Nehemia 9:25 - Godigo dwagi yai po buku

²⁵ Tama dago bulali wąį nǫų dabego te boi hwįnama, tama te bomai obo banis elalubo taun siyu, tama te ili hauwa elalubo tǫ sobadi, te doado bage hauwa pągąnalubo be dabe me sali. Tama augwali te bidigo nigai dwasianu sigi ąį dabe sali, tama te wain gi, me oliv ni gi sobadi, tama te wiegi yai nai hauwa elalubo tobage ni dabe me salio. Tama augwali te bulu tǫ pedaiba bidigi pali sogo, augwa te wiegi yai nai hauwa tuyu, te augwa tigi genuai nisali, tama nago wiegi yai nai tigidali augwaliba mawai baso, te augwali homu wiegi yai pemene mu yai dao.”

Nehemia 9:25 Iomraidhean Croise

Te Israel me Juda Hani Sigo Tuni Bidigo Po Elalubo Buku Deli 14:9

Tiali goli, nago te sęgę sabo meda yai kolesaga me tama edubao,’” wali. “‘Nago te sęgę sabo meda yai kolesagago da, te polobadu king bidi dabego yali kolesaga aiyaba elalualio. Nago bomonama, ena mu tudiba mu ilama, tama nago te bras dabe selama, tama te tibo god noma nigilama, tama augwaliba nago kidu sugunama, tama augwaliba nago lotu po wabo,’” wali. “‘Nago tama tibo kolesagade eno haliga sębę dwai mu ebo,’” wali.

Te Israel me Juda Hani Sigo Tuni Bidigo Po Elalubo Buku Deli 8:66

Te genuai bodolu muani side bidali te silama, tama te nosali Solomongo te we bidi dabe augwa buluba ma tagala palali. Tama te we bidi dabego te kingba usu da po weyu, te tigidali sę agai te elama, te augwaligo te Genuai Bidiba hanaluyu, te agaba wiegi yai sę bugagia emainu yali. Tama augwali pabo sogo te augwali wiegi yai homu pemene mu yali, magi baso meni, te Genuai Bidigo te Israel dabe augwaliba te tigidali wiegi yai sę yali homu kone palama tiali, te aga we bidi augwaliba te sę yai, te aga sę bidi Devit dali te dąų walali po tigidali te usu nagasu te tama tiai dao.

Nehemia 9:35

Te dago king bidali sogo, nago te wąį nǫų dabeba wiegi yai sę mu eyu, tama augwaliba wiegi yai nai mawai. Augwali te genuai tǫ pedaide bidalu, tama te tǫ ili umabo hauwa elalubo genuai tǫde bidai. Tiali goli, augwaligo te homu kone palobeo. Menio. Augwaligo te dwai sęgę sabo sę naga iduali, tama augwali homu begelama, te nageba ma asobeo.

Godigo Nogi Ugwaba Sabo Tęąbi Po Wabo Buku Dabe 105:44

Gasa we bidi augwaligo tǫ agai augwalibolo te tǫ mayu, tama augwaligo te tǫde elaluali gi dabe me sai.

Godigo Nogi Ugwaba Sabo Tęąbi Po Wabo Buku Dabe 65:11

Nago wiegi yai sę daba eyu, tama nago te nai hauwa pedalumainu yai. Te nage gasa me deli pobaso me, nago tede me te nai wiegi yai hauwa pedalumainu ebo dao.

Bugagia Bidibo Kolesagade Po Asęai Buku 30:9

Tiyu, eno doado bage hauwa mu elalubaso, tama eno nage tudiba muyu, tama eno te po waidalio, ‘Genuai Bidi de dawe?’ Tama tiyu, ena te magi nai meni yai bidi pedaluyu, tama eno te nai dabe wi siyu, tama eno God nago nogi aiyaba elaluidalio,” wali.

Aisaia 6:10

Magi baso meni. E we bidi hanigo homu kolesaga te puna pai dao. Tama augwaligo odogo po odobo hagela eyu, tama augwaligo augwa gedu palia sai. Tiyu, augwaligo gedugo te magi nai me deli suidali weyu tiali, tama augwaligo odogo po odidali weyu tiali, tama augwaligo homude te po page ma koneama, tama augwali begasa, enaba ma aselama, tama eno augwali usu ma ilidali weyu, augwaligo tama kolesaga yai dao,” wali.

Aisaia 63:7

Te eno Genuai Bidigo wiegi yai olo mu tau sabo kolesaga po pusubao. Te eno aga nogi ugwaba siyu, te agai da tau siyu, wiegi yai kolesaga hauwa yali po pusaibao. Awe, te aga genuai olo mu tau sabo wiegi yai kolesaga, me homu dene ebogo, agai te Israel haniba wiegi yai sę mu yalio.

