Jems 3:5 - Godigo dwagi yai po buku

⁵ Te tiwai gilama, te da bidigo kele te dago tigide elalubo dwasianu nai dao. Tiali goli te kelego genuai po hauwa wabo dao, tama te wali pogo genuai sę ebo usu dao, te sę meba dwagi yai dao, meba dwai sę dao. Kone palao, te dwasianu sia dabogo te genuai sia mu deyu, tama te bulu tomode elalubo ni dabe tigidali te siago dainogo ebo te dagego konebo dao.

Jems 3:5 Iomraidhean Croise

Jopgo Po Asęani Elalubo Buku 22:17

Te bidi dabe augwaligo Godibolo e tama wali, ‘Nago da tagalama, naga pa,’ me ma augwaligo e tama wali, ‘God Tigidali Bomo Elalubo Bidigo dade magi sę mu ebo usugowe?’

Godigo Nogi Ugwaba Sabo Tęąbi Po Wabo Buku Dabe 10:3

Te dwai sę ebo bidigo te aga ebo dwai homu kolesagade hagoma homu eyu ebo dao. Tama te hauwa nai wei eyu, pesa ebo bidigo agai te Godiba dwai po weyu, tama aga tudiba mudu gebo dao.

Godigo Nogi Ugwaba Sabo Tęąbi Po Wabo Buku Dabe 17:10

Augwaligo gasa bidi dali homu dene eyu, olo me tau sabeo. Augwaligo genuai po dągą weyu, tama augwa nogi naga ugwaba sabo dao.

Godigo Nogi Ugwaba Sabo Tęąbi Po Wabo Buku Dabe 39:1

Eno po te tama wali, “Eno te ena ebo kolesaga tigidali te bugagia tonalueibao,” po wali. “Tiyu, te ena wali pode sęgę sidalio. Te dwai sę ebo bidi dabe ena pąde bidibo sogo da, teda eno po deli me wagobeo,” wali.

Ma Dobola Sali 15:9

“Te boi bidi dabe augwaligo te po wai, ‘Dago augwali pobelama, tama augwali dąų waibao. Tama dago augwaligo wiegi wiegi yai nai dena hanibolo dobola saibao. Tama tigidali nai dago sainogo yali nai te dago siyu naga yaibao. Tama dago augwali dali te poapi ge hwągo hwįnama, tama dena bomogo digi te dago augwali dolaibao.’”

Ma Dobola Sali 5:2

Tiali goli te tuni bidigo te po wai, “Genuai Bidi Yawe de dawe? Magi baso eno agai po odolama, te dage Israel hani pomainogo yaibawe? Eno te Genuai Bidi Yawe konebeo, tama tiyu, eno dage pagameo te po wagobeo,” wali.

Bugagia Bidibo Kolesagade Po Asęai Buku 12:18

Te bidi mego aga po homu kone palama, bugagia me wasiąbaso da, teda agai te subigila wabo pogo te gasa bidigo haligade te bainat hwągo enebo tiwai ebao. Tiali goli, te wiegi yai homu elalubo bidigo pogo te bidi tau sabo, te wiegi yai marasingo tau sabo tiwai gilama ebo dao.

Bugagia Bidibo Kolesagade Po Asęai Buku 15:2

Te wiegi yai homu kolesaga elalubo bidi agai po pusainu yali, agai te bidi dabego te wiegi yai homu wei ebo kolesaga konemainu homu ebo dao. Tiali goli, te wiegi yai homu elalusiąbo bidigo po pusubo sogo, agai pedauwalide te odolali po naga te ąį bole tulalubo tiwai ebo dao.

Bugagia Bidibo Kolesagade Po Asęai Buku 18:21

Te nago pogo bidi bugagia bidabo bomo elalubao. Me ma, nago pogo te bidi dolabo bomo me elalubao. Tama tiyu, nago wiegi yai po wabo kolesaga wei eyu da, te nage bugagia bidaibao.

