Joel 3:2 - Godigo dwagi yai po buku

² Te eno tigidali we bidi hani selama, te odogo malu tǫ pesageba sisinagasali, augwaligo God Te Po Tų Odobo Jas Dao nogi polali tǫba. Te pesagede eno te po tų elama, tama te Israel hani isąwai bage augwaligo te eno we bidi dabeba yali tigidali kolesaga dagalaibao. Te hani dabego eno tǫ pepedama, te augwa hasi dobola sali, tama augwaligo te Israel dabe te gasa bulu tǫ kantriba wi tedela pomainu ilalio.

Joel 3:2 Iomraidhean Croise

Tuni Bidi Dabego Po Elalubo Buku Si 20:26

Tama te de namba 4 te sogode augwali te odogo malu bulu meba sisinagaselama, augwaligo Genuai Bidigo augwali tau siyu yali te sęba kone palali. Tama augwaligo agai nogi ugwaba sali. Te tama tiali po pagede augwaligo te bulu nogi e tama poali, ‘Te Godigo Nogi Ugwaba Sabo Pesage Dao,’ polali.

Aisaia 66:16

Magi baso meni. Te Genuai Bidigo isigo te we bidi uluyu, te agai hwą ge bainatgo te we bidi hauwa mu ela mueibao, te augwa yali dwai sę wei ponoyu, tiaibao.

Aisaia 66:18

Genuai Bidigo te po wai, “Eno te we bidi dabe homu kolesaga sulama, tama eno konebao, te megi da, eno te tigidali we bidi dali sisinibo sogo dao, te mena po haniani wabo bage me sisinaibao. Te augwali sisinagasobo sogode, teda augwaligo te eno genuai ula me bomo sueibao.

Jeremaia 12:14

Genuai Bidigo te tama po wali, “Te Israel dabe pąde bidibo hani dabe, augwalide eno po elalubao,” wali, “augwali te dwai kolesaga ebo bidi dabe tiyu, te augwaligo eno we bidi dabeba mani tǫde dwai sę ebao. Odao. Te eno te hani boi bidi dabe te augwa tǫba digi ela gudulaibao. Te Juda dabe augwa tǫde digi te boi bidi dabego tǫ tomode bidibao, tialima eno te Juda dabe me sela sąwaibao.

Jeremaia 25:31

Agai te i wabo te tigidali tǫ habu mu usu naibao. Te i wabo page e tiwai dao. Genuai Bidigo te tǫde we bidi tigidali po tų ilaibao. Agai te boi bidi dabe tagala palama, te dwai kolesaga ebo we bidi dabe ela muagasaibao. Te Genuai Bidigo po dao.’”

Jeremaia 49:1

Genuai Bidigo po te Amon dabede elalubao. Agai te tiwai po wali, “Magi yaliwe? Te Israel dabego ogwa dabe meni yani homu elama, te augwa aya dabego tǫ dabe doado bage sogobe da, agawe? Te augwali elalubadi yaibaso da, teda magi baso te Amon dabe, te tibo god Molekgo hani dabego, te Gat hanigo tǫ saliwe? Te magi baso te Amon dabe te Gat hanigo taun dabeba bidigi pai dawe?

Jeremaia 50:17

Genuai Bidigo e tiwai po wai, “Israel te sipsip me deli tiwai, te gasa tǫ kantri dabe te laion tiwai elama, aga dolainogo elama, te augwaligo aga pobeali. Hasia te Asiria kingo aga pageabi elama, tuali. Te nosali, te Babilon king Nebukatnesargo te agai nogo sągą dili dabe halua tuai dao.

Esekiel 25:8

Genuai Bidigo po ma weyu, te tama po wai, “Ena God Genuai Bidi, eno po obao, te Moap dabe me Seir dabe, augwaligo te homu yali, te Juda dabe te gasa hani bidi dabe tiwai si da homu yai dao.

