Jeremaia 2:17 - Godigo dwagi yai po buku

¹⁷ Te naga digi yali sęgo te sę nageba pedelali. Magi baso meni, ena Genuai Bidi, naga God, eno nage te sunumidu odasa asainu yali, tiali goli, naga hagela eyu, ena tudiba muai dao wai.

Jeremaia 2:17 Iomraidhean Croise

Tuni Bidi Dabego Po Elalubo Buku Deli 28:9

“Tialima nage Solomon, eno ogwa da, eno te tiwai bomai po nageba obao. Nago homu kolesaga deli naga elaluao, te naga ayago God dologode bidao. Te nago agai homu wali pabo sę bomo mu yao. Nago te tiwai yao, magi baso meni, Genuai Bidigo dago homude magi homu te tigidali agai koneaibao. Te nago agai godolo yabo kolesaga wali pabo sę bomo ebo kolesaga sobaso da, teda te nago aga bugagia konemainu yaibao. Tiali goli nago aga tudiba mubaso da, teda agai nage sela sąnama, te sesemane sogo agai nage tudiba mueibao.

Tuni Bidi Dabego Po Elalubo Buku Si 15:2

Tama king Asa te Jerusalemba ma asobadi, te Asaria aga tiąba pelama, tama agabolo e tama po wali, “King Asa, me tigidali Juda dabe, me tigidali Benjamin hani, dagego odiąo. Tialima dage Genuai Bidi dali pąde mu bidiyu da, teda aga dage dali pąde mu bidaibao. Ma, dagego aga gegebo sę iyu da, teda dage aga pąba mu asobo usu yaibao. Tiali goli, dagego aga tudi ola mayu da, teda agai dage tudi ola mawaibao.

Jopgo Po Asęani Elalubo Buku 34:27

agai augwali tigide dene ilibo dao. Magi baso meni. Augwaligo aga tudi ola mobaso. Tama me augwaligo God agai wei ebo kolesaga wali pisąma ebaso tebo dao.

Jopgo Po Asęani Elalubo Buku 4:8

Tiali goli, eno suali, dwai kolesaga hauwa ebo bidi dabe da, te bage da dwai kolesaga wali peyu, augwali sęgę hauwa wali peyu ebo. Te e tiwai dao, bidigo aga gide dwagi yai nai wai bulama, tama te dwagi yai nai sabo tiwai, ma te bidigo dwai nai wai bulama, tama te dwai nai sabo tiwai.

Godigo Nogi Ugwaba Sabo Tęąbi Po Wabo Buku Dabe 107:7

Agai augwali pabo dodolama, tama augwali odasa peyu, tama augwali te taun me deliba pedelama, te augwali tede bidai.

Godigo Nogi Ugwaba Sabo Tęąbi Po Wabo Buku Dabe 136:16

Te aga we bidi dabede aga te wa pai bulude polasa palio. Agai da sesemane bidada pabo sogo wei mu ebao.

Godigo Nogi Ugwaba Sabo Tęąbi Po Wabo Buku Dabe 77:20

Nage te tonalubo bidi mu tiwai elama, tama nage polasa pobaso, tama te we bidi dabe nage wali pelawai. Nago sę te Moses de Aron sibolo menama, tama augwali sigo te augwali tonaluai dao.

Bugagia Bidibo Kolesagade Po Asęai Buku 15:10

Te doloba pai sunumi tagalobo bidi da, teda dwai dene mu saibao. Tama te gasa bidi dabego aga dodolomainu isiąbo bidi da, teda aga isaibao.

Aisaia 1:4

Tega, te we bidi dage dolama, dagego kolesaga me mu doali. Tigidali sogo dagego dwai sęgę sabo dao. Te duga dwai sęgęgo dage aiyaba kegebo dao. Dage Israel dabego duga Genuai Bidi tagalai dao, aga te Dwagi Yai Doloba Pai Kolesaga Naga Ebo God dao. Tama dagego aga tudi ola manio.

Aisaia 59:13

Dago te dena Genuai Bidi, God, nageba dwai sę yali, te dago nage tudiba munama, nago po sela sąwani. Dago nage dologode bidibo te hagela homu yai dao. Dago te gasa bage elaluama, te haniani hagoma kolesaga yali. Dago te gasa bage dabe tibo po ola mayu, po geagano bilama, haniani sunumi nigibo po wali.

Jeremaia 13:22

Te nago te magi baso te dwai sę nageba pedalubo te nago koneainogo homu ebaso da, teda nago koneao, te pedalubo te nago dwai sę yali wei ponoyu tebao. Te naga yali dwai sęde naga nago ugwa augwaligo peda sąnama, te augwaligo nageba dwai sę yali.

