Dwagi Yai Gesi Po Jongo Asęani 10:3 - Godigo dwagi yai po buku

³ “Te sipsip tonalubo bidi asobaso, te sipsip tomogai tų tonalubo bidi agai te tų dalama, tama te sipsip tonalubo bidi tomoba pelama, tama agai aga kibu sipsip nogi deli deli i wabo dao. Sipsip dabe i olama, tama aga polasa pobaso, tama te sipsip dabe augwali aga wali buluba soabo dao, te tubo noswai gegemainogo tebo dao.

Dwagi Yai Gesi Po Jongo Asęani 10:3 Iomraidhean Croise

Godigo Nogi Ugwaba Sabo Tęąbi Po Wabo Buku Dabe 80:1

Te Israel dabe tonalubo bidi, nago te naga sipsip dabe da bilibo dodolobo dao. Te dago gela wabo odao. Nage te ensel dabe daide ugwadu king bidibo dao.

Ma Dobola Sali 33:17

Tialima, Genuai Bidigo Mosesbolo te po wai, “Eno te nago wali po selama, te sę yaibao. Magi baso meni, eno nage godolo eyu, tama eno nage bugagia koneai dao.”

Bugagia Bidibo Kolesagade Po Asęai Buku 27:23

Nago te naga sipsip dabe me te meme bugagia tonaluao,

Solomon 8:13

Eno abagi, nage gide bidibaso, eno homugo nago po omainu homu ebao, tama eno hai namu dabego te nago dogonigo po wabo odomainao wali.

Aisaia 40:11

Agai te aga we bidi dabe bugagia tonalubao, te sipsip tonalubo bidi dabego te aga sipsip bugagia tonalubo tiwai ebao. Te tonalubo bidigo te sipsip wai dabe te hagawiade pageasa bilaibao. Te aga dua digi pidu, te dwasianu wai dabe elalubo sipsipba te sunumi ola mayu, ela pidubo dao.

Aisaia 42:16

Te eno ena we bidi dabe te polobadu augwali bilisąwai sunumidu odasa asaibao. Megi augwali gedu halua sai hulide bidibao, tialima te be hulia sai elalubo te eno sela sąnama, te augwaliba ula mawaibao. Tama eno te dwai pesage elaluali te dodolama, te dolo yai pesage ilama, te augwali bilabo madi tiaibao. Eno te sę dabe te mu pedalumainu yaibao, te eno te sę yaibao wali po tiwai gilama yaibao. Te eno magi nai me delide homu kone ebo me kegeda palogobeo.

Dwagi Yai Gesi Po Jongo Asęani 10:14

Ena da, te kibu sipsip dabe bugagia tonalubo bidi da. Eno Ayago ena konebo dao, te eno ena Aya me konebo dao. Tama te tiwai egilama, eno ena kibu sipsip konebo dao, augwaligo me ena konebo dao. Eno te sipsip tau sidubadi, bidi mego ena ela muiyu da, te usu dao. Eno homu ena te sipsip tau saibao.

Dwagi Yai Gesi Po Jongo Asęani 10:16

Eno gasa sipsip me elalubuo. Megi augwali e tomogai tomode bidibo menio. Te me eno sigi pelama, odasa asaibao, e tomogai tomoba muaibao. Tama augwaligo eno po odaibao. Tama deli kibu sipsip hani bidaibao, tama te sipsip dabe tonalubo bidi deli digi yaibao.

Dwagi Yai Gesi Po Jongo Asęani 10:4

Tama augwali tigidali buluba teda soabode, te sipsip tonalubo bidi aga polasa peyu, augwali aga wali pabo dao. Magi basowe? Augwaligo aga po wabo dogoni odoyu, wali pabo dao.

Dwagi Yai Gesi Po Jongo Asęani 10:9

Ena digi ena te tomogai tų tiwai dao. Te kibu sipsip dabe tomogai tomoba pelama, tama bugagia bidiyu, buluba ma soyu, tede nai tuyu elama, bugagia bidibo dao. Te tiwai egilama yaibao, bidi me ena bidibo digi asobaso da, aga Godigo tau selama, ma saibao. Tama te bidi dwagi yai madide bugagia bidaibao, te kibu sipsip bidibo tiwai egilama.

Dwagi Yai Gesi Po Jongo Asęani 6:37

Eno Ayago enabolo mabo we bidi tigidali augwali ena pageba asaibao, ena wali asomainogo. Ena pageba asobo bidi te aga eno me sela sągobeo, mu menio.

Dwagi Yai Gesi Po Jongo Asęani 6:45

Te Godigo nosali yabo sę po pusa mani profet bidi dabe augwaligo te po asęani, ‘Godigo tigidali we bidi ola mawaibao.’ Mena bidi me Ayago po odolama, tama koneama, te bidi ena pageba asobo dao.

