Nehemia 4:14 - Godigo dwagi yai po buku

¹⁴ Eno suali, te we bidi wi elama, haliga sęgę elaluai, tama tibaso eno te tobolu bidi dabeba, me ofisa dabeba, me te tigidali we bidiba te tama po wali, “Dage te boi bidi dabede wi me igio,” wali. “Dagego te sę ebo te bugagia homu kone palao, Genuai Bidi te bomai mu da, tama tiyu te tigidali bidi agade wi ebo dao. Tama tialima, odao. Dagego te bomo elama hwįbaso da, teda te dagego abagi dabe me, we wai puluba me, te duga be dabe, te doado bage me, te me dolisąma bugagia elalueibao,” wali.

Nehemia 4:14 Iomraidhean Croise

2 Samuel 10:12

“Dage wi me elamuo. Dago dena hani bidi me te Godigo dabolo mani hanude homu kone palama, tama dago bomo elama, hwįąo. Tama Genuai Bidigo aga homu wali pelama, tama aga te godolo ebo homu tiwai emainu yao,” Joapgo te aga ama Abisaibolo te po wai.

Tuni Bidi Dabego Po Elalubo Buku Si 32:7

“Dage bomo elama dolaluyu, tama dagego te Asiria king bidi aga te geninama ami bidi dabede dage wi igimio. Te mu dao, augwaligo genuai bomo elalubao. Tiali goli dago genuai bomo mu augwaligo bomo aiyaba elaluai mu te elalubao.

Nehemia 1:5

Eno e tiwai gedu haluasa po wali, “God, Genuai Bidi, nage te dagalu tonalubo bomai bidi da, tama da Israel dabe nage dologoba pelama bidibao. Nago te dąų wali bomai po te kontrak me deli da dali yali elalubao, tama dago nage godolo mu elama, tama nago po bugagia mu wali pobaso da, teda nago te dąų walali bomai po kontrak te me tagalisiąma, tama nago da godolo mu ebo dao.

Jopgo Po Asęani Elalubo Buku 37:22

Tama me badu pada badu not badu te moni ula mu dagaludu asobao. Agai au da, te gol masigi tiwai dao. Te da te God aga au te munama, tama genuai ula dali, moni bomo dali si te asobao.

Godigo Nogi Ugwaba Sabo Tęąbi Po Wabo Buku Dabe 143:5

Megi da, eno te polobadu pedelali nai dabeba homu kone ma ebao. Tama eno te nago yali sę dabe, me te nago wiegi yai sę dabeba te eno homu kone ma ebao.

Godigo Nogi Ugwaba Sabo Tęąbi Po Wabo Buku Dabe 20:7

Te meba hanigo hagoma eyu, te hwįbo karis dabeba homu muani, tama gasa hani mebago te augwa hos dabeba homu muani. Tiali goli, dago te dena God Genuai Bidiba, Godiba, konealubo homu dąų wabo dao.

Godigo Nogi Ugwaba Sabo Tęąbi Po Wabo Buku Dabe 27:1

Genuai Bidi God aga te eno ula page da, tama agai ena tau sabo da. Tama tiyu, te bidi me delide ena midigi me egobeo. Genuai Bidigo naga ena seselalubao, te moni bomai obo tiwai te palialubao. Tama tiyu, te magi nai me delide ena wi me egobeo.

Godigo Nogi Ugwaba Sabo Tęąbi Po Wabo Buku Dabe 46:11

Te Tigidali Bomo Elalubo Genuai Bidi da dali bidibao. Te Jekopgo God aga te da seselalubo bidi mu da.

Godigo Nogi Ugwaba Sabo Tęąbi Po Wabo Buku Dabe 65:5

God, nago naga te nago da te boi hwįbode ma selama, tama da bugagia bidibo dao. Nago dago gedu haluasa po wabo odao. Te nago da ma sainu yali sę te sę mu yai. Te dade te digibulu mu te tigidali tǫ habude bidibo bage dabe, tama te augwa pesageba sabolainu, te tamu ąį nogeali, augwaligo konealubo homu nageba dąų mu wabo dao.

Godigo Nogi Ugwaba Sabo Tęąbi Po Wabo Buku Dabe 66:3

Dago te tama po Godiba wainao, “Te nago ebo sę tigidali te wiegi yai mu ebao. Te nago bomo genuai ugwanu mu igulai elalubao, tama nago boi bidi dabe te wi mu elama, tama augwali te nago gesabidiba pibia sagaselama, te kidu sugunagasobo dao.” Te tobage po wainao.

