agai tigidali tǫ sese tama subo dao,” wali.

Sekaraia 6:5

Tama ensel bidigo te po wali, “Te me si me si karis te me si me si haniani wali magiyu te yali dao. Megi tama augwali tigidali tǫde tonalubo Genuai Bidi page tagalama, augwali te asali dao,” wali.

Dwagi Yai Gesi Po Jongo Asęani 1:1

Polobadu polobadu mu, te tigidali nai pedalisiąma, meni yai digi, Po bolo bidai. Po God dali bidai. Tama te Po aga digi God dao.

Godigo Sęba Tagala Palai Bidigo Po 19:10

Tama Pol agai te sę ebadi, kibu be si silali. Te sę elama, umabo we bidi te Esia tǫ tomode bidibo we bidi augwaligo Godigo dwagi yai po odali. Me badu Juda hani we bidi da, me badu te Juda hani isąwai gasa hani dabe we bidi da.

Godigo Sęba Tagala Palai Bidigo Po 2:9

Tama te po ma wai, “Da tigidali buludu eba asali, e Judia tǫ pedai me, te Paria tǫ pedai me, Midia tǫ pedai me, Elam tǫ pedai me, te Mesopotemia me, Kapadosia me, Pontus me, Esia me,

Polgo Po Pas Rom Dabeba Asęani 1:7

Eno e pas te dage Rom moni hanude bidibo we bidibolo asęna tolobao. Dage Rom bage, te God agai dage dali dwagi yai homu eyu, godolo eyu elama, tama dage te aga we bidi mu bidimainogo eyu agai dage i wali. Tama eno homugo dago Aya God dali, Genuai Bidi Jisas Krais dali sigo te dage dali te olo mu tau sabo kolesagago eyu tama dage homu wiegi yai ilama dage dua bugagia bidaibao.

1 Korin 1:3

Eno homugo dago Aya God dali, te Genuai Bidi Jisas Krais dali, augwali sigo te augwa olo tau sabo kolesaga me, te bidi homu dua digi nagame ilibo kolesaga dali si te dagebolo mao.

2 Korin 1:2

Eno homugo te dago Aya God dali, te Genuai Bidi Jisas Krais daligo, te olo mu da tau siyu mabo wiegi yai kolesagago te dagego homu nagame ilama bidiąo.

Hibru 13:8

Jisas Krais aga munu me hasegelegobeo. Polobadu aga hasegelebeo, megi aga hasegelebo meni, nosali aga munu me hasegelegobeo. Aga ebo kolesaga deli naga me ela piduaibao.

Kraisgo Geme Dualali Sę Pedelabo Po Jonbolo Ola Mani 1:1

Te eno megi asęna tolobo po, polobadu te po geme dulaluai, tama Godigo te po Jisas Kraisbolo waselama ola mani. Te Kraisgo aga sę ebo bidi dabebolo te nosali gana pedalobo sę hania hanilainogo tama Godigo agabolo te sę ola mani. Tama agai aga ensel mobo bidi me deli te Jon enabolo tagala palama, tama ena agai sę bidi, tama te tagala palali ensel mobo bidigo te waselali po enabolo ola magasai.

Kraisgo Geme Dualali Sę Pedelabo Po Jonbolo Ola Mani 1:11

Tama te wali pode te po wai, “Nago naga gedugo subo sę po tigidali te bukude asęnama, te Godigo po odobo we bidi bidibo bulu a naga olama me badu nogo si, te buluba nago te sę po asęna tolao. Nago te po Efesus buluba asęna tolobadi, me te Smerna buluba, me te Pergamum bulu, me Taiataira, me Sardis, me Filadelfia buluba tolobadi, me te Laodisia buluba te po asęna tolao,” weyu te po enabolo wai.

Kraisgo Geme Dualali Sę Pedelabo Po Jonbolo Ola Mani 1:17

Tama eno te bidi sulama, tama ena aga sągą pageba kidu pǫgulai, tama ena te isai bidi pigulali tiwai yai. Tiali goli agai dolo nogo ena tigiba munama, tama agai te po wai, “Nage wi tagalao. Ena da, ena digi te hasia bidaluali bidi dao, ena te nosali sogo mu bidaluaibao wabo bidi mu dao.

Kraisgo Geme Dualali Sę Pedelabo Po Jonbolo Ola Mani 1:20

Tama nago eno dolo nogode te hǫ a naga olama me badu nogo si elalubo suali. Te lam sole gol a naga badi me si tama te me nago suai. Tama te nai dabe geme dualali page e dao: te hǫ a naga olama me badu nogo si wali, te Godigo po wali pabo bulu a naga olama me badu si te bulude bidibo we bidi tau sabo ensel mobo bidi dabe dao. Tama me te a naga olama me nogo si te lam sole po wali, te a naga olama me badu nogo si Godigo po wali pabo we bidi hani dabede po begelama weyu,” agai te po wai dao.