Polgo Po Pas Rom Dabeba Asęani 8:30

Tama God agai te polobadu hagea sali we bidi augwali, te agai augwali me i walio. Tama agai te i wali we bidi augwalibolo te agai augwaligo yali dwai sę sęgę sela sąnama, tama augwali me te doloba pai bidi nogi poali. Te agai doloba pai nogi wali we bidi augwalibolo agai te aga digi elalubo ula yai bomo dali genuai nogi dali augwalibolo mani.

1 Korin 16:9

Magi baso meni, Godigo eno sunumi dalobaso, tama eno te we bidi hauwa te Godigo po wali pomainogo tau sabo sę genuai elalubao. Tama ena dali boi bidi homu ebo bidi dabe me hauwa ede elalubao.

Filipai 4:3

Tama nage me, nage ena dali homugo kęą pai bidi, ena dali deli sę ebo bidi dao, eno nagebolo e po obao, te we si augwaligo deli homu naga emainogo nago augwali tau sao. Eno Godigo po pusubo sę ebadi, augwali sigo tigi dene sę eyu, ena tau sali. Te bidi Klemen dali, gasa ena dali deli sę ebo bidi dabe dali, augwaligo te we si dali sę yali dao. Tama augwali tigidaligo nogi te Godigo bukude asęna elalubo dao, te bidibo ula sali bagego nogi asęani bukude.

Kolosi 4:3

Dagego gedu haluasa po obadi, Godigo da me tau somainogo te po wao, “Aya, nago po, te Kraisde polobadu geme dualali po, te po augwaligo te we bidibolo pusumainogo tų dayao,” dagego te po hanalu wao. Eno gasa we bidibolo agai po pusubaso, augwaligo ena e kalabusiba muai dao.

Polgo Si Wali Pas Timotiba Asęani - 2TI 2:19

Tiali goli Godigo mu po te bidigo dolobo usu egobeo. Te bomai be tuni ni pos tiwai bulalio, tama te dolalubao, te be peme egobeo. Tama te tuni ni posde hagea siyu asęani po te tiwai elalubao, “Genuai Bidigo aga we bidi digi bugagia koneani.” Tama te po me asęani elalubo, “Te Genuai Bidi nogi nogi eyu ‘Ena aga bidi dao’ po wabo tigidali bidi, augwaligo te dolo isiąwai kolesaga tudiba muao,” te po asęani elalubao.

1 Pita 1:12

Augwaligo te po hanalu wali digi, tama God agai augwalibolo waselama, tama augwaligo koneai, augwaligo po pusubo sęgo augwa digi tau sabo sę meni, te dage nosali bidabo we bidi tau sabo sę dao. Tama augwaligo te sę eyu, augwaligo te polobadu sogo mu pusali po dagego tamadi odali. God agai aga Tedali Mobo Bidi aba tagala palama, tama agai gasa bidi dabe tau siyu, augwaligo Godigo dwagi yai po dagebolo pusagasai. Tama te sęde te Godigo dagalude sę ebo ensel bidi dabe augwaligo bomo eyu, te sę page kuna koneaio homu ebo dao.

1 Jon 4:6

Da Godigo we bidi dao. God koneani bidi, te bidi agai dago po odobo dao. Tialima God konesiąwani bidi, agai dago po odali goli, te po wali pabo menio. Tede dago te mu po wabo Mobo dali, tibo po wabo dwai bidi noma elalubo bidi dabe dali dagalama, tama augwali si koneagameo.

Jongo Sela Sogo Wabo Asęani Pas - 3JN 1:14

Eno nage tamadi suagasobo homu ebao. Tama eyu, tama nago gesabide eno te po pusaibao.

Kraisgo Geme Dualali Sę Pedelabo Po Jonbolo Ola Mani 20:15

Tama e po tų odobo bidi agai te gamonaibao wali we bidi nogi asęani buku nedeyu, tama niwai bidi agai nogi te bukude me elalusiąbaso da, teda agai te bidi te moni genuai sia dabo dedageba aiyaba te siade dene somainogo sąwai.

Kraisgo Geme Dualali Sę Pedelabo Po Jonbolo Ola Mani 3:20

Odao. Ena te tųde dolaluyu, tama eno te tųba begebo wabo odao. Tama niwai bidi me agai eno te be tųba bebego wabo po odoyu, te be tų dayu da, te ena te be tomoba pelama aga dali bidaibao. Tama ena aga dali nai tuyu, tama aga ena dali nai tuyu bidaibao.

Kraisgo Geme Dualali Sę Pedelabo Po Jonbolo Ola Mani 7:17

Magi baso meni, te genuai tuni bidi duabo nai gesabide bidibo kibu sipsip wai, te aga digi agai augwali tonalubo bidi bidaibao, te kibu sipsip tonalubo bidi agai aga sipsip dabe tonalubo gilama tiwaibao. Tama agai augwali te ąį ulu pedalobo digi odasa pelama, tama augwaligo te bidabo ula yabo ąį saibao. Tama Godigo augwaligo gedude gela wali gedu ąį hola sabaso, tama augwali gela ma wagobeo,” te polalubo tobolu bidigo enabolo te po wai.