Jeremaia 1:13 - Godigo dwagi yai po buku

¹³ Tama Genuai Bidigo enaba te tiwai po ma hanalu wali, “Nago magi nai subawe?” Tama eno te po wai, “Eno te sene sospen me deli te not badu kulugulu weyu ebo subao. Tama te sospen sene te saut pedai badu gea palainu ebao,” wali.

Jeremaia 1:13 Iomraidhean Croise

Tigidali Nai Gagalama Nigali Side 41:32

Godigo te sę yabo te homugo konea selama, tama mu dąų walali. Tama agai nago aga dąų walali homu konemainogo iliyu, nago na si sogo emainu yali. Tama te sesabi elama bidisiąbadi, te pąde sogo tama Godigo te sę pedalumainu yaibao,” wali.

Aisaia 55:11

Te tiwai naga eno po me te enaba odolali ma asogobeo. Menio. Agai te eno wali po tiwai gilama pedelaibao. Te agai eno homugo pedalumainogo homu yali sę pedalubo dao.”

Jeremaia 24:3

Tama Genuai Bidigo enabolo te tiwai po wali, “Jeremaia, nago magi nai sualiwe?” Tama eno te tiwai po wei ponani, “Eno te ni kaya fik du wai sualio. Te wiegi yai fik du te wiegi yai mu elalubao, te kaya fik du dolali te mu dwalio, te bidigo tuabo usu egobeo,” wali.

Esekiel 11:3

Augwaligo te tiwai po wabo dao, ‘Da te wiegi yai we bidi da, tialima dago te be dabe sęnama, te dena e taunde bugagia dugulalu, te wiegi yai kibu mi sene tomode elalubo tiwai yalio.’ Augwaligo te tama po wabo dao.

Esekiel 11:7

“Tama tibaso, ena God Genuai Bidi, eno dageba te tiwai po obao. Mu tama, te e taun te sene me deli tiwai da, tiali goli dage te wiegi yai kibu mi tiwai elalubeo. Menio. Te wiegi yai mi da, te dagego ela muai we bidi dabe tama dao. Tama dage da, te eno dage te taun bulu badu ela gudulaibao.

Esekiel 12:28

Tialima, ena God Genuai Bidi, eno te Israel dabe augwaligo po te tiwai wei ponaibao,” wali, “‘Te eno ma tonalubo sę me egobeo. Eno dageba te po wali nai augwali megi naga eno te sę yaibao.’ Ena God Genuai Bidigo, eno te po wai dao,” wali.

Amos 8:2

Te Genuai Bidigo enabolo te tiwai hanalu wali, “Amos, nago magi nai sualiwe?” Eno te tiwai po agabolo wali, “Eno te basket wa me delide haniani tau yai nedu du hauwa pągąnalubo sualio,” wali. Tialima, Genuai Bidigo enabolo te tiwai po ma wali, “Te eno ena we bidi Israel dabe dolabo sogo, te bidi dabego te gide tau inawai nai dabe tuabo sogo pedalubo tiwai yalio. Megi da, te eno augwaliba dwai dene mawaibao. Eno te ena homu munu ma hasegeligobeo.

Sekaraia 4:2

Tama agai enabolo e tama po hanalu wali, “Nago magi nai subawe?” Tama eno te po wali, “Eno gol ni dage wel muabo dis ugwadu daide elalubo eno subao. Tama nogo a naga olama me badu nogo si, te 7 gol lam ni dage dagana sai elalubo subao. Tama tigidali lam deli deligo te disde wel sabo paip elalubao.