Jems 5:11 - Godigo dwagi yai po buku

¹¹ Tama te tiwai augwaligo te sęgę polobadu bugagia tolai baso, megi dago tama po wabo dao: “Te homu kolesaga dąų olama te sęgę tolali bidi dabe, te bidi megi augwaligo homu wiegi yai eyu bidibao.” Tama gasagi yai bidi me agai nogi Jop, agai yali sę po dagego odai. Te genuai sęgę hauwa te agabolo pedalali digi te agai bomo eyu dolalu, te sęgę te aiyaba elaluai. Tama nosali Genuai Bidigo dwagi yai kolesaga aga dali yai, te me dagego koneai. Tama te bidi Jopde yali sę po odama, tama dago koneani, Genuai Bidi agai da hobede mu eyu, tama sesemane sogo agai da homu dene elama, da agai dwagi yai homu eyu, da olo mu tau sabo dao.

Jems 5:11 Iomraidhean Croise

Tuni Bidi Dabego Po Elalubo Buku Deli 21:13

Tialima Devitgo Gatba te tama po wali, “Nago enabolo te wali po dabede homu sęgę mu ebao. Tama tibaso, te Genuai Bidi aga digi enabolo emainu sula tagalao, magi baso meni, aga te dade homu dene eyu tau sabo wiegi yai kolesaga sesemane sogo ebo God da. Tialima eno homugo te bidi dabego da dolobo te hagela homu ebao,” wali.

Tuni Bidi Dabego Po Elalubo Buku Si 30:9

Dagego koneani, te boi bidi dabego dage aiyaba elaluama, tama dagego hani meba kalabus elama, augwa buluba odasa pai dao. Tiali goli dage Genuai Bidiba ma asiyu da, teda agai te boi bidi dabego dagego te hani dabe hobede emainu ilama, tama augwaligo te dagego hani ma tagala palama duga tǫba ma asaibao. Genuai Bidi dago God aga te hobede iyu homu nagame ebo God dao. Tialima dagego homu begelama agaba ma asali da, teda agai dage ma selama, tama agai dage tudi ma ola magobeo,” te po asęna tama tolali.

Nehemia 9:17

Tama augwaligo nago po wali pabo hagela yali. Te nago augwali tau selama, te bomai sę genuai tigidali yali te augwaligo homu konesiąyu gegeda palali. Tama augwali hagoma mu elama, tama augwa te tobolu bidi me deli nigilama, te augwa kalabus sę yali Isip tǫba ma odasa pomainu yali. Tiali goli, God, nago da tǫde we bidigo sęgę sela sąbo dao. Tama nago da godolo geninama eyu, tama daba wiegi yai sę mu ebo da. Tama nago haliga sębę polo me egobeo. Menio. Nago te olo mu tau sabo wiegi yai homu kolesaga te umabo me elalu, tama tiyu nago dago wąį nǫų dabe tudiba me mubeo.”

Nehemia 9:31

Tiali goli, nago olo tau sabo wiegi yai homu kolesaga te genuai mu elalubo, tama tiyu nago augwali tudiba me musąma, tama nago augwali mu dolomainu me ebeo. God, nage te olo mu tau sabo wiegi yai homu kolesaga me homu dene ebo page bidi mu da, tama nago da wei eyu, godolo mu ebo dao.”

Jopgo Po Asęani Elalubo Buku 1:1

Te sia ge asobo badu, te tǫ kantri nogi Us, tede bidi me deli bidali, aga nogi Jop dao. Te bidi Jop aga Godigo gedude dwagi yai doloba pai bidi mu bidai, dwai kolesaga mu meni yai dao. Aga lotu po weyu, Godigo po dologode naga biliyu, tama agai po wali peyu yai. Tama tiyu, agai dwai sę ebo hagela homu yai.

Jopgo Po Asęani Elalubo Buku 1:2

Aga wego ogwa nogo a naga olama, me badu nogo si ogwa ame nai, wegi sela ame nai dao.

