Dwagi Yai Gesi Po Lukgo Asęani 7:2 - Godigo dwagi yai po buku

² Te Rom ami genuai bidigo te 100 ami bidi dabe tonalubo bidigo te aga dali homu kęą pelama sę ebo bidi isai hagede seanio.

Dwagi Yai Gesi Po Lukgo Asęani 7:2 Iomraidhean Croise

Tigidali Nai Gagalama Nigali Side 24:27

Tama agai te po wai, “Dago Yawe nogi ugwaba sao, te eno genuai bidi Abrahamgo God dao. Agai te eno genuai bidibolo dąų wali po te mu usu nanio, te aga dwagi yai tau sabo kolesaga ebo me, te Abraham dali homu kolesaga kęą pai bidi kolesaga ebo me, te Yawego tagalobeo. Yawego te eno genuai bidi aga amago hanigo beba dolo ena sela asama, tagalagasali dao,” tama wali.

Tigidali Nai Gagalama Nigali Side 35:8

Tama Debora, te Rebekago sę polobadu yali we, aga isai, tama augwaligo aga te Betelde te genuai ni dologode pubulai. Tama augwaligo te ni nogi poali, ‘Tede gela wali ni dao,’ te po wai.

Jopgo Po Asęani Elalubo Buku 31:5

“Eno dwai tibo sę dabe elama, tama eno te we bidi dabe ili po me ola mayu yai meni.

Bugagia Bidibo Kolesagade Po Asęai Buku 29:21

Te nago naga sę bidiba te aga dwasianu elalubo sogo gagalasa, te doado bage madubadi geai baso da, teda nosali te aga nago ogwa mu tiwai pedelaibao.

Matyu 27:54

Tama te enesigi bidi dabego tobolu bidi aga ami bidi dabe aga dali te Jisas tonaluali bage, augwaligo te tǫ mali ebo me te sę dabe pedalobo sulama, tama augwali moni wi mu yalio. Augwaligo te po wai, “Mu tamao, te bidi aga te Godigo Ogwa mu dao,” te po wai.

Dwagi Yai Gesi Po Lukgo Asęani 23:47

Te enesigi bidi dabego tuni bidigo te sę suai, tama agai Godigo nogi ugwaba siyu, agai te po wai, “Mu tamao, te bidi Jisas doloba pai bidi mu dao,” te bidigo te po wai.

Dwagi Yai Gesi Po Lukgo Asęani 7:1

Te Jisasgo we bidibolo te po pusa silama, nosali Kaperneam be nani tomoba pali.

Dwagi Yai Gesi Po Lukgo Asęani 7:3

Tama te ami genuai bidigo Jisas te Kaperneam hanude bidibo po odama, te Juda dabe tobolu bidi me badu tagala palali. Jisas asama, aga sę ebo bidi dwagi yai ma ilaimainu, te bidi dabebolo Jisas oda sigi piąo wai.

Dwagi Yai Gesi Po Lukgo Asęani 8:42

Aga wegi deli digi kibu be nogo si olama, sągągo si peda sigi soai te wegi isai sinabaso, te po wali. Jisas tų sisu pobadi yaide, genuai hani we bidigo aga mu beasa pali.

Godigo Sęba Tagala Palai Bidigo Po 10:1

Te bidi me deli Sisaria be nanide bidali, agai nogi Kornilius. Te bidi aga te Rom ami enesigi bidi dabe tonalubo genuai bidi mu, te 100 ami bidi agai tonalubo da. Augwali te Itali tǫdu asai.

Godigo Sęba Tagala Palai Bidigo Po 10:7

Te po olama, aga pali. Tama Korniliusgo aga bede sę ebo bidi si me i wali. Agai te ami bidi me deli me i wali, te bidigo Godibolo lotu po wabo bidi. Te bidigo Kornilius tigidali sogo mu tau sali.

Godigo Sęba Tagala Palai Bidigo Po 22:26

Tama te ami genuai bidigo te po odama, aga te enesigi tobolu bidi dolo pageba mu pelama, te po hanalu wali, “Nage magi sę yabo homu ebawe? E bidi agai nogi te Rom gavmanigo bukude nogi elalubo da,” te po wai.

Godigo Sęba Tagala Palai Bidigo Po 23:17

Tama Pol agai te enesigi bidi genuai bidi me deli i olama, agabolo te po wali, “Nago te gesi bidi duga tobolu bidi pageba odasa pao. E bidi agai po me deli elalubo, agai odomainao,” wali.

Godigo Sęba Tagala Palai Bidigo Po 27:1

Te Festus agai Pol dali, gasa kalabus bidi dabe dali te Itali tǫba moni gebadu pabo po dodolali, te Sisar pageba pomainu yali. Tama gavman tobolu bidi me badu augwaligo bidi me deli dąį ilali, te bidi nogi Julius da, augwali tonaluabo bidi dąį ilali. Te bidi Julius agai te ami enesigi bidi a naga bidi nogo sągą sese silama, tonalubo tobolu bidi da. Tama aga te umabo ami enesigi bidi hani me deli tomode bidibo bidi da, te hani nogi ‘Rom gavman moni tobolu bidigo enesigi bidi hani da.’

Godigo Sęba Tagala Palai Bidigo Po 27:3

Tama pelama, do kigamu geba tuagasabo pesageba sabolali, te bulu nogi Saidon. Te ami tobolu bidi Julius agai Polbolo dwagi yai kolesaga yali. Agai Pol tagala palama, Pol aga abagi dabe sugi pelama, augwaligo agabolo tubo nai dabe mani.

Godigo Sęba Tagala Palai Bidigo Po 27:43

Tiali goli, te ami tobolu bidi agai te ami dabego yali homu tagalao wali. Magu meni. Agai homugo augwaligo Pol elidali. Tama agai da tigidali i olama, agai te po wali, “Tialima, duga tamu ąį paubo kone baso da, te duga samonama, paubo pelama, nabisba piąo,” wali.

Kolosi 3:22

Dage sęde dąų olama masigi sisąbo sę ebo bidi dabe, duga tonalubo bidigo po tigidali wali pao. Augwaligo dage dali dwagi yai homu emainu tama augwaligo dage tonalubadi naga dagego duga sę bugagia egimio. Te meni. Tigidali sogo dagego dago Genuai Bidi Krais dali wi eyu aga dologode bidibaso, tama homu mu eyu dagego duga sę bugagia yao.