Jeremaia 8:13 - Godigo dwagi yai po buku

¹³ “Ena Genuai Bidi, eno po dolo obao, te eno augwali mu silimainu yaibao. Augwali te ni wain, me ni fik, te du munu me walisiąma, te augwa yabe sasia pabo tiwai yaibao. Tialima, eno te boi bidi hani dabe tagala palama, augwali aiyaba elalumainu yaibao.”

Jeremaia 8:13 Iomraidhean Croise

Aisaia 5:10

Tagala, augwaligo wain gi hauwa bulu badi goli, me wain du dabe hauwa me walogobeo. Tama augwaligo dwasianu wain ąį naga nigaibao. Tagala me, augwaligo nogo si begi te wit ge augwaligo te gide bulai. Tama te wit ininama, augwaligo togolama, te begi deli digi bueibao,” Genuai Bidigo te po wabo eno odali.

Jeremaia 14:12

“Te augwaligo nai habu selama, enaba gedu haluasa po obadi goli, te tagalao, eno augwaligo i wabo munu me odogobeo. Te augwaligo sia ulama, tigidali dela pabo ofa ebadi goli, te tagalao, te wit ulubo ofa ebo me, eno te we bidi augwaliba wiegi yai pemene me egobeo. Menio. Te eno boi bidi dabe tagala palama, augwali elagasomainu yaibao. Te eno augwali nai menia somainu ilama, te augwali isaibao. Tama genuai gasi augwaliba pedalumainu elama, te augwali isila paibao. Tama tebo kolesagade te eno augwali silimainu yaibao,” wali.

Jeremaia 14:15

Tama tialima, ena, Genuai Bidi, eno po dolo tama obao. Te profet dabego po eno nogide pusali goli, tialima eno augwali me tagala palobeo. Augwa te tama po wali, ‘Hwįbo me nasi ebo te tǫ kantriba me pedalugobeo,’ wai. Tialima, hwįbo me, nasi ebo me, te profet dabe augwaba digi pedelama, te augwa mu silaibao.

Jeremaia 17:8

Aga da, te augwaligo wiegi yai ni te ąį pagede bulali tiwai ebao. Te nigo bono sele te aiyaba dulama, te ąį sigulali. Te genuai giliga nanobo side, te nigo wi me egobeo. Menio. Aga yabe te kebasi yai sesemane elalueibao. Te tulubage menibo sogo, aga homu si me egobeo. Menio. Aga nai sesemane waludubo dao,” wali.

Jeremaia 5:17

“Te augwaligo dagego gide elalubo nai, me bede elalubo nai sia saibao. Te augwaligo dagego wai puluba tigidali ela mubadi, te sipsip hani tigidali me, te dagego bulmakau me ela muaibao. Tama te augwaligo dagego wain du ni, me ni fik kaya, te dolaibao. Dagego homugo te dage bomai obo taun tomode bugagia bidaiba homu ebao, tiali goli, te menio. Te boi bidi dabego hwįagasiyu, te taun dabe dola silaibao,” wali.

Jeremaia 7:20

Te ena God Genuai Bidi, eno te tama po obao. Eno haliga sębę dwai mu eyu, te tǫ kantriba me, te we bidiba me, te tubo kibu hasa me, te ni dabeba me, te naiba me dwai sę mu yaibao. Eno haliga sębę te genuai sia dabo tiwai eyu, te bidi mego sula sąyabo usu me egobeo,” te po wai.

Esekiel 22:31

Tialima, eno augwalide haliga sębę ebaso, te augwali eno mu dolainu ebao, te isi dage kalaba munama, dala sabo tiwai yaibao. Te eno augwa yali dwai kolesaga dolo mu wei ponaibao. Ena God Genuai Bidi, eno te po wai dao,” wali.

Hosea 2:12

Te eno te wain ni dabe, me te ni fik kaya ni dabe te bidi dabego aga wei elama, aga mani, te aga mone mabo tiwai yai, te nai dabe eno mu dolaibao. Tama te uni hasa dabego te wain gi dolagaselama, tama te ni kaya fik gi me dolama, te olo bus tiwai pedelaibao,” wali.

Joel 1:7

Augwaligo te dago ni wain dabe dolama, te dago ni kaya fik me tula silali. Augwa te tigidali ni kaya wale me ni nologo tula silama, wa pelama, te tedela yai elaluai dao.

Pris Sę Ebo Bomai Po 26:20

Te nai dabe te gide dabe me hologobeo, te ni dabego du me walogobeo. Te dagego sę dene yali odolali yaibao,” te po wai dao.

Habakuk 3:17

Te ni kaya fik dabego te du walisąbaso, me te ni wain dabego me te wain du walisąbaso, tama te ni oliv dabego me te du wai walisąma, tama te gide nai meni yai elalu, tama te kibu sipsip tigidali isibadi elama, tama te kibu bulmakau dabego be dabe me olo mu elaluyu da,

Hagai 1:11

“Te eno naga te eno te kulubage tuludali weyu dąų wai dao. Tama teyu te moni giliga te bulu dude me, tama me te tigidali nai gide me, me te wain gide me, tama me te ni olivde me, te tigidali nai dabe te moni giliga nanai dao. Eno te tǫde holobo tigidali nai dabeba kulubage me tulumainu me sula tagalobe dao,” wali, “tama me te bidi dabe me, me te bulu hasa dabe me, tama me te tigidali haniani nai dabe te duga gide bulali nai dabede me,” Genuai Bidigo te po wai.

Hagai 2:17

“Eno te posolo yai wali me deli tagala palama, tama te wali asu, te gasi me deli te wali dali asu, te dagego te gi nai dabe tigidali dolai dao,” wali, “tama te ais te kulubage tiwai aselama, tama te dagego gide bulali nai dabe tigidali dolai dao,” wali. “Dagego te sę dabe augwali pedalobo suai dao, tiali goli dagego sulama, te dagego te eno be sę ebode duga homu munu me begelebeo.

Malakai 3:11

Dagego tama tibaso da, teda eno te dwai osogani dabe paniama, te dagego gi nai me dologobeo. Te ni wain du te dagego wain gide mu pągąna paibao wai dao.

Matyu 21:19

Tama aga pelama, te tų sesegede elaluali ni kaya sulama, tama te ni pąba pali, aga du sela tuainogo yai. Tiali goli tede nai me deli walai elalubo subeo. Menio. Yabe naga elaluai. Tama agai te ni kayabolo te tiwai po wali, “Nago nai ma walogobeo. Mu menio.” Tama polo mu te ni kaya aga sasia pai dao.

Jems 1:11

Tama dago koneai. Te noswai plaua duduli wiegi yai au osogo elalubo dao. Giliga pedaliyu, te giliga posolo eyu, tama te noswai tigidali bogwa selama wa pabo dao. Tama te noswai tǫba tulaluai, tama te noswaigo au yali dolobo dao. Te tiwai te nai hauwa munalubo bidi me aga te tigidali sę yali nai dabe tagalama, tomode isiyu, te nai walu doado bage taga pabo dao.