Jeremaia 13:19 - Godigo dwagi yai po buku

¹⁹ ‘Augwaligo te taun dabe obo sunumi paliaibao, te tǫ distrik Negev te Juda pedai te saut badu elaluai, te augwali sunumi dayabo bidi meni yaibao. Magi baso meni, te boi bidi dabego te tigidali Juda selama, te gasa tǫ kantriba kalabus sę igi paibao.’”

Jeremaia 13:19 Iomraidhean Croise

Te Israel me Juda Hani Sigo Tuni Bidigo Po Elalubo Buku Si 25:21

Te Hamat hanigo tǫ, te Ripla hanude, tama te kingo te po wai, tama augwaligo te bidi dabe elama, isilao wali. Tama te Babilon hani bidi dabego e tama tiali, tama nosali te augwaligo te gasa Juda hani bidi dabe selasa pelama, te Juda tǫ tagalama, te Babilon buluba hadabu egi pali.

Tuni Bidi Dabego Po Elalubo Buku Deli 9:1

Augwaligo te Israel hani dabe tigidali nogi sisinani. Tama te nogi sisinama asęani buku nogi augwaligo e tama nogi ebo da, Te Israel Dabego King Dabego Po Buku wabo dao. Te Israel augwali te tǫ kantri Judade bidalu, te God tudiba muani, tama tibaso agai te Babilon dabego te augwali sagaselama, te tǫ kantri Babilonba kalabus sela pomainogo ilalio.

Jopgo Po Asęani Elalubo Buku 12:14

“Ma, te Godigo nai me togali da, te bidi me ma wadologobeo. Tama ma, Godigo bidi kalabusiba tagalali da, te bidi mego te kalabuside me sela sągobeo.

Jeremaia 17:26

Te we bidi dabego te tigidali tǫ kantri pedai taga soyu, te Genuai Bidi, eno beba ofa sela asaibao. Te Juda taun we bidi dabego, me te Jerusalem pąde, me te Benjamin hani tǫ bage me, te bulu du bagede bidibo bage me, te giliga degasa dulubo pedai dwasianu bulu du badu bidibo bage me, te Juda te saut pedai badu bidibo bage me, tigidali te enaba asaibao. Tama augwa te siaba tigidali domainogo ulubo ofa, me te gasa ofa dabe kibu hasa, me te wit ulubo ofa dabe, me te wiegi yai denami holomainogo ulubo ofa, me te enaba usu da wabo, te tama ofa dabe sesaibao.

Jeremaia 20:4

Tama Genuai Bidigo nage dali te tiwai po elalueibao, ‘Te eno dwai sę nageba pedalumainogo ilama, tama nage dali, te naga abagi dabe dali, te wi dwai mu yaibao. Te nago naga abagi dabe te boi bidi dabe aselama, elagasobo sueibao. Te eno Juda dabe tigidali te Babilon kingo nogoba mueibao. Te agai meba ela muyu, te meba sela pelama, te Babilonba kalabus igi paibao.

Jeremaia 24:1

Te Babilon king Nebukatnesargo te Jerusalem aiyaba elalubo si da, teda agai te Juda dabe Babilonba odasa palio. Agai te king Jehoiakimgo ogwa sali, aga te king Jehoiakin, aga gasa nogi me Jekonia. Tama agai te Juda genuai bidi dabe me, te tobage wiegi yai nai nigibo koneai bidi dabe me, sela pali. Tialima, te tudi badu nosali, Genuai Bidigo ena Jeremaiabolo ola mawai, te nade nai me deli ola mabo tiwai yali, tama te nade eno te basket wa side te ni kaya fik wai du dabe elalubo suali. Te basket wa si te Genuai Bidigo be sunumi pąde elalualio.

Jeremaia 28:4

Tama me eno te king Jehoiakin saibao, te Jehoiakimgo ogwa, te gasa Juda dabe te Babilonba kalabus igi pali bage me selama, tama eno augwali ma odasa asaibao. Magi baso meni, eno te Babilon kingo dage mageba muani ni nami pedai togwa sąwaibao. Ena Genuai Bidi, eno te po wai dao,’” te bidi Hananiago te po wali.

