Jems 4:8 - Godigo dwagi yai po buku

⁸ Tama tiyu, dage God pąba mu peyu tibaso da, aga dage pąba mu aselama, bidaibao. Tama dage te dwai sę me sogo me sogo ebo bidi dabe, duga nogogo dwai sę ebo tagalama, dwagi yai sę naga yao, te bidigo nogo ąįde telabo tiwai te meda meniama dwagi yai tiwai yao. Dagego te Godigo po wabo odobo me te tǫde kolesaga ebo te homu si elalubo, te dwai homu ebo kolesaga dagego homude elalubo te sela sąyao, homu deli naga eyu bidao.

Jems 4:8 Iomraidhean Croise

Tigidali Nai Gagalama Nigali Side 18:23

Tama Abraham te Yawe pąba pelama, tama agai Yawebolo tama po hanalu wai, “Te mu tama, nago te dwagi yai bidi dabe te dwai sę yali bidi dabe dali si, augwali dolomainu yaibawe?

Tuni Bidi Dabego Po Elalubo Buku Deli 28:9

“Tialima nage Solomon, eno ogwa da, eno te tiwai bomai po nageba obao. Nago homu kolesaga deli naga elaluao, te naga ayago God dologode bidao. Te nago agai homu wali pabo sę bomo mu yao. Nago te tiwai yao, magi baso meni, Genuai Bidigo dago homude magi homu te tigidali agai koneaibao. Te nago agai godolo yabo kolesaga wali pabo sę bomo ebo kolesaga sobaso da, teda te nago aga bugagia konemainu yaibao. Tiali goli nago aga tudiba mubaso da, teda agai nage sela sąnama, te sesemane sogo agai nage tudiba mueibao.

Tuni Bidi Dabego Po Elalubo Buku Si 15:2

Tama king Asa te Jerusalemba ma asobadi, te Asaria aga tiąba pelama, tama agabolo e tama po wali, “King Asa, me tigidali Juda dabe, me tigidali Benjamin hani, dagego odiąo. Tialima dage Genuai Bidi dali pąde mu bidiyu da, teda aga dage dali pąde mu bidaibao. Ma, dagego aga gegebo sę iyu da, teda dage aga pąba mu asobo usu yaibao. Tiali goli, dagego aga tudi ola mayu da, teda agai dage tudi ola mawaibao.

Jopgo Po Asęani Elalubo Buku 16:17

Eno dwai sę me isąbadi, tiali goli te sęgę dabe eno tigi olo dali mu pedalali. Eno gasa bidi dabe dali dwai sę me ebeo. Tama me ma, eno gedu haluasa po me, ena bilali me, God aga gedude mu elalubadi goli da.” Jopgo te po wali.

Jopgo Po Asęani Elalubo Buku 17:9

Tiali goli, tagala. Te doloba pai bidi dabego augwa dwagi yai kolesaga tagalogobeo. Menio. Augwa doloba pai kolesaga naga yainu bomo mu yaibao,” wali.

Jopgo Po Asęani Elalubo Buku 9:30

Ma, eno dwagi yai sobu selama, dwagi yai meda meni yai węba wę paugi pelama, nago gedude dwai meda menia pai pedaluyu da,

Godigo Nogi Ugwaba Sabo Tęąbi Po Wabo Buku Dabe 119:113

Nage wali paibao weyu, tibo po wabo bidi dabe te eno godolo me egobeo, tiali goli, eno nago bomo yai po wali pabo homu eyu, godolo ebao.

Godigo Nogi Ugwaba Sabo Tęąbi Po Wabo Buku Dabe 145:18

Tigidali we bidigo homu agaba mu munama, i weyu da, teda aga augwali pąde bidibo dao.

Godigo Nogi Ugwaba Sabo Tęąbi Po Wabo Buku Dabe 18:20

Eno te doloba pai kolesaga wali pobaso, tama Godigo wiegi yai sę enaba bugagia yai. Eno dwai me deli ebeo, tama tiyu, Godigo wiegi yai sę enaba mawai dao.

Godigo Nogi Ugwaba Sabo Tęąbi Po Wabo Buku Dabe 24:4

Dwai sę isąwai bidi, tama agai homu meda meni yai dwagi yai. Tibo god dalibolo lotu po wasiąwai bidi, tama bidigo gasa bidi tibo dąų wabo po me ola masiąwai bidi. Tiwai bidi aga te usu yaibao.

Godigo Nogi Ugwaba Sabo Tęąbi Po Wabo Buku Dabe 26:6

Genuai Bidi, eno nogo wę telayu, te eno dwai sę me yali menibaso, te nageba ola mayu tiali. Tama eno nago alta bagulubo sę eyu, tama eno nageba lotu po wabo dao.