Kraisgo Geme Dualali Sę Pedelabo Po Jonbolo Ola Mani 1:8

Te Tigidali Bomo Elalubo Genuai Bidi God agai aga bidibo pagede te po wai, “Ena da, ena digi te hasia bididuali bidi dao, ena te nosali sogo mu bididueibao wabo bidi mu dao,” agai te po wai. Te God aga te megi bididubao, tama polobadu mu aga bididuai, tama nosali aga ma asaibao.

Kraisgo Geme Dualali Sę Pedelabo Po Jonbolo Ola Mani 1:9

Ena Jon, ena duga ama dao. Ena dage dali hodobo te Jisasde wadolama, tama da deli hani elalubaso, tama gasa bage augwaligo dabolo dene dali, sęgę dali mayu elama, tama da tigidali hodobo bomo elama dolaluyu, sęgę bugagia tolobo dao. Tama ena Godigo we bidi tonalubo sę tomode dage dali hodobo bidibao. Tama eno te we bidi dabebolo Godigo po dali, te Jisasgo hania hanilali mu po dali, te po si augwalibolo pusubaso augwaligo ena sela sąnama, ena te tamu ąį tomode elalubo dwasianu tǫ nogi Patmos teba kalabus mugi pali dao.

Kraisgo Geme Dualali Sę Pedelabo Po Jonbolo Ola Mani 16:5

Tama eno odali, te ąį tonalubo ensel mobo bidigo te agai te po wali, “Genuai Bidi, Tigidali Bomo Elalubo God, nage megi bidibo, tama polobadu mu nage bidai bidi, nage te magi dwai sę me esiąyu wiegi yai doloba pai mu bidibo dao. Te nago te bidi dali po tų ebode, te nago te dwai sę ebo bidi dabe augwali dolo mu dagalobo dao.

Kraisgo Geme Dualali Sę Pedelabo Po Jonbolo Ola Mani 2:12

Te bidigo enabolo po me ma wai, “Te megi nago te Pergamum bulude Godigo po odoyu bidibo we bidi tonalubo ensel mobo bidibolo e po asęna tolao: ena da, ena te si dali si badu poa pai bobage ge hwą ge elalubo bidi dao. Tama eno e po nagebolo ola tolobao.

Kraisgo Geme Dualali Sę Pedelabo Po Jonbolo Ola Mani 2:18

Te bidigo enabolo po me ma wai, “Te megi nago te Taiataira bulude Godigo po odoyu bidibo we bidi tonalubo ensel mobo bidibolo e po asęna tolao: ena Godigo Ogwa dao, tama eno gedu te sia bogoli sesena pai bomonama dabo tiwai, tama eno sągą te kapa meda meni yai eyu te gegemani ebo tiwai ebo. Tama eno e po nagebolo ola tolobao.

Kraisgo Geme Dualali Sę Pedelabo Po Jonbolo Ola Mani 2:8

Te bidigo enabolo po me wai, “Te Efesus hanuba u po asęna tolama, tama megi Smerna hanude Godigo po odoyu bidibo we bidi tonalubo ensel mobo bidibolo e po asęna tolao: ena da, ena digi te hasia bididuali bidi dao, ena te nosali sogo mu bididuabo bidi mu dao. Tama polobadu ena isai, tiali goli ena ma hodaluama, megi me bidibao. Tama eno e po nagebolo ola tolobao.

Kraisgo Geme Dualali Sę Pedelabo Po Jonbolo Ola Mani 22:16

“Ena Jisas, eno digi eno mobo bidi dageba tagala palai, tama agai te eno po wali pabo we bidi hani dagebolo e po pusumainogo yai. Ena digi ena te polobadu bidai bidi Devit aga hani bidi wąį dao. Tama te kigamu mu pedalobo te genuai hǫ te ena dao,” agai te po wai.

Kraisgo Geme Dualali Sę Pedelabo Po Jonbolo Ola Mani 22:8

Ena Jon, eno digi te po tigidali odai, tama te nai dabe tigidali eno suai dao. Eno odolama tama eno suai, tama enabolo te nai ola mani ensel mobo bidi sągą pąba eno kidu sugunama, tama agabolo eno lotu po wainogo yai.

