Nehemia 8:9 - Godigo dwagi yai po buku

⁹ Te we bidi dabego te bomai pogo wabo po odolama, tama augwali haliga sęgę mu elama, tama augwa gela walio. Tama te polaluali gavman bidi Nehemia, me pris Esra, tama te Livai dabego te we bidi augwaliba te tiwai po wali, “Megi te dago Genuai Bidi Godigo te genuai bodolu muai side dao. Tama tiyu, dagego te homu dene eyu, gela weyu me igio,” wali.

Nehemia 8:9 Iomraidhean Croise

Te Israel me Juda Hani Sigo Tuni Bidigo Po Elalubo Buku Si 22:11

Tama te kingo te Godigo te Bomai Po te buku tomode elalubo po odobo si, tama agai haliga sęgę mu eyu, tama aga holobo ugwa pisayali.

Te Israel me Juda Hani Sigo Tuni Bidigo Po Elalubo Buku Si 22:19

nago koneanio, te magi nai sę eno dagebolo olama, tama te Jerusalem dali, te Jerusalem taunde bidibo we bidi dabe augwali dali yabo sę po, eno e tama po obao, Jerusalem bulu dolaibao, tama te Jerusalem te olo bulu mu elaluaibao. Tama te gasa hani we bidi dabe augwaligo homugo te dwai po te augwa boi bidi dabe dali weyu, augwaligo e tama po waibao, “Dage te Jerusalem taun bulu dolali yali gilama dage me tama dolao,” waibao. Tialima, te king, nago te e tama po odobo sogo tama te nago hani we bidi dabe dali yabo sę po da, nage haliga begelama, tama te eno gedude naga digi aiyaba elaluali. Tama me te naga bulubo ugwa pisalama, tama gela weyu, tama ena i wai dao. Tama teyu, megi ena Genuai Bidi, eno po obao, eno nago i wabo odalio.

Tuni Bidi Dabego Po Elalubo Buku Si 15:3

Bobobage sogo mu te God Mu Israel dabe dali munu me bidai menio. Magi baso meni, augwaligo agaba tudi ola mobaso. Tama augwaligo Godigo po augwaliba ola maiabo pris bidi meni yai dao. Tama me augwaligo agai bomai po dabe wali me pai menio.

Tuni Bidi Dabego Po Elalubo Buku Si 30:22

Te Livai dabe augwaligo te lotu wabode me Genuai Bidiba ofa ebode augwaligo wiegi yai sę mu yali. Tama tibaso Hesekiago augwalibolo wiegi yai homu ebo po wali. Te we bidi augwali lotu weyu te nai ulubo sę idubadi, te 7 sogo tama bidali. Tama augwaligo God dali homu deli ebo ofa yali. Tama augwaligo gedu haluasa po weyu Genuai Bidi augwa wąįgo Godibolo buba hwi po wali.

Tuni Bidi Dabego Po Elalubo Buku Si 34:19

Te kingo te bukude Godigo bomai po te bukude elalubo po odobode, tialima agai homu sęgę genuai mu ebaso, tama aga ugwa pisąyali.

Tuni Bidi Dabego Po Elalubo Buku Si 34:21

“Te bomai po buku eno megi sali da, tede Genuai Bidigo homugo dago wali pomainu homu yali po e bukude haninama te wali dao. Tiali goli dago wąį nǫų dabego te po wali pai menio. Tama tialima, te tama tialigo da, Genuai Bidigo da dali sębę genuai mu emainu ilali dao. Tiali goli dago megi Genuai Bidigo te buku polo te sali dao. Tama tialima, eno homugo dage pelama, Genuai Bidibolo hanalugi pao, tama ena dali Israel bulude bidibo we bidi me Juda bulude bidibo we bidi, dago mena sę emainu egowe page sugi piąo,” king Josaiago te po wali.

