Te We Bidi Dabego Jerusalem Hagede Gela Wali 1:2 - Godigo dwagi yai po buku

² Polobadu da, tigidali kantri dabego aga abagi wai dao, tiali goli megi da, te gasa kantri mego agade hobede me ebeo. Te abagi dabego aga dali ili po olama, tama augwali agai boi bidi pedelali. Tialima, tigidali sogo hulide Jerusalemgo gela dwai mu weyu idubo, mu tama agai gela gųgai nabogedu aiyaba tulalubo dao.

Te We Bidi Dabego Jerusalem Hagede Gela Wali 1:2 Iomraidhean Croise

Jopgo Po Asęani Elalubo Buku 6:15

Tiali goli, dage eno abagi dabe, dagego ena ili po bugagia mu ola mobao. Dage te ąį gamia wa pai elalubo, te tulubage tulisąma ebadi elalubo tiwai dao.

Jopgo Po Asęani Elalubo Buku 7:3

Godigo bodolu te polua hauwa mu mani, ena dwai tiwai bidimainu. Tama tigidali hulide ena homu dwai idubao.

Godigo Nogi Ugwaba Sabo Tęąbi Po Wabo Buku Dabe 126:5

Te gela wabo sę eyu, te nai bulali bidi dabe, te augwa wiegi yai pemene elama, te inayu tau yali nai nosali saibao.

Godigo Nogi Ugwaba Sabo Tęąbi Po Wabo Buku Dabe 31:11

Te boi bidi dabego dwai posobo po enaba wali. Tama tibaso, te abagi dabego me enaba po dwai weyu, tama eno abagi dabego enade dwai wi mu yali. Ena te sunumidu pobadi, te bidi dabego ena sulama, augwali wi peyu ebo dao.

Godigo Nogi Ugwaba Sabo Tęąbi Po Wabo Buku Dabe 6:6

Ena i udu udubadi genama, tama ena bomo tigidali sia salio. Tigidali sogo hulide te gedu gela giguai ąįgo te eno bet te gologo yai. Eno gela umabo mu udali digi, te eno tobolo ni het pilo te gela giguaigo gologo mu yai dao.

Godigo Nogi Ugwaba Sabo Tęąbi Po Wabo Buku Dabe 69:21

Te eno nasi ebo sogo, augwaligo te dwai marasin ena mani. Te ena dogoni wa pobaso, tama augwaligo te ha ebo ąį nogi viniga naga ena mayu yai dao.

Bugagia Bidibo Kolesagade Po Asęai Buku 19:7

Te bidi te doado bage sǫą pai baso da, teda te aga ama dedego te wei homu me egobeo. Te tiwai eyu da, te aga abagi dabego me te aga tudiba muaibao. Te agai augwali homu bega sabo po obadi digi tagalao, te aga po odolali waibao.

Jeremaia 13:17

Tialima, te dagego po odisąma, te dagego hagoma idubaso da, teda te boi bidi dabego dage Genuai Bidigo we bidi sagaselama, te gasa tǫ kantriba kalabus mugi paibao. Tama tibaso, ena Jeremaia, te enaduba bididu, te dagede gela wedu gedubadi, te eno gedude gela guai gealuama, te eno gesabidiba dualibao wali.

Jeremaia 2:25

Israel, nage udada biliyu, te tibo god wali pigio. Tiyu, nage sągą dolidali weyu, tama naga dogoni mu wa pabuo. Eno te tobage po wai goli, nago te tiwai po weyu, ‘Tagala,’ wali, ‘eno Genuai Bidigo po me odogobeo. Eno te gasa bidi hanigo god dabe godolo mu ebao. Eno augwali me wali pabo homu ebao,’ dagego te po wai,” wali.

Jeremaia 3:1

Genuai Bidigo te tiwai po wai, “Te bidigo aga we sela sąbaso, te wego aga tagalama, te gasa bidiba pali, teda te polasa sali bidigo te we ma sogobeo. Te we agai ma siyu da, teda agai bulu kantri te dwai meda mu eno gedude pedelaibao. Israel, nage te bidi hauwa dali penani ela bilama, tama megi da, te nage enaba ma asainogo, ebawe?

Jeremaia 30:14

Te nago polobadu abagi wali bidi hani dabe, augwaligo nage homu kegeda palama, te homu godolo me ebeo. Nago te dwai sę hauwa yali te genuai sęgę elalubao. Tama nage eno dolama, te sesena pai bidigo aga boi bidi dali ebo kolesaga tiwai yali.

Jeremaia 4:30

Jerusalem, nage dolobo sogo da, te nago magi yaibawe? Te wiegi yai mama ugwa muani tagalao, te nagade digi te golgo nigai beli au yali. Te naga gedu au ilibo tagalao. Te tobage au ebogo nage tau me sogobeo. Magi baso meni, te naga abagi dabego nage godolo homu munu ma isiąma, te nage ela muabo homu naga yaibao, te po wai dao.