Godigo Nogi Ugwaba Sabo Tęąbi Po Wabo Buku Dabe 51:10

God, nago eno homu kolesaga tomode meda meni yai dwagi yai gesi kolesaga ilibo sę ma yao. Awe, ena nage dali homugo kęą pai bidi pedalumainu yao.

Godigo Nogi Ugwaba Sabo Tęąbi Po Wabo Buku Dabe 73:13

Ena bugagia tonalubaso, tama eno haliga te wiegi yai elaluali, tama eno te dwai sę meba me ebeo. Te tiali sę te odolali hagawaibao, agawe?

Godigo Nogi Ugwaba Sabo Tęąbi Po Wabo Buku Dabe 73:28

Tiali goli, ena, te ena nage pąde bidibaso, tama te wiegi yai mu ebao. God, Genuai Bidi, nago ena mu seselalubo da, tama eno nago yali sę po tigidali hanilama, pusainu ebo dao.

Aisaia 13:15

Tiali goli, mena bidi me boi bidi dabego touwali, teda augwaligo hwą bainatgo enama, isilaibao. Mu tama, te boi bidi dabego augwali bobobage hwągo elaibao.

Aisaia 29:13

Genuai Bidigo te po wali, “Te we bidi hani dabe augwaligo eno nogi augwaligo pedauwalidu naga ugwaba sabo dao. Tiali goli, augwaligo homu dali, homu kolesaga si enade digibulu mu elalubao. Augwaligo enaba mu lotu po wabo menio. Augwaligo te bidigo digi muai bomai po, te po naga augwali ola mani po, augwaligo te po naga wali pabo dao.

Aisaia 58:2

“Mu tama, te tigidali sogode augwa te enaba lotu wabo kolesaga eyu, te eno homu kolesaga osola sueinu yali. Te augwaligo enaba hanalu, te augwaliba doloba pai kolesaga yao weyu, te augwali pąde bidibaso, te augwali wiegi yai pemene yaibao wali. Tiali goli, te hani dabego tibo po mu wai. Augwaligo te eno bomo yai po tudiba munama, te augwa dwai kolesaga naga ebo sę yai dao.

Jeremaia 4:11

Te boi bidi dabe asobo sogo, Genuai Bidigo te Juda me Jerusalem we bidi dabeba te tiwai po mawaibao wali, “Te posolai wali dabe te tǫ wa pai bulu du dabede hogodaibao, tama wali te eno we bidi dabeba asaibao. Tialima, te wali asobo te dwai kolesaga sela sąwainogo naga me asobeo, te waligo te wit pobele bage hogomu sela sąbo tiwai me egobeo. Menio.

Jeremaia 4:14

Dage Jerusalem bage, mena sogo dagego te tobage dobo homu kolesaga tagalaibawe? Te dagego duga dwai kolesaga tigidali tagalama, te dage wiegi yai pedalubaso, teda Genuai Bidigo dage ma saibao.

Te We Bidi Dabego Jerusalem Hagede Gela Wali 3:57

Tama nage ena pageba aselama, tama nago enabolo “Wi igio,” po wai dao.

Esekiel 18:31

Magi baso dage Israel isainu ebawe? Te dagego ebo dwai kolesaga tigidali te dagego tagaliąo, te dagego poloba meda haliga elalubo kolesaga hasegelama, te dagego gesi noma haliga, me gesi noma mobo bidi sao.

Sekaraia 1:3

Tiali goli megi da, eno dagebolo e tama po e walobao, dage enaba geasa ma asiąo, tama eno dage tau sagasaibao.

Malakai 3:7

Dage te duga bulai wąį dabe te polobadu bidali tiwai tobage naga dao. Dagego eno bomai po tudiba munama, tama dagego wali pabeo. Tialima, te dagego dwai kolesaga tagalama, te enaba ma asobaso da, eno me eno te haliga sębę ebo tagalama, te dage ma saibao. Ena te Tigidali Bomo Elalubo Genuai Bidi, eno te po walio,” wali. “Dagego te po obao, ‘Dago mena sę elama, nageba ma asaibawe?’ te po wali.

Matyu 12:33

“Te wiegi yai nigo da, te nai me wiegi yai walaibao. Ma, te dwai nigo da, teda te nai me dwai walobo dao. Tama te bidi dabe augwaligo te nai bolo sulama, tama augwaligo koneaibao, te ni wiegi yai yaliwe ma dwai yaliwe naga osola subo dao.

Matyu 15:2

“Magi baso nage wali pabo bidi dabe augwaligo te wąį nǫų dabego dabolo mani kolesaga te augwaligo bolobawe? Te augwaligo nai tuainogo ebo sogo, augwaligo te augwa nogo ąį me telabo menio, te dena wąį dabego nogo ąį telabo gasagi yai sę ebo augwaligo wali pabo menio.” Te bagego te po hanalu wali.

