Kraisgo Geme Dualali Sę Pedelabo Po Jonbolo Ola Mani 1:1 - Godigo dwagi yai po buku

¹ Te eno megi asęna tolobo po, polobadu te po geme dulaluai, tama Godigo te po Jisas Kraisbolo waselama ola mani. Te Kraisgo aga sę ebo bidi dabebolo te nosali gana pedalobo sę hania hanilainogo tama Godigo agabolo te sę ola mani. Tama agai aga ensel mobo bidi me deli te Jon enabolo tagala palama, tama ena agai sę bidi, tama te tagala palali ensel mobo bidigo te waselali po enabolo ola magasai.

Kraisgo Geme Dualali Sę Pedelabo Po Jonbolo Ola Mani 1:1 Iomraidhean Croise

Godigo Nogi Ugwaba Sabo Tęąbi Po Wabo Buku Dabe 25:14

Genuai Bidi God aga te aga dologode bidibo we bidi dabe augwaligo abagi mu dao, tama augwali dali te dąų wali bomai po kontrak te augwaliba ma ola mabo dao.

Daniel 8:16

Tama eno te bidi me deligo i wabo te ąį gamia Ulai tomode i weyu, te tama po wabo eno odali, “Ensel Gebriel, nago te Danielgo suali sę po page pusao,” wali.

Daniel 9:21

Eno gedu haluasa po odubadi, tama te ensel Gebriel, eno te hasia yali nade suali, te aga bola dulu, te ena bidibo pesageba asali. Tama te sogo, te dago polobadu iduali te pio ofa ebo sogo dao.

Daniel 9:23

Daniel, Godigo nage godolo mu ebao. Tama nago gedu haluasa po wabo gagalubo sogo, agai te po me deli pusali, te eno nageba magasu asali. Megi te nago olo bugagia munaluao, tama eno nago te nedali po page pusaibao,” ensel bidi Gebrielgo te po wai.

Amos 3:7

Mu tamao, tigidali sę God Genuai Bidigo yabo homu ebo sę, agai aga sę bidi dabebolo hasia po pusaibao, te profet dabeba waibao, tama nosali agai wali po gilama te sę ebo dao.

Dwagi Yai Gesi Po Jongo Asęani 12:49

Magi basowe? Eno po ena digi homugo me wabeo. Te menio. Aya Godigo ena tagala palobaso, ena asai dao. Aga digi enabolo te po wai, ‘Nago te sę eyu, po weyu yao,’ te po wai.

Dwagi Yai Gesi Po Jongo Asęani 15:15

Genuai bidi agai aga sę ebo bidibolo te sę yao po naga wabo dao. Agai te bidibolo te sę yabo po page ola mabo menio. Tiali goli, eno Ayago ena dali wali po tigidali, te po eno dage dali wai dao. Tama tibaso, eno dage sę ebo bidi da wabo nogi naga ma wagobeo, eno dage dali abagi dabe dao wabo.

Dwagi Yai Gesi Po Jongo Asęani 17:8

Nago enabolo wali po, te po tigidali eno augwalibolo pusai dao. Tama augwaligo te po sali. Te po selama, tama augwaligo mu koneai, polobadu ena nage dali bidilama, asai dao. Tama nago ena tagala palama, ena asai dao, te pode augwaligo homugo te po wali, ‘Te po mu po da,’ olama, tama augwaligo konealubo po te pode dąų wabo dao,” Jisasgo te po wai.

Dwagi Yai Gesi Po Jongo Asęani 3:32

Te bidigo agai po wabo da, te nai dabe agai sulama tama agai odolama te po wai. Tialima, bidi me deligo agai te wali po selama, tama dąų wabe.

Dwagi Yai Gesi Po Jongo Asęani 8:26

Eno dagede wabo po hauwa elalubao, dagego ebo kolesaga hauwa me eno osola sueibao. Tialima, ena tagala palali bidi te agai homu kolesaga te mu tama dao. Tama tigidali po eno Godide odobo po te po naga eno tǫde we bidibolo wabo dao,” Jisasgo te po wai.

