Matyu 8:11 - Godigo dwagi yai po buku

¹¹ Eno dagebolo obao, te sia pedalobo badu me, te sia aiyaba dega sigi pabo badu me, te si badu te we bidi hauwa aselama, tama augwali te polobadu e tǫde bidali bidi te Abraham me Aisak me Jekop te bidi dabe dali deliba dualama, tama dagalude te Godigo we bidi tonalubo madi tomode bidiyu moni nai tueibao.

Matyu 8:11 Iomraidhean Croise

Tigidali Nai Gagalama Nigali Side 12:3

Te nage dali wiegi yai kolesaga ebo bidi dabe, augwalibolo te eno wiegi yai mobo augwaliba mayu yaibao. Te ena digi te nago nogi aiyaba muabo dwai po wabo bidi dabe te eno augwalide te dolabo po mu waibao. Tama tigidali tǫde bidalubo bidi hani dabe te nago hanide naga te wiegi yai mobo augwaligo saibao,” Yawego Abrambolo te po wai.

Tigidali Nai Gagalama Nigali Side 22:18

Tama tigidali tǫde bidalubo bidi hanigo ena hanalu, te augwali dali dwagi yai sę yao po weyu, te nago wąį hani dabe dali dwagi yai sę yali te tiwai yao po waibao. Magi baso meni, nago eno po wali palio,’ Yawego te po wali,” Mobo Bidi Enselgo te po wai.

Tigidali Nai Gagalama Nigali Side 28:14

Te nago ogwa dabego ame nabo wai dabe augwali te tǫ hogomu tiwai hauwa umabo mu pedelaibao. Tama augwaligo te augwa tǫ sese pedai tigidali pedaiba usu elama, bidaluaibao. Tama tigidali tǫde bidalubo bidi dabe augwaligo enabolo te augwali dali dwagi yai sę yao po hanalu, te eno nage me, te nago ame nani waigo wai dabe augwali dali dwagi yai sę yali tiwai gilama dwagi yai sę yao po hanalu waibao.

Tigidali Nai Gagalama Nigali Side 49:10

Agai te tuni bidigo dono tulama, tama aga sągą sawali si tomoba muani. Tama tede mu elaluaibao, te gasa bidigo te bomo sogobeo. Teda agai te bomo tolaluyu, tama te bomo aga aya mu pedelama, tama te tigidali hani bidi dabe tonalubo teba mu usu naibao.

Godigo Nogi Ugwaba Sabo Tęąbi Po Wabo Buku Dabe 22:27

Te tǫde tigidali we bidigo augwaligo te Godiba homu koneama, tama augwa agaba ma asaibao. Te tigidali hani we bidi dabe augwaligo kidu sugunama, agaba lotu waibao.

Godigo Nogi Ugwaba Sabo Tęąbi Po Wabo Buku Dabe 98:3

Agai te aga dąų walali pode homu konealuai, tama agai te Israel dabe homu dene eyu, tama augwali me tagalubeo. Tigidali bulu te tigidali we bidigo sualio. Te dena Godigo te boi bidigo bomo aiyaba elaluama, tama da ma sai dao.

Aisaia 11:10

Tama te sogo Genuai Bidigo gesi tuni bidi me sa muaibao, te Jesigo hani bidi me deli dao. Agai te tigidali we bidi deliba ma sisinabo dąį tiwai bidaibao. Augwali te tigidali tǫ pedai kantri tedu augwali agaba asaibao, te Israel hani isąwai bage. Tama agai hanu da, genuai nogi mu elaluaibao.

Aisaia 49:12

Tialima, eno te digibulu bidalubo we bidi dabe, te not badu me, te giliga dega sigulubo badu me, asaibao. Te augwali te taun Aswan badu me asaibao,” wali.

Aisaia 49:6

“Hasiabolo eno nageba te boi bidi dabego ela musiąwai Jekopgo hani dabe ma hodolabo sę mawai. Eno te Israel bage meba hagea sai dao, tama eno nageba te augwali sisinama, enaba odasa asabo sę mawai dao. Tialima, te sę ebogo te nago bomogo dęą me sogobeo. Eno te gasa sę me mawaibao. Eno nage te Israel hani isąwai we bidi hani tigidaligo sole ula tiwai nigaibao. Awe, nago te eno te tigidali bulu tǫ habu we bidi ma dobola sabo sę yaibao,” te po wali.

Aisaia 52:10

Genuai Bidigo agai bomo hania ola mayu, te tigidali tǫ kantrigo sumainu yaibao. Dago Godigo te aga we bidi dabe ma saibao, tama te tigidali tǫde we bidigo sueibao.