Matyu 27:24

Tama megi da Pailatgo koneani, agai po usu ebeo. Menio. Tama wąbi genuai hwįainogo yai. Tama agai augwali ola momainogo agai wę te poude meba selama, tama aga nogo te we bidigo gedude wę telawai. Tama nogo wę teladubadi agai te po wai, “Te e bidi elibo da, te eno sęgę menio. Te duga sę naga dao.”

Godigo Sęba Tagala Palai Bidigo Po 15:9

Tama Godigo te Juda hani isąwai bidi hanibolo ebo sę te ebo kolesaga tiwai, agai da dali yali, polobadu. Tialima, augwaligo te Jisasba augwa homu mubo si, agai augwaligo dwai kolesaga yali sęgę sela sąwai dao.

2 Korin 7:1

Eno ama dede muo, dago te Godigo te da dali dąų wali po dabe tama salio. Tama tibaso, dago dena tigide me homu elalubo meda tigidali sela sąnama tama wiegi yai tedali bidinao. Tama dago Godide wi elama, tama wiegi yai doloba pai kolesaga mu naga sesemane sogo wali pinao.

2 Timoti 2:8

Tama eno homugo te tigidali bulu bidi dabe augwaligo gedu haluasa po omainogo homu ebao. Eno homugo augwali Godigo kolesaga naga wali pabo bidi dabe bidu, tama haliga sębę me wado po wabo tagaliyu, tama augwa nogo ugwaba siyu, te augwaligo gedu haluasa po omainogo ebo dao. Nago augwalibolo tama tiao po wao.

Hibru 10:22

Tama elalualigo da, teda da homu mu eyu, tama homu si me esiąyu dago Godiba konealubo po dąų mu olama, tama da aga pąba pinao. Agai dago yali dwai sę sęgę sela sąnama, tama dago homu wiegi yai ma ilali. Me agai dago tigi sese te wiegi yai ąįgo mu telawali.

Hibru 7:19

Te Godigo Mosesgo pedauwalidu mani bomo yai pogo te magi nai me deli te wiegi yai mu ilama sese me pedalubo usu ebeo. Tiali goli Godigo gasa tų me dayali, te wiegi yai elama tama te polobadu mani bomai po te aiyaba elaluai, tama da dwagi yai homu eyu, agai da dali yabo dwagi yai sę asobo sogo bugagia tonaluyu ebadi, te tųdu da te God pąba pomainogo tiai dao. Da polobadu dwagi yai homu eyu tonaluali kolesaga te gesi kolesagago aiyaba elalubo dao.

Jems 3:17

Tiali goli niwai bidi augwaligo te God pagedu asobo te wiegi yai homu kolesaga sabo bidi dabe augwaligo ebo kolesaga e dao: polasa mu, te augwaligo meda isiąwai wiegi yai homu kolesaga wali pabo dao. Tama te kolesaga me, te augwaligo gasa bidi dabe dali wiegi yai kolesaga eyu deli homu elama bidiyu, tama augwali dali homu nagame eyu, tama tiyu augwaligo gasa bidi dabego po wabo odobo dao. Tama augwaligo homu dene eyu, we bidi tau sabo wiegi yai kolesaga ebo dao. Tama tiyu, augwaligo deli homu tiwai naga tigidali we bidi dali ebo dao. Tama augwaligo ugwadu homugo naga augwaligo po wabo menio.

1 Pita 1:22

Te dagego Godigo wiegi yai mu po bugagia wali peyu tama duga homu kolesagade elaluali dwai kolesaga sela sąnama, tama dagego duga hasi we bidide dwagi yai homu ebo gagalali. Tama tiyu, megi dage bomo eyu, homu mu elaluyu duga hasi godolo mu yao.

1 Pita 3:21

Tama te ąį te augwaligo dage baptais mani ąį tiwai dao. Tama Jisas Krais aga te gų pagede ma hodalobaso, Godigo te baptais mani ąįgo dage tau siyu ma dobola sali. Te ąįgo te dagego tigide elalubo meda sela sąyu, tama dage tau siyu ma dobola sabo menio. Te meni. Te dagego te doloba pisiąwai sę idali weyu, tama dagego Godibolo te da tau sao po weyu, tama augwaligo dage baptais mawai dao. Tama te tiwai ebogo dage tau siyu ma dobola sabo dao.

1 Jon 3:3

Tama te augwali Krais tiwai pedalobo sogo bugagia tonaluyu bidibo we bidi tigidali, augwaligo magi sę isąyu dwagi yai naga tedali gagabo dao. Magi baso meni, augwaligo koneani, te Krais me aga magi dwai sę isąyu dwagi yai naga tedali bidibo dao.

1 Samuel 14:35

Tama Solgo te masigi te Genuai Bidigo alta tiwai ilama dąį ilali, te hasia sogo naga agai te alta nigibo sę yai.