Nehemia 12:43 - Godigo dwagi yai po buku

⁴³ Te side augwaligo te Godiba ofa hauwa eyu, tama augwa wiegi yai pemene genuai elaluali, magi baso meni, Godigo digi augwali te wiegi yai pemene ilali. Tama te we dabe me, wai puluba dabego me wiegi yai pemene yai. Tama te digibulu bidali we bidi, augwaligo te genuai i wabo me pemene ebo po odai dao.

Nehemia 12:43 Iomraidhean Croise

Tuni Bidi Dabego Po Elalubo Buku Si 20:13

Te Juda bulu bidi dabe me we wai dabe augwali Genuai Bidigo gedude doligiluali, te Genuai Bidigo tempel be pąde.

Tuni Bidi Dabego Po Elalubo Buku Si 20:27

Tialima Jehosafat aga polama, tama tigidali ami dabe augwali aga wali elama, tama augwali Jerusalemba wiegi yai homu pemene dali pali. Magi baso meni, Genuai Bidigo augwali tau selama, augwaligo boi bidi dabe aiyaba elaluai baso.

Tuni Bidi Dabego Po Elalubo Buku Si 7:10

Tama te namba 7 poluago 23 deide Solomongo Israel dabe augwali augwa buluba ma pepelamainu tagala palali. Tama augwali ma pepelabo sogo augwali wiegi yai homu pemene mu yali. Magi baso meni, augwaligo Genuai Bidigo tigidali wiegi yai sę Devit dali iyu, me Solomon dali iyu, me Israel we bidi dabe dali iyu yaibaso, te aga we bidi dabe dali.

Esra 3:13

Te i hai weyu gela wali te genuai mu pedelama, tama te digibulu bidali bidi dabego te odabo usu yai. Tiali goli, augwaligo te bidi dabego te homu dene eyu, te gela wabo, ma te wiegi yai homu pemene eyu i hai oba, te homu me egobeo. Augwaligo te genuai posolu kulukulu wabo naga odai dao.

Nehemia 12:27

Te Jerusalem hanu moni masigigo nigai obo silali sogo, te tigidali bidi sisinagaselama, te obo te Godigo da olama, sa mubo lotu wali. Tama augwaligo te Livai dabe i weyu, te bidali pedai badu te taga soyu, te augwali dali deliba siginagaselama, te wiegi yai homu pemene elama, te Godiba balia po weyu, usu da wali. Tama augwaligo te tiwai balia po wabo sogo, te Livai mebago te musik weyu elabo kapa plet si tola siąo wai, tama mebago te haniani gita eliyu yalio.

Nehemia 12:42

Te gasa bidi dabego nogi te tiwai, Masea, me Semaia, me Eleasar, me Usi, me Eser. Tama Jesrahiago te balia wali bidi dabe tonaluai, tama tigidaligo te balia po wai dao.

Jopgo Po Asęani Elalubo Buku 34:29

Tiali goli, Godigo magi sę me igi menigi sogo da, teda dego mu Godigo dwai page elalubao po wagi dawe? Ma, agai gesabidi dualigi sogo da, teda de aga pageba mu pigi dawe? Tiali goli, agai tigidali we bidi dali, tigidali bulu tǫ kantri dali si tonalubo dao.

Godigo Nogi Ugwaba Sabo Tęąbi Po Wabo Buku Dabe 27:6

Tama tiyu, te ena bobegelalubo boi bidi dabe augwali eno aiyaba elaluaibao. Te eno wiegi yai homu pemene umabo mu elama, tama i weyu, te Godigo tedali wiegi yai bede ofa yaibao. Te eno aga nogi ugwaba sabo balia po waibao.

Godigo Nogi Ugwaba Sabo Tęąbi Po Wabo Buku Dabe 28:7

Godigo naga ena seselaluyu, tama ena bobegela sai elalubo dao. Tama tiyu, eno konealubo homu agaba muani da. Genuai Bidigo ena tau sobaso, tama eno wiegi yai homu pemene agaba ebao, tama eno aga nogi ugwaba sabo balia po dabe obao.

Godigo Nogi Ugwaba Sabo Tęąbi Po Wabo Buku Dabe 9:2

Eno nageba homu koneama, tama eno te wiegi yai homu pemene ebo balia waibao. Te Ugwade Bidibo God mu, te eno balia weyu, nago nogi ugwaba saibao.

Godigo Nogi Ugwaba Sabo Tęąbi Po Wabo Buku Dabe 92:4

Eno te nago bomai sęba homu kone palama, tama ena bugai haliga mu elama, tama eno te wiegi yai homu pemene ebo tęąbi ebo dao.