Jeremaia 32:44

Te bidi dabego tǫ abelama, te tǫ abelali dąų wabo bomo yai po asęaibao. Tama te bidi mebago gedude te augwa dąų wali po bebelama, te augwa dąį te mueibao. Te bidi dabego tǫ abelama, bidibolo mayu ebo te Benjamin hanigo tǫ me, te Jerusalem pąde tǫ me, Juda gasa taun dabe badu me, te bulu dude me, te Juda pedai saut badu me, te giliga degasa dulubo dwasianu bulu badu me, te tǫ abelama bidibolo mabo sę eyu yaibao. Te tama te sogo eno te Juda tǫ kantri bugagia ma bidimainu yaibao. Ena Genuai Bidigo, eno te po wai dao,” wali.

Jeremaia 33:13

Tama augwa sipsip nedaibao. Tesę te bulu dude elalubo taun dabede, me te dwasianu buludu dabede, me te tǫ pedai Negev te saut Juda badu eyu, tama augwa te sę Benjamin hanigo tǫde, me te Jerusalempąde elalubo bulude, me te tigidali Juda taunde, te sęyaibao. Te ena, Genuai Bidigo po dao,” wali.

Jeremaia 39:9

Te Nebusaradan, aga te Babilon ami dabego polalubo ofisa bidi te Jerusalemde bidali, agai te Jerusalemde bidaluali we bidi tigidali selama, te augwali Babilonba kalabus igi painu odasa pali. Te Jerusalem tagalama, agaba polobadu wi asali Juda dabe me selama, te agai augwali me te Babilonba kalabus igi peyu, odasa pai dao.

Jeremaia 52:27

te Hamat tǫba odasa pai. Te kingo po obaso, augwaligo te bidi dabe tede ela muai. Te Babilon dabego tama kolesaga elama, te nosali augwaligo te gasa Juda dabe selama, tama digibulu mu pelama, te Babilonba kalabus igibu sela pai dao.

Jeremaia 52:28

Te Nebukatnesargo kalabus igibu sela pali we bidi namba, e tiwai dao. Te kibu be 7 aga king bidali sogo, agai te 3,023 Juda we bidi sela pai dao.

Jeremaia 52:30

Te kibu be 23 aga te king bidali sogode, te polalubo ofisa bidi Nebusaradango te 745 Juda we bidi selama, te augwali kalabus igibu odasa pai. Te kalabus igi pali bage dabego namba e tiwai dao, te 4,600 mu dao.

Te We Bidi Dabego Jerusalem Hagede Gela Wali 1:3

Te boi bidi dabe augwaligo te Jerusalem pąde bidali Juda dabe dali dwai sę elama, augwali dene manio. Tama megi da, augwaligo te Juda dabe gasa kantriba kalabus elama, odasa palio. Te kantri Juda te meba Israel hani isąwai kantri tomode elalubo dao, tiali goli agai bugagia dulalubo meni dao. Te boi bidi dabego aga pobeasa pelama, aga bagua sai elaluai dao. Tiali goli, aga wi pabo usu meni yai dao. Tama augwaligo aga pageabi yai dao.

Sekaraia 7:7

Polobadu Genuai Bidigo te deli tiwai po naga te profet sibigo pedauwalidu pusai dao, te we bidi dabebolo. Agai te po te Jerusalem wiegi yai elaluyu, wiegi yai nai dabe hauwa elalubadi agai te po mawai dao. Tama te sogo te we bidi hauwa te Jerusalem pągąna peyu, me te Jerusalem bogo badu elaluali taun dabede, me te saut badu taun dabede me we bidi pągąyu, me giliga dega sabo badu te dwasianu bulu du dabede me te we bidi hauwa pągąyu yai dao.

Bomai Po 28:15

Tama Mosesgo po geninama weyu, te po wali, “Tiali goli, dagego Genuai Bidi dago Godigo po sela sąnama, tama dagego agai bomai po eno megi dagebolo mabo te po tigidali bugagia wali pisąma eyu da, teda e tama dwai sę dabe dageba pedelaibao,” wali.

Bomai Po 28:52

Tama augwaligo hwįnama, tama augwaligo dagego Genuai Bidi dago Godigo mani te hanu dabe tigidali dolama silaibao. Tama te hanu bomai obo dagego te duala sainogo nigali, te hanu obo dabe degaibao,” Mosesgo te po wali.

Josua 18:5

Augwaligo te tǫ a naga olama, me si te tama pedemainu yaibao. Te Judago hani augwali te saut badu te augwa sali tǫde bidiyu, tama te Josepgo hani augwali te not badu augwaligo sali tǫde bidiyu emainu yaibao.