Matyu 5:6 - Godigo dwagi yai po buku

⁶ Tama te doloba pai kolesaga sainogo bomo eyu godolo ebo we bidi dabe augwali wiegi yai homu pemene emainao. Te homu tiwai ebo we bidi dabe augwaligo homu kolesaga te Godigo augwali mu usu nama te tiwai pedelaibao.

Matyu 5:6 Iomraidhean Croise

Godigo Nogi Ugwaba Sabo Tęąbi Po Wabo Buku Dabe 107:9

Agai te wę nogonego dogoni wa sali we bidi dabeba te wę mayu, tama augwa te wę tulama mu usu yali. Tama agai te nai hauwa te nasi ebo bidi dabeba menama, tama augwa te dwagi yai nai tulama, tama augwa tabi pągąna pali.

Godigo Nogi Ugwaba Sabo Tęąbi Po Wabo Buku Dabe 145:19

Te agade wi ebo we bidi, te augwali nai meni baso, teda agai augwali nai mabo dao. Tama agai augwali gela wabo odolama, te augwali ma sabo dao.

Godigo Nogi Ugwaba Sabo Tęąbi Po Wabo Buku Dabe 17:15

Tialima, ena da, eno augwalide dwai sę me deli isąma, tama nosali eno nage mu sueibao. Nosali ena piali tagalama, ena hodaluama, tama nage ena dali bidibo sulama, ena dwagi yai homu mu yaibao.

Godigo Nogi Ugwaba Sabo Tęąbi Po Wabo Buku Dabe 63:5

Te eno homu ogwa wai mobo te wiegi yai mu elalubao, te bidigo wiegi yai nai dabe tulama, tama te usu yai tiwai gilama yai. Tama ena wiegi yai pemene elama, tama nage nogi ugwaba sabo dao.

Godigo Nogi Ugwaba Sabo Tęąbi Po Wabo Buku Dabe 65:4

Te nago sa munama, tama nago pąba odasa pabo bidi dabe, augwa te wiegi yai pemene emainao. Te tigidali wiegi yai sę yabo kolesaga nago dabolo te moni lotu be tempelde, te nago wiegi yai tedali bede mawai, tego da mu usu naibao.

Godigo Nogi Ugwaba Sabo Tęąbi Po Wabo Buku Dabe 84:2

Ena tede bidabo homu wei mu ebao. Te eno homu kolesaga tigidaligo te nago be wei mu ebao. Te tigigo, me homu tigidaligo, eno te wiegi yai pemene ebo tęąbi po nageba obao, God te bidabo ula elalubo God dao.

Bugagia Bidibo Kolesagade Po Asęai Buku 10:24

Te dwai sę ebo bidi dabe te nai hauwade wi yaibao, tama te nai dabe te augwaliba pedelaibao. Tiali digi, te doloba pai bidi dabego wei homu ebo nai dabe Godigo mabo dao.

Bugagia Bidibo Kolesagade Po Asęai Buku 21:21

Te bidigo doloba pai kolesaga wali peyu, tama te bidi dabe godolo homu mu ebaso da, teda aga bugagia bidiyu, tama augwaligo doloba pai kolesaga agaba eyu, tama genuai nogi aga mawaibao.

Solomon 5:1

Eno we, nage eno hobolu du mu da, ena te ena giba asalio. Tama eno te wiegi yai denami ebo nai dabe sisinagasali. Eno te wiegi yai pusu yai nai hani tuali. Te eno ame pę me wain dali tuali. Dage si abagi wali wiegi yai mu da, dage si nai me ąį tuao, dage si mu pągąną pao.

Aisaia 25:6

Te bulu du Saionde, Tigidali Bomo Elalubo Genuai Bidigo geninama nai mu sisi yaibao. Te wiegi wiegi yai hasa dabe me, tuabo wain ąį dabe me elaluaibao. Tama tigidali bulu we bidi dabe te nai tuboba sisinagasaibao.