Jopgo Po Asęani Elalubo Buku 2:10

Tiali goli, Jopgo wei ponoyu, te po wali, “Nago po te dwai kolesaga yai wego wabo ąǫ te ebao. Ma, dago dwagi yai te Godigo da dwagi yai nai dabe mabode dwagi yai homu ebo dao. Te magi baso dago Godigo dabolo te dwai sęgę mabode dwagi yai homu egobewe?” te po aga webolo hanalu wali. Mu tama, te dwai sęgęgo Jop pedelali goli, agai Godibolo dwai po me deli wabeo.

Jopgo Po Asęani Elalubo Buku 23:10

Tiali goli, Godigo ena bilibo dabe tigidali mu koneanio. Ma, aga ena usu siyu da, teda agai ena tonobo da wiegi yai gol masigi tonobo tiwai yaibao.

Godigo Nogi Ugwaba Sabo Tęąbi Po Wabo Buku Dabe 103:13

Ayago aga wai dabe hobede ebo dao. Tiwai Genuai Bidigo aga dali wi ebo we bidi augwali hobede ebo dao.

Godigo Nogi Ugwaba Sabo Tęąbi Po Wabo Buku Dabe 103:8

Genuai Bidi agai dwagi yai homu eyu, da hobede mu elama, olo tau sabo dao. Agai sębę polo isąma, tama agai da sesemane godolo mu ebo dao.

Godigo Nogi Ugwaba Sabo Tęąbi Po Wabo Buku Dabe 116:5

Genuai Bidigo te olo tau sabo wiegi yai kolesaga elama, tama dabolo wiegi yai sę ebao. Te dena God agai da homu dene eyu, tau sabo dao.

Godigo Nogi Ugwaba Sabo Tęąbi Po Wabo Buku Dabe 119:132

Nage aselama, te nago homu dene eyu, tau sabo kolesaga enabolo yao. Te nage godolo homu ebo we bidi tigidaliba te tiwai sę nago ebo dao.

Godigo Nogi Ugwaba Sabo Tęąbi Po Wabo Buku Dabe 145:8

Genuai Bidigo da godolo mu eyu, homu dene eyu, tama da olo tau sabo sę ebo dao. Agai wado po polo wasiąma, tama sesemane sogo agai da wei mu ebo dao.

Godigo Nogi Ugwaba Sabo Tęąbi Po Wabo Buku Dabe 37:37

Nago te magi dwai sę me deli isąwai bidide homu kone paliyu, tama te doloba pai bidi suabo homu yao. Te gasa we bidi dabe dali dua digi bidibo bidi yaibaso da, teda aga hani te sesemane sogo bidaibao.

Godigo Nogi Ugwaba Sabo Tęąbi Po Wabo Buku Dabe 51:1

God, nage hobede ebo page bidi, nago ena olo mabo sęgo ena tau sao. Nago olo mabo sę hauwa mu elaluai, tama eno homugo nago eno dwai kolesaga tigidali sela sąyao.

Godigo Nogi Ugwaba Sabo Tęąbi Po Wabo Buku Dabe 78:38

Tiali goli, Godigo te olo tau mabo wiegi yai kolesaga augwaliba elama, tama augwaligo te dwai sęgę sela sąwani, tama agai augwali me dolobeo. Hauwa sogo te agai wado yali, te palia selama elalu, tama augwaliba haliga sębę me ebeo.

Godigo Nogi Ugwaba Sabo Tęąbi Po Wabo Buku Dabe 86:15

Tiali goli, Genuai Bidi, nagede te homu dene ebo, me olo tau mabo wiegi yai kolesaga pągąnalubao, tama nage da, te bobobage guni yai bidi dao. Nago da wei mu eyu, tama nago homugo da dali kęą mu pai dao.