Tuni Bidi Dabego Po Elalubo Buku Si 35:3

Tama me agai Livai dabebolo po me deli mani. Augwali te Genuai Bidigo hani mu dao, tama augwaligo Genuai Bidigo po Israel we bidibolo ola maiabo sę elaluali. Agai po da e tama dao, “Dage pelama, tama Genuai Bidigo te Dąų Wali Bomai Po Munalubo Halobage te Genuai Bidigo tempel be tomoba mugi piąo. Polobadu king Solomon king Devitgo ogwago te tempel be nigai dao. Megi da, dagego polobadu yali gilama te halobage tolasa ugwa eda yabo menio. Tama tialima dagego Genuai Bidigo tempel be tomode sę bugagia iyąo, te dago God dao. Tama me dagego Israel we bidi, te Godigo we bidi, tau sao.

Esra 2:63

Tama te Juda dabe augwa polalubo gavman bidigo te bidi dabego te Godiba ofa ebo nai te tugio olama, te augwali habu selali. Agai te po wai, augwaligo te pris tuni bidi me deli pedalubaso da, teda te polalubo prisgo te dwasianu masigi side te po elalubo sulama, te Godigo homu sumainao, tama Godigo te po omainu yaibao, te bidi dabe augwali te pris sę emainao po wagowe, ma te subo dao.

Esra 7:11

Te Esra aga te Babilon tagalasiąbadi, te king Artaserksisgo te pas me deli asęnama, tama Esraba mawai, te Genuai Bidigo te Israel dabeba mani te bomai po tigidali te bidi Esrago bugagia koneai. Te pasde te tiwai po wali,

Nehemia 10:1

Hasia polalubo bidigo nogi asęani, te polalubo gavman bidi Nehemia, te Hakaliago ogwa dao. Tama te Nehemia tudi badu nosali, Sedekaia aselama, te nogi asęagasali.

Nehemia 12:26

Tama te Livai dabe te polalubo pris Joiakim bidali sogo bidali, te Josuago ogwa, tama te wąį nǫų Jehosadak, me te polaluali gavman bidi Nehemia, me pris Esra bidali sogo, te Godigo bomai po page bugagia koneai bidi dao.

Nehemia 7:65

Te Juda polalubo gavman bidigo te bidi dabego te Godiba ofa ebo nai tugio olama, habu selali. Agai te po wai, augwa te polalubo pris me pedalubaso da, teda te polalubo prisgo te Godigo homu konea sabo masigi si selama, tama Godigo te bidi dabe te pris bidi sę sogowe, ma meni egowe, te po wabo odaibao wai.

Nehemia 7:70

Te we bidi hauwago mone me doado bage te Godigo tempel be ma sę emainu tau sabo nai mawai. Tama polaluali gavman bidigo te gol mawai, te aga sęgę usu te 8 kilogram yali, tama 50 dis pou gol, me 530 te prisgo mubo wiegi yai ugwa mawai. Tama te deli deli hanigo tobolu bidigo te 168 kilogram sęgę elalubo gol mayu, te 1,250 kilogram silva me mawai. Te gasa we bidi dabego te 168 kilogram sęgę elalubo gol, me 140 sęgę elalubo silva, me 67 te pris dabego gudubo ugwa me mayu yai dao.

Kolesaga Koneai Bidigo Pusali Po Elalubo Buku 3:4

Agai te gela wabo sogo muyu, te gisugu wabo sogo bodolu muyu yali. Agai te hobede yabo sogo muyu, te tęąbi po wabo sogo muyu yalio.

Aisaia 61:3

Te Saionde gela udubo we bidi dabeba eno te nagame yai haliga dua eyu, pemene ebo homu me selasa asaibao, te augwa bomo silali bageba tama tiwaibao. Augwali homu dene ebaso, te sia keli augwa toboluba muani. Tiali goli, eno te nai hasegelama, tama dwagi yai au yabo nai augwaliba mueibao. Awe, eno augwaligo tigiba te wiegi yai denami ebo wel mawaibao, tama augwali homu dene ebo tagalama, dwagi yai homu pemene eyu bidaibao. Te augwa bomo ma selama, te Genuai Bidiba pemene ebo balia waibao. Augwa tigidali te doloba pai kolesaga naga ebo sę bomo yaibao. Te gasa bidi dabego sueibao, augwali te Genuai Bidigo digi bulali ni kali tiwai elalubao, tama augwaligo Genuai Bidigo nogi ugwaba saibao.