Aisaia 61:3

Te Saionde gela udubo we bidi dabeba eno te nagame yai haliga dua eyu, pemene ebo homu me selasa asaibao, te augwa bomo silali bageba tama tiwaibao. Augwali homu dene ebaso, te sia keli augwa toboluba muani. Tiali goli, eno te nai hasegelama, tama dwagi yai au yabo nai augwaliba mueibao. Awe, eno augwaligo tigiba te wiegi yai denami ebo wel mawaibao, tama augwali homu dene ebo tagalama, dwagi yai homu pemene eyu bidaibao. Te augwa bomo ma selama, te Genuai Bidiba pemene ebo balia waibao. Augwa tigidali te doloba pai kolesaga naga ebo sę bomo yaibao. Te gasa bidi dabego sueibao, augwali te Genuai Bidigo digi bulali ni kali tiwai elalubao, tama augwaligo Genuai Bidigo nogi ugwaba saibao.

Jeremaia 31:13

Te sogo te wegi ogwa we wiegi yai homu pemene elama, te tęąbi po weyu, te gesi bidi me, monu dabe me, pemene yaibao. Eno augwali homu dene ebo silama, te augwali bugagia haliga tegalumainogo yaibao. Te eno augwali haliga nagame elama, dua digi bidiyu, pemene emainogo yaibao.

Jeremaia 33:11

tama augwa bugai haliga elama, pemene eyu, tama augwa te we bidi we sabode nai ulubo sogo te nai tuyu, wiegi yai homu pemene yaibao. Tama te we bidi dabego buba hwi wabo ofa selama, te Genuai Bidi, eno beba sesaibao. Tama augwa te ofa nai sela asobo sogo da, teda augwa tęąbi po e tiwai waibao, ‘Dago buba hwi te Tigidali Bomo Elalubo Genuai Bidiba wainao. Agai dabolo wiegi yai sę mu ebo dao. Sesemane sesemane sogo agai da godolo mu ebo dao.’ Augwaligo te tobage balia po te sogo waibao. Magi baso meni, te sogo ena Genuai Bidi, te eno te tǫ te polobadu elaluali tiwai wiegi yai ma elalueibao,” te po wai dao.

Israel Hanigo Namba 10:10

Tama me ma, te lotu wabo genuai sogo me, te gesi noma poluade me, ma gasa lotu wabo genuai sogo me, te biugel eliyu yao. Dagego te biugel te isigo ulama, sese dela silibo ofa ulubode, me homu deliba yainu ebo ofa ebode, te biugel eliyu yao. Tama eno dage koneama, eno dage tau saibao. Ena God, dagego Genuai Bidi, eno polo wali.” Te po wai.

Matyu 21:15

Tiali goli te genuai pris bidi dabe me, te bomo yai po page koneai bidi dabe me augwaligo agai te bomai sę ebo sulama, tama odali te wai puluba augwaligo te Moni Lotu Be tempel be tomode bomonama i weyu te po wai, “Te Devitgo hani bidi dali wiegi yai homu pemene yao,” te wai puluba augwaligo te po wai.

Matyu 21:9

Tama te bidi Jisas tomoba ilama peyu, tama we bidi meba augwali polasa pabo bage dali, nosali asobo we bidi dali augwaligo bomo elama i weyu, te Jisasgo nogi ugwaba siyu, te po wai, “Dago nage dali dwagi yai homu pemene ebao, te nage Devitgo hani bidi dao. Godigo nage dali dwagi yai sę yao, te nage te Genuai Bidigo nogide asali bidi dao. Dagalude bidibo bage me augwaligo aga nogi ugwaba sao.”

Dwagi Yai Gesi Po Jongo Asęani 16:22

Tama dage dali me te tiwai dao. Tama tiyu, megi dage homu sęgę ebao. Tiali goli, eno dage ma sueibao, tama dage dwagi yai homu ma yaibao. Tama niwai bidi mego dagego te dwagi yai homu ebo me sela sągobeo,” Jisasgo te po aga bidi dabe dali wai.

Efesus 5:19

Tama tiyu, dagego duga hasi duga ama dedego noma bidi mobo dąų omainogo, dagego haniani dwagi yai balia po wao. Tama te lotu balia wabo buku nogi Sam, te bukude elalubo Godigo nogi ugwaba sabo po me, te Jisasgo nogi ugwaba sabo tęąbi po me, te po tama duga ama dedebolo wao. Tama tiyu, bomo eyu te dago Genuai Bidibolo me aga nogi ugwaba sabo balia po dali lotu tęąbi po dali wao.

Jems 5:13

Te dage tomode bidi me deli aga te sęgę tolobawe? Tibaso da, agai te Godibolo gedu haluasa po hanalu wao, Godigo aga tau somainogo. Ma, bidi me aga homu dwagi yai eyu bidibawe? Te homu ebo bidi agai te Godibolo wiegi yai homu elama, tęąbi po weyu, Godigo nogi ugwaba sao.

1 Samuel 4:5

Augwali te bidibo pesageba sabolama, tama te Israel dabe augwaligo te Dąų Wali Bomai Po Munalubo Halobage sela asobo sulama, tama augwa wiegi yai homu pemene eyu, tama po dagą bomonama wali, tama posolu wabo genuai mu pedelali.