Jeremaia 19:4

‘Eno te tiwai yaibao, magi baso meni, te eno we bidi dabego ena tudiba munama, tama augwa te gasa tibo god dabeba te wiegi yai denami ilibo hano ebo ofa ebao. Te we bidi augwa digi, me te augwa wąį nǫų dabego me, te Juda king dabego me, te god polobadu me konebeo. Tiali goli, megi augwaligo te god dabeba lotu weyu ebao, tama tebo kolesagade augwaligo te pesage dwai meda mu eno gedude ilibao. Tama me, te augwaligo magi sęgę meni yai bidi hauwa ela muyu, tama augwaligo kaneme te pesagede geą sąbo dao.

Jeremaia 2:13

magi baso meni, eno we bidi dabego te dwai sę si yali. Hasia augwaligo ena tudiba muai. Ena te ulu wę tiwai te augwali bidabo ula maiabo wę elaluali, tiali goli, augwaligo ena tagalali. Tama me, tǫ diganama, augwa digi te wę sabobo nai nigali. Tiali goli, te wę sabobo nai te alua pelama, te ąį augwalide elalubo usu ebeo.’”

Jeremaia 2:19

Naga digi ebo dwai kolesagade te nageba dwai dene mawaibao. Nago ena tudiba mubaso, tama naga te kolesagade nageba wado ilaibao. Nago ena Genuai Bidi tagalu, te nago God, te nago ena dologoba me bidagasobe. Tama nago bugagia homu kone palama, koneao, nago te dwai kolesaga dabe mu ebogo te nageba dwai dene mobao. Ena God, Tigidali Bomo Elalubo Genuai Bidi, eno te po wai dao.”

Jeremaia 4:18

Dagego te dwai kolesaga eyu, dage te dwai sunumidu bilibaso, tama dageba te pedalubo sęgęgo page dabe te dao. Te duga dwai sęgęgo digi duga te dene tolobao, tama te duga homu enelawe togwalubo dao,” wali

Jeremaia 44:3

Eno augwali dolali, magi baso meni, te Juda dabego dwai kolesaga hauwa yali, te tama tialigo te eno augwaliba haliga sębę yabo sę ilali. Augwaligo te gasa godiba lotu weyu, te augwaliba wiegi yai denami ilibo hano ebo ofa yali. Augwaligo te god dabe polobadu me konesiąwai. Te dage ede bidibo Juda dabe, te dagego wąį nǫų dabego me te god dabe polobadu me konebeo.

Jeremaia 5:25

Tialima, dagego te haniani dwai sę ebo kolesaga ebao, tama duga te ebo kolesagago te wiegi yai nai sabo te paliama, te dagego sabe dao,” wali.

Esekiel 39:24

Eno augwaliba tudi ola menama, tama augwaligo dwai meda yai sę dabe elama, sęgę sę dabe yali wei ponoyu, tama tiai dao, augwa dagede,” wali.

Hosea 13:9

“Te Israel dabe, te ena deli naga te dage tau sabo usu yaibao. Tiali goli, dagego hagela ebaso, tama eno dage dolaibao. Tama dego dage tau sogowe? Te bidi dabe menio.

Maika 1:5

Te tigidali sę pedelaibao, magi baso meni, te Israel dabego dwai sę eyu, te Godigo po sela sąwani. Te hagoma ebo kolesaga te Israelde elaluali, te sę page dego dawe? Te Samaria dabede naga dao. Te Juda tibo godiba lotu po wali kolesaga, te sę page dego dolai dawe? Te page Jerusalem dabede naga elaluai dao.

Israel Hanigo Namba 32:23

“Megi eno po bomona dage dali te obao, dagego duga dąų wali po wali pisiąbaso da, teda dagego Genuai Bidi dali sęgę saibao. Tama dagego te tama koneao, Genuai Bidigo dagego dwai sęgę kone palama, tama dage ela silaibao.

Bomai Po 32:10

Te Israel dabe augwali polama, augwali subigila bilaluali, te masigi kemi sane dwai bulude, me te wali genuai ebo bulude bilali. Tama Genuai Bidigo augwali gegelama, augwali oda selama, tama augwali tau sali. Tama agai augwali tonaluali, te aga digi aga tonalubo tiwai yali.

Bomai Po 32:19

“Tiali, Godigo aga wai dabe augwaligo te dwai kolesaga ebo sulama, aga sębę elama, tama augwaliba tudi ola mani.