Nehemia 6:6 - Godigo dwagi yai po buku

⁶ Te pasde wali po te tiwai, “Ena Senbalat, eno Gesemgo te tiwai po wabo odai, te da pąde bidibo we bidi hani tomode te po me deli sabilibo odali. Tama te sabilibo po te tiwai wai, nage dali, te gasa Juda dabe daligo te king dologode munu ma bidigobeo olama, tama dagego hwįnama, te duga gavman tedali hodolainu yali. Tama te pagede naga dagego te obo banis ma geselebao. Tama nago me te naga digi te king pedalumainu ebo dao.

Nehemia 6:6 Iomraidhean Croise

Esra 4:12

King, nagebolo dago te e tama po obao. Te Juda dabego nago gasa bulu tǫ pedaide bidali taga soyu, tama te Jerusalemba ma aselama, tama augwaligo te dwai taun ma geselainu ebao. Polobadu te hanu we bidi dabe augwaligo te kingo po sela sąwai we bidi dabe dao. Tama megi te Juda dabego te taun moni masigi obo nigibo sę ma gagalama, tama te pąde tama te sę silainogo ebao.

Esra 4:15

Dago homugo te kuskus dabeba te po walama, te augwali pelama, te gavman buku nedegi pomainu yao, te nago wąį nǫų dabe bidali sogo asęani po tede elalueibao. Te nago tama tiyu da, te augwaligo asęani pogo nageba ola mobaso, tama nago te taun Jerusalem we bidi dabe koneama, te augwali dwai hagoma ebo we bidi dabe dao. Te wąį nǫų dabe bidali sogode digi, augwaligo te kingba me, te bulu tǫ pedai tonalubo bidi dabeba me, sęgę mayu yai. Te Jerusalem dabego te king dabego po sela sąbaso, tama te pagede naga tama te king dabego te taun dolai dao.

Nehemia 2:19

Tiali goli, Senbalat, me Tobia, me Gesem, te Arap hani bidi me deli, te bagego dago te sę yabo po odali. Tama tibaso, te augwali aselama, tama dabolo te posobo po weyu, te gisugu mayu yalio. Augwaligo te tiwai po wai, “Dagego magi yainu ebawe? Dagego te taun obo ma nigainu eba, agawe? Dagego homugo te dagego tama tiwai elama, tama dage te bomai bage pedelama, tama dagego te king dali hwįaiba weyu teba, agawe?”

Nehemia 6:13

Augwali sigo homugo te Semaiago pogo ena wi ilama, tama ena te Tedali Gasagi Yai Be Habu tomoba pomainu elama, tama te habu selai kolesagade ena sęgę somainu yali. Tama tibaso, te augwaligo eno nogi dolama, tama ena aiyaba elalueinu yai.

Nehemia 6:5

Nosali Senbalatgo enaba po ma ola tolali. Tama te sogo agai asęani pas te halusiąwai. Agai te aga sę bidi me delibolo menama, te enaba tolali.

Nehemia 6:7

Tama nago te profet mebabolo walama, augwaligo te tiwai po te Jerusalem tomode pusumainogo yai, ‘Megi da, te da Juda dabe dena digi te king elalubao.’ Eno te sabilibo po page bugagia koneainu ebao, tama tiyu, eno homugo dadi si deliba sisinama, te po dodolainu homu ebao, tiyu king aga digi nagede augwaligo te wali po odabuo,” Senbalatgo te tiwai po asęna tolali.

Jeremaia 20:10

Eno odali, te bidi hauwa augwa hasi pomu po dua digi mia siyu, te tiwai po obao, “Jeremaia aga te po wabo bidi, ‘Te bidi dabe wi ilibo sę eyu, te tigidali badu bidaibao.’ Tegoba, dago aga po tų ilaibao. Te megi tama po tų ilinao,” augwaligo te po wabo. Te eno hai namu tigidaligo homu te dwai sę enaba pedelama, te ena aiyaba elalumainao homu ebao. Tama augwa te tiwai po wali, “Te dago aga gaga munama, te dago aga aiyaba elaluama, te agai yali dwai kolesaga wei ponaibao,” te po wai.

Matyu 5:11

“Tama dagebolo sęgę mabo bidi dabe augwaligo suali dagego ena wali pabo subaso da, te augwaligo dage dali dwai posobo po weyu, tama dene mobadi augwaligo te kedu meni yai tibo po haniani weyu ebaso da, teda dage homu pemene wiegi yai yao.

Dwagi Yai Gesi Po Lukgo Asęani 23:2

Augwaligo gagalama, Jisas tų ela mayu, te bidi Pailat gesabide. Augwaligo te po wai, “E bidigo da hanigo ebo kolesaga dolali. Jisasgo da dabe weyu, dago gavman tuni bidi Sisarbolo takis masigi magio homu ebo dao. Tama Jisasgo dabolo habu selebo po weyu, te po wai, ‘Ena da, Godigo sa muyu asaibao wali bidi Krais dao. Te ena tuni bidi dao,’ Jisasgo te po wai dao,” augwaligo te po wai.

Dwagi Yai Gesi Po Jongo Asęani 19:13

Pailatgo te po odolama, tama agai te gavman moni be tomoba ma pelama, tama Jisas buluba sela asai. Tama Jisas buluba sela aselama, tama Pailat aga po tų odainogo duabo digi duawai, te bulu augwaligo nogi masigigo bidabo sai nigai digi dao wai. Tama te Hibru pogo te nogi tama wai, Gabata, te nogi tama wai.

Polgo Po Pas Rom Dabeba Asęani 3:8

Tama we bidi augwaligo te po tama weyu e po me wabo dao, “Ao, Godigo te dwagi yai kolesaga pedalumainogo te dago dwai sę inao. Te bidi Pol agai te tiwai po naga wabo dao,” augwaligo enade nogi posobo po weyu te po wabo dao. Nosali te bidi dabe augwalibolo te Godigo dwai dene wei ponoyu, te agai dolo mu naga wei ponaibao.

2 Korin 6:8

Tama bidi mebago dago nogi ugwaba sabo dao, tama bidi mebago da nogi aiyaba elaluyu ebo dao. Mebago posobo po dwai dabolo wabo, tama mebago gasa bidi dabe augwalibolo te dago wiegi yai kolesaga ebo po pusubo dao. Boi bidi dabe augwaligo da tibo po weyu, te we bidi dwai sę tomoba kegebo bidi da homu ebo dao, tiali goli menio, dago mu po naga wabo dao.

1 Pita 3:16

Tialima, te po page agabolo ola mobadi dagego wado po wagio. Te meni. Dage te nagamea pai homu kolesaga elama, tama aga dologode bidiyu, te konealubo po page agabolo ola mao. Tama timainogo dage te doloba pai kolesaga naga yao. Tama dagego tama tiyu da, te bidi meba augwaligo dage dali nogi posobo po weyu, tama dage Krais aga hani we bidigo ebo dwagi yai sęde augwaligo ‘Te dwai sę dao’ po wabo bage, nosali augwaligo koneaibao, te pode augwaligo mu geda muani. Tama te koneama tama augwali ge neyu hale mu yaibao.