Godigo Nogi Ugwaba Sabo Tęąbi Po Wabo Buku Dabe 86:5

Genuai Bidi, nago te wiegi yai sę mu elama, tama nago eno dwai sęgę sela sąbo dao. Nago te nageba gedu haluasa po wabo we bidi tigidali wei mu eyu, tama naga homugo augwali dali kęą pai dao.

Godigo Nogi Ugwaba Sabo Tęąbi Po Wabo Buku Dabe 94:12

Genuai Bidi, nago te bidi me deli dodolomainu eyu, nago bomo yai po te bidi ola mayu da, te bidi aga dwagi yai homu emainao.

Ma Dobola Sali 34:6

Tama aga te Moses pąba pelama ela soali, tama i weyu, te po wai, “Ena Genuai Bidi, ena Genuai Bidi dao. Ena God, tama ena te olo tau siyu mabo wiegi yai kolesaga badi, te homu dene ebo page bidi dao. Tama eno sębę polo me egobeo. Eno tigidali we bidi godolo mu elama, tama eno ena wali po tigidali wali pabo dao.

Kolesaga Koneai Bidigo Pusali Po Elalubo Buku 7:8

Te bidi mego sę me deli hodolobaso da, teda te wiegi yai kolesaga ebao. Tialima, agai te yali sę siminibaso da, teda te sę uganu ela holali dao. Te magi nai pedalubo bugagia tonalubo bidigo ebo kolesagago te hagoma homu ebo kolesaga aiyaba elalubo dao.

Aisaia 63:7

Te eno Genuai Bidigo wiegi yai olo mu tau sabo kolesaga po pusubao. Te eno aga nogi ugwaba siyu, te agai da tau siyu, wiegi yai kolesaga hauwa yali po pusaibao. Awe, te aga genuai olo mu tau sabo wiegi yai kolesaga, me homu dene ebogo, agai te Israel haniba wiegi yai sę mu yalio.

Aisaia 63:9

Te augwali dene me sęgę tolali sogo, Genuai Bidi me augwali dali te dene me sęgę tolali. Te agai haliga augwalide homu dene ebaso, te agai augwaliba te olo mu tau sabo wiegi yai kolesaga yali, tama aga digi te mobo bidi ensel tiwai pedelama, te augwali ma sali. Te tobage sogo sesabi mu elama, te agai augwali tolalu, te augwali bugagia mu tonaluai dao.

Te We Bidi Dabego Jerusalem Hagede Gela Wali 3:22

Tigidali sogo Genuai Bidigo da homu dene eyu, tau sabo sę elama, tama agai daba homugo kęą peyu, da godolo mu ebo dao. Tama agai te kolesaga munu me siligobeo.

Daniel 9:9

Dago nago po sela sąwani, tiali goli nage te olo mu tau mabo wiegi yai kolesaga elalubo God, tama nago dago dwai sę yali sęgę sela sąbo dao.

Joel 2:13

Te duga homu dene ebo ola mayu, te dagego ugwa dabe olodali pisagimio. Te duga haligade digi te duga yali dwai sęde homu dene mu yao,” Genuai Bidigo te po wali. Dage te Godiba ma asiyu, te dena Genuai Bidi dao. Agade te olo mu tau sabo wiegi yai pemene ebo homu kolesaga pągąnalubao, te dade wiegi yai sę ebao. Godigo dabolo te dua dua eyu, sębę polo egobeo, te da sesemane sogo godolo mu ebao. Sesemane sogo agai dago dwai sęgę sela sąyabo sisi idu, te dabolo dwai dene ilabo homu ebe dao.

Jona 4:2

Tama agai Genuai Bidibolo gedu haluasa po weyu, te po wai, “Genuai Bidio, nago eno po odao. Eno bulu tagalama, e buluba asisiąbadi, tama eno koneani, te nago tama tiaibao naga wai. Tama ena wi peyu, tama ena te tǫ Tarsis teba painu yai. Eno koneani, nage te homu dene elama, olo tau sabo dwagi yai kolesaga ebo God da. Nago sębę polo me egobeo. Menio. Nago dade homu dene genilama mu ebao. Nago homu kolesaga hasegelama, tama nago te bidi dwai ebo wei me ponobeo.

