Jeremaia 17:11 - Godigo dwagi yai po buku

¹¹ Te bidigo kolesaga dolo isąbadi, te mone hauwa sobaso da, te aga te ba me deligo te gasa bago ge wi selama, tama te gede pedelali wai dabe sabo tiwai ebao. Te bidigo mone tigidali te aga monu dabe isąbadi hagawaibao. Tama nosali, te bidi dabego koneaibao, aga te homu kolesaga meni yai bidi tiwai yalio.

Jeremaia 17:11 Iomraidhean Croise

Jopgo Po Asęani Elalubo Buku 20:21

Mena nai dabe augwaligo me godolo yali da, teda augwaligo siyu naga ebo dao, te bidigo dwagi yai tubo nai sulama, tula siliyu yaide, dage me tagalabo homu ebe tiwai yali gilama. Tiali goli, te dwagi yai sogo te pęwadage sogo bidama, tama sia saibao.

Godigo Nogi Ugwaba Sabo Tęąbi Po Wabo Buku Dabe 49:13

Te sę ebo te bidi dabe augwa digi tǫde tigidali nai homugo dąų wabo bidide pedelebo dao. Tiwai bidi dabego dwagi yai homu kolesaga menio. Te bidi dabe augwaligo e tǫde tigidali nai dali osogo dwagi yai elama, tama augwali isibo dao.

Godigo Nogi Ugwaba Sabo Tęąbi Po Wabo Buku Dabe 55:23

Tiali goli God, te nago te bidi ela mubo bidi dabe sela sąyu, tama te tibo po wabo bidi dabe me sela sąyu elama, tama augwali te dwai pesageba pelama, tama augwali hagawaibao. Te augwaligo bidabo sogo bodolu te me elalubadi, tama te augwali isaibao. Tiali goli, ena digi, teda eno konealubo homu nageba mu sesemane kęą paibao.

Bugagia Bidibo Kolesagade Po Asęai Buku 13:11

Tama te bidigo sę me isiąma, tama te odolali te mone hauwa sobaso da, teda agai te mone polo tama sia saibao. Tiali goli, te sę ebo bidigo tama te dwasianu dwasianu mone sisini peyu da, teda agai mone te hauwa pedalubo sę eduaibao.

Bugagia Bidibo Kolesagade Po Asęai Buku 15:27

Te monede pesą eyu ebo bidigo tama te mone sainu te tobage haniani dwai kolesaga ebaso da, teda agai te dwai sęgę te aga we wai dabede te pedalubao. Tiali goli, te gasa bidi dabego te haniani dwai sęde te mone mabo sisąbo bidi da, teda aga te bugagia bidaibao.

Bugagia Bidibo Kolesagade Po Asęai Buku 21:6

Tama te bidigo tibo kolesaga wali peyu, te doado bage hauwa sobaso da, teda aga te isabo sunumide bidibao. Tama te bidigo mone me doado bage te dagalude pǫ te pęwadage sogo naga elalubo tiwai elama, tama te mu tigidali sia sabo dao.

Bugagia Bidibo Kolesagade Po Asęai Buku 23:5

Te nago mone hauwa sobadi goli, te tagala, te polo tama sia saibao. Te mone te ba bogo tiwai elama, tama te ba kemodage tiwai ugwaba bola holobo dao. (8)

Bugagia Bidibo Kolesagade Po Asęai Buku 28:16

Te bulu tǫ kantri tonalubo bidigo homu te wiegi yai me elalusiąbo bidigo da, agai te bulude bidi hani bage te aiyaba agalama dolaibao. Tiali digi, te bulu tǫ kantri tonalubo bidigo te we bidi dabego nai anoma eyu, kekebo homu te hagela homu ebo bidigo da, teda aga te sesabi sogo elama, te aga bugagia bidaibao.

Bugagia Bidibo Kolesagade Po Asęai Buku 28:20

Te bidigo doloba pai kolesaga wali pobaso da, teda te Godigo agaba wiegi yai sę mu yaibao. Tiali goli, te bidi aga polo mu tama te mone hauwa elalubo bidi pedelabo homu ebaso da, teda te Genuai Bidigo aga odolali me pomainu egobeo. Menio. Te agaba te dwai dene mabo sę yaibao.