Esekiel 34:6

Eno sipsip kibu dabe augwali te bulu du dabeba wi pobao, tama augwali tigidali tǫba tigidali polo pepelawalio. Tama augwali gegabo bidi meni yanio. Mu menio.’ Te po augwalibolo pusao,” Genuai Bidigo enabolo te po wai.

Esekiel 35:10

“‘Dage Idom dabe, dagego ena God Genuai Bidi eno te kantri si Israel de Judade bidiba homu me yai menio, te augwali eno we bidi dao. Megi da, dagego te po wali dao, dagego augwali hani sigo tǫ saibao po te wali dao.

Esekiel 36:1

Genuai Bidigo ena dali e tama po wali, “Tǫde bidio, nago te Israel dabego bulu du dabebolo eno augwalibolo wainogo ebo te poba bugagia olo saganama odao po walao.

Esekiel 36:5

Tama tialima, God ena Genuai Bidi ena haliga sębę posolo tiwai eyu, eno bomai po te kantri Idomba, me kantri dage pąde elalubo, te kantri dabeba te obao. Augwaligo homugo ena te olo nai dao tiwai homu elama, tama augwaligo eno tǫ sainu homu mu gana pai dao. Magi baso meni. Augwaligo te tǫ me badu te augwaligo kau kibu dabe me sipsip kibugo nosai tede tumainao homu yali.

Esekiel 38:22

Tama eno agaba haniani gasi pedalomainu iliyu, me boi agaba pedalomainu eyu yaibao, te agabolo dene mayu tama tiaibao. Te eno te tulubage, me talua ge tulubage, me posolai masigi te isi dabo te gea paliyu yaibao, tama te nai dabe aga tigiba tulaluyu, me aga dali asali ami bidi dabe tigiba me tulalueibao, me te aga dali asali haniani kantri bidi dabeba tulalueibao.

Esekiel 39:11

“Ena Genuai Bidi eno po genina ma weyu, e po obao. ‘Te sę dabe tigidali pedalobo sogo da, teda eno te kantri Israelde te king Gok aga ami dabe dali augwali pubulabo gų page tǫ deli me sa muaibao. Te gų page da, te Osogo Bidagasali Bidi Dabego Odogo Malu Bulude elaluaiba, te u badu te giliga asobo badu te tamu ąį Detsi te sigi ąį badu. Tama te we bidi augwali te badu munu me ma biligobeo. Magi baso meni. Te Gokgo ami bidi dabego gų page te bulu badu mu pągąna paibao. Tama augwaligo te odogo malu bulu nogi e tama nogi nogi yaiba, Gokgo Ami Bidi Dabego Odogo Malu Bulu dao waibao.

Joel 3:12

Godigo te po wai, “Te we bidi hani dabe te sisi elama, te odogo malu tǫba dulao,” wali, “augwaligo te God Te Po Tų Odobo Jas Dao nogi poali tǫba dulao. Ena Genuai Bidi, ena te pesagede dugulalu, te Israel pąde bidibo tigidali gasa hani we bidi te po tų ilaibao,” wai dao.

Joel 3:14

Te hauwa umabo we bidi te odogo malu buluba sisinama, po tų yaibao. Te dwasianu sogo te Genuai Bidi te buluba pedelabo bodolude te pedelaibao.

Amos 1:11

Genuai Bidigo wabo po e dao, “Hauwa sogo te Idom tǫ kantri we bidigo dwai sęgę sabo sę idu geai. Augwaligo te tebode dwasianu toma me nabeo. Augwaligo te Israel hani we bidi dabe pobeasa pali, te augwa ama dabe digi te augwali bobage hwą ge bainatgo elalio. Te augwali hobede eyu, tau sabo homu eyu, tama augwali tagalabo homu dwasianu me ebeo. Mu menio. Augwaligo haliga sębę ebo wado yabo homu sębę genuai mu elama, posolo mu yai, tama te haliga sębę yali me silibeo. Te me elalualio. Tialima, mu tama, eno te Idom dabe augwaliba dwai sęgę mabo dene mu ilaibao.