Maika 7:18

Genuai Bidi, te god me deli nage tiwai me menio. Nago te naga we bidi dabe, te augwali kalabus igi peyu, meba ma asali bage, te augwaligo sęgę nago sela sądubadi gebao. Nago wado po wabo homu sębę te sesemane me elaludubeo. Menio. Sesemane sogo nago wiegi yai pemene eyu, te da godolo mu eyu, tau sabo dao.

Israel Hanigo Namba 14:18

‘Ena Genuai Bidi, eno sębę polo me ebo menio. Tama eno te we bidi godolo eyu, tama eno ena po tigidali sogo wali peyu ebo dao. Tama eno augwali dwai sę tigidali sela sąyu, me eno augwaligo hagoma homu ebo eno sela sąyu, tama ebo dao. Tiali goli, eno te dwai sę ebo we bidi dene iliyu, me eno te wai dabe me dene iliyu, me agai wąį wai dabe dene iliyu ela pelama, te namba 3 haniba saboligi peyu, me namba 4 haniba saboligi peyu, tama yaibao, te nosali pedalobo hanide.’ Nago tama po wai dao.

Matyu 10:22

Tama tigidali we bidigo dwai homu mu dage dali yaibao. Magi basowe, dage eno hani bidi mu bidibaso tiaibao. Tiali goli, te bodolu muani sogo tonaluyu bomonama bidibo bidi, teda te bidi aga te Godigo ma dobola siyu, tama te dwagi yai madiba muaibao.

Dwagi Yai Gesi Po Lukgo Asęani 1:50

Te God agai po tų sisu pabo we bidibolo agai olo tau sabo sę me, te iba bidada pabo bidigo ogwago ogwa dabego me, agai po tų sisu pidubaso da, agai tama tede piduabo tolai dao. Agai nogogo bomai sę yai dao.

Dwagi Yai Gesi Po Lukgo Asęani 11:10

Magi baso meni. Tigidali bidigo gedu haluasa po God dali hanalu wabo bidi dabe, augwaligo te nai saibao. Te nai gegebo sę ebo bidi, agai te nai sueibao. Tama te be tųba elebo bidi, teda Godigo te bidibolo tų dalobo dao,” Jisasgo augwalibolo te po wai.

Dwagi Yai Gesi Po Lukgo Asęani 6:36

Duga Ayago we bidi hobede elama, tau sabogia, dagego me we bidi hobede elama, tau siąo,” Jisasgo te po wali.

Polgo Po Pas Rom Dabeba Asęani 2:4

Te ma, nago e homu ebawe, “Te Godigo ena wiegi yai bugagia iliyu, tama ena bobobage sogo tonaluyu, tama agai te dwai sę ebo wei enabolo polo me ponogobeo.” Te homu egio. Te Godigo wiegi yai polo wei ponosiąbo kolesaga ebode, te nago homugo te olo nai tiwai da, te homu ebawe? Godigo homugo nage homu begelemainogo, tama agai dwagi yai kolesaga naga nagebolo eyu tonalubo dao. Te kolesaga page nago konebewe?

Efesus 1:6

Tama Godigo aga ogwa Jisasde dwagi yai homu eyu, tama da aga ogwade wadolo baso, tama agai da dali wiegi yai homu ilibo sę yai dao. Tama God agai da olo mu tau siyu agai te genuai sę ebaso, te dago God aga ula yai bomo elalubo nogi ugwaba sao.