Godigo Nogi Ugwaba Sabo Tęąbi Po Wabo Buku Dabe 66:5

Dage aselama, te Godigo yali sę suiąo. Te genuai genuai sę dabe agai te we bidi dabe tomode yai dao.

Ma Dobola Sali 14:14

Odao, Genuai Bidigo dage tau siyu, hwįaibao. Tiali goli, duga digi magi sę me elamuo. Dagego pedauwali dąų naga wao,” wali.

Ma Dobola Sali 14:25

Genuai Bidigo te augwaligo karis nadoba te tǫde dąų ilali, tama te karis dabe bomonama uda wainogo yali usu ebeo. Tama te Isip dabego te po wai, “Odiąo. Te Genuai Bidi Yawe aga hani Israel augwali tau siyu, da dali hwįbao. Da polo wi pinao. Dago augwali polo taga pinao,” wali.

Kolesaga Koneai Bidigo Pusali Po Elalubo Buku 12:1

Godigo da tigidali nigali. Tibaso, dage gesi ogwa bidi bidibadi digi dagego aga homu kone palao. Tiyu, dagego aga homu kone gegeda paligio, tama nosali dage monu dabe pedalubo side te dwai sęgęgo dage gegebaso, te dage deli deligo te tiwai po waibao, “Eno ena bidabo ulade wiegi yai homu pemene ebeo,” po waidali weyu.

Daniel 11:32

“Tama kingo te God tudiba mubo bidi dabe bega sabo po olama, tama te augwaligo aga wali paibao. Tiali goli, te God dologoba mu pelama bidali we bidi da, teda augwali te bomonama dolalu, te king bidigo po wali pogobeo.

Sekaraia 14:3

Tama Genuai Bidigo te bulu tǫ kantriba boi hwįgi paibao, te agai hwįbo sogo te ebo kolesaga tiwaigo te boi hwįaibao wali.

Israel Hanigo Namba 14:9

Dagego te Genuai Bidi dali dwai homu elama, agai po sela sąyu elama, tobolu gagea pigimio, tama dage te ude bidibo we bidi dali wi igimio. Magi baso meni. Augwali te dago bulu hasa tiwai dao. Dago augwali aiyaba elalubo bomai sę me egobeo. Magi baso meni. Genuai Bidi da dali bidiyu, agai augwaligo augwa tonalubo tibo god dabe polo dolalio. Tialima, augwalide wi igimio,” te bidi sigo te po wai.

Matyu 10:28

Dagego tigi naga ela mubo bidi dabe te dage wi egio. Augwaligo dagego po wabo mobo noma bidi te dali me ela mugobeo. Menio. Te Godigo dagego tigi me noma bidi dali te genuai dene sabo te siade mu dolobo bomo elalubaso, te dage agade naga wi yao.

Bomai Po 1:21

Te tǫ suao. God dago wąį dabego Genuai Bidigo dagebolo megi mani dao. Dage pelama, teba duagi piąo, te agai dagebolo hasia wali gilama. Dage wi elama, homu hauwa me kųą pelamo dao.’ Eno te po wai.”

Bomai Po 10:17

Magi baso meni, God dago Genuai Bidigo te tigidali te tibo god dabe me te tigidali bomo elalubo te tigidali nai dabego bomo edelai mu elalubo. Aga te genuai bomai mu dao, tama tiyu tigidali nai dabe aga dologode naga elaluao. Agai te po tų ebode te abagi si ebo kolesaga wali peyu, me te we bidigo agaba magi nai mayu, aga homu bea sabo homu ebo kolesaga emainogo sula tagalobo menio, te haniani sę ebo kolesagade.

Hibru 13:6

Tama Godigo te po obaso, dago dena homu bomonama tama dago e tiwai po waiyąo, “Genuai Bidi da ena tau sabo bidi dao. Te ena wi me egobeo. Te bidi dabe augwaligo ena dali ebo dwai kolesaga tigidaligo ena dologowe? Menio!”

Josua 1:9

Eno nagebolo wai dao. Tama nage bomo elama dolaluyu, tama nage wi munu me isiąyu, tama nage magi nai me delide habu bulu me pelamuo. Magi baso meni, ena God, te nago Genuai Bidi, te ena nage dali te nage pabo tigidali buluba paibao,” te po wali.

Te Israel Tobolu Bidi Dabe 3:27

Nosali aga te Israel dabego tǫba pedelama, tama agai Efraimgo bidali bulu duba sabolama, te bu wabo nai biugel bu olama, te Israel bidi i olama, te hwįagasao wai. Tama augwali nosali asobadi aga polasa peyu, tama augwali te bulu duba dabe aiyaba dulali.