Aisaia 41:17

“Te eno we bidi dabe te ąį mu sǫą pelama, te augwali dogoni te ąį tuabo wa pali sogo, te augwaligo ena i obaso, tialima ena, Genuai Bidi, te eno augwaligo gedu haluasa po wabo odaibao. Ena, te Israelgo God, te eno dage homu kone me gegeda palogobeo.

Aisaia 44:3

Te ąį sǫą pabo tǫba eno te ąį gelaibao, tama te wa pai tǫde te ąį somainu ilaibao. Te eno mobo bidi te dagego wai dabeba gelaibao. Te eno dagego waigo ame nabo wai dabeba wiegi yai bugagia ilaibao.

Aisaia 65:13

Tama tibaso, ena God, Genuai Bidi, eno te tama po obao. Te eno sę bidi dabego te nai me ąį hauwa elalueibao. Tiali, dage te ena tudiba mubo hani dabe, te dage nai sili bidu, te tuabo ąį meni yaibao. Te eno hani dabe, te augwa wiegi yai pemene yaibao, tiali te dage dwai hale mu saibao.

Aisaia 66:11

Magi baso meni. Aga bugagia bidibaso, te duga wiegi yai pemene elama, agade te wiegi yai nai hauwa saibao. Aga te dagego ida me deli tiwai elama, tama dagego aga ame tuyu, te dage bugagia mu pągąnama, te haliga nagame yai bidaibao,” wali.

Jeremaia 31:25

Te bidi me deligo tigi bomo silibaso da, teda eno aga dąų walaibao. Tama te bidi aga haliga sęgę elalubaso, te eno agai haliga usu naibao,” wali.

Dwagi Yai Gesi Po Lukgo Asęani 1:53

Agai te nasi ebo bidi dwagi yai naigo tabi pągąlobo dao. Agai te sibage hauwa mubo bidi olo dali gudula palobo dao.

Dwagi Yai Gesi Po Lukgo Asęani 6:21

Dage megi nasi ebo bage, dage bugai homu iyąo. Dage nosali tabiaibao. Dage megi gela wabo bage, dage bugai homu iyąo. Nosali duga gisugu waibao.

Dwagi Yai Gesi Po Lukgo Asęani 6:25

Te nai dabe megi elalubo bage, dage dwai side bidaibao. Nosali duga nasi yaibao. Te megi gisugu wabo bage, dage dwai bede bidaibao. Nosali dage moni homu dene elama, gela waibao.

Dwagi Yai Gesi Po Jongo Asęani 4:14

Tialima, bidi me deli eno mabo ąį tuyu da, tigidali sogo te bidi ąį nogone ma egobeo. Te ąį eno mawainogo ebo ąįgo da, te tama tiaibao, te ąį da bidabo bomo mabo wę ulu pedalubo ąǫ te bidi tigi tomode tiwai yaibao. Tama te ąį tigidali sogo pedaliyu, te bidi mu bidada peyu, mu bidada paibao,” Jisasgo te po wai.

Dwagi Yai Gesi Po Jongo Asęani 6:27

“Dagego te mobia pabo nai naga sabo sę tiwai dagego egimio. Te menio. Dagego te bidada peyu bidabo bomo mabo nai sabo sę yao. Te tiwai nai Godigo Bidi Mu agai dagebolo mawaibao. Magi basowe? Aga Aya Godigo te bidide dwagi yai homu eyu, sa muai,” Jisasgo te po wai.

Dwagi Yai Gesi Po Jongo Asęani 7:37

Te olo bidibo si silibo side, te genuai side dao, wai. Te tebo side Jisas dolaluyu, bomo olama, i wai, “Bidi me deli ąį nogone ebaso da, te bidi ena pageba aselama, ąį tuagasao.

Kraisgo Geme Dualali Sę Pedelabo Po Jonbolo Ola Mani 7:16

Tama tiyu, augwali nasi munu me esiąyu, tama augwali ąį nogone munu me ma egobeo. Tama augwali giliga posolo esiąyu, tama magi nai mego augwali tigi posolo me iligobeo.