Jeremaia 9:1

Idao! Te eno tobolu te ulu wę me deli tiwai elaluyu, tama te eno gedu sidu te ąį hauwa geligi da, teda eno homu dene dwai mu eyu, gela wabo usu igi da. Te eno giligade me hulide gela udigi da, magi baso meni, te boi bidi dabego te eno hanigo we bidi dabe ela muai dao.

Te We Bidi Dabego Jerusalem Hagede Gela Wali 1:19

Eno abagi dabego ena tau somainu i wai dao. Tiali goli, augwali eno boi bidi pedelalio. Eno pris dabe, me tobolu bidi dabe, augwali nasi genuai mu yali. Tama augwali bugagia bidabo tubo nai gegebo bomai sę mu yalio. Tiali goli, augwali nai meniama, tama augwali eno sunumi dabede isai dao.”

Te We Bidi Dabego Jerusalem Hagede Gela Wali 1:21

Te meba gasa we bidi hanigo eno ena te dene ebaso, gela wabo po odali. Tiali goli, ena dali hobede yabo bidi meni yai. Te eno boi bidi dabego nago enabolo te mani te genuai sęgę po odali. Tama augwaligo nago te yali sędę augwali wiegi yai homu pemene genuai mu ebao. Polobadu nago enabolo dwai dene maiabo bodolu muai dao. Tama te bodolu polo pedelalio. Tiali goli, megi da, eno homugo nago eno boi bidi dabeba me deli tiwai kolesaga me yao.

Te We Bidi Dabego Jerusalem Hagede Gela Wali 1:9

Polobadu aga dwai kolesaga te pepeli dilide mu elaluai dao. Tiali goli, agai aga dolabo homu kone me ebeo. Tama tialigo aga mu dolama, mu dolali, tama bidi mego aga hobede eyu, tau sabo me egobeo. Tama Jerusalem agai e tama tiwai po i obao, “Genuai Bidi, eno e sęgę suao. Te boi bidi dabego ena aiyaba mu elalualio. Tama augwaligo ena dolalide wiegi yai homu pemene elama, gana pali dao,” wabo.

Te We Bidi Dabego Jerusalem Hagede Gela Wali 2:11

Eno te Jerusalemde pedelali nai dabe homu kone palama, tama ena gela waligo eno gedu dene mu ebao. Eno te hobedai we bidi dolama elalubo sulama, ena gasa homu dwai mu ebo dao. Eno homu dene dwai mu yalio. Magi baso meni, eno suali, te nai tusiąwai wai puluba dali, wai bǫų dabe dali suali. Augwaligo bomo kimi meniama, tama didibili elama, te Jerusalem sunumi dabede tuloluama, munalua pabo sualio.

Esekiel 16:37

Tialima, eno te nago godolo yali abagi augwali me, nago godolo isąwani me tagalao, te tigidali eno deliba sisinaibao. Te eno augwali odasa aselama, te augwaligo nage bagua sagasaibao. Tialima, eno nago ugwa peda sąnama, te nage habu olo elalubo augwaligo sueibao.

Hosea 2:7

Te agai godolo homu ebo bidi dabeba painogo pali goli, tiali goli aga te augwaliba me pedalugobeo. Te agai augwali gegegi paibao, tiali goli, agai augwali me sugobeo. Tama tibaso, agai te po waibao, ‘Polobadu ena eno bidi dali bugagia bidalio, tiali goli, megi menio. Tama tibaso, te ena bidi muba dolo ma paibao,’ te po waibao.”

Maika 7:5

Awe, te sogo te ogwa dabego te augwa aya dabeba posobo po dwai weyu, te wegi dabego augwa ida dabego po sela sąyu yaibao. Te bidigo sali we dabego te augwa auwa dabe dali konila po weyu yaibao. Te bidi aga we wai dali te boi bidi pedelaibao. Tibaso, nago te naga abagigo wabo po me, hai namugo po me, te osola suao, dua dao. Tama nago te naga we dali wabo po tigidali me, te bugagia tonalu te yao.

Kraisgo Geme Dualali Sę Pedelabo Po Jonbolo Ola Mani 17:13

Tama te tuni bidi nogo si augwaligo homu deli naga elaluyu, tama augwaligo augwa genuai nogi me, te bomo me, te tigidali te hudigi ebo hasabolo mawaibao.

Kraisgo Geme Dualali Sę Pedelabo Po Jonbolo Ola Mani 17:16

Tama te nogo si gąų nago suali, te dali te dwai hudigi ebo hasa dali augwaligo te penani we dali boi bidi yaibao. Te penani we augwaligo aga mu dolama, tama agai ugwa dabe me tigidali doado bage dolaibao. Tama augwaligo agai tigi mi tuyu, tama aga tigi tigidali siago domainogo ulaibao.