Bugagia Bidibo Kolesagade Po Asęai Buku 28:22

Te aga doado bage yogo ela sabo bidigo, aga te mone hauwa elalubo bidi pedalubo sę bomo polo yaibao. Tiali goli, aga te magi nai meni yai dwai mu pedelabo te agai me konebeo.

Bugagia Bidibo Kolesagade Po Asęai Buku 28:8

Te bidigo te bidi dabego agaba te nai negeli somainu elama, tama agai te augwalide gasa ugwadu daganobo profet mone genuai dali sobaso da, teda agai te mone tolalubaso, usu me egobeo. Menio. Te mone te magi nai meni yai bidi dabe tau sabo bidigo nogoba pelama, tama te magi nai meni yai bidi dabe tau somainu ebo dao.

Jeremaia 22:13

Genuai Bidigo po ma weyu, te tama po wali, “Te aga wiegi yai genuai be sę yabo homu ebo bidi agaba te Genuai Bidigo sęgę pedalumainogo yaibao, magi baso meni, agai dwai kolesaga te we bidi dabeba yali. Aga be te genuai mu, tama te be habu ugwadu elalubao. Te aga abagi dabego agai te sę yali. Tiali goli, agai mone augwalibolo me mabeo. Menio. Augwaligo sę olo naga yai dao.

Jeremaia 22:17

Tialima, nagade digi, naga homu elama, te nago sesemane sogo te tobage nai dabe pesa elama, tama nago te nai dabe sainogo tibo kolesaga ebao. Tama nago te magi dwai sę isąwai bidi dabe odolali elibao. Tama nago te we bidi elaluama, te augwaliba dwai sę ebo dao,” wali.

Jeremaia 6:13

“Tigidali we bidigo te dwai kolesaga haniani eyu, te mone hauwa sabo homu eyu tama tiali. Te olo bidi dabe me, genuai bidi dabego me te kolesaga naga wali pali. Te pris dabego me, te profet dabego me te we bidi tibo po ola mayu yalio.

Jeremaia 8:10

“Tialima, eno te gasa bidi dabego te Juda dabego we me tǫ sagasomainogo ilaibao. Magi baso meni, tigidali we bidigo dwai sę haniani eyu, te doado bage hauwa sainu yali. Te olo bidi dabego me, te genuai bidi dabego me, te kolesaga wali pali. Te pris dabe me, profetgo me, te we bidi dabe tibo po ola mayu yai dao.

Amos 3:10

Genuai Bidigo te tama po wali, “Te Samaria we bidi augwaligo te nai wi siyu, hwįbo kolesaga eyu, te nai hauwa selama, te augwa bomai be dabe pągąnani. Augwa te doloba pai kolesaga me konebeo. Mu menio.

Maika 2:9

Dagego te eno hani dabego wilawe we dabe te augwa godolo homu ebo bede ela gudulai. Te dagego eno te augwaligo wai dabeba mani wiegi yai nogi te doloyu, te wai dabe dwai bidibo dao.

Maika 7:3

Augwaligo te dwai sę ebo kolesaga mu koneani. Te ofisa dabego me jas dabego te bidi dabeba i weyu, te augwaliba te mone menama, te po tų dolainu ebo dao. Augwaligo deli homu ebo dao. Te genuai nogi elalubo bidi dabego te jas dabeba te homu wei godolo ebo po obaso, te po tų doloyu, te jas dabego te bidi dabego wabo po wali peyu ebo dao.

Sefanaia 1:9

Te eno te we bidi augwali te bulu badu we bidigo lotu wabo tiwai ebo we bidi, me nai wi siyu, me bidi ela muyu ebo we bidi sese dene mayu, me te nai wi sai nai dabego augwa genuai bidigo be pągąniyu ebo bidi dabebolo dene mawaibao,” wali.

