Jeremaia 2:30 - Godigo dwagi yai po buku

³⁰ Eno dagego wai puluba dabeba dwai dene mabo sę yali, te dage dodoliyu yali, tiali digi ena odolali sę dene yai. Dagego duga kolesaga me hasegelebeo. Menio. Iya! Dagego te eno dageba tagala palali profet dabe deli deli ela muna muna pela silali, te nasi yai boma pai laiongo hasa elebo tiwai yai.

Jeremaia 2:30 Iomraidhean Croise

Te Israel me Juda Hani Sigo Tuni Bidigo Po Elalubo Buku Deli 19:10

Te Elaijago te tama po wai, “Genuai Bidi, Tigidali Bomo Elalubo God dao, eno te Israel we bidi tigidaligo nage deli naga wali pomainogo ebo sę bomo ebao. Tiali goli, augwaligo nage tudiba muyu, tama te nago augwali dali dąų wali bomai po kontrak bolali. Te augwaligo nago alta dabe aluama, te nago po pusubo profet bidi tigidali ela muani. Te enaduba deli naga bidibao, te megi augwaligo ena me ela mumainu ebo dao,” wali.

Te Israel me Juda Hani Sigo Tuni Bidigo Po Elalubo Buku Deli 19:14

Tama Elaijago po e tiwai wei ponani, “God, Tigidali Bomo Elalubo Genuai Bidi, eno te Israel we bidi tigidali nage deliba naga wali pomainu ebo sę bomo ebao. Tiali goli, augwaligo nage tudiba munama, te nago augwali dali dąų wali bomai po bolalio. Te augwaligo nago alta dabe aluama doliyu, te nago po pusubo profet bidi dabe tigidali ela muani. Tama enaduba deli naga bidibao. Te megi augwaligo ena me ela mueinu ebo dao,” tama wali.

Tuni Bidi Dabego Po Elalubo Buku Si 24:21

King Joas aga ofisa dabe dali augwaligo te Sekaraiago wali po wei ebeo, tama augwaligo aga ela isilabo po miani. Tama tialima kingo pode te bidi dabego masigigo Sekaraia enani, tama aga te Genuai Bidigo tempel be bagulali obo tomode sisinibo pesagede elama isilali.

Tuni Bidi Dabego Po Elalubo Buku Si 28:22

Te king Ahasgo te sęgę hauwa mu sabo sogo agai Genuai Bidi munu me homu kone ebeo. Menio. Agai Genuai Bidi tudiba munama, me genina mu tudi ola manio, tama dwai dwai sę hauwa mu yali.

Tuni Bidi Dabego Po Elalubo Buku Si 36:16

Tiali goli te we bidigo te augwaliba tagala palali te bidi dabe posobo po weyu yali, tama augwaligo homugo tiali augwaligo po te olo nai tiwai dao homu yali. Tama augwaligo te profet dabe olo nai gagaliyu yali. Tama tibaso, Genuai Bidigo aga we bidi dabe hagela mu elama, tama augwali dali sębę genuai mu yali. Tama augwaligo agai augwalibolo tagala palainu ebo te dwai sę geda muabo usu egobeo.

Nehemia 9:26

“Tiali goli, te we bidi augwali te hagoma mu elama, tama augwaligo nago po sela sąwai. Tama nago bomo yai poba augwaligo tudi ola mawai. Tama nago te profet bidi dabe augwaliba tagala palali, te augwaligo te nago bomo yai po augwaliba magasu asali, te augwali homu begelama, nageba ma asomainu yai. Tiali goli, augwaligo te profet dabe ela muani. Tama hauwa sogo augwaligo te tiwai kolesaga yali, tama augwaligo nago nogi mu dolai dao.

Aisaia 1:5

Magi baso dagego Godigo po me sela sądubawe? Dage tigidali sogo dene sabo hagela meniwe? Israel, nage te bidi me bidi dabego elai bidi tiwai dao, te agai tigi sese mu dolama, bomo mu meni yai. Agai tobolu keni kenigo pągąna pai.

Aisaia 59:3

Magi baso meni. Te dagego haniani tibo po weyu, te wado po, me po dwai wali. Te dagego dwai kolesaga eyu, te bidi dabe ela munama, te augwa kaneme dagego nogode dagana sai elalubao.

Aisaia 9:13

Te Israel we bidi homu begelebeo. Genuai Bidi Tigidali Bomo Elalubo Bidigo augwali dene mani. Tiali goli, augwali agaba ma asobeo.

Jeremaia 31:18

Te Efraim hani dabego gela wabo eno mu odalio. Augwa gela weyu, te tiwai po wali, ‘Genuai Bidi, nago da keloago elali, te nago da dodolali, te bidigo te hagoma ebo ogwa bidi bulmakau elibo tiwai yai. Genuai Bidi, nage naga dago God, te da nageba ma asabo homu ebao. Tama tialima, nago da odasa asao.