Hosea 4:6

Te we bidi dabego ena bugagia konesiąbaso, augwaligo ena wali me asobeo, tama teyu, te augwali dolaibao,” wai. “Dage pris dabego ena wali me asisąyu, tama dagego eno po sela sąwanio. Tama tiyu, te eno dage sela sąwaibao. Tama eno te dagego wai dabe me te eno pris pedalumainu me egobeo,” wai dao.

Pris Sę Ebo Bomai Po 23:24

“Te Israel we bidibolo te tiwai po walao. Te 7 polua dei 1, dage toma nao. Te duga genuai side me deli dao, te dagego bu wabo nai biugel bu olama, te dage sisinagaselama, lotu wao.

Malakai 2:13

Tama eno dagebolo te dagego gasa dwai sę me ebo po obao. Genuai Bidigo te dagego agaba sela pabo ofa umabo hagela eyu, te me sogobeo wali. Tama tibaso, dagego gela weyu, te i dwai weyu, te gela kugai ąį te Genuai Bidigo alta daiba gealubo dao wali.

Polgo Po Pas Rom Dabeba Asęani 3:20

Magi baso meni, te bomai po wali pabo kolesagade te bidi deli agade Godigo ‘Aga doloba pai bidi dao’ po me wagobeo. Te bomai pogo dena dwai sę ebo kolesaga denabolo hania mu ola mayu ebo dao, te tama sę naga te bomai pogo ebo dao.

Bomai Po 12:12

Tialima, dage, me duga wai dabe, me duga sę ebo we bidi, me te Livai dabe te dagego hanude bidibo, te bage dage sese tama Genuai Bidi pageba pelama, tama agaba wiegi yai homu pemene mu igi piąo. Dagego Livai dabe bugagia mu koneawe, magi baso meni, augwaligo tǫ mu menio.

Bomai Po 12:7

Te pesage da, te God dago Genuai Bidigo gedude, te dage me duga we wai dagego tuyu, me dage wiegi yai homu pemene yabo madi da, magi baso meni, te Genuai Bidigo dagebolo bomo mayu, tama tigidali dagego yali sę te wiegi yai pedelai baso, tama tiagameo,” wali.

Bomai Po 16:11

Dage sese tama te lotu wabo pesage deliba pelama, tama Genuai Bidigo gedude dage wiegi yai homu pemene igi pao, te dage, me duga wai puluba, me duga sę ebo we bidi, me te Livai dabe, me te gasa bulu bidi dabe, me te wai dabe augwa aya isai dabe, me te we dabe augwa bidi isai dabe, dage te hanu dabede bidalubo bage, dage sese tama wiegi yai homu pemene iyąo.

Bomai Po 26:14

Eno bidi isali sogo gela wali sogo eno nago nai dali me tuai menio. Te ena nago gedude meda yai bidali sogo, eno te nai dabe eno be buluba pali me eno me selama, tuai menio. Tama eno meba selama, te isai bidiba ofa me yai menio. Genuai Bidi, eno God, eno nago naga te nai dabego nago enabolo yao wali, te sę dabe dolo tama yai dao.

Jems 4:9

Tama duga te dwai sę ebo kolesagade homu sęgę eyu tama gela hauwa waiyąo. Tama dagego megi tama tebo kolesagade dagego dwagi yai homu eyu gisugu wai, tama dagego te dwai sęde gisugu wabo te kolesaga hasegelama, tama duga te dwai sę yalide homu begeleyu gela wao. Tama dage te megi naga wiegi yai homu te dwai sęde ebo bidi dabe, dagego te homu ebo hasegelama, tama duga te yali dwai sęde hale eyu homu dene yao.