Sekaraia 5:4

Tigidali Bomo Elalubo Genuai Bidigo te po wali, agai te dwai bidi dolabo po toloyu, tama agai te nai wi siyu me tibo po weyu ebo bidi dabego be tomoba po ola tolaibao. Tama te po te bidi dabe augwa be tomode elaluyu, tama te bidi dabe dola silaibao,” wali.

Malakai 3:5

Tigidali Bomo Elalubo Genuai Bidigo te po wai, “Eno dagego kolesaga dagalainu asaibao,” wali. “Te polo tama eno te we sali tomode dolobo sę eyu, te pobi wabo bidi dabe po tų iliyu, te tibo po kotde pusuyu, te tonalubo bidi dabego te augwa sę bidi bugagia me abeligobeo, te we dabego tigidali doado bage sabo bidigo te muma sabo po weyu, te augwa bidi isai we dabego doado bage me siyu, te augwa aya isai wai dabego doado bage me sali, te bomai po boloyu te gasa tǫ kantridu asai bidi dabego nai me sali. Te tigidali bidi ena dologode me bidibeo, tama tibaso te eno augwali po tų ilaibao,” wai dao.

Matyu 23:13

“Dage te bomai po page ola mabo bidi dabe me, dage Farisi dabe me, hobede ya. Dageba te dwai sogo mu pedelaibao, dage tibo po wabo bage. Te Godigo we bidi tonalubo kolesaga tomoba pabo tų te dagego te we bidi augwaligo gesabidiba te tų palibo dao. Duga digi te tomoba me pabo meni, tama te we bidi augwali te tomoba painogo ebadi, te dagego augwali pabo tų palibo dao.

Dwagi Yai Gesi Po Lukgo Asęani 12:20

Tiali goli, Godigo te bidibolo te po wali, ‘Nage da, mu umawai bidi dao. Megi hulide tama nage isaibao. Nage isaide, mena bidigo naga tobade yogwaluali nai dabe tigidali saibawe?’” Jisasgo te po wali.

2 Timoti 6:9

Tiali goli te doado bage hauwa saio homu ebo bidi dabe augwali te buside bidibo uni kibu dabego te nai tugi painogo te denami odobo tiwai ebo dao. Tiali goli te kibu aga te dedagede tulaluyu isabo homu me konegobeo. Te moneba homu konebo bidi dabego homu te tiwai ebo dao. Te augwa homu te moneba dąų olama, tama augwaligo te haniani dwai kolesaga wali peyu, tama te homu kolesaga meni yai bidi tiwai bilibadi, te augwa digi dene mabo kolesagago augwali dąų wabo dao. Tama tiyu augwa digi dolama, tama augwali dwai mu hobedagia bidaibao.

Taitus 1:11

Tama augwaligo gasa bidi dabego mone masigi bomo elama sainogo eyu, tama augwaligo te ola masiąbo po ola mabo dao. Te usu meni. Tama tebogo augwaligo te we bidi hani meba tomode si bugulama, tama we bidi meba augwaligo Godigo po megi bugagia wali me pabo meni. Tama tibaso, te nago nigilibo tonalubo bidi dabe augwaligo te olo po ola mabo bagego pedauwali dąų wao.

2 Pita 2:14

Tama augwaligo gedugo te we dabe sibi sesemane sogo tonono eyu te penani yainogo, tama augwaligo te dwai kolesaga ebo tagalogobeo. Mu menio. Augwaligo te homu bomo meni yai bidi dabe augwali te sę emainogo homu begelama, tama augwaligo te dwai sęgę sabo kolesaga yai. Te augwaligo gasa bidigo nai sabo pesą ebo kolesaga konea sai dao. Tama Godigo te bidi dabe augwali mu dolaibao.

2 Pita 2:3

Tama te tibo po ola mabo bage augwaligo te gasa we bidi dabego nai sulama pesą elama mu sainogo ebo bidi dabe, tama augwaligo te dagego mone dabe bomonama sainogo tibo po hauwa dage dali waibao. Tiali goli polobadu mu Godigo augwali po tų ilama hagayabo te sisi yai elalubao. Tama augwali mu dolabo nai te sesemane sogo tonalubao.