Efesus 2:4

Mu tama, dago yali dwai kolesagago da ela munama, tama da isai bidi tiwai bidibo ąǫ eyu bidai. Tama da te tiwai bidaluai goli, Godigo da dali dwagi yai homu elama, tama da godolo genuai mu yali. Tama tibaso, agai da dali homu dene genuai mu eyu, da tau sabo homu mu yai. Tama eyu, agai da Kraisba wadolama, da ma hodolai, te da ma bidimainogo yai. Tama tiyu, te Godigo da olo mu tau sabo wiegi yai kolesagago naga agai dage ma dobola sai dao.

Hibru 10:39

Tiali goli da te ibaba kila selama te hagayabo we bidi te me tegobeo. Menio. Da te konealubo po dąų wabo we bidi hani dao, tama God agai da ma dobola sabo dao.

Hibru 3:14

Magi baso meni. Polobadu dago Godide konealubo po dąų wali, teda te konealubo po megi me dago bugagia dąų weyu, teda da isiboba usu nigi paibao. Dago tama tiyu da, teda da te Krais dali wadolama, tama sę deli naga aga dali hodobo eyu tama bidaibao.

Hibru 3:6

Tiali goli Krais aga da te Godigo Ogwa, tama agai da te Godigo hani augwali tonaluyu tama te tobolu bidi bidibo sę elaluyu, tama agai me te sęde Godide homu kęą pai bidi bidibao. Tama tibaso, agai nogigo te Mosesgo nogi aiyaba elalubo dao. Tama sesemane sogo dago konealubo po dąų weyu tama wi isąyu tama dago wiegi yai homu pemene elama tama Genuai Bidi naga tonaluyu da, teda da me te Godigo hani mu bidaibao, te da agai be tiwai elaluaibao.

Jems 1:12

Niwai bidi me aga dali te dwai sę yanama sinayu bomo ebadi tama te bidigo dwai sę emainogo te bidi me deligo te dwai sę yao po weyu da, te bidigo te sę isiąma, te bidi aga bomo elama te dwai sę aiyaba elalubaso, te tiwai bidi aga dwagi yai homu eyu bidaibao. Magi baso meni. Agai te dwai sę usu sabo sogo aiyaba elaluama, tama Godigo aga bidabo ula mawaibao. Godigo te po polobadu wai dao, “Niwai bidi agai ena dali dwagi yai homu eyu, godolo mu ebo bidi agabolo te bidabo ula eno mawaibao,” te po wai dao.

Jems 1:2

Eno ama dedeo, haniani sęgę dagebolo pedalobaso da, teda dwagi yai homu yao.

1 Pita 1:13

Te God agai dage dali te sę yaligo da, te bidi me sę yai hagede aga ugwa sugwa sabo tiwai, dagego duga homu bugagia dodola selama dąų wao. Tama dage deli deli duga digi bugagia tonaluao, te homu kęnai we bidi bidao. Tama te Jisas Krais aga asobo hanilabo sogo agai dagebolo te wiegi yai olo tau sabo sę mawaibao. Dagego tede duga homu bugagia dąų olama, dwagi yai homu eyu tonaluao.

1 Pita 3:14

Tialima dagego te doloba pai sę yai goli te gasa bidi dabe augwaligo dage dene me sogo mayu da, teda God agai dage dali dwagi yai homu eyu dwagi yai kolesaga dage dali yaibao. Tama tibaso, dage augwalide wi egio, te augwaligo dage dali ebo sęde me dage moni homu egimio.

2 Pita 2:9

Tama te polobadu yali sę pode dago koneai, Godigo te we bidigo ebo dwai sę wei ponobo konealigo da, teda e me dago koneani, te God wali pabo we bidi augwalibolo te usu sabo sę pedalobaso da, teda Genuai Bidigo augwali te sęde ma dobola sainogo koneama tama tiaibao. Tama agai te dwai bidi dabego ebo kolesaga me koneyu, tama te dwai dene wei augwaliba ponobo, te me agai konebao. Tama koneyu, agai te po tų yabo sogo tonalubadi augwali dene mabo dao.