Jeremaia 12:16 - Godigo dwagi yai po buku

¹⁶ Tama te sogo te gasa hani augwaligo te eno we bidi dabego kolesaga bugagia konea sabo sę yaibao. Polobadu te hani dabego eno we bidiba te god Bal nogide mu po waiyąo wabo po ola mawai. Tiali goli, te sogode te augwa digi eno nogide mu po dao waibao, te sesemane sogo bidada pabo Genuai Bidi dao. Te kolesaga augwaligo wali pobaso da, teda augwali me eno we bidi hani pedelaibao.

Jeremaia 12:16 Iomraidhean Croise

Solomon 1:8

Eno abagio, nage gasa sawi yai we mu da. Te nago ena suabo homu ebaso da, teda nago te sipsip dabego sągą pasalu wali poanao. Nago wali pobaso da, teda naga meme dabego tuabo wiegi yai nosai elalubo sueibao. Te nosai te sipsip tonalubo bidi dabego sel ugwa be pąde elalubao.

Aisaia 2:3

Te tigidali bulu badu we bidi hanigo te po waibao, “Asiąo. Da bulu du Saionba pinao, Genuai Bidigo bulu duba. Te Israel dabego Godigo beba pinao. Te agai dabolo dago emaina homu ebo te kolesaga ola momainu. Tama da aga digi sa muani sunumidu pogo o.” Augwaligo te tama po waibao. Magi baso meni, Genuai Bidigo bomai po te bulu du Saionde gagalasa, tama tigidali buluba paibao. Awe, Jerusalem te Genuai Bidi agai bulu elaluama, tama agai po we bidibolo ola mabo digi elaluaibao.

Aisaia 42:6

“Ena Genuai Bidigo digi, eno nage i olama, te eno doloba pai kolesaga ola momainu yai. Te nage eno ugwaba pogalu bugagia tonalueibao. Te nagede naga, te eno te Israel hani we bidi dali bomai po dąų walaibao. Tama nage eno te Israel hani isąwai hani dabego ula tiwai ilama, bidaibao.

Aisaia 45:23

Ena Genuai Bidi, ena nogide digi daide ugwadu mu po obao, te eno pedauwalide wali po te me hasegelegobeo. Eno te tama po wali, te tǫde tigidali we bidi enaba aselama, te enaba kidu sugunagasaibao, te augwali tigidaligo ena dologode naga bidabo po dąų waibao, te po wai.

Aisaia 49:6

“Hasiabolo eno nageba te boi bidi dabego ela musiąwai Jekopgo hani dabe ma hodolabo sę mawai. Eno te Israel bage meba hagea sai dao, tama eno nageba te augwali sisinama, enaba odasa asabo sę mawai dao. Tialima, te sę ebogo te nago bomogo dęą me sogobeo. Eno te gasa sę me mawaibao. Eno nage te Israel hani isąwai we bidi hani tigidaligo sole ula tiwai nigaibao. Awe, nago te eno te tigidali bulu tǫ habu we bidi ma dobola sabo sę yaibao,” te po wali.

Aisaia 65:16

Tama te tigidali tǫ habu pedai badude, te bidi dabego gedu haluasa po enaba weyu, te mu po naga wabo God da po weyu, te augwali wiegi yai bugagia ilao po enaba hanalueibao. Te bidi dabego augwa po dąų walabo homu elama, augwa te eno nogi delide naga te mu po dao waibao. Tama augwa te polobadu elaluali haliga sęgę me dwai sę yali dabe te homu kone gegeda palaibao, te ena, Genuai Bidi, te eno augwa te polobadu yali dwai sę dabeba homu kone mu gegeda palaibao,” wali.

Jeremaia 16:19

Genuai Bidi, nago ena dąų walama, ena obogo bagualubao, te nago ena te sęgę ebo sogo tau sobao. Te tigidali digibulu tǫ habu we bidi hani te nageba asama, augwa te tiwai po waibao, “Te dago wąį nǫų dabego tibo god, augwali te mu god menio. Augwali te olo bage tiwai elalu, te da tau sabo usu me ebe dao.

Jeremaia 18:8

Tialima, te hani we bidigo augwa te dwai kolesaga ebo tagalobaso da, teda eno homu me hasegelama, tama eno te dwai kolesaga augwaliba yaibao wali te sę eno me ebo meni dao.

Jeremaia 3:17

Te sogo te we bidi dabego te tiwai po waibao, ‘Jerusalem digi te Genuai Bidigo dugabo sia sai tiwai dao,’ waibao. Te tigidali kantri tǫde bidibo hani we bidi te Jerusalemba asiyu, te enaba genuai nogi magasaibao. Te munu ma augwa te hagoma isiąma, te augwa homude digi ebo dwai kolesaga wali munu me pelamu dao,” wali.

Jeremaia 4:2

“Te dagego wabo po dąų waliyu, te tama po obao, ‘Te sesemane sogo bidada pabo Genuai Bidigo nogide mu da,’ po wainogo eyu da, teda dagego mu po tama naga weyu, te wiegi yai doloba pai kolesaga wali peyu, te po wao. Te dagego tama tibaso da, teda gasa hani dabego enaba hanalu, te eno augwaliba wiegi yai sę ebaso, te augwaligo enaba genuai nogi mawaibao,” te po wai.

