Jeremaia 27:19 - Godigo dwagi yai po buku

^19-21 “Magi baso meni. King Nebukatnesar te Jerusalemba aselama, te king Jehoiakin sali, te Jehoiakimgo ogwa, tama agai te Juda tobolu bidi dabe me, te Jerusalem tobolu bidi dabe me selama, tama agai augwali Babilonba kalabus igi peyu odasa pali. Tialima, agai te wiegi yai nai meba te Jerusalemde elalumainu yalio. Agai te brasgo nigali genuai pos dabe sabeo, tama augwa te brasgo nigai tang ąį tubo genuai nai me sabe, tama augwa te brasgo nigai te dwasianu ąį tubo tang dabe gasaba bilabo nai dabe, te me sabeo. Tama me agai te eno bede gasa nai dabe me sabeo, te kingo bede me, te tigidali Jerusalem pedai badu elaluali nai me sabeo. Tialima, ena God, dage Israelgo Genuai Bidi, ena Tigidali Bomo Elalubo Genuai Bidigo, eno te tiwai po dageba wabo dao.

Jeremaia 27:19 Iomraidhean Croise

Te Israel me Juda Hani Sigo Tuni Bidigo Po Elalubo Buku Deli 7:23

Te Huramgo te genuai tank ąį deli te brasgo nigali. Te tank ugwadu daide usu sali, te 2 mita me 20 sentimita, tama te dedage usu sali, te 4 mita me 40 sentimita, tama aga tigi genuai yali, te 13 me hap teba usu nigi pai.

Te Israel me Juda Hani Sigo Tuni Bidigo Po Elalubo Buku Deli 7:27

Huramgo nogo si wilkar te brasgo nigali, te daide ugwadu te dwasianu tank wę dabe muainu yali. Te wilkar me si me si pedai bogo badu te deli tigi tobage dąį elaluali, te 1 mita me 80 sentimita usu nama, tama augwali te daide ugwadu, te 1 mita 30 sentimita usu nama elaluai.

Te Israel me Juda Hani Sigo Tuni Bidigo Po Elalubo Buku Si 25:13

Tama te Babilon hani bidi dabe augwaligo te Genuai Bidigo tempel beba pelama, tama augwaligo te brasgo nigali moni pos si me, tama me te bidi dabego te bras selama, nogogo nigali wilkar dabe me, tama te wę tubo dwasianu tank te wilkar ugwadu daide muani nai dabe me tigidali, te augwaligo auluama sąyani, tama augwaligo te tigidali te bras dabe te Babilon buluba selasa pali.

Te Israel me Juda Hani Sigo Tuni Bidigo Po Elalubo Buku Si 25:17

Te bidi dabe augwaligo polobadu te brasgo nigali pos si te augwaligo hasia nigali ususi elama naga pos si nigali. Te bobobage yali usu te 8 mita usu. Te augwaligo te pos si toboluba mubo au ebo nai nigali, te dwasianu genuai gagawai, tama te au ebo nai bobobage usu te 1 mita tama te 30 sentimita usu. Tama augwaligo te bras selama, te dwagi yai te au yai nigali, te tiwai te sųgų gegebo wago au yali tiwai mu, me te ni du pomigranet dabe te ni dugo au yali tiwai au yali, te augwaligo te pos side tama augwaligo te au yai nigali. Tama augwaligo te brasgo nigai ni pomigranet du dabe selama, tama te wa umben gege pabo au yali. Tama augwaligo te au yai doado bage selama, tama te brasgo nigai bobobage pos tobolu side tama augwaligo au yai nai munama, tama te pos si tobolude bagulali.

Tuni Bidi Dabego Po Elalubo Buku Si 36:18

Tama te Babilon kingo te haniani genuai me dwasianu dis dabe, me Genuai Bidigo tempel bede plet dabe, me Genuai Bidigo bede wiegi wiegi yai nai dabe siyu, me Juda dabego kingo doado bage, me aga ofisa bidi dabego doado bage siyu yali, te king aga ofisa dabego nai dabe sali, tama agai sese tama Babilonba selasa pali.

Te We Bidi Dabego Jerusalem Hagede Gela Wali 1:10

Polobadu te God Genuai Bidi te habu selebo po weyu, te Israel hani isąwai bage te moni lotu be tempel tomoba pelamuo po wai dao. Tiali goli, te Jerusalem we bidigo suali, te tobage boi bidi dabe te bomo yai po boliyu, augwali tomoba pelama, tama tede elaluali wiegi wiegi yai nai dabe sese tama wi salio.

Daniel 1:2

Godigo te Nebukatnesargo te Jehoiakim me te Juda we bidi hauwa somainu elama, tama te Godigo bede muani wiegi yai nai, te kap, me plet pou dabe meba salio. Tama agai te aga tibo godigo beba digibulu sela pali, te be te tǫ pedai Sinarde elaluali, te Babilon hanude digi dao.