Bugagia Bidibo Kolesagade Po Asęai Buku 26:20

Te augwaligo siaba te sia munama nogosiąbaso da, teda te sia disąma, sula saibao. Tama te tiwai me te bidi dabego te posobo po wasiąbaso da, teda te tigidali wado po wabo te sia saibao.

Jeremaia 18:18

Te we bidi dabego te tama po wali, “Tegobao, dago te Jeremaiabolo magi sę yabo sunumi gegeinao. Agai po te mu po me wabeo. Te pris dabego augwa bomo yai po dabolo pusubo sę me tagalogobeo. Te wiegi yai homu kolesaga me koneai bidi dabe, augwa wiegi yai po me tagalogobeo. Tama te profet dabego me, te augwa profet po pusubo sę me tagalogobeo. Tama tialima, dago te Jeremaiago poba olo me mugobeo. Menio. Dago aga po tų naga inao,” te po wali.

Esekiel 28:2

“Tǫde bidi, eno homugo nago Tair kingbolo ena God Genuai Bidigo eno po aga dali pusainogo ebo po pusigi pao. Eno po e dao. Tair king bidi, nago naga nogi ugwaba siyu, te po wali, nage god me deli dao, wali. Tama nago bulu te god dabego bulu yali gilama tamu ąį tomode elalubao. Mu tama, nago te po wali, tiali goli, nage god menio, nage olo bidi dao.

Esekiel 29:3

Nago te God Genuai Bidi eno po agabolo pusuyu, te po walao, ‘Isip king bidi, ena nago boi bidi pedalobao. Nage te pukpuk me genuai deli te Isip dabego wę dabede pila mubo tiwai dao. Nago te po wabo dao. Nago naga digi naga ma geselai dao olama, tama te ąį Nail te naga ąį dao wabo dao.

Daniel 3:15

Tialima, dagego te musik odobo sogo, dagego kidu sugunama, tama te piksaba lotu waiyąo. Tama dagego te tiwai isąbaso da, megi naga tama eno te bidi dabeba walama, tama augwaligo dage te genuai sia daboba sąmainogo yaibao. Tama dagego homugo te dage tau sabo god me deli elaluba homu eba, agawe?” kingo te po wai.

Daniel 4:30

Tama agai te tama po wali, “Iya, Babilon te genuai taun mu, tama te polalubo mu da. Te ena king bidi ede bidimainu eyu, te eno bomogo digi, eno te taun hodolali, te eno genuai bomo me genuai nogi te tigidali hani we bidiba ola mani dao,” kingo te po wai.

Jems 3:4

Tama dagego homugo te moni geba sip, tede me bilibo kone palao. Te moni geba sip te genuai nai mu dao, tama tiyu bomai waligo te sip selasa, te tamu ąįdu bilibo dao. Tama te sip tolasa bilibo nai te dwasianu nai mu dao. Tiali goli, te sip tolasa bilibo bidi agai homugo gasaba painogo da, te bidi agai te sip tolasa pabo nai teba begelama pabo dao.

2 Pita 2:18

We bidi meba augwali te Godigo po odisąwai bage tomode bidai digi, tama tamadi tama augwaligo te kolesaga ebo tagalali. Tama te we bidi dabebolo te tibo po ola mabo bage augwaligo te genuai po weyu, tama augwaligo te dwai kolesagade te po dwai dabe wabo dao. Augwaligo te homu begelai we bidi te homu hodolobo kolesaga eyu, te penani me te tigigo haniani dwai kolesagago augwali te dwai kolesagaba ma kekebo sę eyu tama augwali te kolesaga wali pabo dao.

Jutgo Asęani Pas 1:16

Te dage tomode bidibo tibo po ola mabo bidi dabe, augwali te tigidali pedalobo naide hagela homu eyu, tama sesemane sogo augwaligo gasa we bidide dwai homu naga ebo dao. Tama augwaligo tigigo ebo kolesaga hodolama, tama augwaligo te kolesaga naga wali pabo dao. Augwaligo genuai po weyu, tama augwa nogi augwaligo ugwaba sabo dao. Te gasa we bidi dabebolo augwaligo po mumubo po weyu, tama te bagego nai dabede pesą elama sabo dao.