Jeremaia 2:7

Eno te bulai wąį dabe odasa asiyu, te olo tǫ bulu tagalama, tama eno augwali te wiegi yai ili elalubo tǫba odasa asai. Tama megi dage te tǫde bidibao, te dage Israel te wiegi yai nai sela tuyu, te wiegi yai nai elalubo digi bidibao. Tiali goli, dage eno te tǫde bidibadi, dagego te dwai kugumini yai kolesaga ebao, te eno dageba mani tǫ te eno gedude dwai nai mu pedalubao,” wali.

Jeremaia 31:14

Te we bidi dabego ofa hauwa enaba selasa asaibao. Tama tibaso, te pris dabe augwa nai hauwa elalueibao. Tama eno te wiegi yai nai hauwa te eno we bidi dabeba mawaibao. Ena Genuai Bidi, eno te po wai dao,” wali.

Jeremaia 32:23

Da hani dabego te tǫ selama, tede bidali. Tialima, te nago augwaliba mani tigidali po, me bomo yai po, te augwaligo wali me pabeo. Menio. Augwaligo nago po sela sąyu, te nago bomo yai po bolalio. Tama tibaso, nago te dene mabo sę dabe da haniba yai dao.”

Esekiel 20:6

Tama te sogo eno dila pai bomai po augwali dali dąų olama, te augwali eno Isipde selama, te eno augwaliba maiabo te dąį ilali tǫba odasa asali. Te tǫ te polalubo sawi yai tǫ mu elaluali, te gasa badu tǫ pedai tigidali aiyaba elaluali. Te tǫgo ili hauwa elalu, te nai wiegi yai mu holai dao.

Hosea 13:6

Tialima, nosali dage te wiegi yai tǫba sabalubo sogo, te dage nai pągąna pelama, te dage tigidali nai usu yali. Dagego te nai sela selama da, tama dagego te homu yali, te duga bomogo digi dagego te nai sali homu yai. Tama tiyu, dagego ena homu kone gegeda palubao,” wai.

Hosea 3:5

Te tiali sogo silibaso da, teda te Israel dabe te Godiba ma aselama, te Genuai Bidi deliba naga lotu waibao. Te augwaligo te king Devitgo wąį nǫų deli naga wali paibao. Tama augwa te Genuai Bidigo po dologoba naga pobaso, tama agai te haniani wiegi yai nai augwaliba mayu yaibao.

Polgo Po Pas Rom Dabeba Asęani 2:4

Te ma, nago e homu ebawe, “Te Godigo ena wiegi yai bugagia iliyu, tama ena bobobage sogo tonaluyu, tama agai te dwai sę ebo wei enabolo polo me ponogobeo.” Te homu egio. Te Godigo wiegi yai polo wei ponosiąbo kolesaga ebode, te nago homugo te olo nai tiwai da, te homu ebawe? Godigo homugo nage homu begelemainogo, tama agai dwagi yai kolesaga naga nagebolo eyu tonalubo dao. Te kolesaga page nago konebewe?

Bomai Po 3:5

Tigidali te hanu dabe te masigigo nigai moni obo mu elama, tama bomai sunumi mu nigali, tama augwaligo te sunumi dabe te bomai ain dili dabego dąų waliyu yali dao. Tama te obo meni yai dwasianu bulu dabe hauwa mu elaluali.

Bomai Po 32:13

“Godigo augwali sula tagalu, te bulu du dabe tonalumainu ilali, tama te gide bulali nai dabe te augwaligo sela tuyu yali. Tama augwaligo te pusu nai te hani bunu ge te masigi dedagede sela tuyu yai dao. Tama me augwaligo oliv ni bugagia holali, te masigi hauwa yai tǫde.

Bomai Po 32:14

Augwaligo kau kibu dabe, me meme kibu dabego ame pę hauwa augwaligo sali. Tama augwaligo kau kibu, me sipsip kibu, me meme kibu dabe moni bage mu nisali. Tama augwaligo wit me wain dabe wiegi yai mu holali.”

Bomai Po 32:15

“Te Genuai Bidigo we bidi augwaligo nai dabe hauwa mu sali. Tiali goli, augwaligo aga dali dwai hagoma sę yali. Augwali nai hauwa sogo mu tulama, tama augwali genuai bidi dabe mu nisali. Godigo augwali nigilali, tama aga bomogo augwali ma oda sali. Tiali goli, augwaligo aga tudiba togolali, tama aga tagalali.