Aisaia 59:19

Genuai Bidi te genuai wę asobo tiwai eyu, te Genuai Bidigo ponobo sogo te dąų walali wę gisigilama, te wę asesa mu pomainu yaibao. Te tigidali tǫ asesa mu pomainu yaibao. Te tigidali tǫ habu we bidi dabe, te giliga pedalubo badu gagalasa pelama, te giliga degegi paboba usu nigi paibao, te augwaligo Genuai Bidigo bomo me genuai nogi koneama, te aga nogide wi elama, te augwali aga dologoba aselama, bidimainogo yaibao.

Jeremaia 16:19

Genuai Bidi, nago ena dąų walama, ena obogo bagualubao, te nago ena te sęgę ebo sogo tau sobao. Te tigidali digibulu tǫ habu we bidi hani te nageba asama, augwa te tiwai po waibao, “Te dago wąį nǫų dabego tibo god, augwali te mu god menio. Augwali te olo bage tiwai elalu, te da tau sabo usu me ebe dao.

Daniel 2:44

“Tama te king dabe bidalubadi, te Godigo te we bidi tonalubo bomo te tomo hodolama, tama te tonalubo bomo te sesemane bidada peyu, bidada paibao. Te gasa king dabego te Godigo tonalubo bomo te elalueinu ebaso, usu me egobeo, te gasa bagego te bomo me sogobeo. Tiali digi, te agai da te augwali aiyaba elaluama, tama te gasa king dabe mu dola silama, tama agai tonalubo bomo te sesemane elaluaibao.

Malakai 1:11

“Te tigidali bulu tǫ kantri we bidi dabego enaba genuai nogi mawaibao. Te tigidali bulude bidi dabego te wiegi yai denami ofa hano iliyu, te tobage wiegi yai ofa dabe enaba mawaibao. Te tigidali we bidigo ena nogi ugwaba saibao.

Matyu 21:41

Te augwaligo agabolo te po wai, “Teda augwali te dwai sę yali bidi dabe bidibaso, agai augwali dwagila mu dolaibao. Tama agai te wain gi gasa hanigo te gi sę tonalumai hagede mawaibao, tama te gide nai sabo sogo augwaligo aya agabolo nai mawaibao,” augwaligo te po wai.

Matyu 24:31

Tama aga mobo bidi ensel dabe tagala palama, augwaligo te bu wabo nai biugel bomonama mu bu ola asaibao, tama augwaligo aga te sa muani we bidi dabe sisinaibao. Te augwali te tǫ bogo me si me si yali badu te we bidi sesa asiyu, tama te dagalu sesege badu mu usu nigi paibao, te we bidi sigi paibao,” Jisasgo te po wai.

Matyu 3:2

“Dage dwai kolesaga yalide ge neyu, homu geasa peyu bidiąo. Magi baso meni. Te dagalude bidibo bidi God agai we bidi tonalubo sę yabo bomo te pąba asai dao, dage te bomo dologoba asiąo,” te po wali.

Matyu 8:10

Jisasgo te po odama, tama aga homu noma siyu, tama agai aga wali asobo we bidi dabebolo te po wali, “Eno mu po dagebolo obao, eno te Israel we bidi hanide te tobage konealubo po dąų wai bidi tiwai me deli eno subeo. Menio.

Dwagi Yai Gesi Po Lukgo Asęani 12:37

Te genuai bidi asu suagasali, te sę ebo bidi dabe te godege pisąma, te gedu dila pai bomonama bididubadi yaide, augwa genuai bidigo suagasobaso da, teda te sę ebo bidi dabe da dwagi yai homu pemene mu yaibao. Eno dagebolo obe dao, te genuai bidi agai digi te sę ebo bidi dabego sę ebogia, aga ugwa haganama, te kukulu dąų walama, ‘Dage dua yao’ olama, tubo nai augwalibolo mawaibao.

Dwagi Yai Gesi Po Lukgo Asęani 16:22

Tama te tiwai bidama, tama te nai meni yai bidi isali. Te bidi isąma, Godigo ensel bidi dabe augwaligo te isai bidi dagaluba tolasa pali, te polobadu bidali genuai bidi Abraham bogo badu bidigi pali, moni da tumainu yali. Te nosali aga masigi daide bidali bidi me te isali. Isama, aga hani bidigo aga pubulali.

Godigo Sęba Tagala Palai Bidigo Po 10:45

Tama augwaligo gasagi gasagi yai po, me me po haniani weyu, Godigo nogi ugwaba sali, “God, nage dwagi yai bidi mu dao,” wali. Tama me badu Juda bidi augwali Jisasgo po wali pabo bidi dabe Pita dali asai, Jopadu. Augwali noma mu sai, Godigo agai Dwagi Yai Mobo Bidi te Juda hani isąwai we bidibolo me olo mawai.