Maika 4:12

Tiali goli, te hani bidi dabego te Genuai Bidigo homu kolesaga konesąwai. Te Genuai Bidigo augwali sisinama, te augwaliba dwai dene maiabo te augwaligo konesiąma wali, te bidigo te bo elalubo wit sisinama, te agaga pelama, te wit nai ge sainu ebo tiwai gilama yaibao.

Sefanaia 3:8

Tialima, Genuai Bidigo aga wali asobo we bidibolo e tama po walali, “Dage homu hauwa igimio. Dagego eno te tigidali kantri we bidi po tų ela mabo te sogo deli naga tonaluiagameo. Magi baso meni. Eno augwali dali sębę elama, tama eno augwali deliba sisinagasomai elama, homu polo dąų olama, tama eno augwali dene mawaibao. Tama eno sębę te isi bogoli tiwai elama, tama eno tigidali tǫ dabe mu dolaibao,” wali.

Kraisgo Geme Dualali Sę Pedelabo Po Jonbolo Ola Mani 11:18

Tama nago po konesiąbo haniani tǫde bidibo bage augwali sębę mu yai. Tiali goli megi nago sębę yabo sogo te pedelalio. Tama megi te isali we bidi augwali te po tų eboba pedalobo sogo dao. Tama megi e sogo naga sę ebo bidi dabe, te nago nosali yabo sę po pusali bidi, augwalibolo te wiegi yai nai mabo sogo pedalai dao. Tama nago we bidi tigidali, te nogi yai bidi me, te nogi meni yai bidi, tigidali nagede wi eyu nago bomo dologode bidibo we bidi, te megi da te nago augwalibolo me te wiegi yai nai mabo sogo pedalai dao,” augwaligo te po wai.

Kraisgo Geme Dualali Sę Pedelabo Po Jonbolo Ola Mani 16:14

Tama te dwai haubo noma bidi augwaligo te bidigo isiąwai sę te bidi noma sabo sę haniani mu ebo dao. Tama augwali te tigidali tǫba te tigidali tuni bidi bidibo digi pelama, te bidigo isiąwai bomo yai sę augwaligo sulama noma somainogo ebo dao. Augwaligo homugo te tuni bidi dabe augwali deliba sisinama, tama augwaligo te Tigidali Bomo Elalubo God dali hwįabo sogo asobo tonalumainogo yaibao.

Kraisgo Geme Dualali Sę Pedelabo Po Jonbolo Ola Mani 16:16

Tama te dwai haubo noma bidi augwaligo te tuni bidi dabe teba sisinai, te Hibru pogo augwaligo te bulu nogi Armagedon wai.

Kraisgo Geme Dualali Sę Pedelabo Po Jonbolo Ola Mani 16:6

Te dwai sę ebo bidi dabe augwaligo te nago po odobo we bidi augwali dali, te nago po pusubo bidi dabe dali ela muyu, tama augwaligo kaneme gea sąwai dao. Tama nago te dwai bidi dabe augwalibolo kaneme mayu, tama augwa te kaneme tumainao. Augwaligo augwa te dwai sę yalide dolo mu te dene sabo dao,” te po te ąį tonalubo ensel bidigo wai.

Kraisgo Geme Dualali Sę Pedelabo Po Jonbolo Ola Mani 20:8

Tama kalabus tagalama, tama aga buluba solama, agai te haniani tigidali digibulu tǫ pedaide bidibo we bidi hani augwaliba tibo po ola mena mena biligi paibao, te bidi hani me nogi Gok me Magok dao. Te Satango augwali deliba sisinama hwįmainogo yaibao. Tama augwaligo namba te nedebo te usu egobeo, te masigi kemi tiwai dao.