Jeremaia 46:14

“Dagego te taun Mikdol, me Memfis, me Tapanes, me te gasa Isip pedai badu, teba te po hanilama, pusao. Augwaliba te tiwai po wao, ‘Dage Isip te hwįabo sisilama, dolaluao. Magi baso meni, te boi bidi pedelama, te dage ela mubo sę yaibao.

Jeremaia 5:3

Genuai Bidi, nago godolo ebo homugo te tigidali bidigo te dolo yai kolesaga mu wali pomai homu ebao. Nago te we bidi dabe elebadi goli, tialima augwali te dene ebo gę nabeo. Nago augwali elaluali, tiali goli te augwali nago dodolomainu me ebeo. Augwa tobolu te masigi dila pai mu tiwai elalu, te augwa haliga begelibo hagela mu yali.

Jeremaia 7:28

Te nago augwaliba te tiwai po wao, ‘Te dage hanigo te Genuai Bidi, duga Godigo po wali me pisąyu, te Godigo augwali dodolomainu me ebeo. Augwaligo te mu po wabo kolesagadu munu me wali pabeo. Augwaligo te kolesaga mu tagalobo dao.’ Te po wao,” wali.

Te We Bidi Dabego Jerusalem Hagede Gela Wali 4:13

Tiali goli, Godigo te boi bidi dabe tagala palama, te Jerusalem dolai dao. Magi baso meni. Te profet dabe, me pris dabe, augwaligo dwai sę elama, tama augwaligo te Jerusalemde dwai sę meni yai we bidi ela mubaso tiai dao.

Esekiel 22:24

“Tǫde bidio, nago te Israel dabeba te po walao, augwaligo dwai kolesaga hauwa eyu, te augwaligo tǫ eno gedude meda pedelali. Tialima, eno haliga sębę dwai mu augwaliba eyu, eno te tulubage paliama, te kalaba tulubage me paliama, te dene mabo sę augwaliba mobao.

Esekiel 24:13

Dage Jerusalem, te yaba yali po wali page te dagego dwai meda yai kolesagade dąį elasa walio. Eno dagego dwai kolesaga sela sąbo usu sali, tiali goli dagego hagela yali. Dage meda dali bidabo homu naga yali. Tialima, te ena haliga sębę ebaso, te eno dageba dwai dene mabo sę ebaso, te eno dageba dwai dene mabo sę mu yaibao. Tama dage te meda dali me tama bidaludubadi, te eno haliga sębę yali silibo sogoba usu naibao,” wai dao.

Daniel 9:13

Nago te Mosesgo bomai po tomode wali po gilama dago te sęgę tigidali sali. Tiali goli, megi me dago te sęgę sabo kolesaga me tagalisiąma, tama dago nageba hanalu, te dabolo bugai haliga yabo po me hanalusiąwai, tama dago nago mu po wali me pisąwai.

Sefanaia 3:2

Augwaligo bidi dabego po odisąwai, awe, augwaligo Genuai Bidigo po me odai menio. Tama augwaligo Genuai Bidigo augwali dodolomainu homu ebo hagela yai dao. Tama augwaligo agaba homu dąų olama, tama augwaligo Genuai Bidigo augwali tau somainu me hanalu wai menio.

Matyu 23:29

Po ma weyu, agai te po wai,” Dage bomai po page ola mabo bidi me, dage Farisi dabe dali, hobede ya. Dageba te dwai sogo mu pedelaibao. Dagego te polobadu po pusali bidi profet dabe gų pagede masigi be sęnama, tama te polobadu bidali doloba pai bidi dabe muani gų page au ilibo dao.

Godigo Sęba Tagala Palai Bidigo Po 7:52

Polobadu duga wąį dabe augwaligo Godigo dwagi yai po pusa mabo bidi dabe tigidali ela silali. Me deli bidibawe? Mu menio. Polobadu mu Godigo dwagi yai po odasa pabo bidi dabe augwaligo te po wai, ‘Nosali God agai dwagi yai dolo sę ebo bidi asaibao.’ Tialima, duga wąį dabe augwaligo te po odasa pabo bidi dabe ela muani. Megi tama dagego te Godigo dwagi yai dolo sę ebo bidi ela muai.

1 Tesalonaika 2:15

Tama te dwai sę yali Juda bage augwaligo Godigo po pusa mani profet bidi elama isai, tama augwaligo Genuai Bidi Jisas me eleyu yai. Tama tiyu, augwaligo da me ela guduluyu sela sąwai dao. Tama augwaligo ebo sęde te Godigo dwagi yai homu isiąwai sę dao. Tama augwaligo tigidali bidi dali boi bidi mu ebo dao.

Kraisgo Geme Dualali Sę Pedelabo Po Jonbolo Ola Mani 16:9

Tama te genuai giliga nanobo siago te posolo mu eyu, tama te siago te bidi dabe dwai dene mu mawai. Tibaso, augwaligo God nogide posobo po wai, agai te dwai dene mabo nai tonalubo bomo elalubaso, tiali goli augwaligo ge neyu homu begelama God agai nogi ugwaba sabeo.