Jeremaia 5:2

“Te dagego bomo yai po me deli dąų weyu, po wabo sogo, dagego Genuai Bidi, eno nogide mu po obao po wabo dao. Tiali goli, dagego tibo po naga weyu, te odolali po wabo dao,” wali.

Jeremaia 5:7

Genuai Bidigo po Jerusalemde elalu te tiwai po wali, “Eno nago dwai sę sela sągobeo, magi baso meni, te nago we bidi dabego ena tudiba munama, tama te mu nai ąǫ isąwai tibo god wali pai. Tama augwaligo te tibo godigo nogide bomai po dąų wai dao. Eno te we bidi dabeba nai hauwa mani, tiali goli, augwaligo ena tagalama, te tibo god wali pobao, te bidigo aga we tagalama, te penani ebo wego beba pabo tiwai ebo dao.

Jeremaia 6:16

Genuai Bidigo aga we bidi dabeba e tama po wai, “Te dagego mena sunumi wali pabo homu ebaso da, te bugagia homu kone palao. Dagego te duga wąį nǫų dabego wali te wiegi yai sunumi gegao. Te dagego me te sunumi wali pobaso, tama te nai dabego dageba sęgę masiąyu, te duga haliga te toma nomainu ilao,” wali. Tialima, te Israel dabego te po wai, “Dago te sunumi wali me pogobeo,” wali.

Sefanaia 1:5

Te eno te we bidi augwali augwa wiegi yai dolaba pai be peduba pelama, tama augwaligo te polua, me giliga, me hǫ dabeba lotu wabo we bidi me dolaibao. Mu tama, we bidi hauwa augwaligo enaba lotu po weyu, e tama po wabo, ‘Mu tamao, dago Genuai Bidi wali pobao,’ po wabo dao. Tiali goli, augwaligo tibo god Molekba lotu wagi peyu, me augwaligo te po ‘Te mu tama,’ po wabo dao, ‘dago god Molek wali pobao,’ po wabo dao. Tialima, eno augwali dolaibao.

Sekaraia 1:6

Tiali goli eno po te profet sibi dabego pedauwalidu eno pedelaibao wali te sę dabe duga wąį dabeba polo pedelai dao. Augwaligo eno augwalibolo mani te po wali pai menio. Tama tialigo augwali te dolali dao. Tama nosali augwali homu begelama augwaligo e tama po wai dao, ‘God, Tigidali Bomo Elalubo Genuai Bidi, agai dabolo wali gilama tama agai dabolo dene mawai dao. Te dena dagede tama dao,’ augwaligo te po wali,” God Genuai Bidigo te po wai.

Sekaraia 2:11

“Tama te sogo kantri hauwa we bidi augwali Genuai Bidiba aselama, tama augwali eno we bidi bidaibao. Tama ena dage tomode bidaibao, tama dagego koneaibao, ena aga digi dage tomoba taga palama, dage tomode bidibo koneaibao.

Polgo Po Pas Rom Dabeba Asęani 11:17

Tama augwali te gide elalubo ni oliv tiwai bidiyu, tama Godigo te ni oliv nologo meba dwali togolama sela sąnama, tama agai dage olo ni oliv nologo te bulude elalubadi selama, tama dage te gide elalubo ni olivgo nologo togwali pesagede wadolali. Tama dagego augwali hasegelama, tama megi dage bugagia bidibao. Tama dage te elalubo dwagi yai ni olivba wadolobaso, tama dage dali te ni aga nologo mu dali te dagego te ni oliv pedalidu asobo ąįgo ili sabo dao, te nigo bomo me dagego sabo dao.

Polgo Po Pas Rom Dabeba Asęani 14:11

Magu meni, te Godigo po bukude asęani po tiwai yaibao, te po asęani, “Genuai Bidigo te po wai dao: ‘Ena mu tama bidibo, ena isigobeo. Te tiwai eno megi wabo po me te mu usu nagasaibao. Te tigidali we bidigo ena pagede kidu sugunama, tama tigidali bidigo God po hanilama weyu aga God mu da waibao.’”

1 Korin 3:9

Magi baso meni, da si te Godigo deli sę naga ebo sę bidi dao, tama dage te Godigo gi tiwai dao. Tama dage te Godigo be tiwai, aga te be sędu bidibao.

Josua 23:7

Tama te dage tomode bidalubo gasa we bidi hani dali deliba me sisinamuo, tama dagego te augwaligo tibo god nogi te me nogilamuo, tama dagego te mu po dąų walainu te augwali nogi me nogi igio. Tama dagego te kidu sugunama, tama te augwaligo tibo godiba lotu po me wagio. Menio!

Rutgo Po Elalubo Buku 3:13

Tama megi hulide nage ede bidagameo, tama do kigamu ena te bidi pageba pelama, agai homu kolesaga te eno koneaibao. Ma, agai nage tonaluainogo ebaso da, te usu dao. Tiali goli, aga hagela homu ebaso da, teda eno nage tonaluaibao. Eno po te mu po naga dao. Genuai Bidigo te eno wabo po odobao. Tialima, megi da, nage ma piagameo,” wali.