Kraisgo Geme Dualali Sę Pedelabo Po Jonbolo Ola Mani 3:1

Te bidigo enabolo po me ma wai, “Te megi nago te Sardis bulude Godigo po odoyu bidibo we bidi tonalubo ensel mobo bidibolo e po asęna tolao: eno te a naga olama me badu nogo si te Godigo mobo bidi dabe elaluyu, tama eno te a olama me badu nogo si hǫ te eno nogogo tolalubo dao. Tama ena digi eno e po nagebolo ola tolobao. Tama nago ebo kolesaga tigidali te eno koneai. Gasa we bidi augwaligo te po dagede wabo dao, ‘Te Sardis bulude bidibo Godigo po odobo we bidi hani augwali bomo elama, wiegi yai kolesaga wali peyu bidibo dao,’ augwaligo dage dali te po wabo dao. Tiali goli menio, eno gedude dage isai bidi tiwai dao.

Kraisgo Geme Dualali Sę Pedelabo Po Jonbolo Ola Mani 3:14

Te eno suali bidigo enabolo te po me ma wai, “Te megi nago te Laodisia bulude Godigo po odoyu bidibo we bidi tonalubo ensel mobo bidibolo e po asęna tolao: ena te mu po wabo page bidi mu, ena te Godide homu kęą pai bidi bidiyu, tama eno te Godigo po tigidali dolo mu te we bidibolo pusubo dao. Sesemane sogo eno mu po naga pusubo dao. Ena te Godigo nigali nai tigidali page mu dao. Eno e po nagebolo ola tolobao.

Kraisgo Geme Dualali Sę Pedelabo Po Jonbolo Ola Mani 3:7

Te eno suali bidigo enabolo po me wai, “Te megi nago te Filadelfia bulude Godigo po odoyu bidibo we bidi tonalubo ensel mobo bidibolo e po asęna tolao: ena da, te Godigo bidi naga dao, ena magi sę isąwai tedali gasagi yai bidi dao. Tama ena te mu kolesaga ebo page bidi mu dao. Te eno te polobadu bidali bidi Devit agai tų dalabo ki tolalubao. Eno te tų dayu, tama niwai bidi mego te tų ma paligobeo. Tama eno te tų paliyu da, te niwai bidigo te tų ma dagobeo. Tama eno e po nagebolo ola tolobao.

Kraisgo Geme Dualali Sę Pedelabo Po Jonbolo Ola Mani 4:5

Tama te tomode bidibo genuai tuni bidigo duabo digide te be sele eyu, tama be kulu kulu wai, te moni u wabo odai. Tama te tuni bidigo gesabidide te sole a naga olama me badu nogo si te ula elaluai. Te sole ula elalubo te Godigo mobo bidi a naga olama me badu si dao.

Kraisgo Geme Dualali Sę Pedelabo Po Jonbolo Ola Mani 4:8

Tama te bidibo ula elalubo hasa me si me si, te augwali deli deligo bogo te a naga olama me badu nogo deli elaluali. Tama gedu hauwago augwali tigi te bulu badu me tomo badu me usu nama mu elaluai. Te bogo dologode me elaluali. Tama ulade dali te hulide dali augwaligo te balia weyu te po wabo, “Genuai Bidi Godigo tigidali bomo elalubao, te aga wiegi yai tedali, wiegi yai tedali, wiegi yai tedali mu dao. Tama polobadu aga bidai, tama megi me aga bidibo, tama nosali aga asaibao.” Tama augwaligo te po wabo toma me tubo menio.

Kraisgo Geme Dualali Sę Pedelabo Po Jonbolo Ola Mani 5:6

Tama te sogo eno suali, te kibu sipsip wai dolalubo suai, te augwaligo aga hwągo ela muai subo tiwai homu yai. Tama aga te genuai tuni bidi duabo nai dali te bidibo ula elalubo hasa me si me si te pąde aga dolaluyu, tama te polalubo tobolu bidi dabe tomode bidai. Tama agai te bulmakaugo tobolude elalubo gąų tiwai te a naga olama me badu si badi, te agai gedu me te a naga olama me badu nogo si elalubo. Tama te gedu dabe augwali te Godigo mobo bidi a naga olama me badu nogo si dao. God agai augwali te tigidali tǫba tagala palai dao.

Kraisgo Geme Dualali Sę Pedelabo Po Jonbolo Ola Mani 8:2

Tama te dwasianu sagia sai elalu bidali sogo silama, tama nosali eno te God gesabidide dolalubo ensel mobo bidi a naga olama me badu nogo si eno suali, tama augwaligo te ona tiwai nai a naga olama me badu nogo si selama tolaluai.