Polgo Po Pas Rom Dabeba Asęani 16:25

Dago Godigo nogi ugwaba mu sinao. Eno aga gesi wiegi yai po pusubogia tama God agai dage te Kraisde homu kęą pai we bidi mu dąų wabo usu yaibao. Te wiegi yai gesi po te Jisas Kraisde elalubao. Tama polobadu tigidali sogo te po te geme dualali po geme dualaluali,

Galesia 1:12

Tama eno te po bidi mede sabeo. Tama bidi mego te po enabolo ola mabeo. Mu menio. Jisas Krais aga digi enabolo te po ola mayu waselai. Tama te koneama, ena da Godigo tagala palai po wagi pabo bidi mu dao, te dagego koneaibao.

Efesus 3:3

Te Godigo yabo kolesaga po te po polobadu geme dualaluali. Tama te po God agai enabolo ola mani, te agai yabo kolesaga page eno hania konemainogo yai. Tama Godigo tede ena hania ola mani kolesaga eno megi tama pęwadage asęani pogo dagebolo pusali.

Taitus 1:1

Ena Pol dao, tama ena Godigo sę ebo bidi dao. Ena te Jisas Kraisgo po sela pabo sę ebo bidi ena dao. Agai ena dią selama tama tagala palama, tama eno te Godigo hagea sai we bidi augwaligo te agade konealubo po augwa homude eno bomo iligi pao ena dali te po wai, tama eno augwali tau siyu elama, tama augwaligo Godigo mu po selama, tama augwali aga tiwai bidimainogo agai ena te sę mani.

Kraisgo Geme Dualali Sę Pedelabo Po Jonbolo Ola Mani 1:19

Tama tibaso, nago te gedugo suali sę po asęąo, te megi pedalobo sę me, te nosali pedalabo sę po me asęąo.

Kraisgo Geme Dualali Sę Pedelabo Po Jonbolo Ola Mani 1:9

Ena Jon, ena duga ama dao. Ena dage dali hodobo te Jisasde wadolama, tama da deli hani elalubaso, tama gasa bage augwaligo dabolo dene dali, sęgę dali mayu elama, tama da tigidali hodobo bomo elama dolaluyu, sęgę bugagia tolobo dao. Tama ena Godigo we bidi tonalubo sę tomode dage dali hodobo bidibao. Tama eno te we bidi dabebolo Godigo po dali, te Jisasgo hania hanilali mu po dali, te po si augwalibolo pusubaso augwaligo ena sela sąnama, ena te tamu ąį tomode elalubo dwasianu tǫ nogi Patmos teba kalabus mugi pali dao.

Kraisgo Geme Dualali Sę Pedelabo Po Jonbolo Ola Mani 17:1

Te pou elaluali a naga olama me badu nogo si ensel mobo bidi augwali tomode me deli te aga asama, enabolo te po wai, “Nage suagasao. Te penani ebo we te genuai ąį dabe ugwadu daide dulaluali, aga te yali dwai sęde dwai dene mu sabo sę, eno nagebolo te sę ebo ola mawaibao.

Kraisgo Geme Dualali Sę Pedelabo Po Jonbolo Ola Mani 19:10

Tialima, ena te ensel mobo bidi sągą pąba kidu sugunama, tama eno gesabidi tǫba munama, tama eno aga dali lotu po wabo homu yai. Tiali goli agai enabolo te po wai, “Nago tama tigio! Ena nage dali, nago ama dede dali deli sę ebo bidi dao. Dagego konealubo po Jisasde dąų olama, agai nogi haninama pusubo dao. Nago God deli dali naga lotu po wao. Te Jisasde gasa bidibolo po pusubo we bidi, te Godigo Mobo Bidi agai augwali homu hodolama, tama augwaligo te po pusubo dao. Te Mobo Bidigo te tobage sę naga te Godigo nosali yabo sę po pusubo bidi dali me ebo dao,” agai te po wai.

Kraisgo Geme Dualali Sę Pedelabo Po Jonbolo Ola Mani 19:9

Tama te ensel mobo bidigo enabolo te po wali, “Nago te po asęąo: te we bidi dabe augwali Godigo te genuai nai tubo digi asomainogo i wai, te Kibu Sipsip Wai aga we kębode te sogo te i wali we bidi augwali wiegi yai homu pemene eyu bidaibao,” agai te po wai. Tama olama, agai enabolo te po me wai, “E po, eno nagebolo tama wali po, e po te Godigo wali mu po dao,” te ensel bidigo enabolo te po wai.