Godigo Sęba Tagala Palai Bidigo Po 11:18

Te Jisasgo po wali pabo Juda bidi dabe augwaligo Pitago wali po odama, tama augwaligo wado po wabo tagalali. Tama augwaligo Godigo nogi ugwaba siyu, te po wai, “E, Godigo te sunumi dawai, te Israel bidi hani isąwai bidi dabe augwali me homu begelama, bugagia bidimainu yali,” te po wali.

Godigo Sęba Tagala Palai Bidigo Po 14:22

Augwali sigo te Jisasgo po wali pabo we bidibolo dwagi yai po mobo mani, augwaligo Jisas konealubo homu dąų walomainu. Augwali sigo te genuai po ola mawai, “Dago te Godigo tųdu pobadi, gasa we bidi augwaligo dabolo haniani sęgę mawaibao, tama nosali Godigo da tonalubo buluba da sabolaibao,” te po wai.

Godigo Sęba Tagala Palai Bidigo Po 14:27

Tama augwali si Antiokba ma sabolama, augwali sigo Jisasgo po wali pabo we bidi dali deliba sisinagasali. Tama augwali sigo te sę yali po augwalibolo pusali, tigidali nai Godigo augwali si tau sali sę me, tama Godigo te Juda hani isąwai we bidi augwaligo agai po konealubo sunumi dayali.

1 Korin 15:20

Tiali goli te tiwai me egobeo. Mu menio. Te Krais isali, tama mu tama Godigo aga te isai we bidi tomodu ma hodolali. Aga te isali we bidi dabe hodalomainogo te hasia polasa hodaluali bidi aga dao. Tama te gide nai inabo hasia pedalali nai tiwai aga te gų pagede hasia mu ma pedalai dao. Tama tibaso, dago koneani, agade konealubo po dąų wali we bidi tigidali augwali me te Godigo ma hodolaibao.

1 Korin 6:9

Te dwai kolesaga ebo bidi dabe, augwali te augwali Godigo te we bidi tonalubo bomo tomoba me pogobeo. Te dagego konebewe? Tiyu dagego te duga homuba digi tibo po ola maiabuo. Te penani sę kolesaga ebo bidi dabe me, tama te tibo god wali pabo bidi dabe me, te we sabo kolesaga dolobo bidi dabe badi, tama te we dali ebo kolesaga tiwai eyu godolo ebo bidi dabe me, tama te hale ebo kolesaga te gasa bidi dabe dali ebo bidi dabe me,

Efesus 3:6

Te dualaluali po page e dao: dage Juda hani isiąwai bidi hani dagego Godigo wiegi yai gesi po odama, dagego homu kolesaga tigidali te poba munama, tama dage te Juda hani dali wadolama tama da dali deli hani bidibao. Tama tibaso, da te megi e tiwai dao: polobadu Godigo agai te Kraisba augwa homu begi pabo Juda dabe dali dwagi yai sę hauwa yaibao po dąų walali. Tama megi Kraisgo yali sęde Godigo te tobage dwagi yai sę te Juda hani isiąwai bage dali me yaibao, te augwa homu agaba begi pali we bidi augwali dali agai te tiwai mu yaibao.

Kolosi 3:11

Tama Godigo tama tibaso, megi aga gedude te we bidi haniani tedali elalubo menio. Te Juda hani isąwai hani dali Juda bidi hani te si tedali gasagi yai meni. Te tigiwali togolama sa elalubo bage dali, te tigiwali togisiąbo bage dali, agai gedude te tedali gasagi yai me menio. Te bulu tomode mu bidibo bidi dabe dali, te bulu yowi tiwai bidibo bage me, te augwaligo sęde dąų olama masigi sisąbo sę ebo bage me, te olo bugagia bidibo we bidi me, Godigo gedude augwali tedali tedali gasagi gasagi yai meni. Te magigo meni. Krais aga digi naga te genuai dao, tama aga te aga we bidi tigidali deli deli tomode bidibao.

2 Tesalonaika 1:5

Te dagego te ebo kolesagade God agai da hania tama ola mobao, agai dago ebo kolesaga osola subo si, tama agai dolo osola subo dao. Tama dagego te God agai we bidi tonalubo sę tobade te dene dali sęgę dali si sai. Gasa bidi dabe augwaligo dagebolo dene dali sęgę dali si mawai. Tama tibaso, God agai dage dali tama tiyu, tama dage agai we bidi hani tomode bidibo usu yaibao.

Kraisgo Geme Dualali Sę Pedelabo Po Jonbolo Ola Mani 7:6

Tama te bidi Asergo hani augwali me te bidi sese hauwa mu 12,000 sobadi, te bidi Naptali hani augwali me te bidi sese hauwa mu 12,000 siyu, te bidi Manase hani augwali me te bidi sese hauwa mu te 12,000 sali,