Kraisgo Geme Dualali Sę Pedelabo Po Jonbolo Ola Mani 21:2

Tama eno te wiegi yai magi dwai sę isiąwai hanu suali, te gesi hanu nogi Jerusalem dao. Eno te hanu te God dali bidibo suali, tama te hanu te dagalu tagalama, tama e tǫba dulali. Te gesi hanugo au dobage wiegi yai elaluali, te we aga bidi dali painogo aga wiegi yai au dobage sisi elama aga bidi dali painogo ebo tiwai ebo suali.

Kraisgo Geme Dualali Sę Pedelabo Po Jonbolo Ola Mani 21:9

Te ensel mobo bidi me deli enaba asai. Aga te a naga olama me badu nogo si wali te tomode ensel bidi te pou te a naga olama me badu si te bidi dolabo dwai nai elaluali pou dabe nogogo tolaluali, te bidi me deli dao. Te dwai sę ebo nai pedalabo sogo te nosali mu dao. Tama te ensel mobo bidigo enabolo te po wai, “Nage asao. Te eno nagebolo te Kibu Sipsip Waigo sabo we ola mawaibao, te we agai nosali mu saibao,” agai te po wai.

Kraisgo Geme Dualali Sę Pedelabo Po Jonbolo Ola Mani 22:1

Tama te ensel mobo bidigo pabo ąį me deli ena ola mawai, te bidibo ula mabo wę, tama te wę te dula ula mu gegemani ebo tiwai ula yai. Tama te ąį aga gomo, te God dali te Sipsip Wai augwali sigo tuni bidi duabo sai pagede te ąį gomo elalubao.

Kraisgo Geme Dualali Sę Pedelabo Po Jonbolo Ola Mani 22:16

“Ena Jisas, eno digi eno mobo bidi dageba tagala palai, tama agai te eno po wali pabo we bidi hani dagebolo e po pusumainogo yai. Ena digi ena te polobadu bidai bidi Devit aga hani bidi wąį dao. Tama te kigamu mu pedalobo te genuai hǫ te ena dao,” agai te po wai.

Kraisgo Geme Dualali Sę Pedelabo Po Jonbolo Ola Mani 22:6

Tama te ensel mobo bidigo enabolo te po wai, “Te nago asęani po tigidali, e po te mu po dao, tama tigidali bidigo e pode homu dąų olama tama teba tiąlubo te usu yaibao. Tama Genuai Bidi God agai po pusumainogo ebo bidigo homu noma bidi hodolomainogo agai aga Mobo Bidi te bidi dabebolo mabo dao. Tama megi agai aga ensel mobo bidi tagala palama, agai sę bidi tigidalibolo te tamadi pedalabo sęde po ola momainogo yai,” te ensel mobo bidigo enabolo te po wai.

Kraisgo Geme Dualali Sę Pedelabo Po Jonbolo Ola Mani 22:8

Ena Jon, eno digi te po tigidali odai, tama te nai dabe tigidali eno suai dao. Eno odolama tama eno suai, tama enabolo te nai ola mani ensel mobo bidi sągą pąba eno kidu sugunama, tama agabolo eno lotu po wainogo yai.

Kraisgo Geme Dualali Sę Pedelabo Po Jonbolo Ola Mani 22:9

Tiali goli agai enabolo te po wali, “Nago tama tigio! Ena nage dali me, e naga ama dede dali, da deli sę naga ebo dao, augwali te Godigo po ola mabo bidi dabe dao. Tama ena e bukude po wali pabo tigidali bidigo deli sę ebo bidi dao. Nago lotu po God deli dali naga wao,” te ensel bidigo te po wai.

Kraisgo Geme Dualali Sę Pedelabo Po Jonbolo Ola Mani 4:1

Te bidigo enabolo te po wabo silama, tama eno te gasa na tiwai eyu tama eno suali, dagalude tų me deli dalaluai. Tama te pedauwalidu polobadu eno odali agai po enabolo mayu te genuai yadogoli tiwai naigo te bu wabo tiwai eyu, tama agai te po wali, “Nage edaba holao, tama eno nagebolo te nosali pedalabo sę tigidali ola mawaibao.”

Kraisgo Geme Dualali Sę Pedelabo Po Jonbolo Ola Mani 5:7

Tama te kibu sipsip wai aga pelama, tama te genuai tuni bidigo duabo nai pageba sabolama, tama tede dulalubo bidigo dolo nogo ugwadu daide elalubo buku agai sai.